Encyclopedia of Prophetic Hadiths

«Bonte se gen bon karaktè, epi peche a se sa kap trakase nan kè ou, epi ou pa ta renmen moun konnen li.»

Gen 4 defo si yon moun genyen yo nèt, li se yon vrè ipokrit. Epi si li gen yon sèl nan kalite sa yo nan li, sa vle di li gen yon tras (yon branch) nan ipokrizi nan li jiskaske li kite li: depi lap pale li bay manti, depil pwomèt li pa kenbe pawòl li, depil nan diskisyon (oswa an kòlè) li depase limit nan lenjistis (ak move pawòl), epi depi fè yon kontra (oswa yon sèman) li trayil.

« Lè Allah te fin kreye Paradi a ak Lanfè a, li te voye Jibril (lapè sou li) nan Paradi a. Li di li: "Ale wè li, epi gade sam prepare ladan li pou moun ki gen pou antre ladan li yo." Jibril ale, li gadel, li tounen epi li di: "Mwen sèman sou pouvwaw la! Pa gen yon moun kap tande pale de li kap rete san li pa antre ladan l." Lè sa a, Allah bay lòd pou yo antoure Paradi a ak difikilte (sa moun pa renmen fè), epi li dil: "Ale wè li ankò, epi gade sam prepare ladan li pou moun ki pou antre yo." Jibril ale, li gadel, epi li wè li antoure ak tout sa ki difisil, li di: "Mwen sèman sou pouvwa w la! Mwen pè pou pa gen pèsonn ki rive antre ladan li." Allah di li: "Ale gade Lanfè a, epi gade sam prepare ladan li pou moun ki pou antre ladan li yo." Jibril ale, li gadel, li wè kote flanm dife yo ap monte sou tèt youn lòt (youn ap vale lòt). Li tounen epi li di: "Mwen sèman sou pouvwaw la! Pa gen pèsonn kap antre ladan l." Lè sa a, Bondye bay lòd pou yo antoure Lanfè a ak tout kalite dezi (bagay ki atire moun). Epi li dil: "Tounen gade li." Jibril ale, li gadel, li wè li antoure ak tout kalite dezi, li tounen epi li di: "Mwen sèman sou pouvwaw la! Mwen pè pou pa gen pèsonn kap chape anba li, pou tout moun pa antre ladan l." »

Pwofèt la (ke lapè ak benediksyon Allah sou li) te pase bò kot 2 tonb, epi li te di: «Anverite, yap pini yo tou 2 epi se pa pou yon gwo zafè yap pini yo, kanta pou youn nan yo, li pat konn pwoteje tèt li kont pipi li, epi kanta pou lòt la, li te konn mache ap fè tripotay.» Aprèsa li te pran yon branch palmis frèch, li fann li an 2, epi li plante youn sou chak tonb. Yo te di: O Mesaje Allah, poukisa ou fè sa? Li te di: «Petèt sa ap soulaje yo toutan yo poko sèch.»

Mwen te tande Mesaje Allah a (se pou lapè ak benediksyon Allah sou li) ap di: «Allah, Sila a ki Beni epi ki Trè Wo a, di: O pitit Adan! Toutotan ou priyem epi ou mete espwa ou nan Mwen, Map padone ou pou kèlkeswa sa ou te fè, epi sa pa deranjem. O pitit Adan! Menmsi peche ou yo ta rive jouk nan nwaj syèl la, epi aprèsa ou mandem padon, Map padone ou, epi sa pa deranjem. O pitit Adan! Anverite, si ou ta vin jwenn Mwen ak yon kantite peche ki prèske plen tè a, epi aprèsa ou rankontre Mwen san ou pa asosye anyen avèk Mwen, Map vin jwenn ou ak menm kantite padon an.»

Mesaje Allah a, (lapè ak benediksyon Allah sou li), te resite vèsè sa a: « Se Li menm ki fè desann Liv la pou ou; gen ladan li vèsè ki klè, ki se fondasyon Liv la, epi gen lòt ki pa klè. Kanta moun ki gen devyasyon nan kè yo, yo swiv sa ki pa klè ladan li yo nan chèche kreye dezòd ak chèche entèprete yo (daprè sa yo vle). Pèsonn pa konnen entèpretasyon yo eksepte Allah Epi moun ki gen konesans ki byen chita yo di: "Nou kwè ladan li, tout soti nan men Seyè nou an." Epi se moun ki gen lespri yo sèlman ki kapab pran konsèy. » (Al-Imran: 7). Li te di: Mesaje Allah a, (lapè ak benediksyon Allah sou li), te di: « Lèw wè moun kap swiv sa ki pa klè ladan li yo, yo se moun sa yo Allah te nonmen yo, donk pran prekosyon avèk yo. »

«Jou Jijman an pap rive jouk yon moun pase bò tonb yon lòt moun epi li di: Mwen ta swete se mwen ki te nan plas li.»

Dife nou an se yon pati nan swasanndis pati dife Lanfè a." Yo dil: "O Mesaje Allah! Si se te jis sa a, li tap sifi." Li reponn: "Li depase yo pa swasant-nèf pati, chak nan yo gen menm chalè ak li."