الوَاقِعة

Igihe umuhero w’isi wabaye;

Ukuba kwawo, nta n’umwe ashobora kuguhakana;

Uzota abansi b’Imana Allah mu muriro, uduze abatoni bayo mu Bwami bw’ijuru.

Igihe isi yagigimye nya kugigima;

Imisozi na yo ikavungagurika nya kuvungagurika;

Igacika intumo itumurwa n’umuyaga mu kirere;

Maze na mwe ibiremwa mukagaburwa mu migwi itatu;

Umugwi w’abantu b’iburyo. Ese icokwereka icubahiro cabo n’indishi bagenewe!

Umugwi w’abantu b’ibubamfu. Ese icokwereka amagorwa bagowe n’ibihano bibarindiriye!

Hamwe rero n’umugwi w’abahurumbira gukora ivyiza kw’isi, bazotanga abandi mu vyubahiro vyo mu buzima bw’inyuma yo gupfa;

Aba rero, ni bo bazoba batonye hambavu y’Imana Allah;

Ikazobinjiza mu Bwami bw’ijuru bwuzuye inema.

Hazokwinjira muri Bwo, umugwi munini w’abantu bo mu binjana vya mbere mu barungikiwe Intumwa Muhamadi (nyakugira amahoro n’impuhwe z’Imana Allah) hamwe n’abandi bantu bo kuva ku gihe ca Adamu;

Hamwe rero n’umugwi w’abantu bake mu bakurikiye mu nyuma gushika ku musi w’iherezo1;

Bazoba bicaye ku bitanda bisharijwe n’inzahabu;

Bavyegamiyeko, bicaye barabana;

Bazoba bakikujwe n’imisore myiza, ikurakuranwa mu kubazimana, iri mu runganwe rumwe, idasaza, itigera ipfa;

Ibahereza ibinyobwa mu bikombe n’amabirika, maze bahabwe n’akarahuri k’inzoga zenzwe mu mazi y’imbizi itemba mu Bwami bw’ijuru;

Ntibazosoma nya karahuri ngo bameneke umutwe, eka ntibazonaborerwa ngo umutwe uyayuke, batangure kudedemba bavuga ayamuhe;

Ibahereza n’ivyamwa bo bonyene bihitiyemwo;

Hamwe n’inyama z’inyoni bo bonyene bipfuza;

Bazoba bafiseyo n’abakenyezi bo mu Bwami bw’ijuru barangwa n’ubwiza bw’akataraboneka (Hururayini);

Ku bwiza bwa nya bakenyezi, wogira ngo ni lulu2 zikiri aho zaremewe, zitarakorwako n’iminwe y’abantu;

Iyo ni yo mpembo yabo ku vyo bari barakoze kw’isi.

Muri nya Bwami, ntibazokwumva amajambo y’ikinyoma canke ay’imburakimazi;

Kiretse gusa ijambo riroranye ryeza umutima, n’iryo kuramukanya amahoro.

Abantu b’iburyo. Ese icokwereka icubahiro cabo n’indishi bagenewe!

Bazoba bari ahantu hari igiti ca Sidri kitagira amahwa;

N’ibitoki vy’imihanyu igerekeranye;

Bari mu gatutu kamaho, katigera karenga;

Hari n’amazi atemba, atigera akama;

N’ivyamwa vy’ubwoko bwinshi vy’urutavanako;

Bitigera bihundura, ata n’ikibabuza kuvyamura borohewe;

Bazoba bicaye ku bisaswa bishashe neza ku bitanda.

Mu vy’ukuri Twebwe Allah, Tuzoha abagore bo mu Bwami bw’ijuru indemo nshasha itandukanye kure cane n’iyo n’ukuntu bari bararemwe kw’isi;

Maze Tubagire amasugi;

Yikundwakaza ku bagabo bayo, akaba no mu runganwe rumwe;

Tukazobaremera bushasha abantu b’iburyo;

Ari na bo bagize umugwi w’abantu benshi b’imbere y’irungikwa ry’Intumwa Muhamadi (nyakugira amahoro n’impuhwe z’Imana Allah);

Hamwe rero n’umugwi w’abantu benshi bakurikiye mu nyuma gushika ku musi w’iherezo.

Umugwi w’abantu b’ibubamfu. Ese icokwereka amagorwa bagowe n’ibihano bibarindiriye!

Bazoba bari mu bihano vy’umwokero w’umuriro wa Jahannamu bahezagurika, bahemburwa n’amazi yasebuye akaryimara, acagagura amara;

Bari mu gatutu k’umwotsi wa Jahannamu;

Si ahantu harangwa n’akayaga wokwipfuza gushikira; si n’ahantu hubashwe wokwipfuza kuraba ibihabera;

Mu vy’ukuri n’imbere y’aho bakiri kw’isi, bararyoherwa n’ibizira mu bihendamaso vyayo, bakirengagiza ukuri bazaniwe n’Intumwa z’Imana Allah;

Baranatsimbatara kw’igarariza n’ibangikanyamana, batiyumvira kwigaya;

Bahora bavuga mu guhakana izurwa ry’ibiremwa, bati: “Mbega burya, nitwapfa tugacika ivu n’amagufa yaboze mu kuzimu, tuzoheza dusubizwe ubuzima tuzuke koko!

Burya, tuzozuka twebwe hamwe n’abavyeyi bacu bapfuye kera bagacika ivu!”.

Ntumwa y’Imana! Bakurire inkoni ku gishitsi, maze ubishure uti: “Mu vy’ukuri, abapfuye kera hamwe n’abazopfa mu nyuma muri Bene Adamu;

Ni ukuri bose bazozuka, maze begeranirizwe hamwe ku musi nyezina w’izuka”.

Hanyuma rero ga bantu bahuvye inzira y’ukuri, bagahakana bivuye inyuma isezerano ry’Imana Allah;

Ni ukuri, muzorya ku giti Zaqquumu kiri mu nyenga y’umuriro;

Maze ku kwicwa n’inzara, muzokiryako ku kwuzuza inda;

Muheze mushozeko n’amazi yasebuye akaryimara;

Muzoyanywa kenshi atabavuna akanyota, nka kurya kw’ingamiya inywa ntihere inyota ku burwayi;

Ivyo bihano bateguriwe rero, ni yo nduhuro yabo ku musi w’iharurirwa n’impera.

Bantu! Twebwe Allah, Twabaremye ata co mwari muri, Tubarema mu busa. Ubwo none, ntimwokwemera ko Dushoboye no kubazura inyuma yo gupfa!

Mbega ntimuraba ngo mubone intanga musesera mu gitereko c’abagore banyu;

Ni mwebwe muheza mukaziremamwo umuntu, canke ni Twebwe Turema!

Twebwe Allah, umwe wese muri mwebwe, Twaramugeneye isango ryiwe ryo gupfa, ntitwonanirwa rero;

Kubarema ukundi ku musi w’izuka, maze Tukabarema ukuntu mutazi;

Ni ukuri, mwaramenye ko Imana Allah Yabaremye iremwa rya mbere ata co mwari muri. Ubwo none, ntimwokwibuka ko Ishoboye no kubarema bushasha!

Mbega murabona ivyo muteragira mu kurima!

Ni mwebwe mubinagisha bikagondora biva mu kuzimu, canke ni Twebwe Tubinagisha bikamera!

Iyo Dushaka rero, Twari kugira ivyo mwateragiye bigacika ubusize, maze mugasigara mwipfumbereje, mukumirwa muravye ivyashikiye ibiterwa vyanyu;

Mukavuga muti: “Mu vy’ukuri, turaguye mu gahombo katagira izina;

Ahubwo mbere turabuze n’icotubeshaho!”.

Mbega, ntimuraba ngo mubone amazi munywa kugira mubeho!

Ni mwebwe muyamanura mu bicu maze hakagwa imvura kw’isi, canke ni Twebwe Allah Dutuma imvura igwa ku mpuhwe zacu!

Iyo Dushaka rero, Twari kuyagira amazi y’icunyunyu ku buryo mudashobora kuyakoresha mu kunywa no mu kuvomera ibiterwa vyanyu. Ubwo none, ntimwoshimira Imana Allah ku nema yo kuronswa amazi y’akanovera!

Mbega ntimuraba ngo mubone umucanwa mucana!

Ni mwebwe mwaremye igiti cawo, canke ni Twebwe Allah Twakiremye!

Twebwe Allah, Twabagiriye umucanwa kugira ubabere inkebuzo ibibutsa umuriro wa Jahannamu, no kugira ubere kirumara abari ku rugendo.

Muvugishwamana! Ninahaza izina ry’Imana yawe Rurema Allah ku mazina yayo no ku matazirano yayo, Nyenicubahirogisumbavyose.

Jewe Allah, Ndarahiye ku bituro inyenyeri zirengerako mu kirere!

Iyo rero mu vy’ukuri, ni indahiro koko iyo mumenya uburemere bwayo buhambaye;

Mu vy’ukuri, iyi Qor’ani yahishuriwe Muhamadi (nyakugira amahoro n’impuhwe z’Imana Allah), ni Qor’ani yubashwe, irimwo ubumenyi n’ivyiza vyinshi;

Yanditswe mu Gitabu gicungerewe n’abamalayika ku Mana Allah, ahatabonwa n’ibiremwa;

Nta n’uwugikorako, kiretse abamalayika bubashwe bejejwe ivyaha. Eka mbere nta n’uwugikorako mu biremwa, kiretse abejejwe ibangikanyamana n'ibihumanya bituma umuntu yiyuhagira agatunganya n’isuku ryo gusenga.

Iyi Qor’ani, yamanuwe ivuye ku Mana Rurema Allah Yaremye ibiremwa vyose.

Mbega none ga babangikanyamana, ni iyi Qor’ani muhakana mwivuye inyuma!

Maze mukagira ishimwa ry’inema z’Imana Allah, rikaba uguhakana mwivuye inyuma!

Mbega burya igihe umuntu yoba ari ku mpfiro, umutima ugeze mu muhogo agira acikane;

Na mwe mukaba ari ho mwibereye muraba ukuntu asambagirika, mwoshobora gutuma adacikana! Muranguha.

Kandi rero muri ico gihe, Twebwe Allah Tubicishije ku bamalayika, Tuba Turi hafi yiwe cane kurusha uko mumwegereye, ariko rero mwebwe ntimubabona.

Mbega nimwaba mutazoharurirwa ngo muhemberwe ivyo mwakoze;

Murashobora gusubiza mu mubiri w’uwapfuye, inkomoko y’ubuzima “Roho” maze akaba muzima nimwaba muri imvugakuri! Muranguha.

Uwapfuye rero, iyo ari uwo mu bantu bahurumbira gukora ivyiza, batonye ku Mana Allah;

Igihe co gucikana, aba ari mu mpuhwe z’Imana Allah hamwe n’umunezero nta ngere; akazohabwa n’Ubwami bw’ijuru bwuzuye inema.

Iyo uwupfuye, ari uwo mu bantu b’iburyo naho;

Mu gihe co gucikana abwirwa ati: “Urakagira iteka n’itekane kuba uri mu bantu b’iburyo”.

Iyo uwupfuye, ari mu bahakana bivuye inyuma izurwa ry’ibiremwa, bahuvye inzira y’ukuri;

Azokwakirwa mu muriro wa Jahannamu, aheze azimanwe amazi yasebuye akaryimara;

Maze yinjizwe mu muriro ururumba, aheze awote.

Ntumwa y’Imana! Ibi Tukwiganiye, ni kwo kuri koko kudahinyuzwa.

Muvugishwamana! Ninahaza izina ry’Imana yawe Rurema Allah ku mazina yayo no ku matazirano yayo, Nyenicubahirogisumbavyose.