الوَاقِعة

Amayka nakawma su gay a mawli.

Na dala den kanu kawma nin i sakataw bu a makandalbut.

Igkababan nu kaped, igkapulu nu ped.

Amayka kumegkal den su lupa sa mapasang.

Endu malupet menem su manga palaw.

Makailing sa bumbul a pakabayug sa makabpayapat.

Endu ma-aden kanu (lu sa gay a mawli) sa telu lumpuk.

Su manga taw a tampal sa kawanan su kitab nin na mapya i bagi nin.

Su manga taw a tampal menem sa biwang su kitab nin na mawag i bagi nin.

Endu su manga taw menem a nawna (nangimbenal) na mawna bun silan (kaludep sa surga).

Entu ba i nakasupeg kanu Kadenan nilan.

Lu silan sa surga a sangat i kapya nin.

Madakel kanu nangawna (nakebpun sa nangawna a nangimbenal).

Endu su paydu menem kanu mawli sa kanilan (i nakebpun bun kanu nangawna).

Lu silan kanu manga kantil (katri) a pedsimbulan sa bulawan a pilak.

Pedsandeng silan sa mamagidsaya.

Pembalibeten silan nu manga wata sa dala kalyu nilan (sa surga).

Manga tagayan endu kendi endu manga basu a manga mapya i nanam nin.

Di silan malangut atawaka mabeleg.

Endu su unga na manga kayu na endaw i kyugan nilan.

Endu sapu na papanuk endaw i pegkyugan nilan.

Endu manga babay a tanan manga manisan.

Mana den silan a manga muntya a pegkendap-kendap.

Inibalas sa kanilan sabap kanu galebekan nilan a mapya.

Dala makineg nilan a mawag a kadtalu atawaka makasakit sa ginawa.

Ya tabya na kadtalu a suti.

Endu su manga taw a tampal sa kawanan na ngin den (a kapya) i tampal silan sa kawanan.

Sya silan kanu atag nu kayu a matilak.

Endu saging a taman sa pulu na minunga.

Endu gasilungan a tatap.

Endu ig a pedtuga a dili gapinda.

Endu manga unga na kayu a madakel.

Dala den madtalu a timpu nin (bagunga den sa layab) endu di gaibpedan.

Endu igan a mapulu.

Saben-sabenal na binaluy nami pan sa kanilan i manga bidadari sa kinabaluy a mapya.

Binaluy nami silan a manga laga.

Manga mapya i palas nin a mamagidsan sa umur.

Kanu manga taw a tampal sa kawanan.

Madakel kanu nangawna.

Endu madakel bun mambu kanu mawli sa kanilan (i nakebpun bun kanu nangawna).

Su manga taw a tampal sa biwang na entayn i manga taw a tampal sa biwang?

Lu silan sa apuy a mayaw, sa gasugat bun silan a sambel a apuy.

Endu pedsilung silan na galutu na mayaw bun silan.

Di kena matenggaw, endu di kena pakapiya sa ginawa.

Saben-sabenal silan na pegkakalini bun silan (sya sa dunya sa dala simba).

Endu ya nilan pinapapameday (pinapanalus) na kadusan a masla.

Endu ya nilan kadtalu: u minatay tanu na mabaluy tanu a lupa, nalupet su tulan tanu, na makambuwat tanu pan?

Apya su manga lukes tanu a nangawna?

Edtalu ka (Muhammad) sa kanilan i saben-sabenal a iganat kanu nangawna endu su nangawli.

Na mabulig kanu bun tanan kanu gay a kagkukum.

Mawli na sekanu a nangatadin a napandalbut.

Na ya nu makan na zaqqum (di mawta endu di malamed).

Mapenu su manga tiyan nu sa apuy.

Endu ya nu mainem na sangat i kayaw nin.

Mana den kabpaginem na unta.

Namba i katumpan nilan kanu gay a mawli.

Sekami na binaluy nami sekanu na ya mapya na pangimbenal kanu.

Ngintu gailay nu su mani a papedtugan nu? (kanu manga babay).

Ngintu sekanu i minaluy lun, atawaka sekami i minaluy lun?

Sekami na inukul nami sa lekanu su kapatay na dala makawngen sa lekami.

Sambyan nami sekanu, endu pembaluyn nami sekanu a mana ubal.

Endu saben-sabenal a natawan nu su kinapangengetu nu paganay, na namba ka ma-indaw kanu.

Nailay nu su langun nu ibamula nu?

Ngintu sekanu i bamula atawaka sekami ba i bamula lun?

Upama ka ya nami bu pigkahanda i baluyn nami a dala mawnga nin atawaka nagangu na makadsendit kanu, endu magayp kanu.

(Madtalu nu): saben-sabenal na nalapis tanu.

Taman sa ya nu madtalu na da den rizki tanu.

Nailay nu bun su ig a baginumen nu?

Ngintu sekanu i papedtulun (sa ig) ebpun kanu dadtem, atawaka sekami (Allah) i papedtulun kanu ulan.

Upama pigkahanda nami bu na baluyn nami a matimus, na dayt sa lekanu na edsukur kanu (sa Allah).

Nailay nu bun su apuy a papembuwaten kanu mailaw a kayu?

Ngintu sekanu i napambwat kanu kayu nin atawaka sekami bun i napambwat lun?

Sekami na binaluy nami i langun na namba a maka-indaw sa lekanu, endu mabaluy a lutuwan nu belalakaw sa mawatan.

Tasbih ka (Muhammad) kanu ngala nu Kadenan nengka a masla.

(Saksi su Allah) idsapa ku su pedsedepan nu manga bitun.

Endu saben-sabenal a idsapa ku (Allah) sa umana bu ka katawan nu na sangat a masla.

Saben-sabenal su Qur’an na mapulu.

Lu kanu kitab a naparihala.

Dala makakembil lun ya tabya na suti.

Initulun ebpun kanu Kadenan nu manga dunya.

Namba i kitab anan a ipendalay nu bu.

Endu pembaluyn nu i rizki nu (a ipedsupak) endu papendalbut kanu.

Amayka makawma den su nyawa kanu bakelengan (kanu kapatay).

Endu sekanu na mailay nu den su papendalbuten nu.

Endu sekami (Allah) i masiken pan gayd sa lekanu, ugayd na di nu gailay.

(Ngintu ka da nu pan enggula) amayka sekanu na maka-amung kanu bun sa siksa?

Imbalingan nu (su nyawa lu kanu lawas nin) amayka sekanu i benal i kadtalu nin.

Amayka su taw (minatay) na kuyug kanu manga masupeg kanu Allah.

(Lekanin) su katana endu rizki a mapya endu surga a sangat i kapya nin.

Endu amayka kuyug menem (su minatay) kanu tampal sa kawanan.

Su sagyahatra den i leka, ebpun kanu manga taw a tampal sa kawanan.

Endu amayka su napandalbut menem a nangatading pan.

Ya nilan katumpan na su sangat i kayaw nin a pakalesu a pakagepul.

Endu gapagyaw den sa naraka jaheem.

Benal a namba i saben-sabenal a bantang a di makapandalbut.

Tasbih ka (Muhammad) kanu ngala nu kadenan nengka a masla.