مطوية الحج
د سعودي عربستان شاهي مملکت
د سعودي عربستان شاهي مملکت
داسلامی چارو، دعوت او ارشاد وزارت
د حج اعمال
د عالیقدر شيخ:
محمد بن صالح العثیمین لیکنه
رحمه الله
د لومړۍ ورځې عمل چې هغه اتمه ورځ ده
۱- (هغه څوک چې په مکه او د هغې په شاوخوا کې استوګن وي) له خپل ځای څخه به د حج لپاره احرام تړي، غسل به کوي، خوشبويي به کاروي، د احرام جامې به اغوندي، او داسې به وايي:
«اې الله! ستا لپاره حج کولو ته حاضر یم، اي لويه ربه زه تا ته حاضر يم، زه حاضر یم تا لره هېڅ شریک نشته، یقینا چې ټول تعریفونه او نعمتونه تا لره دي، او پاچاهي تا لره ده، تا لره هېڅ شریک نشته». او هغه څوک چې په همدې ورځ مکې ته راځي او د میقاتونو له هاخوا څخه را روان وي، نو له میقاته دې بې احرامه نه تېریږي. ۲- منا ته به ځي او د نهمې ورځې تر لمر خاته پورې به هلته پاتې کیږي، او هلته د اتمې ورځې د ماسپښین، مازدیګر، ماښام، ماخوستن، او د نهمې ورځې د سهار لمونځونه ادا کوي؛ هر لمونځ به په خپل وخت کوي او څلور رکعتي لمونځونه به قصر کوي.
د دويمې ورځې کار چې هغه نهمه ورځ ده
۱- د لمر له راختلو وروسته به عرفې ته روانېږي، او د ماسپښین او مازدیګر لمونځونه به قصر او د ماسپښین په وخت کې یو ځای ادا کوي، او - که ممکن و - کله چې ورسېږي، نو د زوال نه مخکې به په نمره کې پاتې کیږي.
۲- د لمانځه پسې د ذکر او دعا لپاره ځان فارغوي، او د لمر تر پرېوتو پورې قبلې ته مخ کوي او لاسونه پورته کوي.
۳- د لمر له پرېوتو وروسته مزدلفې ته ځي، هلته د ماښام لمونځ درې او د ماخوستن لمونځ دوه رکعته ادا کوي، او تر سهار راختلو پورې به په کې شپه تېروي.
۴- د سهار لمونځ به د سهار له راختلو وروسته ادا کوي، بيا به تر هغه وخته ذکر او دعا کوي چې ښه رڼا شي.
۵- د لمر له راختلو مخکې به منا ته روانیږي.
د درېمې ورځې کار (د اختر ورځ)
۱- کله چې منا ته ورسېږي، د عقبې جمره به په اووه کاڼو پرله پسې ولي، او له هر کاڼي سره به الله اکبر وایي.
۲ - که قرباني ولري، نو هغه به حلالوي.
۳- خپل سر دې وخروي یا دې لنډ کړي، او په دې سره لومړی تحلل ترسره کېږي؛ خپلې جامې دې واغوندي، خوشبويي دې استعمال کړي نو د احرام ټول ممنوعات ورته روا کیږي، پرته له دې چې خپلې مېرمنې ته نږدې شي.
۴- مکې ته به ځي او د افاضې طواف به کوي، چې د حج طواف دی، او د حج لپاره د صفا او مروه ترمنځ به سعي کوي، که چېرې متمتع و، او یا که متمتع نه و خو د قدوم له طواف سره يې سعي نه وه کړې.
په دې سره ورته دویم تحلل حاصلیږي، او د احرام ټول حرام شوي کارونه ورته حلالېږي، ان تر دې چې خپلې مېرمنې ته هم نږدې کېدلی شي.
۵- منا ته به ورګرځي او هلته به د يوولسمې شپه تېروي.
د څلورمې ورځې کار چې یوولسمه ورځ ده
۱- درې واړه جمرې، لومړۍ بیا منځنۍ او بیا د عقبې جمره، هره یوه به په اوو پرله پسې تیږو ولي، او له هرې تیږې سره به الله اکبر وايي. دا جمرې به له زوال څخه وروسته ولي، او له هغه څخه مخکې یې ویشتل جواز نه لري، او د لومړۍ او منځنۍ جمرې وروسته به د دعا لپاره ودرېږي.
۲- په مِنَا کې د دوولسمې شپه تېرول.
د پنځمې ورځې کار چې هغه دولسمه ورځ ده
۱- درې واړه جمرې به ولي، لکه څنګه چې یې په څلورمه ورځ ویشتلي وې.
۲- که د تلوار کولو اراده ولري نو له منا څخه به د لمر ډوبېدو نه مخکې روانیږي، او که د ځنډېدو اراده ولري نو شپه به په کې تېروي.
د شپږمې ورځې کار چې دیارلسمه ورځ ده
دغه ورځ د هغه چا لپاره خاصه ده چې تاخیر کوي او په دې کې دا کارونه کوي:
۱- درې واړه جمرې دې د مخکنیو دوو ورځو په څېر وولي.
۲- له هغه وروسته به له منا څخه کوچ کوي.
او وروستی عمل به یې د سفر پر مهال طواف الوداع وي، والله أعلم.