القِيَامة

Idsapa ku kanu gay a katindeg (nu manga namamatay).

Endu idsapa ku sa Allah su nafsu a mategel mamulegis.

Ngintu antapan a manusya i di nami limuden su tulan nin?

Kena, ka magaga nami mapa-ulit su manga kemel nin.

Na ya kyug nu manga manusya na kendupang ka edtawbat bu.

Idsa nin u kanu i kawma na gay a mawli?

Amayka lemansi su mata sa kapangingilay.

Endu amayka mawa den su sigay nu ulan-uan.

Endu makadtimwa su senang kanu ulan-ulan.

Na madtalu nu manusya endaw den i kapalaguyan?

Inunta na da den kalindungan.

Lu kanu Kadenan nengka i kadtakenan.

Balasan su manusya sa nawli nawna a galebek nin.

Endu su manusya na katawan nin i ginawa nin.

Apya ngin i dawa nin (di den makadawa).

Da ka pedsalengan pembatya (su ayatan/wahi) sabap sa bamagayas ka.

Ka buligen nami bun sa pusung nengka (sa kalangag lun) endu kabatya lun.

Amayka binatya nami entuba i unuti ka.

Mawli na ipayag nami bun sa leka.

Kena, ka ya nu bun kalinyan su malegan sa dunya.

Endu ipedtagak nu su akhirat.

Endu su manga biyas na egkagalaw (namba su manga bamaginugut).

Lu den bagilay kanu Kadenan nin.

(Aden menem) manga biyas a manga maytem (namba su manga kafir).

Napasad kanu ginawa nin i pakaydan sa lekanin a mapasang.

Kena, ka amayka sundulan den (sakratal mawt)

(Na ya madtalu): entayn i tumuganul kanu nyawa nin atawaka gumamut.

Endu natagu den sa ginawa nin su kabpitas.

Endu makadtinggumaya su mapasang sa dunya endu su mapasang sa akhirat.

Ka lu den mabulig kanu kadenan nengka.

(Su kafir) na dala pangimbenal sa mapayag masulen endu di edsambayang.

Ugayd na napandalbut, endu minenda sa katalima sa Islam.

Mawli na lu mibpawang sekanin sa pamilya nin sa masandag.

Nakaduwan-duwan ka den, tidtu den a nakaduwan-duwan ka den.

Mawli na nakaduwan-duwan kaden, tidtu den a nakaduwan-duwan ka den.

Ngintu antapen a manusya i pasagaden sekanin sa di makambuwat sa gay a mawli?

Kena ba binaluy nami sekanin a ganat sa sadtak a similya a pagundas?

Mawli na nabaluy a sapu binaluy nu Allah sa pinabpalas nin.

Lu nin ba binaluy sa babay-mama.

Su Allah na ya nin pan di magaga i kapanguyagan kanu minatay.