المُدثر

Hay seka a midtanggub.

Tindeg ka, ipanginggilek nengka su naraka.

Endu su Kadenan nengka i pakasela ka.

Endu suti ka su balegkas nengka.

Endu tangkay ka su sakutu.

Endu da ka menggay sa kyug na madakel i makwa nengka.

Endu sabar ka kanu Kadenan nengka.

Amayka yupen su sanggakala.

Na entuba a gay a mapasang.

Kanu manga kafir na di silan kalemwan.

Pasagadi aku endu su binaluy ku sa saki bu.

Endu inenggan ku pan sa tamuk a madakel.

Endu manga wata pedtalabuk sa gabuligan.

Endu binelat ku sa lekanin su mawlad a kapaguyag.

Mawli na edsinganinin pamun sa umanan ku.

Di, ka nan a mama na sinangka nin su ayatan ku.

Di ebplis na tegelen ku lu kanu siksa a mapasang.

Namikir u ngin i edtalun nin (Qur’an).

Na namulkan sekanin sa apya ngin i pamikiran nin.

Mawli na namulkan sekanin sa apya ngin i pamikiran nin.

Mawli na inilay nin su manga taw nin.

Mawli na nalibedteng endu nabensi.

Mawli na timaligkud, endu mimamasela.

Ya nin pidtalu na su Qur’an na sih’r nakabpun kanu mategel sa sih’r.

Da (Qur’an) ugayd na kadtalu na manusya.

Paludepen ku sa naraka.

Di nengka katawan u ngin i pidtalu a saqar.

Da ipedsama nin endu da ipedtagak nin.

Pedtutung sa upis na manusya.

Aden sapulu endu syaw (malaikat).

Endu da binaluy nami a pedtuganul sa naraka a di kena malaikat, endu da kinabaluy nami sa bilangan nilan ya tabya na fitna kanu manga kafir, ka endu matagu sa ginawa nu manga taw a aden kitab nin (Yahudi-Nasrani), endu kawmanan menem sa inugut nu manga bamaginugut, na di makanduwa-duwa su manga taw a aden kitab nin endu su manga bamaginugut, endu madtalu nu manga munafiq endu su manga kafir u ngin i kahanda nu Kadenan sa namba a upaman? Mamba i kapedtading kanu kaped kanu manga taw endu kapedkatutulu kanu kaped, na dala sa kanu sundalu nu Kadenan nengka i mataw lun, ya tabya na sekanin (Allah) endu langun na nya ba na indawan sa maunsya.

Di kena, saki (Allah) idsapa ku su ulan-ulan.

Endu idsapa ku su magabi amayka egkapita.

Endu idsapa ku su subbuh amayka egkapita.

Na saben-sabenal su naraka na isa kanu masla a gatala.

Ipagkagilek sa manusya.

Kanu pegkyug sa lekanu atawaka su di pegkyug.

Uman isa na deketan nu galebek nin a kasiksan.

Ya tabya na su manga taw a tampal sa kawanan.

Ka lu silan sa surga mamagidsaya.

Kanu manga taw a dupang (lu sa dunya).

(Idsa nu malaikat): nginan ka nakaludep kanu sa naraka a saqar?

Ya nilan kadtalu: da kami makadsamabayang.

Endu da kami makapakan sa miskinan.

Endu imbityala kami sa di nami katawan.

Endu papendalbuten nami su gay a mawli.

Taman sa nawma kami na kapatay.

Na da makangguna sa kanilan su kadtabang nu banabang.

Ngintu ka embalawagan nilan su indawan.

Mana den silan himar a nalalaguy.

Sa nailay nin su alimaw a pakakayd lun.

Inunta na uman isa sa kanilan na ka-enggan sa kitab sa mana su kina-enggay kanu rasul.

Di kena, ka di nilan ipegkagilek su akhirat.

Inunta na su Qur’an na indawan.

Entayn i pegkyug (sa surga) na tademan nin.

Endu dala bun katademan nilan ya tabya na su kahanda nu Allah ka sekanin i wagib a ikagilek endu sekanin i kigkuwan sa ampun.