ನಿಮ್ಮಲ್ಲಿ ಯಾರೂ ಕೂಡ ಒಂದೇ ವಸ್ತ್ರದಲ್ಲಿ ತಮ್ಮ ಭುಜಗಳ ಮೇಲೆ ಏನೂ ಇಲ್ಲದೆ ನಮಾಝ್ ಮಾಡಬಾರದು

ಈ ಹದೀಸನ್ನು ವಿವರಿಸುತ್ತಾ ನವವಿ ಹೇಳಿದರು: "ಈ ನಿಷೇಧದಲ್ಲಿರುವ ವಿವೇಕವೇನೆಂದರೆ, ಒಬ್ಬ ವ್ಯಕ್ತಿಯು ವಸ್ತ್ರವನ್ನು ಸೊಂಟಕ್ಕೆ ಸುತ್ತಿಕೊಂಡರೆ ಮತ್ತು ಭುಜಗಳ ಮೇಲೆ ಅದರ ಒಂದು ಭಾಗವು ಇಲ್ಲದಿದ್ದರೆ, ಅವನ ಔರತ್ (ಮುಚ್ಚಬೇಕಾದ ಖಾಸಗಿ ಭಾಗಗಳು) ಬಹಿರಂಗಗೊಳ್ಳುವ ಅಪಾಯವಿದೆ. ಭುಜದ ಮೇಲೆ ಅದರ ಒಂದು ಭಾಗವನ್ನು ಹಾಕಿದರೆ ಆ ಅಪಾಯವಿರುವುದಿಲ್ಲ. ಮಾತ್ರವಲ್ಲ, ಅವನು ಅದನ್ನು ತನ್ನ ಕೈಯಿಂದ ಅಥವಾ ಕೈಗಳಿಂದ ಹಿಡಿದಿಟ್ಟುಕೊಳ್ಳಬೇಕಾಗಬಹುದು ಮತ್ತು ಅದರಲ್ಲಿ ನಿರತನಾಗಿಬಿಡಬಹುದು. ಇದರಿಂದ ಅವನಿಗೆ ತನ್ನ ಬಲಗೈಯನ್ನು ಎಡಗೈಯ ಮೇಲೆ ಎದೆಯ ಕೆಳಗೆ ಇಟ್ಟುಕೊಳ್ಳುವ ಸುನ್ನತ್, ಎಲ್ಲೆಲ್ಲಿ ಕೈ ಎತ್ತಬೇಕೋ ಅಲ್ಲಿ ಕೈ ಎತ್ತುವ ಸುನ್ನತ್ ಹಾಗೂ ಇತರ ಸುನ್ನತ್‌ಗಳು ನಷ್ಟವಾಗಬಹುದು. ಅಷ್ಟೇ ಅಲ್ಲದೆ, ಇದರಿಂದ ದೇಹದ ಮೇಲ್ಭಾಗ ಮತ್ತು ಅಲಂಕಾರದ ಸ್ಥಳವನ್ನು ಮುಚ್ಚದೆ ಬಿಡುವ ಸಂಭವವಿದೆ. ಸರ್ವಶಕ್ತನಾದ ಅಲ್ಲಾಹು ಹೇಳುತ್ತಾನೆ: "ಪ್ರತಿ ಮಸೀದಿಗಳಲ್ಲಿಯೂ ನಿಮ್ಮ ಅಲಂಕಾರವನ್ನು ಸ್ವೀಕರಿಸಿಕೊಳ್ಳಿ." [ಅಅ್‌ರಾಫ್:31]