اللَّيل

Idsapa ku kanu magabi amayka egkalibuteng.

Idsapa ku kanu malamag amayka egkaliwanag.

Idsapa ku kanu namaluy sa mama endu babay.

Saben-sabenal na langun u galebekan nu na midsempad-sempad.

Na makapantag kanu entayn i taw a mangalimuwan (kanu inisapal nu Allah).

Endu pangimbenalin nin su mapya (laa ilaaha illallah/sulga/balas).

Na pakalemuwan nami sekanin sa kanggalebek kanu mapya.

Endu makapantag kanu entayn i taw a midsingit endu mimamasela.

Endu pinandalbut nin su mapya (laa ilaaha illallah/sulga/balas).

Na pakalemuwan nami sekanin kanu kinanggalebekin sa da lantekin.

Endu di den makambalaguna sa lekanin su tamukin amayka mawlug den sekanin (sa naraka).

Saben-sabenal a sya sa lekami su tidtu a tutulu.

Endu saben-sabenal a lekami su mawli (akhirat) endu su mawna (dunya).

Na pinayngatan ku sa lekanu su apuy a pegkalaw-kalaw.

Da makaludep lun ya tabya na dupang.

Su taw a pinandalebut nin su Nabi endu su taw a tinumaligkud kanu kapalityala.

Endu di ebplis na itangka nu Allah (sa naraka) su taw a labi a magilek.

Sekanin antu a ibpagenggay nin su tamukin ka endu masuti (pedzakat).

Endu da sa kanu isa bu a taw i ya nin kabpangalimuwan kanu tamukin i kapamalasan.

Ya tabya na pananangulin kanu Kadenan in a labi a mapulu.

Endu saben-sabenal a di ebplis na kalilinyan nin su ipamalas lun (sa labi a masela kanu nakapangalimuwan nin).