“ចាំបាច់លើពួកអ្នកត្រូវប្រកាន់ខ្ជាប់នូវភាពទៀងត្រង់ ព្រោះភាពទៀងត្រង់នាំទៅកាន់ទង្វើកុសល ហើយពិតណាស់ ទង្វើកុសលនាំទៅកាន់ឋានសួគ៌

អំពី អាប់ទុលឡោះ ពិន ម៉ាស៊្អូទ رضي الله عنه បាននិយាយថា៖ រ៉ស៊ូលុលឡោះ ﷺ លោកបានមានប្រសាសន៍ថា៖

“ចាំបាច់លើពួកអ្នកត្រូវប្រកាន់ខ្ជាប់នូវភាពទៀងត្រង់ ព្រោះភាពទៀងត្រង់នាំទៅកាន់ទង្វើកុសល ហើយពិតណាស់ ទង្វើកុសលនាំទៅកាន់ឋានសួគ៌។ មានអ្នកខ្លះនៅប្រព្រឹត្តទៀងត្រង់ រហូតដល់ត្រូវបានគេកត់ត្រានៅនឹងអល់ឡោះថា ជាមនុស្សទៀងត្រង់បំផុត។ ហើយចូរពួកអ្នកប្រុងប្រយ័ត្នចំពោះការភូតកុហក ព្រោះការភូតកុហកនាំទៅកាន់ទង្វើអាក្រក់ ហើយពិតណាស់ ទង្វើអាក្រក់នាំទៅកាន់ឋាននរក។ មានអ្នកខ្លះនៅនិយាយកុហក រហូតដល់ត្រូវបានគេកត់ត្រានៅនឹងអល់ឡោះថា ជាមនុស្សកុហកបំផុត”។

«عَلَيْكُمْ بِالصِّدْقِ، فَإِنَّ الصِّدْقَ يَهْدِي إِلَى الْبِرِّ، وَإِنَّ الْبِرَّ يَهْدِي إِلَى الْجَنَّةِ، وَمَا يَزَالُ الرَّجُلُ يَصْدُقُ وَيَتَحَرَّى الصِّدْقَ حَتَّى يُكْتَبَ عِنْدَ اللهِ صِدِّيقًا، وَإِيَّاكُمْ وَالْكَذِبَ، فَإِنَّ الْكَذِبَ يَهْدِي إِلَى الْفُجُورِ، وَإِنَّ الْفُجُورَ يَهْدِي إِلَى النَّارِ، وَمَا يَزَالُ الرَّجُلُ يَكْذِبُ وَيَتَحَرَّى الْكَذِبَ حَتَّى يُكْتَبَ عِنْدَ اللهِ كَذَّابًا».

រាយការណ៍ដោយ អាល់ពូខរី និងមូស្លីម
ហាទីស្ហសហេស
ពន្យល់

ណាពី ﷺ លោកបានបង្គាប់ប្រើឱ្យប្រកាន់ខ្ជាប់នូវភាពទៀងត្រង់ ហើយលោកបានបញ្ជាក់ថា ជាការពិតណាស់ ការប្រកាន់ខ្ជាប់នូវភាពទៀងត្រង់តែងនាំទៅរកការសាងទង្វើកុសលជាប្រចាំ។ ហើយការប្រកាន់ខ្ជាប់នូវការធ្វើអំពើល្អជាប់ជានិច្ច នឹងនាំរូបគេទៅកាន់ឋានសួគ៌។ អ្នកដែលបន្តប្រកាន់ខ្ជាប់នូវភាពទៀងត្រង់ ទាំងនៅទីស្ងាត់ និងទីសាធារណៈ រូបគេសមនឹងទទួលបាននូវឈ្មោះជា “អ្នកដែលមានភាពទៀងត្រង់បំផុត” (الصديق)។ បន្ទាប់មក ណាពី ﷺ លោកបានព្រមានចំពោះការភូតកុហក និងការនិយាយមិនពិត ព្រោះវានាំមនុស្សងាកចេញពីផ្លូវត្រូវ ហើយនាំទៅរកអំពើអាក្រក់ និងអំពើបាប។ បន្ទាប់មក វានឹងនាំរូបគេទៅកាន់ឋាននរក។ ហើយគេនៅតែបន្តនិយាយកុហកកាន់តែច្រើនឡើងៗ រហូតដល់ត្រូវបានគេកត់ត្រានៅនឹងអល់ឡោះជាម្ចាស់ថា ជាមនុស្សកុហកបំផុត។

មេរៀនដែលទាញបានពីហាទីស្ហ

ភាពទៀងត្រង់ គឺជាចរិតលក្ខណៈដ៏ឧត្តុង្គឧត្តមដែលអាចទទួលបានតាមរយៈការប្រឹងប្រែង និងការហ្វឹកហាត់។ បុគ្គលម្នាក់នៅតែប្រកាន់ខ្ជាប់នូវភាពទៀងត្រង់ រហូតដល់ភាពទៀងត្រង់ក្លាយជាចរិតលក្ខណៈ និងធម្មជាតិរបស់គេ។ ដូច្នេះ រូបគេត្រូវបានគេកត់ត្រានៅឯអល់ឡោះជាម្ចាស់ថា ស្ថិតក្នុងចំណោមអ្នកដែលទៀងត្រង់បំផុត និងជាមនុស្សល្អ។

ការកុហក គឺជាចរិតលក្ខណៈដ៏គួរឲ្យស្អប់ខ្ពើមដែលរូបគេទទួលបានតាមរយៈការអនុវត្តវាជាប់ជានិច្ចទាំងពាក្យសម្ដី និងទង្វើ រហូតដល់វាក្លាយជាចរិតលក្ខណៈ និងធម្មជាតិរបស់គេ។ បន្ទាប់មក រូបគេត្រូវបានគេកត់ត្រានៅឯអល់ឡោះជាម្ចាស់ថា ស្ថិតក្នុងចំណោមអ្នកដែលភូតកុហក។

ភាពទៀងត្រង់ សំដៅទាំងទៅលើភាពទៀងត្រង់នៃអណ្ដាតដែលផ្ទុយពីការកុហក, ភាពទៀងត្រង់នៅក្នុងការនៀត ពោលគឺភាពជ្រះថ្លា(អៀខ្លើស), ភាពទៀងត្រង់នៅក្នុងការប្ដេជ្ញាចិត្តចំពោះអំពើល្អដែលខ្លួនបាននៀត, ភាពទៀងត្រង់ក្នុងទង្វើ ដែលយ៉ាងហោចណាស់ គឺត្រូវឲ្យអ្វីដែលខ្លួនលាក់បាំង និងអ្វីដែលបង្ហាញចេញមកក្រៅ គឺដូចគ្នា(គ្មានភាពពុតត្បុត) ហើយនិងភាពទៀងត្រង់ក្នុងស្ថានភាពផ្សេងៗទៀតដូចជា ភាពទៀងត្រង់ក្នុងការខ្លាច និងសង្ឃឹមជាដើម។ ជាការពិតណាស់ ជនណាដែលមានលក្ខណៈទាំងអស់នេះ គឺជាអ្នកដែលមានភាពទៀងត្រង់បំផុត ឬបើមានលក្ខណៈខ្លះនោះ គេគឺជាអ្នកដែលមានភាពទៀងត្រង់។

ឯកសារយោង

សហេស អាល់ពូខរី (8/ 25) (6094).

សហេស មូស្លីម (4/ 2013) (2607).

បន្ថែមទៀត (8)

توضيح الأحكام من بلوغ المرام.

لعبد الله البسام (7/ 479).

منحة العلام في شرح بلوغ المرام.

لعبد الله الفوزان (10/ 313).

فتح ذي الجلال والإكرام.

لابن عثيمين (6/ 417).

سبل السلام بشرح بلوغ المرام.

لمحمد الصنعاني (2/ 686).

14 សៀវភៅ
បន្ថែមទៀត (13)
កាតទាំងអស់