Àlsìlàamàtɛ̀rɛ bara Irikpɛ dìyàyo kulu ŋmɛnɛ adiini nɔ̀
Tila wɔ̀ gu àlsìlàamàtɛ̀rɛ kunkuni à hɔnnɛyo ga nɔ̀, kó cìbayo ká à bara Bɔ̀nŋɔ̀ Fɔ̀ tɛ̀rɛɛ Fɔlɔnku ŋmɛnɛ adiini nɔ̀. À gu Irikpɛ Fɔ ká À Bara À Fɔlɔnku Gonoyo cimmanīyo , nna ká Muhammadu (Irikpɛ mà à fɔ̌ ka à sáabu ka à yéenanī) bara Andébiyo mɛ̀ɛwì nɔ̀. Nŋa à gu aadalsi nna dèidèi tɛ̀rɛ barayo tabbataniyo , kó malaayikayo nna ciyáama kɛ̄iyo gonoyo cimmaiyo kpɛ̌nɛ. À dù ka bara adiini ká ň bɔ̀rɔ hɛi nnā nɔ̀ ka yei ka bara lǎakali ŋmɛnɛ adiini ká ǎ cɛ kó kpee nnā jìnde nɔyo kubèntɛ Irikpɛ sɛ ga, kó nàmu anduniya nna láahara ŋmɛnɛ bɔnkáani mà tɛ (à…
Àlsìlàamàtɛ̀rɛ bara Irikpɛ dìyàyo kulu ŋmɛnɛ adiini nɔ̀
Beiyo ŋmɛnɛ Hanŋa ká ǎ latiyo nna Adiini Sénni tɛyo Bɔ̀nŋɔ̀tɛ̀rɛ Gbei dɔ̄ ká à gono Kǎba Jìnjire nna Andebi Jìnjire kuna
Àlsìlàamàtɛ̀rɛ bara nɔ̀ jìndè nɔyo kùbèntɛ Irikpɛ sɛ Kpei Ká Nŋa nɔ̀ haliita kulu Hàlìitàkpɛ nna à Bɛ̀rɛ̀ Bɛ̀rɛ̀kpɛ, nna bɔ̀ŋɔ kùsǔm nɔyo À sɛ À bàkàsinɛ nna À bèeraniyo nna À jirimaniyo bɔ̀nŋɔ̀. Àlsìlàamàtɛ̀rɛ di kɔsɛ nɔ̀ cimi nɔyo Irikpɛ sɛ, nna cimi nɔyo ká Nŋa nɔ̀ Hàlìitàkpɛ , À bàasi hɛ̀i kulu bara haliita nɔ̀, Nŋa yǎ hìmaayo nna bɔɔtayo À sɛ À Fɔlɔnku À sinna wece, hɛ̀ifɔ si ká ǹ ba bɔɔta ŋmáa à sɛ nna cimi fàase Nŋa. À gonna Maayo Káayo Ǹ Bòoriyo Bìsayo nna Zémyo Káayo Ǹ Jirima nna Ǹ Kùbeyoo Bìsayo. Nŋa Nŋa yǎ gonna Tɔyo ka Kube Hɛnnɔ Kulu ká hartayo fɔ si À Kuna .À ná hɛi Ǹ binɛ ná À hɛi , hɛifɔ binɛ ná bara À cinɛ bère À hìmàkàsìnɛ̀. À suu zùmmu ka hulo À hàliita fɔ gáa kunā À binɛ suu À Bɔŋɔ bɛ̀rɛ ka ci à hàliita fɔ tàka .
Àlsìlàamàtɛ̀rɛ bara Irikpɛ Ká Ǎ Béeriyo ŋmɛnɛ adiini nɔ̀ ká À suu adiini fɔ ta boroo sɛ à bàasi. Nŋa yǎ dù ka bara adiini ká Andebiyo kulu kà nnā (yèenaayo mà tɔ ǹ ga).
Àlsìlàamàtɛ̀rɛ ŋmɛnɛ kɔsɛyo kuna nɔ̀ cimi nɔyo dìyàyo kulu sɛ, nna cimi nɔyo ká Irikpɛ nà dìyáyo di dɔ̌ntɔ kìtɛ nɔ̀ domi ǹ mà À Fòoroyo tɔyani À tàmyo ga, nŋa À nà tilayo zumanī ǹ sɛ, nŋa dìyàyo di kɔ̀kɔ̀rɔ̀ nɔ̀ Muhammadu (fɔ̌yo nna yèenaayo mà tɔ à ga) ká Irikpɛ dɔ̌ntɔ nna À Kpèitɛ̀rɛ ŋmɛnɛ sàriya ká à bara dìyàyo káayo ǹ jina à sɛ ŋmɛnɛ sàrìyàyo mɛ̀ɛwì nna ǹ tùusùkpɛ. Nŋa Irikpɛ nà à tɛ̀ɛmako nna màamaaci hàyà bèeriyo ká ǹ kuna wɔ̀ɔka à bàyoo bìsayo nɔ̀ Àlkùrani Jìrìmàntɛ Ká à bara hàliitayo kulu Nɔrukpɛ ŋmɛnɛ Sénni , tila ká à bayoo bìsayo tila kulu kà bɔ̀rɔ̀ tɛ̀rɛ bei nɔ̀ ya, tila nɔ̀ ya ká ǎ haliita kulu mɔnŋɔyanīyo à tàka kànaayo, hɛ̀ika à gono à kuna dɔ kàmmɛ nna à sénni gure dɔ kàmmɛ nna à sɛsɛrɛyo dɔ kàmmɛ. À kuna hìnì cìbayo ka kpee nnā cimi dɔ gono, cimi ká ǎ tɔyanī bɔnkáani ga anduniya kuna nna laahara, à dù kó sarīyo nɔ̀ hali hɔ̃ nna làarubu cìnɛ̀ ká à zùmmú nnā , ǹ ná bâ ibīi gùre fɔ bɛrɛ à kuna ǹ binɛ ná à bàaru .
Kpɛ̌ɛnɛ Àlsìlàamàtɛ̀rɛ kɔsɛyo kuna nɔ̀ cimi nɔyo malaayikayo sɛ, nna cimi nɔyo hanu kɔkɔ̀rɔ̀ sɛ, hanu di kuna binɛ nɔ̀ Irikpɛɛ boroo turanī zǎ ǹ sàarɛ̄ɛyo kuna ciyaama kɛiyo hɛnɛ domi À mà ǹ gbeiyo kabu ka ǹ bana tɛ ǹ sɛ. Warka à nà ihɛnnɔyo tɛ cimi nɔyo bɔ̀nŋɔ̀ gonna gomini dawwàmàntɛ Àljanna kuna, warka binɛ à céférì ka gbei làalɔyo tɛ gonna azaaba bèerì nìnɛ̀ kuna .Ya nɔ̀ kpɛ̌nɛ Àlsìlàamàtɛ̀rɛ kɔsɛyo kuna nɔ̀ cimi nɔyo hɛ̀ika Irikpɛ haw ka jisi sɛ à ŋmɛnɛ ihɛnnɔ aw à ŋmɛnɛ ilàalɔ.
Àlsìlàamayoo cimi nɔyo nɔ̀ ká Andebi Isa bara Irikpɛ tàm nɔ̀ ka yei ka bara À dìyà, kó cimi nɔyo kpɛ̌nɛ ká à ná bara Irikpɛ kōo; domi Irikpɛɛ Bayo nɔ̀ kó Bara Jirima Béerìkpɛ Ká à suu tɛ À 'n gonna wèi bère kōo. Àmma Irikpɛ nà iri nɔ làabaari àlkùrani kuna ká Isa bara Andebi nɔ̀ ká Irikpɛ nà à gòminī munjiza(1) tùutuuma, nŋa Irikpɛ nà à dɔ̌ntɔ nɔ̀ à mà à boroo cɛ ka kpee nnā bɔ̀ɔta ŋmáayo Irikpɛ Fɔlɔnku Ká À sinna wece sɛ ga. Nŋa À nà iri beiyanī ká Isa ná cèeji boroo ga ǹ mà bɔ̀ɔta à sɛ, cɛrɛ bɔŋɔ mòsóm bara ká à Hàlìitàkpɛ sɛ nɔ̀ ǎ bɔ̀ɔta. ŋmá.
Àlsìlàamàtɛ̀rɛ bara adiini nɔ̀ ká ǎ sawayo nna bɔ̀rɔ haliita tàbiya dèidèintɛ nna laakali àlàafiàntɛ, nŋa bìnɛ̀ dèidèintɛyo gu à tayo. Hàlìitàkpɛ Jirima Bèerìkpɛ yǎ nà à ci àsaria hinì À hàliitayo sɛ, à binɛ bara alhéeri nna bɔnkaani hinì nɔ̀ bɔ̀rɔ̀ kulu sɛ. À suu dimi fɔ fisau ka tɛkɛ dimi fɔ ga, dě binɛ gáa kama fɔ ka tɛkɛ gáa kama fɔ ga, à kuna boroo kuluu sawayo nna cɛrɛ nɔ̀. Àlsìlàamàtɛ̀rɛ di kuna bɔ̀rɔ̀ fɔ su fisauyo kó tɛkɛyo à hansinɛ̀ ga fàase nna à gbéi hɛnnɔ zaka .
À bara tilasi nɔ̀ bɔ̀rɔ̀ làakalintɛ kulu mà cimi nɔ Irikpɛ sɛ ká Nŋa yǎ Bara Nɔrukpɛ, nŋa àlsìlàamàtɛ̀rɛ bara adiini (yardantɛ Nɔrukpɛ di dɔ) , nŋa Muhammadu (Irikpɛ mà à fɔ̌ ka à sáabu ka à yénanī) bara dìyà, zaŋa ya binɛ bara fòoro fɔ nɔ̀ ká à kuna bɔ̀rɔ sinna fisauyo fɔ ; domi ciyaamā kɛiyo hɛnɛ Irikpɛ ba à hã hɛika á tùtu nnā diyàyo sɛ; dě à bara cìmìnɔ̀ɔri nɔ̀ à gonna bàa nna bana bèerì jìrìmàntɛ, dě binɛ à bara cèfri nɔ̀ hasaara bàtùmɛ kpaarɛ ŋmɛnɛ gono à sɛ.
Àlsìlaama binɛ nɔ̀ warka ǎ cì : (Ach'hadu an laa ilaaha illal-lɔɔhu wa Ach'hadu anna Muhammadan rasuulul-lɔɔhi) Á sěda ká kpei fɔ si ká à hima ǹ mà bɔ̀ɔta ŋmáa à sɛ nna cimi fàase Irikpɛ, nŋa á sěda ká Muhammadu bara Irikpɛ dìyà), à 'n dù kó gonna mɛɛcìnɛ̀ di ŋmɛnɛ beiyo kó cimi nɔyo à sɛ, ka yei kó àlsìlàamàtɛ̀rɛ ŋmɛnɛ àsariya cìnniyo beiyo céeji cɛɛnɛ cɛɛnɛ; domi à 'n dùwa kó tùnu nna hɛ̀ikáayo Irikpɛ nà ǹ ci à ga tilasi .