Tumelo ea Islam ke bolumeli ba Morena Oa Mafats'e (Oa lintho tsoile)

Tumelo ea Islam ke bolumeli ba Morena oa mafats'e

Komiti ea Tsebo tlas'a ofisi ea Botsamaisi ba Litaba tsa Bolumeli, Masjid al-Haram (Makkah) le Masjid an-Nabawi (Masjid oa Moporofeta Madinah)

Ka Lebitso la Allah Ea Mosa Ea Lereko

Molimo oa hao ke mang?

Ena ke potso e kholo ka ho fetisisa e kileng ea e-ba teng; ke potso e bohlokoa ka ho fetisisa eo motho a lokelang ho tseba karabo ea eona.

Morena oa rona ke Eena ea bopileng maholimo le lefats'e, 'me a theola metsi a tsoang leholimong, 'me a hlahisa litholoana le lifate e le lijo bakeng sa rona le liphoofolo tseo re li jang.

Ke Eena ea re bopileng le bo-ntat’a rona, ’me a bopa ntho e ’ngoe le e ’ngoe. Ke Eena ea entseng bosiu le motšehare. Ke Eena ea entseng bosiu nako ea ho robala le ho phomola, le motšehare nako ea ho batla lijo le mokhoa oa ho iphelisa.

Ke Eena ea re bopetseng letsatsi, khoeli, linaleli le maoatle, 'me o re bopetse liphoofolo tseo re jang ho tsona le tseo re ruang molemo ho tsona ka lebese le boea ba tsona.

Ea Phahameng O re: ﴾Ruri, Morena oa lona ke Allah, Ea bopileng maholimo le lefatše ka matsatsi a tšeletseng, 'me a phahamela ka holimo ho Terone. O koahela bosiu ka motšeare, ’me motšeare o potlakela ho latela bosiu. Eaba letsatsi, khoeli, le linaleli, tsohle li eba tlas’a taelo ea Hae. Ruri, popo le taolo ke tsa Hae, ho bokoe Allah, Mong`a lintho tsohle. 54﴿ [Al-A'raaf :54].

Litšobotsi tsa Morena oa Mafatše ke life?

Morena ke Eena Ea bopileng libopuoa, ke Eena Ea ba tataisetsang 'neteng le tataisong, ke Eena Ea laolang litaba tsa libopuoa tsohle, ke Eena Ea li hlokomelang, ke Eena Mong'a ntho e 'ngoe le e 'ngoe bophelong bona le ka mor'a lefu, ntho e ’ngoe le e ’ngoe ke ea Hae, ’me ntho e ’ngoe le e ’ngoe ntle le Eena e ruiloe ke Eena.

Ke Eena Ea Phelang, Ea sa shoeng kapa Ea sa robaleng, 'Me ke eena Mohlokomeli oa bophelo bohle, Eo ka taelo ea Hae ntho e 'ngoe le e 'ngoe e phelang e leng teng. Ke Eena eo mohau le tsebo tsa Hae li akaretsang lintho tsohle, 'me ha ho letho le patehileng ho Eena, lefatšeng le leholimong

Ha ho letho le ts'oanang le Eena, 'me ke Eena Ea Utloang, Ea bonang tsohle. O ka holimo ho maholimo a Hae, ke Morui Ha hloke popo ea Hae, empa popo e ea Mo hloka. Ha A lule kahare ho popo ea Hae, ebile ha ho popo ea Hae e ka lulang kahare ho boleng ba Hae, Khanya e be ho Eena, Ea Phahameng.

Morena ke Eena Ea bopileng lefats’e lena le bonahalang ka litsamaiso tsohle tsa lona tse lekantsoeng hantle, tse sa senyeheng; ekaba litsamaiso tsa ’mele oa motho le tsa liphoofolo, kapa litsamaiso tsa bokahohle bo re potileng ka letsatsi la lona, linaleli tsa lona, le likarolo tsohle tse ling tsa lona..

’Me kannete ntho e ’ngoe le e ’ngoe e rapeloang kantle ho Eena ha e na matla a ho itsoela molemo kapa ho its'ireletsa kotsing; joale e ka khona joang ho tlisetsa ea e rapelang molemo kapa ho mo sireletsa kotsing?

'Me Allah Ea Matla 'Ohle Ha A na molekane boreneng ba Hae, 'mopong oa Hae, tsamaisong ea Hae, kapa borapeling ba Hae. Ha A na mora kapa molekane. Molimo Ea Phahameng O itse: ﴾Ke Eena Moqapi oa Maholimo le lefats’e. A ka ba le ngoana joang athe Ha A na mosali? O bopileng lintho tsohle, ’me ke Eena Ea tsebang lintho tsohle ka botlalo. 101﴿ [Al-An'aam: 101].

Ea Phahameng O itse ka Jesu khotso e be le ena: Ruri, mohlala oa Jesu ho Molimo o ts'oana le oa Adama, (Allah) O mo bopile ka lerole. Eaba O re ho eena, eba teng, 'me a ba teng. 59 (Ena ke) 'nete e tsoang ho Mong'a hao, kahoo u se ke oaba har'a ba belaelang. 60. [Ali Imran 59-60] Hape O itse: ﴾’Me hopola ha Allah A tla re (ka Letsatsi la Tsoho): “Oho ‘Iesa (Jesu), mora oa Maryam (Maria)! Na u itse ho batho: Re rapeleng 'na le ’mè oaka re le melimo e ’meli kantle ho Allah?’” Eena o tla re: “Tlotla e be ho Uena! Ke ne ke se na bokhoni ba ho bua seo ke neng ke se na tokelo ea ho se bua. Haeba nka be ke buile joalo, U ka be U tsebile. U tseba se kahare ho ’na, empa ’na ha ke tsebe se kahare ho Uena. Ruri, ke Uena feela Ea Tsebang tsohle tse patiloeng le tse sa bonahaleng.” "Ha kea ka ka ba bolella letho haese seo Uena U ntaetseng sona: hore ba rapele Allah, Morena oaka le Morena oa bona. Ke ne ke le paki holim’a bona ha ke sa ntse ke le har’a bona; empa ka mor'a hore U nkukele holimo (leholimong), Uena ke Uena Ea neng A ba hlokomela. ’Me Uena U paki holim’a ntho e ’ngoe le e ’ngoe.”﴿ [Al-Maidah 116-117]

Ke efe tokelo ea Morena oa rona ho Rona?

Ruri ke tokelo ea Hae holim’a batho bohle hore ba Mo rapele Eena A le Mong feela, ba se ke ba Mo kopanya le letho. Ka hona ba se ke ba rapela ntho efe kapa efe ntle ho Eena kapa hammoho le Eena, ekaba motho, lejoe, noka, ntho e sa pheleng, naleli kapa eng kapa eng. Empa ba etse borapeli bohle bo be bo hloekileng, bo lebisoe ho Allah, Morena oa mafatše ’ohle.

Ke efe tokelo ea batho ho Morena oa bona

Tokelo ea batho ho Molimo, haeba ba Mo rapela A le mong, ke hore A se ke A otla ea sa Mo kopanyeng le letho khumamelong, le hore O ba nolofalletsa bophelo bo botle boo ho bona ba fumanang khutso le khotsofalo lefatšeng lena, 'me bophelong bo tlang O ba amohela Paradeiseng, moo ho nang le thabo e sa feleng le bophelo bo sa feleng. Empa haeba ba sa mo mamele, ba hana taelo ea Hae, 'me ba kopanya ntho leha e le efe kapa efe le Eena, O etsa hore maphelo a bona a be bohloko le ho hlomola, leha ba nahana hore ba thabile ebile ba phuthulohile. 'Me Bophelong bo Tlang O ba kenya Liheleng, tseo ba ke keng ba tsoa ho tsona, 'me ho tsona ho na le tlhokofatso e sa feleng le bophelo bo sa feleng.

Morero oa boteng ba rona ke ofe? ʼMe ke hobane'ng ha re bopiloe?

Morena EA Mosa O re boleletse hore O re bopile ka morero O moholo, eleng ho Mo rapela Eena feela A le Mong, 'me ha rea ​​lokela ho mo kopanya le letho, ﴾Ha Kea ka ka bopa li-jinn (libopuoa tse ling tse sa bonoeng tseo Molimo O li bopileng kathoko ho Mangeloi le batho 'me ke tseo Satane a hlahang ho tsona) le batho haese hore ba Nthapele (Nna ke le mong). [Al-Dhariyat:56] Re filoe boikarabello ba ho nts'etsa lefatše pele ka botle le tokiso. Mang kapa mang ea rapelang ntle le (ho rapela) Morena le 'Mopi oa hae ha a tsebe morero oo a o bopetsoeng, le ho phetha mosebetsi oa hae ho 'Mopi oa hae. 'Me mang kapa mang ea bakang bobolu le ts'enyo lefatšeng ha a tsebe mosebetsi oo a o filoeng.

Re rapela Morena oa rona joang?

Ruri, Morena Ea Matla Ohle Ha A ka A re bopa 'me A re siea re se na morero, leha e le hore o entse hore maphelo a rona a se ke a ba le morero. Ho e-na le hoo, o khethile Baromuoa har'a batho ho ea ho batho ba bona, bao e neng e le batho ba phethahetseng ka ho fetisisa boitšoarong, meea e hloekileng ka ho fetisisa, le lipelo tse ntle ka ho fetisisa. O ile a ba romela melaetsa ea Hae, ho akarelletsa le ntho e 'ngoe le e 'ngoe eo batho ba lokelang ho e tseba ka Molimo ea Matla 'Ohle, le ka tsoho ea batho (bafu) bakeng sa Letsatsi la Kahlolo, e leng Letsatsi la ho Ikarabella le ho abeloa moputso,

Baromuoa ba ile ba tsebisa batho ba bona mokhoa oa ho rapela Morena oa bona, 'me ba ba hlalosetsa mekhoa ea borapeli, linako tsa bona le moputso oa bona lefatšeng lena le la kamoso. Ba ile ba ba lemosa ka seo Morena oa bona a ba hanetseng sona mabapi le lijo, lino le lenyalo, 'me ba ba tataisetsa boitšoarong bo botle le ho ba thibela boitšoarong bo bobe.

Ke bolumeli bofe bo amohelehang ho Molimo Ea Matla 'Ohle?

Bolumeli bo amohelehang ho Molimo ke Islamo, 'me ke bona bolumeli boo Baporofeta bohle ba rutileng ka bona, Ebile Molimo Ha ana ho amohela bolumeli bo bong ntle le bona ka Letsatsi la Tsoho, ﴾Mang kapa mang ea labalabelang bolumeli bo bong bosele ntle le ba Islam, bo ke ke ba amoheloa ho eena, ’me ka Letsatsi la Kahlolo o tla ba har’a ba lahlehetsoeng 85﴿ [Al-Imran: 85] Bolumeli bo bong le bo bong boo batho ba bo amohetseng ntle le Islamo ke bolumeli ba bohata, 'me ha bo tsoele balateli ba bona molemo, empa bo ba tlisetsa mahlomola lefatšeng lena le bophelong ba kamor'a lefu.

Motheo le litšiea tsa bolumeli boo (ba Islamo) ke life?

Bolumeli bona bo nolofalitsoe ke Molimo bakeng sa bahlanka ba Hae. Litšiea tsa bona tse kholo ka ho fetisisa ke ho lumela ho Molimo e le Morena, e le Molimo ea rapeloang, le ho lumela ho mangeloi a Hae, libuka tsa Hae, barumuoa ba Hae le Letsatsi la ho Qetela, le ho lumela ho Qadar (morero oa bomolimo o tlileng pele ho popo), kahoo u paka hore ha ho na molimo ofe kapa ofe o lokeloang ke khumamelo kantle ho Allah, le hore Muhammad ke morumuoa oa Molimo, 'me u etsa thapelo, le ho lefa Zakaat haeba u na le chelete eo Zakaat e lokelang ho lefshoa ho eona, 'me u itima ka khoeli ea Ramadhan, e leng khoeli e le ʼngoe selemong, 'me u etsa leeto la bolumeli ho ea Ntlong ea boholo-holo eo Abrahama, khotso e be ho eena, a e ahileng ka taelo ea Morena oa hae, haeba u khona ho etsa joalo,

ʼMe u qoba seo Allah A u hanetseng sona, joalo ka borapeli ba melimo e mengata, polao, bofebe, ho ja leruo le hanetsoeng, ho se mamele batsoali le ho noa joala, e le hore u ka fumana khotso, thabo le katleho lefatšeng lena, le ho le tlang ka morao ho lefu, Molimo o tla u fa thabo e sa feleng le bophelo bo sa feleng Paradeiseng.

Na bolumeli ba Islamo ke bolumeli ba sechaba se itseng feela kapa Mohlobo o itseng?

Islam ke bolumeli ba Allah ho batho bohle, ha ho na ea betere ho e mong kantle le ts'abo ea Molimo le liketso tse ntle, ebile batho tumelong ena ba ea ts'oana, ﴾Ha Rea u romela haese feela e le mohau ho batho bohle, mojari oa litaba tse molemo le mohlokomelisi.﴿ [Saba: 28]

Batho ba tseba joang hore Barumuoa ke ba 'nete, khotso le mahlohonolo a be holim’a bona?

Batho ba tseba hore barumuoa ke ba 'nete ka litsela tse ngata tse kang:

Hore seo ba se tlisang ele sa 'nete le tataiso ke se amohelehang likelello tse phetseng hantle le maikutlong a tlhaho, 'me likelello li paka molemo oa sona, 'me bao eseng barumuoa ba ka se tle le ntho e tšoanang le eo ba e tlisitseng.

Seo barumuoa ba se tlisitseng se na le boiketlo (molemo le tokiso) bolumeling ba batho le litabeng tsa bona tsa lefats'e, se lokisa litaba tsa bona, se aha tsoelo-pele ea sechaba sa bona, le ho sireletsa bolumeli ba bona, likelello tsa bona, maruo a bona le seriti sa bona.

Hore Barumuoa ba Allah, khotso e be holim’a bona, ha ba kope moputso ho batho ka lebaka la ho ba khannela botleng le tataisong; empa bona ba emetse moputso oa bona ho Morena oa bona.

Seo barumuoa ba se tlisitseng ke 'nete ebile se tiile, ntle le pelaelo, 'me ha se hanyetsane kapa hona ho thekesela. Moporofeta e mong le e mong o tiisa (litaba tsa) baporofeta ba tlileng pele 'me o bitsetsa ho se tšoanang le seo ba neng ba bitsetsa ho sona.

Hore Allah O tšehetsa Barumuoa khotso e be holim'a bona, ka lipontšo tse hlakileng le mehlolo e matla eo Allah A e etsang ka bona, e le bopaki bo hlakileng hore ke barumuoa ba tsoang ho Molimo, ʼme mohlolo o moholo ka ho fetisisa oa baporofeta ke mohlolo oa Morumuoa oa ho qetela Muhammad, Molimo A mo hlohonolofatse 'me A mo fe khotso, e leng Qur’an e Halalelang.

Qu'ran e Halalelang ke eng?

Qurʼan e Halalelang ke buka ea Morena oa Mafatše. Ke Lentsoe la Molimo, le senotsoeng ke lengeloi Gabariele, khotso e be ho eena, ho Moporofeta Muhammad, khotso le litlhohonolofatso li be ho eena. E na le sohle seo Molimo A tlamang batho ho se tseba ka Molimo, mangeloi a Hae, libuka tsa Hae, barumuoa ba Hae, Letsatsi la Bofelo, le al-Qadar (thero ea pele le taelo ea bomolimo), e ntle le e mpe,

E boetse e na le liketso tsa borapeli tse tlamang, le lintho tse hanetsoeng tseo ho lokelang ho li qoba, le boitšoaro bo botle hammoho le bo bobe; le tsohle tse amanang le litaba tsa bolumeli ba batho, bophelo ba bona ba lefatše le ba Bofelo. Ke buka ea mohlolo eo Allah A ileng A phephetsa batho hore ba tle ka e tšoanang le eona, empa ba sitoa; ’me phephetso eo e ntse e tsoela pele ho fihlela kajeno le ho fihlela Letsatsi la Kahlolo le fihlile, ’me ba ke ke ba khona ho etsa joalo, ﴾E-re: Haeba batho le li-Jinn ba ka bokana hammoho ho leka ho hlahisa se tšoanang le Qurʼan ena, ba ke ke ba khona ho hlahisa se tšoanang le eona, leha ba ka ba ba thusana.88﴿ [Al-Isra: 88] E bolokiloe ho fihlela Letsatsing la Tsoho ka puo eo e senotsoeng ka eona, ha ho tlhaku le e 'ngoe e siiloeng ho eona, leha e le lentsoe le le leng le fetotsoeng ho eona.

Bopaki ba tsoho le kahlolo ke bofe?

Na ha u bone hore lefatše le ne le shoele, le se na bophelo? Empa e itse ha Re theolela metsi ho lona, la sisinyeha, ʼme la hlahisa mefuta eohle ea limela tse khahlisang, ruri Ea le fang bophelo, O khona ho tsosa le bafu, Ruri, Ea bopileng motho ka lerotholi la mokelikeli o nyelisehang O khona ho mo tsosa le ho mo khutlisetsa hape ka Letsatsi la Tsoho, ho mo jarisa boikarabello (ba liketso tsa hae) le ho mo putsa ka botlalo, haeba a sebelitse Ka botle, O tla mo putsa ka botle, 'me haeba e le Ka bobe, O tla thola bobe. Ruri Ea bopileng Maholimo le lefatše le linaleli, O na le matla a ho khutlisa popo ea motho hape; hobane Ea nang le matla a ho bopa tse kholo—e leng maholimo le lefatše— O boetse O na le matla a ho bopa tse nyenyane, e leng ho boptjoa ha motho.

Letsatsi la kahlolo e tl'o ba eng?

Morena Ea Phahameng ka tlotla ea Hae O tla tsosa batho bohle mabitleng a bona, ebe O ba ahlola ho ea ka mesebetsi ea bona. Ea ileng a lumela ’me a tiisa (molaetsa oa) barumuoa, o tla mo kenya Leholimong (Jannah), leo ho lona ho nang le monate o sa feleng oo boholo ba oona bo sa kang ba fihlela kelellong ea motho. Empa ea sa kang a lumela, O tla mo kenya Mollong (Nnar), oo ho ona ho nang le kotlo e sa feleng eo motho a sokang a e nahana. ’Me ha motho a se a kene Leholimong kapa Mollong, a ke ke a hlola a shoa; o tla hlola teng ka ho sa feleng, ebang ke thabong kapa kotlong.