सानातिना पापहरूबाट सचेत एवं सतर्क रहनुहोस्।
सह्ल बिन साअ्द (रजियल्लाहु अन्हु) ले बयान गरेका छन्, रसूल (सल्लल्लाहु अलैहि वसल्लम) ले भन्नुभएको छ:
"तिमीहरू साना र तुच्छ ठानिएका पापहरूबाट बच्नू; किनकि साना पापहरूको उदाहरण त्यस्ता मानिसहरूको समूह जस्तै हो, जसले कुनै उपत्यकाको फेदमा बास गरे। त्यसपछि एक जनाले एउटा सानो दाउरो ल्यायो, अर्कोले अर्को दाउरो ल्यायो, यसरी दाउरो जम्मा गर्दै अन्ततः उनीहरूले (आगो बालेर) आफ्नो रोटी पकाए। निश्चय नै, साना ठानिएका पापहरू एकत्रित हुँदै जान्छन्, र जब ती साना पापहरू गर्ने मानिसमाथि पकड हुन्छ, तब ती साना पापहरूले नै उसलाई नष्ट गरिदिन्छन्।"
«إِيَّاكُمْ وَمُحَقَّرَاتِ الذُّنُوبِ، فَإِنَّمَا مَثَلُ مُحَقَّرَاتِ الذُّنُوبِ كَقَوْمٍ نَزَلُوا فِي بَطْنِ وَادٍ، فَجَاءَ ذَا بِعُودٍ، وَجَاءَ ذَا بِعُودٍ، حَتَّى أَنْضَجُوا خُبْزَتَهُمْ، وَإِنَّ مُحَقَّرَاتِ الذُّنُوبِ مَتَى يُؤْخَذْ بِهَا صَاحِبُهَا تُهْلِكْهُ».
नबी (सल्लल्लाहु अलैहि वसल्लम) ले स-साना पापहरूलाई तुच्छ ठानी तिनलाई हल्का रूपमा लिने र निरन्तर दोहोर्याइरहने कृत्यप्रति कडा चेतावनी दिनुभएको छ; किनभने ती स-साना पापहरू एकत्रित भई अन्ततः विनाशको कारण बन्दछन्। उहाँले यसको उदाहरण एउटा यस्तो यात्री समूहको माध्यमबाट दिनुभयो, जो कुनै उपत्यकाको बीचमा पुगेर विश्राम गर्दछन्, अनि उनीहरूमध्ये प्रत्येकले एक-एकवटा सानो दाउरा संकलन गरेर ल्याउँछन्; र हेर्दाहेर्दै ती एकत्रित दाउराहरूको सहायताले उनीहरूले आफ्नो भोजन (रोटी) पकाउन पर्याप्त आगो तयार गर्दछन्। पक्कै पनि, मानिसले तुच्छ ठानेका तिनै स-साना पापहरूको कारण जब व्यक्ति पकडमा पर्दछ र उसले समयमै पश्चात्ताप (तौबा) गर्दैन वा अल्लाहले उसलाई क्षमा गर्नुहुन्न भने, तिनै पापका थुप्राहरूले उसलाई नष्ट गरिदिन्छन्।
नबी (सल्लल्लाहु अलैहि वसल्लम) ले कुरालाई बुझाउन र थप स्पष्ट पार्न उदाहरणहरूको प्रयोग गर्नुहुन्थ्यो।
यसमा तुच्छ ठानिने साना पापहरूबाट सावधान गराइएको छ र तिनको चाँडै प्रायश्चित गर्न प्रोत्साहित गरिएको छ।
तुच्छ ठानिएका पापहरूका विभिन्न अर्थहरू हुन सक्छन्: पहिलो: व्यक्तिले गर्ने त्यस्ता पापहरू जसलाई उसले साना पाप हुन् भन्ने भ्रम राख्छ, जबकि अल्लाहको दृष्टिमा ती ठूला पापहरू हुन्। दोस्रो: व्यक्तिले कुनै पर्वाह नगरी गर्ने त्यस्ता साना पापहरू जसबाट उसले तौबा (पश्चात्ताप) गर्दैन, फलस्वरूप यी साना पापहरू थपिँदै र एकत्रित हुँदै जान्छन्, र अन्ततः तिनले उसलाई नष्ट गरिदिन्छन्। तेस्रो: व्यक्तिले वास्ता नगरी गर्ने त्यस्ता साना पापहरू जुन उसलाई विनाशकारी ठूला पापहरूमा फसाउने कारण बन्न पुग्छन्।
मुस्नद अहमद (37/ 466) (22808).
थप (2)
التيسير بشرح الجامع الصغير (1/ 405).
فيض القدير (3/ 127).