«Wẽnd yeelame: Ned ning sẽn wa n maana Mam noang beem, ad M vẽnega a soab ne zabre, la Mam yamba ka yɩ sẽn na n pẽneg Maam ne bũmbu, tɩ noom Maam n yɩɩd Mam sẽn maan faril ning n rogl-a wã ye

Nabiyaamã (Wẽnd pʋʋsg la A tɩlgr be a yĩnga) kõo kibare, Al-hadiis Al-ƙʋdsiy pʋgẽ, tɩ Wẽnde (A Naam zẽk yã) A yeelame: ned ning sẽn namsa noang sẽn be Mam nong-n-taasã pʋgẽ, n maan t'a sũur yiki, maa a kisg-a, rẽnd Mam vẽnega beem ne yãwã soabã. La waliy (Wẽnd nong-n-taaga): yẽ la sɩd-kõt sẽn yaa Wẽn-zoεtã, la yamb sẽn tar sɩd-kũunã la Wẽn-zoεεgã tεka la yẽ me pʋɩɩrã zemsɩd waliimdã wεεngẽ, la lɩslaam ka pẽnegd a Soabã ne bũmb tɩ noom-A n yɩɩd A sẽn maan tɩ yaa faril n rogl-a wã ye, sẽn yaa tũudmã maaneg la haraam-rãmbã basgo, la lɩslaam ka bak n pẽnegd a Soabã, ne naafɩlrãmba, n lagem ne faril-rãmba, halɩ t'a wa tʋg n paam Wẽnd nonglem, rẽnd Wẽnd sã n yɩ a nonglem, Wẽnd na n rems-a lame la A sõng-a, a yĩn-wil a naasã pʋgẽ: A remsd-a-la a wʋmbẽ wã, t'a ka wʋmde rẽnda bũmb ning sẽn yard Wẽnde. La A remsd-a a ninẽ, t'a ka get rẽnda sẽn tʋg bũmb ning Wẽnd sẽn nong tɩ b gese, la A yardẽ wã. la A rems-a a nugẽ wã, a ka tʋmd ne a nugã, rẽnda bũmb ning sẽn yard Wẽnde. La a rems-a a naoorẽ, t'a ka kẽnde, rẽndame tɩ yaa sẽn na n tʋg bũmb ning sẽn yard Wẽnde, la a ka maand tʋʋmde, rẽnda sõma sẽn beẽ la a kẽnda. Sẽn lagem ne wã fãa, a sã n kos Wẽnd bũmbu, Wẽnd kõt-a-la a sẽn kosã, rẽnd nedã yɩta b sẽn reegd a soab kosgo, a sã n kos gũudum ne Wẽnde, n dell Wẽnde, n bao gũudum ne-A, ad Wẽnde, (A Naam yɩlgame), A reegda a kosgã la A gũ-a n yi bũmb ninga a sẽn yεεsd-a.