تنبيهات على أحكام تختص بالمؤمنات

දේවත්වය විශ්වාස කරන කාන්තාවන්ට අදාල නීති රීති පිළිබඳ විමසුමක්

කර්තෘ ගරු අෂ්-ෂෙයික් ආචාර්ය.සාලිහ් බින් ෆව්සාන් අල් ෆව්සාන්

අපරිමිත දයාන්විත අසමසම කරුණාන්විත වූ අල්ලාහ් ගේ නාමයෙනි.

පෙරවදන

සියලු ප්රශංසා අල්ලාහ් සතුය. ඔහු සියල්ල සැලැසුම් කර යහපත් මඟට යොමු කරන්නේය. ඔහුගේ අභිලාෂය පරිදි ශුක්රාණුවෙන් පිරිමි සහ ගැහැණු යුවළ නිර්මාණය කළේය. අල්ලාහ් පමණක් හැර වන්දනාමානයට සුදුසු වෙන කිසිවෙකු නොමැත. ඔහුට කිසිම හවුල්කරුවෙකු නැතැයි මම සාක්ෂි දරමි. ආරම්භයේදී සහ අවසානයයේදී ප්රශංසා හිමිවන්නේ අල්ලාහ්ටමය. එමෙන්ම මුහම්මද් නබි (සල්ලලාහු අලෙයිහි වසල්ලම්) තුමාණන් ඔහුගේ මෙහෙකරුවා සහ ඔහුගේ දූතයා බවට ද මම සාක්ෂි දරමි. තවද එතුමාණන්ව ඉහල අහසට අල්ලාහ්ගේ බල මහිමයෙන් රැගෙන යන ලද අතර එහිදී එතුමාණන් විසින් අල්ලාහ්ගේ අති විශිෂ්ඨ වූ ආශ්චර්යයන් දැක බලාගන්නා ලදී. එතුමා, එතුමාගේ පවුලේ ඥාතීන් මෙන්ම බුද්ධි ඥානයෙන් සහ යහපත් ගුණ ධර්මයෙන් යුත් එතුමාගේ හිත මිතුරන් වෙත සදා ශාන්තිය සහ සමාදානයේ ආශිර්වාදය බොහෝ සෙයින් ලැබේවා!

විශේෂයෙන්ම මුස්ලිම් කාන්තාවන් සම්බන්ධයෙන් ඔවුන්ට හිමි තැන ඉස්ලාම් දහමෙහි ඉහල තත්ත්වයෙහිලා සලකන බැවින් ඔවුන් වෙත බොහෝ වැදගත් කාර්යභාරයන් පැවැරී ඇත. මුහම්මද් නබි (සල්ලල්ලාහු අලයිහි වසල්ලම්) තුමාණන් කාන්තාවන්හට විශේෂිත වූ මගපෙන්වීම් රැසක් පෙන්වා දී ඇති අතර එතුමාණන්ගේ ඓතිහාසික අරෆා දේශනාවේදී කාන්තාවන් වෙනුවෙන් අනුශාසනාවක් ද කළහ. සෑම කාලයකදීම ඔවුන් ගැන සැළකිලිමත් වීමේ අනිවාර්යය භාවය හා විශේෂයෙන්ම කාන්තාව අවතක්සේරුවට හා පහත් තත්ත්වයට පත් කර ඇති මෙවැනි කාල වකවානුවක ඔවුන් සියඵ උවදුරුවලින් රැකගැනීමේ අවශ්යතාවය සහ ඔවුන්ගේ විමුක්තිය සදහා මග පාදා දීමේ අවශ්යතාවය ගැන ද එතුමාණන් විසින් අවධාරණය කර ඇත.

මෙම පොතෙහි කාන්තාවන්ට අදාල නීති රීති අන්තර්ගත වී ඇති බැවින් මෙය ඔවුන්ගේ ජීවිතය සාරවත් කරන සංකේතයක් වේවා යැයි ප්රාර්ථනා කරමි. මෙය, ඒ සඳහා දායකත්වයක් සපයන අතර, මහඟු ප්රයත්නයක ප්රතිඵලයකි. අල්ලාහ් මෙම ප්රයත්නය තුළින් ඉහල ප්රතිඵල ලබාගැනීමේ හැකියාව ලබා දෙත්වා! එබැවින් පාඨකයින් විසින් මෙම පොතෙහි අඩංගු කරුණු පියවරින් පියවර හොඳින් කියවා, වඩා හොඳ හා සම්පූර්ණ ප්රතිඵලයක් නෙලා ගනු ඇතැයි මම අපේක්ෂා කරමි.

මා කෙටියෙන් ඉදිරිපත් කළ කරුණු පහත සදහන් පාඩම්වල අන්තර් ගත වී ඇත.

පළමු වන පාඩම: පොදු නීති රීති.

දෙවන පාඩම: කාන්තාව සිය ඇඟ පසඟ අලංකාර කර ගැනීම පිළිබද නීති.

තුන්වන පාඩම: ඔසප් තත්ත්වය, ඔසප් කාලය ඉක්මවා ලේ වහනය වීම, දරු ප්රසූතියෙන් පසු ලේ වහනය වීම පිළිබද නීති රීති.

සිව්වන පාඩම: කාන්තාවන්ගේ ඇඳුම් හා හිජාබ් පිළිබඳ නීති රීති.

පස්වන පාඩම: කාන්තාවන්ගේ සලාතයන් සම්බන්ධ නීති රීති පැහැදිලි කිරීම.

හයවන පාඩම: මරණ කටයුතු සම්බන්ධ කාන්තාවකට අදාල නීති රීති.

සත්වන පාඩම: උපවාස ශීලය සම්බන්ධ කාන්තාවන්ට අදාල නීති රීති.

අටවන පාඩම: හජ් උම්රා සම්බන්ධ කාන්තාවන්ට අදාල නීති රීති.

නවවන පාඩම: විවාහ කරගැනීමට අනුමැතිය ඇති සහ නැති කරුණු සම්බන්ධ නීති රීති.

අවසාන වශයෙන් දහවන පාඩම: කාන්තා අභිමානය හා ඇගේ නිර්මළ කම ආරක්ෂා කරගැනීම සම්බන්ධ පැහැදිලි කිරීම්.

කතෘ

පළමුවන පාඩම

පොදු නීති රීති.

ඉස්ලාමයට පෙර වූ යුගයේ කාන්තාවන්ගේ තත්ත්වය: ඉස්ලාමයට පෙරවූ කාලය ලෙස හැඳින්වන්නේ, ව්ශේෂයෙන් අරාබිවරුන් සහ ලොව අනිකුත් ජනයා පොදුවේ ජීවත් වූ අවිද්යාවේ යුගයයි. දෙවියන්ගේ පණිවිඩකරුවන් එවනු ලැබු අවධියේ ජීවත්වූ මිනිස් සමාජය යහ මාර්ගවලින් පාඩම් ඉගෙන ගත්හ. කාලයකින් අරාබිවරුන් සහ අරාබි නොවන පිරිස අතර ඉතිරිව සිටි දහම් ලද ජනතාවගේ ක්රියා රටාවන් ද පිළිකුල් සහගත විය. අල්හදීසයේ සඳහන් පරිදි, කිසිදු මගපෙන්වීම් නොමැතිව ජීවත් වූ අරාබිවරුන් වෙත අල්ලාහ් ඔහුගේ බැල්ම යොමු කළේය. එම වකවානුවේ කාන්තාවන් බොහෝ දුෂ්කර තත්ත්වයකට මුහුණ දී සිටියෝය. විශේෂයෙන් අරාබි ප්රජාව ගැහැණු දරුවකුගේ උපත පිළිකුලට ලක් කළ අතර, ඔවුන්ගෙන් සමහරු ගැහැණු දරුවා පණපිටින්ම හුස්ම හිරවී මිය යන තෙක්ම පොලොව යට මිහිදන් කරන්නට ගත්තෝය. සමහර ගැහැණු දරුවන් මෙවැනි මරණයෙන් බේරුන ද, ඔවුන් ඉතා නින්දිත ලෙස හා ඉතා පහත් ජීවිතයක් ගත කළහ. අල්ලාහ් මේ සම්බන්ධයෙන් මෙසේ පවසයි. ඔවුන්ගෙන් කෙනෙකුට ගැහැණු දරුවකුගේ උපත පිළිබද සුභාරංචිය දන්වනු ලැබුවේ නම් ඔවුන්ගේ මුහුණ කඵපැහැ ගැන්වයි. තවද ඔහු දුක සඟවා ගනී.(සූරා 16 අන්-නහ්ල් 58) කවර දෙයක් පිළිබඳව ඔහුට ශුභාරංචි දෙනු ලැබුවේ ද එහි අසුභකම හේතුවෙන් අවමානය සමඟ එය රඳවා තබා ගන්නේ ද එසේ නැතිනම් වැල්ලෙහි සඟවන්නේ දැයි සිතා ජනයාගෙන් ඔහු සැඟවෙන්නට බලයි. දැනගනු ඔවුන් තීන්දු කරන දෑ නපුරු විය. ( සූරා 16 අන්-නහ්ල් 59). උත්තරීතර අල්ලාහ් මෙසේ ද පවසා ඇත. පණ පිටින් මිහිදන් කරනු ලැබු ගැහැණු දරුවා (මරණින් මතු දිනයේදී) විමසනු ලබන විට, තමන් ඝාතනය කරනු ලැබුවේ කුමන වරදකට දැයි (විමසනු ලබන විට,)

අල් මව්ඌදතු යනු පසට යටවී ප්රාණය යන තුරු පණ පිටින් පොලොව යට මිහිදන් කරනු ලබන ගැහැණු දැරිිය වේ. ඇය ළදරු ඝාතනයෙන් ආරක්ෂා වී ජීවත් වුව ද අවමන් ජීවිතයක් ගත කරනු ඇත. ඇගේ ඥාතියාට කොමපණ මුදල් තිබුණ ද ඔහුගේ උරුමයේ කොටසක් ඇයට හිමි වන්නේ නැත. ඒ සමගම ඇය දුප්පත්කමෙන් හා දිළිඳුකමෙන් දුක් විඳිනු ඇත. එය ඔවුන් උරුමය වෙන් කරනුයේ පිරිමින්ට පමණක් මිස කාන්තාවන්ට නොවන බැවිණි. ස්වාමිපුරුෂයාගේ මරණයකදී ඔහුගේ මුදල් මෙන් ඇයද උරුම කරනු ලැබුවාය. එමඟින් තමන්ට සිදු වන හිරිහැර, ලැජ්ජාව සහ අයුක්තිය නොසලකා හරිමින්, නිශ්චිත භාර්යාවන් ගණනකට බැඳී නොසිටි කාන්තාවන් විශාල සංඛ්යාවක් එක් ස්වාමි පුරුෂයෙකු යටතේ ජීවත් වූහ.

ඉස්ලාම් දහමේ උදාවීමත් සමග කාන්තාවන්ගේ තත්ත්වය

ඉස්ලාමයේ උදාවීමත් සමගම කාන්තා පක්ෂය වැටී සිටි අයුක්ති සහගත තත්ත්වය ඉවත් කරනු ලැබු අතර, ඔවුහු මානුෂික මුහුණුවරකින් සලකනු ලැබූහ. උත්තරීතර අල්ලාහ් මෙසේ පවසයි: "මිනිසුනි! ඔබ සියලු දෙනා අපි මැවුවේ පිරිමියෙකු සහ ගැහැණියෙකුගේ මාර්ගයෙනි." සියලු කීර්ති හිමි අල්ලාහ් පවසා සිටින වග නම්, මිනිස් සංහතියේ මානුෂික මෙහෙවර සඳහා කාන්තාව පිරිමින්ගේ හවුල්කාරිය වන අතරම සියලු ක්රියා සඳහා පිරිමි පක්ෂයට මෙන්ම කාන්තාවටද සමාන යහපත් ප්රතිඵල හා දඬුවම් ලැබීමේ දී ඇය ද හවුල්කාරී වන බවයි. "පුරුෂයකුගෙන් හෝ ස්ත්රියකගෙන් හෝ වේවා, කවරෙකු විශ්වාස කරන්නෙකු ලෙස යහපත් ක්රියා කරන්නේද, අපි (මෙලොව) හොඳ ජීවිතයක් ගත කිරීමට ඔවුනට ජීවය ලබා දෙන්නෙමු. තවද ඔවුන් කරමින් සිටි විශිෂ්ඨ දෑ සඳහා අපි (මතුලොවෙහි) ඔවුන්ට යහපත් ප්රතිඵල නියත වශෙයන්ම ලබා දෙන්නෙමු." උත්තරීතර අල්ලාහ් මෙසේ ද පවසා ඇත. "වංචනික පිරිමින්ටද, වංචනික ගැහැණුන්ටද, අල්ලාහ්ට සමානයන් තබන පිරිමින්ටද, අල්ලාහ්ට සමානයන් තබන ගැහැණුන්ටද නියත වශෙයන්ම අල්ලාහ් දඩුවම් කරනු ඇත." මියගිය සැමියාගෙන් උරුම කර ගත හැකි (වස්තුව සේ) කාන්තාවන් සළකනු ලැබීම සියලු කීර්ති හිමි අල්ලාහ් තහනම් කර ඇත. අල්ලාහ් මෙසේ පවසා ඇත. "අහෝ දේවත්වය විශ්වාස කළවුනි! ඔබ, බලහත්කාරයෙන් ස්ත්රීන් උරුම කර ගැනීම නීත්යානුකූල නොවේ." මෙමගින් ඇයගේ පෞද්ගලිකත්වයේ ස්වාධීනත්වයට සහතික කළේය. ඇය උරුමක්කාරියක් බවට පත් කළ අතරම වෙනකෙකුට උරුම කරනු ලැබූ තැනැත්තියක් බවට පත් කළේ නැත. එමෙන්ම ඇගේ ඥාතියෙකුගේ ධනයට උරුමය ලබන්නට ඇයට හැකි විය. මේ ගැන අල්ලාහ් මෙසේ පවසයි. "(මියගිය) දෙමව්පියන් හා සමීප ඥාතීන් අත හැර ගිය දෙයින් පුරුෂයින්ට කොටසක් උරුම වේ. තවද (මියගිය) දෙමව්පියන් හා සමීප ඥාතීන් අත හැර ගිය දෙයින් කාන්තාවන්ටද කොටසක් උරුම වේ. එය ස්වල්පයක් හෝ විශාල කොටසක් හෝ වේවා. මෙය අල්ලාහ් විසින් අනිවාර්යයෙන් නියමකර ඇති කොටසක් වේ." උත්තරීතර අල්ලාහ් මෙසේ ද පවසා ඇත. "නුඹලාගේ දරුවන්ගේ උරුමය සම්බන්ධයෙන් අල්ලාහ් (මෙසේ) නුඹලාට නියම කරයි.(නුඹලාගේ දරුවන්ගෙන්) පිරිමියාට ගැහැණු දෙදෙනෙකුගේ කොටස මෙන් විය යුතුයි. (මිය ගිය අයට) ගැහැණු දරුවන් දෙදෙනෙකුට වඩා සිටී නම් ඔහු (මිය ගිය තැනැත්තා) හැර ගිය දෙයින් ඔවුන්ට තුනෙන් දෙකක් විය යුතුයි. තවද එකම දුවෙක් වී නම් ඇයට (සම්ර්ණ දේපලෙන්) හරි අඩකි." මෙම වදනේ අවසානයේදී, ගැහැණුන්ගේ උරුමය සම්බන්ධයෙන් මව, දියණිය,සොහොයුරිය සහ බිරිඳගේ උරුමය පිළිබදව සඳහන් වී ඇත. විවාහය විෂයයෙහි බිරින්දෑවරුන් අතර හැකි පමණින් යුක්තිය සාධාරණය ඉටු කිරීමේ කොන්දේසිය මත පිරිමියාට උපරිමයෙන් විවාහ හතරකට අල්ලාහ් සීමා කර ඇත. ඔවුන් සමග යහපත් අයුරින් ජීවත් වීම අනිවාර්යය කළේය. අල්ලාහ් තආලා මෙසේද පවසයි. "ඔබලා කාන්තාවන් සමග යහපත් අයුරින් හැසිෙරන්න." ඔහු (අල්ලාහ්) මහර් (විවාහයකදී පිරිමියා විසින් මනමාලියට ප්රදානය කරන) ත්යාගය ඇයට උරුම වූ දෙයක් බවට පත් කළේය. සිය කැමැත්තෙන් කාන්තාව අතහැරියා මිස සම්පූර්ණයෙන්ම ඇයට ලබා දීමට නියෝග කළේය. තවද ඔහු මෙසේ පැවසීය. "තව ද නුඹලා (විවාහ වන) කාන්තාවන්ට ඔවුන්ගේ මහර් (හෙවත් විවාහ දීමනාවන්) සිත් මනාපයෙන් පිරිනමනු. නමුත් ඔවුන් ඉන් කිසිවක් නුඹලාට ස්වකැමැත්තෙන් පිරිනැමුවේ නම් එවිට නුඹලා එය සතුටින් හා පහසුවෙන් අනුභව කරනු." කාන්තාව ස්වාමිපුරුෂයාගේ නිවසේ යහපත අණ කරන අයහපත දුරු කරන පාලිකාව ලෙස ද දූ දරුවන්ට යහමග පෙන්වන නායිකාව ලෙස ද අල්ලාහ් පත් කළේය. නබි (සල්ලල්ලාහු අලෙයිහි වසල්ලම්) තුමාණන් මෙසේ පැවැසුෙව්ය. ස්ත්රීය ඇගේ ස්වාමිපුරුෂයාගේ නිවසෙහි (කටයුතු පිළිබද) වගකිව යුතු අතර ඇගේ වගකීම ගැන මතුවට ඇයගෙන් අසනු ලබනු ඇත. ස්වාමි පුරුෂයා විසින් සිය කාන්තාවන්ට අවශ්ය විය හියදම් හා ඇයට අවශ්ය ඇඳුම් පැළඳුම් යහපත් ලෙස සළසා දීම අනිවාර්ය කළේය.

ඉස්ලාමයේ හතුරන් සහ ඔවුන්ගේ අනුගාමිකයන්ගේ එකම අභිලාශය වී ඇත්තේ කාන්තාවන්ගේ ගෞරවය හා ඔවුන්ගේ අයිතිවාසිකම් කප්පාදු කිරීමයි.

ඉස්ලාමයේ සතුරන් එනම් මිනිසත් භාවයේ සතුරන් සහ කෛරාටිකයන් හෙවත් හදවත් තුල දූෂිත රෝගාබාධ වලින් පීඩාවට පත්වී සිටින්නන්, මුස්ලිම් කාන්තාවන් ඉස්ලාම් තුලින් හිමි කරගත් ගරුත්වය, අභිමානය හා සංරක්ෂණය දැක ඔවුහු කුපිතයට පත් වී සිටිති. මෙම කෛරාටික අසත්පුරුෂයින් ඔවුන්ගේ කාන්තාවන් අධර්මය වෙත යොමු කර ඔවුන්ගේ පිපාසිත ආශාවන් තෘප්තිමත් කර ගැනීමෙන් පසු, මුස්ලිම් කාන්තාවන් දඩමීමා කරෙගන ඉස්ලාමය විනාශ කරන ආයුධයක් ලෙස භාවිතා කිරීමටත්, ඉස්ලාමයේ දුර්වල බැතිමතුන් සහ දුෂිත අදහස් ඇති දනන් දඩයම් කිරීමට වෙර දරති. අල්ලාහ් දෙවිඳාණන් මෙසේ සදහන් කරයි. "තවද ආශාවන් අනුගමනය කරන්නෝ නුඹලා (නිවැරදි මාර්ගෙයන්) බොහෝ ඈත් විය යුතු යැයි අපේක්ෂා කරති."

මුස්ලිම් වරුන් පිළිබද ක්රෝධයෙන් පෙලෙන අයට අවශ්ය කරන්නේ ලෞකික ආශාවන් ගෙන් හා ෂයිතාන්ගේ ප්රවනතාවයට හසුවූ අය ඉදිරිපිට කාන්තාව ප්රදර්ශනය කර ඔවුන් මිළ අඩු භාණ්ඩයක් බවට පත් කිරීමටයි. එසේත් නැත්නම් කාන්තාව අනාවරණය වූ භාණ්ඩයක් බවට පත් කර ඔවුන්ගේ සුන්දර දසුන් රාගිකයින් ඉදිරියේ ප්රදර්ශන කර ඔවුන්ගේ මනදොල පිනවීමටය. නැත්නම් මෙම කාන්තාවන් හරහා මීටත් වඩා පහත් නීච ක්රියා වෙත අනුබල දෙන වෙළඳ භාණ්ඩයක් බවට පත් කිරීමයි. එබැවින් කාන්තාවන් සිය නිවසින් පිටව යාමට උත්සාහ කරන අතර, ඔවුන් පිරිමින් සමග කරටකර කටයුතු කිරීමට පෙළඹීමක් කරන බව දකින්නට ලැබේ. එහි ප්රතිඵලයක් වශයෙන් කාන්තාවන් ගිලන් ගතවූ පිරිමින්ට සාත්තු කිරීම, රෝහලේ පිරිමින්ට හෙද සේවයෙහි යෙදීම, ගුවන් යානයේ සේවිකාවක් වශයෙන් කටයුතු කිරීම, පිරිමි/ කාන්තා මිශ්ර අධ්යාපන ආයතනයන්හි ගුරු සේවයෙහි යෙදීම, වේදිකාවේ රංගන ශිල්පිනියක් සහ ගායන ශිල්පිනියක් බවට පත්වීම, ප්රසිද්ධ ජනමාධ්යයන්හි නිවේදිකාවක් ලෙස කටයුතු කිරීම, මෙවැනි සේවාවන් තුලින් ඔවුන් සිය හඬ සහ ප්රතිරූපය ප්රදර්ශනය කරති. එපමණක් නොව අසභ්ය දර්ශන අඩංගු සඟරා සහ චිත්ර කතා පත්රවල ආකර්ශනීය තරුණියන්ගේ චරිතවලට පන පෙවීමේ භූමිකාවක යෙදීමටද ඔවුන්ව භාවිතා කරති. ඔවුන්ගේ නිරුවත යනු ව්යාපාරිකයන්ගේ සඟරා ප්රවර්ධනය කිරීම සහ වෙළඳාම් දියුණු කිරීමේ මාර්ගයයි. සමහර සමාගම් සහ කර්මාන්තශාලාවල අයිතිකරුවන් ඔවුන්ගේ නිෂ්පාදනවල සංකේත සහ පින්තූර සඳහා කාන්තාවන්ගේ පින්තූර ඔවුන්ගේ ප්රදර්ශන භාණ්ඩ සහ නිෂ්පාදන මත සංකේතයක් ලෙස තබා ඇත. මෙවැනි වැරදි ක්රියා පටිපාටිය නිසා කාන්තාවන් තම නිවසේ සිය සැමියාගේ සහ දරුවන්ගේ යුතුකම් පසෙක තබා රැකියාවන්හි නිරත වීමේ ප්රතිපලයක් වශයෙන් සිය සැමියන්, තම දරුවන් රැකබලා ගැනීමට සහ තම ගේ දොර වැඩ කරගැනීම සඳහා විදේශීය ශ්රමිකයන් ගෙන්වා ගැනීමේ ප්රවනතාවයක් පවතී. (මෙය මැදපෙරදිග දේශයන්ශි තත්ත්වයයි.) මෙම විකල් ක්රමවේදය නිසා විවිධ ආකාරයේ අනාචාරයන් සිදුවන අතර පවුල් සමාගම් පරිහානිය කරා ගමන් කරති.

පහත දැක්වෙන සීමාවන් සහ කොන්දේසි යටතේ කාන්තාවකට තම නිවසින් පිටත වැඩ කිරීම ගැන විරුද්ධත්වයක් නොමැත.ඒවා නම්.

අදාල කාර්යය කිරීමට අවශ්ය පිරිමින් නොමැති විටක සහ එම කාර්යය ජනතාවවට අත්යවශ්ය සේවයක් නම් එවැනි අවස්ථාවක කාන්තාවක් එම කටයුතු වල යෙදීම.

කාන්තාවකගේ ප්රධාන කාර්යය වන නිවසෙහි වැඩ කටයුතු සිදු කිරීමෙන් පසුව ඉහත සදහන් ආකාරයේ කටයුතු වල යෙදීම.

මෙසේ කාන්තාවන් විසින් සිදු කරන්නා වූ අධ්යාපනය, කාන්තා වෛද්ය සේවා හෝ හෙද සේවා යනාදිය පිරිමින්ගෙන් තොරව කාන්තාවන් සිටින පරිසරය තුළ සිදු කිරීම.

කාන්තාවන් තමන්ගේ ආගමික විෂයන් ඉගෙන ගත යුතු බැවින් ආගම් පිළිබඳ කරුණු ඉගෙන ගැනීමට ඔවුන්ට තහනමක් නැත.මෙය කාන්තාවන්ට අවශ්ය වූ අධ්යාපනයක් ලෙස තිබිය යුතු අතර මුස්ලිම් පල්ලිය හා ඒ හා සමාන පිරිමින්ගෙන් දුරස් වූ ස්ථානයක අධ්යාපනය හැදෑරීමේ කටයුතුවල නිරත වීය හැක. මෙම ක්රියාවලිය ඉස්ලාම් මූලාරම්භයේදී සිදු වූ ආකාරයට සිදුවීමට වග බලා ගතයුතු වේ.

දෙවන ඡේදය

කාන්තාවකගේ අඟ පසඟ අලංකාර කර ගැනීම පිළිබද විස්තර.

ෆිත්රා හෙවත් ස්වභාව ධර්මය විසින් දායාද කළ ලක්ෂණ අතරින් ඇයට ආවේනික වූ ඇයට සුදුසු කටයුතු සිදු කිරීමට ඉස්ලාමය ඉල්ලා සිටියි.

(ඒ අනුව) නියපොතු කැපීම,.ඒවා හොඳින් සකස් කර ගැනීම. නියපොතු කැපීම ඉස්ලාමීය විද්වතුන්ගේ ඒකමතික තීණ්දුවට අනුව සුන්නාහ් පිළිවෙතකි.මන්ද එය හදීසයේ සඳහන් ආකාරයට සොබාදහමේ ලක්ෂණයන්ගෙන් එකකි. නියපොතු ඉවත් කිරීම පිරිසිදුකමට සහ අලංකාරයට මග පාදයි. ඒවා දිගට වැවීමට ඉඩ හැරීම විකෘති ලක්ෂණයක් පෙන්නුම් කරන අතර, වන සතුන්ට සමාන පෙනුමක් ලබා දෙයි. මෙසේ කිරීමෙන් එය පිරිසිදු කමට බාධාවක් වන අතර, ඒවාට යටින් කුණු රැඳීම, ජලය ඇතුල්වීම වැළකීම වැනි අහිත කර දේ නියපොතු වැවීම නිසා සිදුවේ. සමහර මුස්ලිම් කාන්තාවන් බටහිර සංකෘතිය අනුගමනය කරමින් නියපොතු වැවීම කෙරෙහි ඇල්මක් දක්වති. මෙවැනි ක්රියා හුදෙක්ම සුන්නාහ් පිළිබද නොදැනුවත් කම නිසා සිදු වේ.

නබි තුමාණන්ගේ මග පෙන්වීමකට අනුව ස්ත්රියකට කිහිල්ලේ රෝම හා වෙනත් ලිංගය ආශ්රිතව ඇති රෝම ඉවත් කිරීම සිදු කළ යුතුය. කාන්තාවකගේ අලංකාරය පවත්වාගෙන යාම වස් ඒවා සෑම සතියකට වරක් සිදු කිරීම සුදුසුය. නමුත් දින හතලිහකට වඩා වැඩි කාලයක් ඉවත් නොකර සිටීමෙන් වැළකී සිටිය යුතුයි.

කාන්තාවන් විසින් හිසකෙස් සහ ඇහිබැමි සම්බන්ධයෙන් කළ යුතු දේ සහ නොකළ යුතු දේ පිළිබඳ විස්තර සහ වර්ණ කිරීම් හා හිසකෙස් සායම් කිරීම් පිළිබඳ නීති රීති.

කාන්තාවකට හිසකෙස් වැවීමට හැකි අතර ඒවා අත්යවශ්ය හේතුවකට මිස බූ ගෑම තහනම්ය.

සෞදි අරාබියේ ප්රධාන විද්වතකු වන ෂෙයික් මුහම්මද් ඉබ්නු ඉබ්රාහිම් ආල-ෂෙයික් මුෆ්ති විසින් මෙසේ පවසා ඇත. කාන්තාවන් හිසේ කෙස් බූ ගා ඉවත් නොකළ යුතුය. මේ ගැන අලී (රළියල්ලාහු අන්හු) දැන්වු හදීසයක් සුනන් ග්රන්ථයේ අන් නසායි විසින් ද, උස්මාන් (රළියල්ලාහු අන්හු) දැන්වු හදීසයක් අල් බස්සාර් විසින් ද, ඉක්රිමා (රළියල්ලාහු අන්හු) දැන්වූ හදීසයක් ඉබ්නු ජරීර් විසින් දි වාර්තා කර ඇත. නබි තුමාණන් කාන්තාවන් සිය හිසකෙස් බූ ගෑම වළක්වා ඇත.

මුහම්මද් (සල්ලල්ලාහු අලෙයිහි වසල්ලම්) තුමාණන් විසින් වැළකී සිටීමේ ආඥාවක් නිකුත් වූ විටක ඒ සම්බන්ධයෙන් (සුන්නාවෙහි) වෙනත් ප්රබල කිසිඳු විකල්ප අදහසක් දක්නට නොලැබෙන්නේ නම්, එම ක්රියාව හරාම් හෙවත් තහනම් බවට තහවුරු කරනු ලැබේ.

මුල්ලාහ් අලි කාරි තුමා (අල් මිර්කාත් ෂරහු අල් මිශ්කාත්) හි විස්තර කරමින් මෙසේ පවසයි. පිරිමින්ට තමන්ගේ රැවුුල ගාම්බීරත්වය පෙන්නුම් කරන්නේ යම්සේද කාන්තාවකට ඇගේ හිසකෙස් එලෙසය. එය අලංකාරය ප්රියමනාප පෙනුම පිළිබිඹු කරයි.

කාන්තාවන් තම දිගු කොණ්ඩය කොටට කැපීම, අලංකාරයට නොව අවශ්යතාවයට අනුව සිදු කළ යුතුය. නිදසුනක් ලෙස එය නඩත්තු කිරීම දුෂ්කරතාවයක් යැයි සිතනවා නම් හෝ ඒවා දිගට වැවී තිබීම අපහසු යැයි දැනෙනවා නම් එවැනි අවස්ථාවකදී අවශ්යතාවයට අනුව ඒවා අඩු කිරීමට හැක. මුහම්මද් (සල්ලල්ලාහු අලෙයිහි වසල්ලම්) තුමාණන්ගේ භාර්යාවන් කිහිපදෙනෙකු එතුමාගේ අභාවයෙන් පසුව අලංකාරවත් කමින් මිදෙනු පිණිස සහ එහි අවශ්යතාවයක් නොමති බැවින් පහසුව පිණිස ඉතා දිගු වරලස කොටට කපා සකස්කර ගත්හ.

කාන්තාවකගේ හිස කෙස් කොටට කැපීම තුළින් නොමග ගියවුන් සහ වෙනත් සංස්කෘති අනුකරනය කිරීම හෝ පිරිමින් අනුකරනය කිරීම අරමුණ කර ගන්නේ නම් එසේ කිරීම කිසිම සැකයකින් තොරව තහනම්ය. මන්ද වෙනත් සංස්කෘති අනුකරනය කිරීම හෝ පිරිමින් අනුකරනය කිරීම ඉස්ලාමයේ තහනම් කර ඇති බැවිනි. තවද කාන්තාවක් අලංකරණය වෙනුවෙන් කෙස් කපා දැමීම ද තහනම් වේ.

අපේ ෂෙයික් කෙනෙකු වන මුහම්මද් අල් අමී අල්-ෂන්කිතී (අල්ලාහ් ඔහුට කරුණාව දක්වත්වා!) අළ්වාඋල් බයාන් හි මෙසේ පැවසුුහ."කාන්තාවන් යුරෝපීය රටවල් අනුකරනය කරමින් සිය හිසකෙස් කපා සකස් කිරීම සමාජ චාරිත්රයක් බවට පත් වෙමින් තිබේ. මෙය ඉස්ලාමයට පෙර මුස්ලිම් කාන්තාවන් හා සාමාන්ය මුස්ලීම් කාන්තාවන්ගේ පිළිවෙතට පටහැනිය. මෙය ආගම් තුළ මෙන්ම සදාචාරය අතින්ද ගැටලුකාරී තත්ත්වයක් ඇති කරයි. පසුව එතුමා හදීසයක් මෙසේ පැහැදි කළේය. නබි තුමාණන්ගේ බිරින්දෑවරුන්, ඔවුන් හිස්වලින් බහුල කොටසක් ඉවත් කරගත්හ. මුහම්මද් (සල්ලල්ලාහු අලෙයිහි වසල්ලම්) තුමාගේ භාර්යාවන්, නබි තුමාණන්ගේ මරණයෙන් පසු ඔවුන්ගේ හිසකෙස් කොටට කපා ඉවත් කළහ. එතුමාණන්ගේ මරණයට පෙර ඔවුහු තමන්ව අලංකාර කරගත්හ. ඔවුන්ගේ කැපී පෙනෙන අලංකරණය වූයේ ඔවුන්ගේ හිස කෙස්ය. එතුමාණන්ගේ අභාවයෙන් පසු ඔවුන්ටම ආවේනික වු සාරධර්මයක් විය. ඔවුන් ලොවේ අනිකුත් කාන්තාවන්ගේ තත්ත්වයෙන් වෙනස් වූහ. අනිකුත් කාන්තාවන් මෙන් නොව ඔවුන්ගේ මරණය දක්වා ඔවුන්ට තවත් විවාහයක් කරගැනීමට නොහැක. ආශාවන් අත්හැරීමට සිදු විය. ජීවිතයේ සැමදා ඉද්දා (පොරොත්තු) ත්යෙහි නියලීමට සිදු විය. අල්ලාහ් මෙසේ පවසයි. තවද අල්ලාහ්ගේ දූතයාණන්ට නුඹලා වේදනා කිරීමත්, ඔහුගෙන් පසු ව ඔහුගේ බිරියන් කිසිවිටෙක නුඹලා විවාහ කර ගැනීමත් නුඹලාට නොවීය. නියත වශයෙන්ම එය අල්ලාහ් අබියස අතිමහත් කරුණකි. පොදුවේ (විවාහය ගැන) පිරිමින්ගේ බලාපොරොත්තු සුන් වීමත් සමඟම විශේෂයෙන් අලංකාර කිරීමේ අවශ්යතාවයෙන් සහ එවැනි වෙනත් කරුණුවලින් ඔවුන්ට මිදීමට සිදු විය.

කාන්තාවකගේ හිසකෙස් (පිරිසිදු බව) ආරක්ෂා කර නඩත්තු කර යුතුයි. ඒවා කරලට ගොතා ගත යුතු අතර ඒ සියල්ල එකට ගොතා හිස මත (අලංකාරයට) තැබීම හෝ හිසේ පැත්තක වැටෙන ලෙස සකස් කිරීම හෝ නොකළ යුතුය.

අශ් ෂෙයික් ඉබ්නු තයිමියියා සිය මජ්මූඃ අල්fපතාවා පිටු (22/145) හි මෙසේ පැවැසීය. සමහර අයහපත් කාන්තාවන් ඔවුන්ගේ හිසකෙස් කරලට ගොතා ඔවුන්ගේ උරහිස් අතරේ එක් පැත්තකට වැටන සේ (අලංකාරය පෙන්වීමට) තැත් කරන බවක් පෙනී යයි.

සවුදි අරාබියාවේ ප්රධාන විද්වතෙකු වන අෂ්ෂෙයිහ් මුහම්මද් බින් ඉබ්රාහීම් මෙසේ පවසයි. නවීන යුගයේදී සමහර මුස්ලිම් කාන්තාවන් සිය හිස කෙස්වලින් කොටසක් ගොතා බඳින අතර, අනෙක් කොටස ඔවුන්ගේ උරහිස් අතරේ වැටන සේ හෝ හිස මත ගොතා තබා අලංකාර කරති. මෙය දේව ප්රතික්ෂේප කරන බටහිර කාන්තාවන්ගේ සිරිත අනුකරණය කිරීම වන හෙයින් අනුමත කළ නොහැක. අබූ හුරෙයිරා (රළියල්ලාහු අන්හු) වාර්තා කරන හදීසයක අල්ලාහ්ගේ දූතයාණන් (සල්ලල්ලාහු අලෙයිහි වසල්ලම්) මෙසේ දන්වයි. අපා ගින්නට අයත් සළකුණු දෙකකින් යුත්, මීට පෙර මා නොදුටු ජන කොටසක් සිිටිති. එක් පිරිසක් ඔවුන්ගේ දෑත් සතුව ගවයින්ගේ වලිගය මෙන් වූ කස තිබෙන අතර ඒ ජන කොටස් දෙක ඒ මිනිසුන්ගේ පහරට ලක්වෙති. ඔවුන් කවුරුන්ද යත් වස්ත්ර ඇඳ සිටියද නිරුවතින් මෙන් සිටිති. අනිත් පිරිස දහමින් ඈත් වී සිටින අතර ඔවුන්ගේ ගමන් බිමන්හි රටාව ගැස්සෙන පැද්දෙන ලතාවකට අනුවය. ඔටුවාගේ පිට තිබන මොල්ලිය මෙන් ඔවුන් හිස මත වරලස ගොතා බැඳ අලංකාර කරති. ඔවුහු ස්වර්ගයට ඇතුළු නොවන අතර එහි සුවඳ කෙතරම් දුරට විහිදුනත් ඔවුන් වෙත හමන්නේ නැත.

සමහර විද්වතුන් මේ ගැන පවසන්නේ මෙසේය. "විජාතික සංකෘතිය සහ ඔවුන්ගේ ආදර්ශය අනුගමනය කරන මුස්ලිම් කාන්තාවන් අප අතර සිටිති. ඔවුන්ගේ ගමනේ ශෛලය මෙන් මුස්ලිම් කාන්තාවන්ද සිය ගමනේ අලංකාරය පෙන්වීමට උත්සහ කරති. මෙය සමාජය අපහසුතාවයට පත් කරන හැසිරීමකි.

මුස්ලිම් කාන්තාවක් තම හිසකෙස් මුඩු ගෑම හෝ අනවශ්ය ලෙස කොටට කපා දැමීම තහනම් වන අතර, අනුන්ගේ හිසකෙස් (බොරු කොණ්ඩ හෝ හවරි) තමන් වෙත ලබා ගැනීම සහ වෙනත් හිස කෙස් මගින් තමන්ගේ හිසකෙසට එකතු කර (අලංකාර කිරීම) ඔවුන් කෙරෙහි තහනම් කර ඇත. සහීහ් හදීස් ග්රන්ථයන්හි මෙසේ සදහන් වී ඇත. අල්ලාහ්ගේ දූතයාණෝ (එතුමා කෙරෙහි අල්ලාහ්ගේ ශාන්තිය හා සමාදානය උදා වේවා!), සිය හිසකෙස් සමග අනිත් කාන්තාවන් විසින් සකස් කරන ලද කෘතිම හිසකෙස් (හවරි) ලබා ගන්නා කාන්තාවන් සහ ඒවා සපයන කාන්තාවන් යන දෙපාර්ශ්වය ට ශාප කළහ. අල් වාසිලාහ් යනු තමන්ගේ හිසකෙස් අන් කාන්තාවන් වෙත ලැබෙන්නට සලස්වන කාන්තාවයි, ව අල්මුස්තව්සිලාහ් යනු අන් කාන්තාවන් විසින් කපා වෙන්කළ කෙස් කලඹ තමන්ගේ (හිසකෙස් අලංකාරය සදහා) ලබා ගන්නා තැනත්තියයි. මෙවැනි පිළිවෙත් තුළින් ව්යාජ බවක් ඇති කරන හෙයින් එය තහනම් ක්රියාවක් වන්නේය. බුහාරි සහ මුස්ලිම් ග්රන්තයන්හි සදහන් වන ආකාරයට මුආවියා (රළියල්ලාහු අන්හු) තුමා මදීනා නගරයට පැමණ ජනතාව අමතා දේශනාවක් කළේය. එහිදී එතුමා කාන්තා හිසකෙස් මිටක් අතැතිව මෙසේ පැවැසූහ. 'මෙවැනි කොණ්ඩා සැරසිලිවලින් තමන්ව අලංකාර කරන අප කාන්තාවන්ගේ තත්ත්වය කුමක්ද? මුහම්මද් (සල්ලල්ලාහු අලයිහි වසල්ලම්) තුමාණන් මෙසේ පවසනු මම අසා ඇත්තෙමි.' "වෙනත් කාන්තාවන්ගේ කපා ගත් කොණ්ඩා ගෙන තමන්ගේ හිසකෙස් සකස් කර ගන්නා කාන්තාවන් යනු ව්යාජ ලෙස කටයුතු කරන්නන්ය." හිස කෙස් මෙන් පෙනෙන කෘතිම කෙස් සහ එය පැළඳීම ව්යාජය වේ. මුස්ලිම් කාන්තාවක් සිය ඇහි බැමි ඉවත් කිරීම හෝ එයින් කොටසක් මුුඩු කිරීම හෝ කැපීම, ඒවා ඉවත් කරන යම් ද්රව්යයක් භාවිතා කිරීම තහනම් බව නබි (සල්ලල්ලාහු අලෙයිහ වසල්ලම්) තමාණන් පවසා ඇත. අන්නාමිසා හෙවත් ඇහි බැමි ඉවත්කරනු ලබන්නියන් හට එතුමාණන් ශාප කර ඇත. අන්නාමිසා හෙවත් ඇහි බැමි ඉවත් කරනු ලබන්නියන් හට සහ අල් මුතනාමිසා හෙවත් එසේ කරන්නියන් හට නබි තුමාණන් ශාප කර ඇත. අන් නාමිසා යනු ඇහි බැමි, කෙස් ඉවත් කරගනු ලබන කාන්තාවන්ය. අල්මුතනාමිසා යනු එසේ ඇහි බැමි ඉවත් කරන කාන්තාවන්ය. මෙය අල්ලාහ්ගේ ස්වභාධාර්මික ක්රියාවලියට විරුද්ධ පියවරකි. මෙය ආදම්ගේ පරම්පරාව නොමග යවන බවට ෂෙයිතාන් අධිෂ්ඨාන කරගත් පිළිවෙතයි. ඔහුගේ ප්රකාශය ගැන හදීසයක මෙසේ ද සඳහන් වේ. "තවද මම ඔවුනට නියෝග කරමි. එවිට ඔවුන් අල්ලාහ්ගේ මැවීම් වෙනස් කරනු ඇත" යැයි (ෂෙයිතාන්) පැවසුවේය. සහීහ් ග්රන්ථයෙහි ඉබ්නු මස්ඌද් තුමා වාර්තා කරන හදීසයක මෙසේ සදහන් වේ. ශරීරයෙහි පච්ච කොටා ගන්නා සහ එසේ පච්ච කොටන, ඇහි බැම් හැඩය සකස් කරන, ඉවත් කරන, සහ දන්ත අලංකරණය කරමින් අල්ලාහ්ගේ මැවීම්හි ස්වභාවය වෙනස් කරන කාන්තාවන්ට අල්ලාහ් ශාප කළේය. පසුව මෙසේ ද පැවැසූහ. "අල්ලාහ්ගේ දූතයාණන් (සල්ලල්ලාහු අලෙයිහි වසල්ලම්) ශාප කරන අයට මා ද ශාප කළ යුතු නොවේ ද? එය කීර්තිමත් අල්ලාහ්ගේ පුස්තකයේ විය. රසූල් තුමාණන් ඔබට දේශනා කළේ කුමක්ද? ඒ අනුව ජීවිතය සකස් කරගන්න එතුමා විසින් වළක්වන ලද්දේ කුමක්ද ඒවායින් වැළකී සිටින්න. ඉබ්නු කසීර් තුමා මේ ගැන එතුමාගේ තෆ්සීර් ග්රන්ථයෙහි අංක (2/359) පිටුවෙහි මෙසේ සදහන් කර ඇත. දාරු අල් අන්දලිස් පිටපත

බොහෝ කාන්තාවන් මෙම බරපතල පාපක්රියාවට පැටලී සිටින අතර මෙම අනතුරු දායක තත්ත්වය මුස්ලිම් සමාජය තුළ විශාල පරීක්ෂණක් වී ඇත. තවද, මෙය පාපයක් වන බැවින් මෙවැනි ක්රියාවන් සදහා නියෝග කරන සිය ස්වාමිපුරුෂයින්ට කීකරු වීමෙන් කාන්තාවන් වැළැකී සිටිය යුතුයි.

දත්වල පෙනුම තියුණු කිරීම සදහා හා දත් පැහැපත් කිරීම වස් දත් අලංකාරය උදෙසා දත් අතර හිඩස් ඇති කරගැනීම සඳහා දත් මුවහත් කිරීම කාන්තාවන් කෙරෙහි තහනම් කර ඇත. දත්වල පිහිටීමේ අසාමාන්යතා, දත් ඉස්සරහට ඇදී තිබීම, දිරාපත් වීම වැනි දෝෂ ඇතුළු තවත් බොහෝ දේ සඳහා ප්රතිකාර ලබාගැනීම මෙන්ම ශල්යකර්ම කිරීමට අවසර ඇත. මේ සියල්ල අදාල වෛද්ය වරයෙකුගේ උපදෙස් මත සිදු විය යුතුය.

කාන්තාවන් විසින් සිය ශරීරයේ පච්ච කොටා ගැනීම තහනම් කර ඇත. මුහම්මද් (සල්ලල්ලාහු අලෙයිහි වසල්ලම්) තුමාණන් පච්ච කොටන ක්රියාවෙහි යෙදෙන තැනැත්තා සහ එම සේවය ලබා ගන්නා කාන්තාවන්ට ශාපකර ඇත. අල් වාශිමා යනු කටුවක් උපයෝගී කරගනිමින් මුහුණේ, දෑත්හි සහ වෙනත් ස්ථානයන්හි පච්ච කොටා ඉන්පසු එම ස්ථානය කොහොල් නම් මෙහෙන්දි අයි ලයිනර් වැනි දෑ හෝ තීන්තවලින් පුරවන ක්රියාවෙහි යෙදෙන තැනැත්තාය. අල් මුස්තව්ශිමා යනු එම සේවය ලබා ගන්නා කාන්තාවන්ය. මෙය මහත් වූ පාප ක්රියාවන් වේ. නබි (සල්ලල්ලාහු අලෙයිහි වසල්ලම්) තුමාණන් එය කළ හෝ එම සේවය ලබාගත් තැනැත්තා ශාප කළේ එහි අකුසල් රාශියක් සිදුවන බැවිනි.

කාන්තාවන් (සිය අලංකාරය සදහා) සායම් වර්ග භාවිතා කිරීම, කොණ්ඩා සදහා ඩයි භාවිතය සහ ස්වර්ණාභරණයෙන් සැරසීම සම්බන්ධයෙන් පවතින නීති රීති. මෙය සම්බන්ධයෙන් ඉමාම් නවවී තුමා සිය මජ්මූඃ ග්රන්ථයෙහි පිටුව (1/324) හි මෙසේ සදහන් කර ඇත. හෙන්නා හෙවත් මරුත්තෝන්ඩි භාවිතයෙන් දෑත හා දෙපය වර්ණ කිරීමට විවාහක කාන්තාවන් සඳහා අනුමැතිය ඇත. අබූ දාවුද් වාර්තා කරන හදීසයක් මේ සඳහා සාධකයක් ලෙස පවතී. එක් කාන්තාවක් ආඉෂා (රළියල්ලාහු අන්හා) තුමියගෙන් හෙන්නා ගැන විමසු විිට, එතුමිය ඇයට මෙසේ පිළිතුරු දුන්නාය. ඒවා භාවිත සම්බන්ධයෙන් කිසිම වරදක් නැත. නමුත් මම ඒවා පිලිකුල් කරමි. මගේ සැමියා වූ අල්ලාහ්ගේ දූතයාණන් (අල්ලාහ්ගේ සාමය හා ආශීර්වාද ඔහුට හිමිවේවා!) එහි ගඳ පිලිකුල් කළහ. ආඉෂා (රලියල්ලාහු අන්හා) තුමිය පැවැසූ බවට නසාඊ ඉමාම් තුමා මෙසේ වාර්තා කර ඇත. තිරයක පිටුපස සිට කාන්තාවක් - අල්ලාහ්ගේ දූතයා වෙත පොතක් දිගු කළාය. එවිට නබි තුමාණන් (පොත දිගු කල තැනැත්තාගේ) අත ඇල්ලුවේය. "මෙය පිරිමියෙකුගේද නැතහොත් ස්ත්රියකගේද මම නොදනිමි." යැයි එතුමාණන් පැවැසුවේය. එවිට ඇය "ස්ත්රියකගේ අතකි" යැයි පැවැසුවාය. එවිට නබි තුමාණන්, "කාන්තාවක් නම් නියපොතු වලට හෙන්නා මරත්තෝන්ඩි තවරා ගන්නේ නම් යහපත්ය." යනුවෙන් පැවැසුවේය. ප්රකාශය- අබූ දාවුද් / අන් නසාඊ නමුත් පිරිසිදු කිරීමේදී පිරිසිදු කම වලක්වන ඝනකම් සහිත තීන්ත වැනි දෙයකින් නියපොතු වර්ණ කිරීමෙන් වැළැකී සිටිය යුතුය.

කාන්තාවක් සිය හිසකෙස් වර්ණ කිරීම: ඇය වයස්ගත කාන්තාවක් නම් සිය කෙස් කළු පාටින් තොරව වෙනත් පාටකින් වර්ණ කිරීමට හැක. මන්ද, පොදුවේ නබි (සල්ලල්ලාහු අලෙයිහි වසල්ලම්) තුමාණන් කළු පාටින් හිසකෙස් වර්ණ කිරීම තහනම් කර ඇත.

ඉමාම් අන් නවවී (රියාද් අල් සාලිහීන්) පිටුව 626හි, පුරුෂයින් හා ස්ත්රීන්ගේ හිසකෙස් කළු පැහැ ගැන්වීම තහනම් කිරීම පිළිබඳ පරිච්ඡේදයේ මේ ගැන සඳහන් කර ඇති අතර එතුමා [අල්-මජ්මූඃ] පිටුව(1/324) හි "අපගේ ධර්මයට අනුව හිසකෙස් කළු කිරීම හෝ සායම් කිරීම තහනම් කිරීම සම්බන්ධයෙන් පිරිමි, කාන්තා දෙපක්ෂයට ම තහනම් වේ."යනුවෙන් පැවැසීය. නිමි.

කාන්තාවක් සිය කඵ පැහැති හිසකෙස් වෙනත් වර්ණයකින් පාට කිරීම සදහා සායම් (ඩයි) භාවිතය නොකළ යුතුයි. මා සිතන ආකාරයට ඒ සඳහා අනුමැතිය නැත. මන්ද එය අවශ්ය නොවන නිසාය. (ස්වභාවයෙන්ම) හිසකෙස් කළුවට තිබීම අලංකාරයකි. එය වෙනස් කිරීම නිසා එහි විකෘතිභාවයක් ඇති වේ. එසේ වෙනස් කිරීම දේව විශ්වාස නොමැති කාන්තාවන් අනුකරණය කිරීමකි.

විද්වතුන්ගේ එකඟත්වයට අනුව කාන්තාවක් රන් හා රිදී ආභරණ පැළඳීම සාමාන්ය චාරිත්රයකි. එසේ වුවද ඇය විසින් මහරම් (විවාහවීමට තහනම්) නොවන පිරිමින් ඉදිරියේ ඇගේ ස්වර්ණාභරණ අලංකාරය පෙන්වීමට ඉඩ නැත. විශේෂයෙන්ම නිවසින් පිටව යන විට සහ මිනිසුන් ඒ දෙස බලන විට ඔවුන් ඉදිරියේ ඒවා අනාවරණය කළ නොයුතුයි. මන්ද එය (ෆිත්නාව) අධර්මය වෙත මග පෙන්වයි. ඇගේ වස්ත්රයට යටින් පැළඳ සිටින පා සළඹ වැනි ආභාරණයන් හඬ නැංවීම පවා තහනමට ලක් වී ඇති තත්වයක, ඇය විසින් පිටතට පෙනෙන ලෙස පැළැඳ සිටින ඇගේ ආභරණ ගැන කුමක් කිව හැකිද?

තුන්වන ඡේදය

ඔසප් වීම, ඔසප් කාලය ඉක්මවා ලේ වහනය වීම, දරු ප්රසූතියෙන් පසු ලේ වහනයවීම පිළිබද නීති රීති.

පළමුව: ඔසප් වීම

හයිළ් හෙවත් ඔසප් වීම හැදින්වීම

හයිළ් යන අරාබි වචනයේ සිංහල අර්ථය වහනය වීම යන්නයි. ඉස්ලාම් ඉගැන්වීමට අනුව එහි අර්ථය කාන්තාවකගේ ගැබ සිට යෝනි මාර්ගයෙන් කිසිදු ලෙඩ රෝගයකින් තොරව, පිට වන රුධිර වර්ගයකි. නමුත් මෙය අල්ලාහ් විසින් ආදම්ගේ දූවරුන් ගර්භණී කාලයේ දී දරුවා ගර්භාෂය තුළ පෝෂණය කිරීම සඳහා ද, දරුවාගේ උපතෙන් පසුව ඒවා කිරි බවට පත්කිරීම සඳහාද සකස් කළ මාර්ගයකි. එම කාන්තාව ගර්භණීව හෝ දරුවාට කිරි දෙන තත්තවයෙන් පසුවන්නේ නම් එම රුධිරය රැඳී පවතී. පසුව පොදුවේ හඳුනන නියමිත කාල පරිච්ඡේදවලදී හෝ මාසික වාරවලදී එය පිටතට පැමිණේ.

ඔසප්වීමේ වයස.

කාන්තාවක් ඔසප් වීමේ වයස: බොහෝවිට ස්ත්රියකට වයස අවුරුදු නවයේ සිට අවුරුදු පනහ දක්වා වූ කාලය තුළ ඔසප් වීම සිදුවේ. අති උතුම් අල්ලාහ් මෙසේ පවසයි. නුඹලාගේ බිරියන්ගෙන් ඔසප් වීමේ තත්ත්වය ගැන (බලාපොරොත්තු) සුන් කර ගත්තවුන් වනාහි, නුඹලා ඔවුන් ගැන සැක කළෙහු නම් ඔවුන්ගේ ඉද්දා කාලය මාස තුනකි. ඔසප් තත්ත්වයට පත් නොවූ කාන්තාවන්ට ද (එලෙසමය.) පොදු නිගමනයකට අනුව අවුරුදු පනහකට වැඩි කාන්තාවන්හට මාස් ශුද්ධිය ඇති නොවන අතර අවුරුදු නවයට වඩා අඩු අයටද එවැන්නක් සිදු නොවේ.

හයිළ් හෙවත් ඔසප් වීම පිළිබඳ නීති රීති.

මෙම ඔසප්වීම සිදුවන කාල වකවානුවේ යෝනි මාර්ගයෙන් සංසර්ගයේ යෙදීම පිරිමින්ට තහනම් කර ඇත. අල්ලාහ් මෙසේ පවසයි. "තවද ඔසප් පිළිබඳ ව ඔවුහු නුඹගෙන් විමසන්නෝය. එය වේදනා සහගත කිලිටකි, එබැවින් ඔසප් සමයේ බිරියන්ගෙන් ඉවත් වනු. ඔවුන් පිරිසිදු වන තෙක් (ලිංගික ඇසුරට) නුඹලා ඔවුනට සමීප නොවනු. ඔවුන් පිරිසිදු වූ කල්හි අල්ලාහ් නුඹලාට අණ කළ පරිදි ඔවුන් වෙත යනු. සැබැවින්ම අල්ලාහ් පශ්චාත්තාපයේ නියැලෙන්නන් ප්රිය කරන අතරම පිරිසිදුව සිටින්නන්ට ප්රිය කරන්නේය." (2/222) මෙම තහනම රඳා පවතින්නේ ඔසප් කාලයේ රුධිරය පිටවීම නැවැතී, ඇය ජලස්නානය කර පිරිසිදු වත තුරු පමණයි. "(ඔසප් කාලය අවසන් වෙන තුරු ඔවුන් වෙත නොයනු) ඔවුන් පිරිසිදු තත්ත්වයට පත් වූ විට අල්ලාහ් නුඹලාට අණ කර ඇති පරිද්දෙන්ම ඔවුන් වෙත යනු." (2. 222) ඔසප් කාලයේ සිය සැමියාට යෝනි මාර්ගය තුළ ලිංගික සංසර්ගයෙන් තොරව සිය බිරිඳව භුක්ති විඳීමට අනුමත ඇත. එය නබි (සල්ලල්ලාහු අලයිහි වසල්ලම්) තුමාගේ දේශනාවකට අනුවය. ලිංගිකව එක් වීම හැර අනෙකුත් දෑ සිදු කරනු. ඔසප් කාලය තුළ කාන්තාවක් සව්ම් හෙවත් උපවාසයේ යෙදීම, සලාත් කිරීම වැනි යාඥාවන්ගෙන් මිදී සිටිය යුතුයි. ඔසප් කාලය තුළ අදාළ කාන්තාවන් කෙරෙහි සලාතය සහ උපවාසය තහනම්ය. ඒ දෙක වලංගු වන්නේ නැත. නබි (සල්ලල්ලාහු අලයිහි වසල්ලම්) තුමා මෙසේ පවසා ඇත්තාහ. කාන්තාවක් ඔසප් තත්ත්වයේ සිටින විට සලාතය මෙන්ම උපවාසය අත්හැර දමනවා නොවේ ද? කාන්තාවක් ඔසප් තත්ත්වයෙන් මිදී පිරිසිදු වීමෙන් පසු අතපසු වූ උපවාසය ඉටු කරයි. නමුත් අතපසු වූ සලාතය ඉටු නොකරයි. මේ සම්බන්ධයෙන් ආඉෂා තුමිය මෙසේ පවසයි. අල්ලාහ්ගේ දූතයාණන්ගේ (සල්ලල්ලාහු අලයිහි වසල්ලම්) කාලයේදී අපි ඔසප් තත්ත්වයේ පසු වූයෙමු. එවිට අපහට අතපසුවූ උපවාසය ඉටු කරන ලෙසත් අතපසු වූ සලාතය ඉටු නොකරන ලෙසත් අණ කරනු ලැබුවෙමු. මෙය බුහාරි හා මුස්ලිම් හි වාර්තා වි ඇත.

සලාතය වරින් වර ඉටු කළ යුතු නැමදුමක් වන අතර එය අපහසුතාවයට සහ විඩාවට පත් කරනු ඇත. එබැවින් එය නැවත ඉටු කිරීම අනිවාර්ය නොවේ. නමුත් උපවාසය (වසරකට වරක් ඉටු කරන මෙහෙයක් බැවින්) මෙයට හාත්පසින් වෙනස්ය.

ආවරණයකින් තොරව අල් කුර්ආන් පිටපත ස්පර්ශය කිරීම ඔසප් හටගත් කාන්තාව කෙරෙහි තහනම් වේ. අල්ලාහ් මෙසේ පවසයි. "එය පිරිසිදු වන්තයින් හැර වෙන කිසිවෙකු ස්පර්ෂය කරන්නේ නැත." නබි (සල්ලල්ලාහු අලෙයිහි වසල්ලම්) තුමා විසින් අමර් බින් හසම් තුමා වෙත ලියන ලද ලේඛනයෙහි සඳහන්ව ඇති ආකාරයට, "පිරිසිදු වන්තයෙක් හැර මෙම ග්රන්ථය වෙන කිසිවෙකු ස්පර්ෂය කරන්නේ නැත." මිනිසුන් එය පිළිගැනීමෙන් මුතවාතිර් ඝනයේ හදීස් හා සමාන වේ. ෂෙයිකුල් ඉස්ලාම් ඉබ්නු තයිමියියා (අල්ලාහ් එතුමාට කරුණා කරත්වා) මෙසේ පැවසීය. ඉමාම්වරු සිව් දෙනාගේම එකඟත්වයෙන් යුත් මතය අනුව පිරිසිදුව සිටින අය හැර වෙන කිසිවෙකු අල් කුර්ආනය ස්පර්ශ කරන්නේ නැත.

ඔපස් වූ අවස්ථාවේදී, අල් කුර්ආනයට අත නොතබා අල් කුර්ආනය පාරායනය කරන කාන්තාව සම්බන්ධව විද්වතුන් අතර මතභේද පවතී. වඩාත් ආරක්ෂක පිළිවත වනුයේ: ඇයට එය අමතක වනු ඇතැයි බියවීම වැනි නොවැළැක්විය හැකි අවස්ථාවක හැර ඇය එය පාරායනය නොකිරීමය දෙවියන් වහන්සේ හොඳින්ම දන්නා සේක.

ඔපස් තත්ත්වයේ සිටින කාන්තාවකට මක්කාවේ පිහිටි කඅබාව තවාෆ් කිරීම තහනම් කර ඇත. එය ආඉෂා තුමිය ඔපස් වූ විටක නබි (සල්ලල්ලාහු අලෙයිහි වසල්ලම්) තුමාණන් විසින් කළ ප්රකාශයක් මේ සම්බන්ධයෙන් සඳහන් වී ඇති බැවිණි. ඔබ හාජිවරුන් කරන සියලු ක්රියා කරන්න. නමුත් පිරිසිදු වන තුරු කඃබාව වටා තවාෆ් නොකරන්න.

ඔපස් තත්ත්වයේ සිටින කාන්තාවකට මස්ජිදයේ රැඳී සිටීම තහනම් කර ඇත.

නබි (සල්ලල්ලාහු අලයිහි ව සල්ලම්) තුමාණන්ගේ ප්රකාශයකට අනුව ඔසප් තත්ත්වයේ සිටින කාන්තාවකට මස්ජිදයේ රැඳී සිටීම තහනම් වේ. ඔසප් සිදුවන කාන්තාවකට හෝ ලිංගික අපිරිසිදු පුද්ගලයෙකුට මම මස්ජිදයේ රැඳී සිටීමට අනුමත නොකරමි. නබි (සල්ලල්ලාහු අලෙයිහි වසල්ලම්) තුමාණන්ගේ ප්රකාශය මෙසේය. ඔපස් තත්ත්වයේ සිටින කාන්තාවන්ට සහ මහා කිල්ලේ පසු වන අයට මස්ජිදයේ රැඳී සිටීම අනුමත නොවන්නේය. ඇයට (ඔපස් තත්ත්වයේ සිටින කාන්තාවට) මස්ජිදය හරහා රැඳී නොසිටිමින් ඉක්මණින් ගමන් කිරීමට අනුමතිය ඇත. ආඉෂා (රළියල්ලාහු අන්හා) තුමිය විසින් දැනුම් දෙන හදීසයක මෙසේ සඳහන් වේ. නබි (සල්ලල්ලාහු අලයිහි වසල්ලම්) තුමාණන් වරක් මස්ජිදයට ගොස් හුම්රාව (සලාත් කිරීම සඳහා භාවිතා කරන ඇතිරිල්ල) ගෙන එන ලෙස එතුමියගෙන් ඉල්ලා සිටියේය. එවිට "මම ඔපස් තත්ත්වයේ පසු වෙමි" යැයි කීවෙමි. එවිට එතුමාණන් "ඔසප්වීම ඔබේ අතේ නැත." (මස්ජිදය හරහා ගමන් කිරීමට හැකිය.) යනුවෙන් පැවැසුහ.

ඔපස් තත්ත්වයේ පසුවන කාන්තාවකට ඉස්ලාමීය ඉගැන්වීම් වලට අනුකූල වූ තහ්ලීල් (ලා ඉලාහ ඉල්ලල්ලාහු), තක්බීර් (අල්ලාහු අක්බර්), තස්බීහ් (සුබ්හානල්ලාහ්) යනාදී අද්කාර් හා ප්රාර්ථනාවන් පැතීමටත් උදේ සවස පවසන ප්රාර්ථනාවන්, නින්දට යාමේදී සහ නින්දෙන් අවදි වීමේදී පාරායනය කළ යුතු ප්රාර්ථනාවන් පාරායනය කිරීමටත් අනුමැතිය ඇත. එමෙන්ම, ඉස්ලාම් නීති පොත්, අල් කුර්ආන් අර්ථ විවරණය හා හදීස් වැනි පොත් කියවීමටත් අනුමැතිය ඇත.

ඔපස් කාන්තාවකගෙන් වහනය වන රුධිරයේ කහ සහ දුඹුරු පැහැයේ නීතිය පිළිබඳ දැනගැනීමේ වැදගත්කම. (සමහර අවස්ථාවන්හිදී ඔසප් වීමේදී හටගන්නා රුධිරය) කහ පැහැයට හුරු දුඹුරු පැහැයක් ගනී. එලෙසම අපිරිසිදු ජලයේ තද වර්ණයට සමාන වර්ණයක්ද ගනී. සාමාන්යයෙන් ඔසප් හටගන්නා කාලය තුළ මෙවැනි වර්ණ දෙකකින් යුත් අපිරිසිදු රුධිරය පිටවේ නම් එය මාසික ඔපස් පිටවීමක් හැටියට සළකනු ලැබේ. එබැවින් පෙර සඳහන් කළ ඔසප් සඳහා වූ නීති රීති ඇය සඳහා බල පවත්වනු ඇත. ඔසප් පිටවෙන නිශ්චිත කාලයෙන් බැහැරව මෙවන්නක් පිටවන්නේ නම් මේවා ඔසප් ලක්ෂණයක් සේ හෝ වෙනත් කිසිවක් ලෙස සළකණු නොලැබේ. ඇය පිරිසිදු වු නැතැත්තියක් ලෙස සළකනු ලැබේ. උම්මු අතියියා (රළියල්ලාහු අන්හා) තුමියගේ ප්රකාශය මේ සඳහා සාක්ෂියක් වශයෙන් ගන්නා ලදී. එනම් අපට මාසික චක්රය ක්රියාවලියකට අනුව ඔසප් හටගෙන පිරිසිඳු වීමෙන් පසු පිටවන කහ වර්ණය සහ අපිරිසිඳු ජලයේ වර්ණය සාමාන්ය දෙයක් ලෙස සළකමින් සිටියෙමු.(ග්රන්ථය ඉමාම් අබූ දාවුද, තවද බුහාරි විසින් "පිරිසිදු වීමෙන් පසු" යන වදන සඳහන් නොකරමින් වාර්තා කරන ලදී.) මෙම හදීසය විද්වතුන් අතර (ඔසප් පිළිබඳ) පිළිගත් නීතියක් ලෙස සළකනු ලැබේ.මක්නිසාද යත් මෙය නබි (සල්ලල්ලාහු අලයිහි වසල්ලම්) තුමා විසින් අනුමත කරන ලද නීතියක් වේ. මේ අනුව පැහැදිලි වන කරුණ නම් කහ වර්ණය සහ අපිරිසිඳු ජලයේ වර්ණය ඔසප් තත්ත්වයෙන් පිරිසිදු වීමට පෙර පැවැතියේ නම් එය ඔසප් තත්වයෙහිලා සළකා ඒ සඳහා වූ නීතිය ක්රියාත්මක කරනු ලැබේ.

ඉගෙන ගත හැකි තවත් පාඩමක්:

ප්රශ්නය- කාන්තාවක් සිය මාසික ඔසප් චක්රයේ අවසාන අවස්ථාව ගැන දැන ගන්නේ කෙසේද?

පිළිතුරු- ඔසප් සමයේ රුධිර පිටවීම නැවතීමත් සමග මෙහි අවසානය ඇය දැන ගන්නීය. එහි ලක්ෂණ දෙකක් වේ. පළමු ලක්ෂණය නම් රුධිර පිටවීම නැවැතීමත් සමග සුදු පැහැති ජලය වැනි දෙයක් පිටවීමයි. ඇතැම් විට සුදු නොවන වර්ණයෙන් ද පිහිටයි. මෙහි වර්ණය කාන්තාවන්ගේ ශාරීරික තත්වයට අනුව වෙනස් වේ.

දෙවෙනි ලක්ෂණය නම් වියළිව තිබීමය. එනම් ඇය යෝනිය තුළට රෙදි කඩක් හෝ පුඵන් වැනි දෙයක් ඇතුළත් කර එය වියලිව පිටතට ගැනීමේදී එහි කහ වර්ණය හෝ අපිරිසිදු ජලයේ වර්ණය වැනි කිසිවක් නොදකී.

ඔසප් පිටවීමේ අවසාන තත්ත්වයක සිටින කාන්තාවකට අනිවාර්ය වන්නේ කුමක්ද?

විශේෂ අවවාදය :- හිරු බැස යාමට කලින් පිරිසිදු වූ ඔපස් තත්වයේ සිටි කාන්තවන් සහ පස්චාත් දරු ප්රසූති කාන්තාවන් සඳහා ඔසප් තත්වයේ සිටින කාන්තාවක් ඔසප් තත්වය අවසන් වීමෙන් පසු ජලයෙන් ස්නානය කිරීම අනිවාර්ය වේ. එනම් පිරිසිදු වීමේ චේතනාව ඇතුව, ඇයගේ ශරීරය සම්පූර්ණයෙන්ම ජලය තැවැරෙන ආකාරයට ජලය භාවිතයෙන් ජලස්නානය කිරීම අනිවාර්ය වේ. නබි (සල්ලල්ලාහු අලයිහි වසල්ලම්) තුමාණන් මේ ගැන මෙසේ පවසා ඇත. ඔබ ඔසප් තත්ත්වයට පත්වන්නේ නම් සලාතය ඉටු නොකරන්න. ඔසප් තත්ත්වයෙන් මිඳුනේ නම් ජලයෙන් ස්නානය කර පිරිසිදු වී සලාතය ඉටු කරන්න.

පිරිසිදු වීමේ ක්රමය:- සලාතය සඳහා පිරිසිදු වෙන බවට හෝ මහා කිල්ළෙන් මිදෙන බවට හෝ නැත්නම් වෙනත් සුදුසු ආකාරයකට චේතනාව තබා ගැනීම. පසුව බිස්මිල්ලාහ් යනුවෙන් පවසා ශරීරය සම්පූර්ණයෙන්ම තෙමෙන සේ ජලය ගලා යාමට සැළැස්වීම. ජලය හිස කෙස් තුළට යවන්නට සැළැස්වීම අවශ්ය වේ. කොණ්ඩය ගොතා බැඳ ඇත්නම් ඒවා ලිහීමට අවශ්ය නොවේ. නමුත් ජලය ඒ තුලට යවන්නට සැළැස්වීම අවශ්ය වේ. තවද ජලයට මසන් කොළ හෝ පිරිසිදු කිරීමේ ද්රව්ය එකතු කරන්නේ නම් වඩාත් යහපත්ය. තවද පුලුන් ස්වල්පයකට සුවඳ විලවුන් තවරා එය ජලස්නානය කිරීමෙන් පසු යෝනිය මාර්ගයට දැමීම සතුටු දායක වේ. නබි (සල්ලල්ලාහු අලයිහි වසල්ලම්) තුමාණන් එතුමාගේ බිරිඳ අස්මා (රළියල්ලාහු අන්හා) තුමියට එසේ කරන ලෙස අණ කළේය.

(හිරු බැස යාමට කලින් ඔසප් සහ ප්රසූත තත්වයෙන් පිරිසිදු වූ කාන්තාවකට) ලුහර් සලාතය සහ අසර් සලාතය ඉටු කිරීම අනිවාර්ය වේ. එසේම ෆජ්ර් සලාතය උදාවීමට පෙර පිරිසිඳු වූ කාන්තාවන්ට, එදිනට අදාල මග්රිබ් සලාතය සහ ඉෂා සලාතය ඉටු කිරීමද අනිවාර්ය වේ. මන්ද මෙම සලාත් දෙක අත්යවශ්ය හේතුවක් නිසා ඒකාබද්ධ කරමින් ෆජ්ර් සලාතය දක්වා ඉටු කිරීමට අවසර ඇති බැවිනි.

ඉබ්නු තයිමියියා රහ්ම හුල්ලාහ්, අල්ෆතාවා ග්රන්ථය පිටුව (22/434) හි මෙසේ පවසයි. ෂාෆී, මාලික්, අහ්මද් යන ප්රධාන පෙළේ විද්වතුන්ට අනුව ඔසප් තත්ත්වයේ සිටි කෙනෙකු දිවා කාලයේ අවසාන අවදියේ පිරිසිදු තත්ත්වයට පත් වූයේ නම්, ඇයට ලුහර් සලාතය සහ අසර් සලාතය ඉටු කිරීම අනිවාර්ය වේ. එසේම ඇය රාත්රියේ අවසාන භාගයේදී පිරිසිදු තත්ත්වයට පත්වූයේ නම් මග්රිබ් සලාතය සහ ඉෂා සලාතය ඉටු කිරීමද අනිවාර්ය වේ. අබ්දුල් රහ්මාන් බින් අව්ෆ්, අබූ හුරෛරා, ඉබ්නු අබ්බාස් යන අයගේ කියමන් අනුව පෙර සඳහන් කළ සලාතයන් දෙක අත්යවශ්ය අවස්ථාවක ඒකාබද්ධ කර ඉටු කිරීමට ඉස්ලාමයෙන් අවසරයක් ලබා දී ඇත. ඒ අනුව ඇය දිවා කාලයේ අවසාන භාගයේදී පිරිසිදු තත්ත්වයට පත්වන්නේ නම් ලුහර් සලාතය ඉටු කිරීම සඳහා වේලාව ඉතිරු වී පවතී. එවිට ඇය අසර් සලාතයට පෙර ලුහර් සලාතය ඉටු කරනු ඇත. රාත්රී කාලයේ අවසාන වේලාවේදී ඇය ඔසප් තත්ත්වයෙන් මිදී පිරිසිදු බවට පත්වූයේ නම් මග්රිබ් සලාතය සඳහා (ඒකාබද්ධ කර ඉටු කිරීමේ පදනම යටතේ) වේලාව ඇත. ඒ අනුව ඇය මග්රිබ් සලාතය ඉෂා සලාතයට පෙර ඉටු කරනු ඇත.

සලාත් වේලාවක් පැමිණීමෙන් පසු එය ඉටු කිරීමට පෙර ඇය ඔසප් තත්ත්වයට හෝ ප්රසූති තත්ත්වයට පත් වූයේ නම්, එම සලාතය නැවැත ඉටු කිරීම ඇයට අනිවාර්ය නොවේ.

ඉබ්නු තයිමියියා රහ්ම හුල්ලාහ්, අල්ෆතාවා ග්රන්ථය පිටු (23/335) මෙසේ පවසයි.අබූ හනීෆා සහ මාලික් යන ප්රධාන පෙළේ විද්වතුන්ට අනුව මෙවැනි අවස්ථාවක ඇය කෙරෙහි කිසිවක් අනිවාර්ය නොවේ. මෙහිදී ඇයට නැවැත ඉටු කිරීමක් අවශ්ය වන්නේ නැත. නිදාගැනීම නිසා හෝ අමතක වීමක් නිසා අනිවාර්ය සලාතයක් ඉටු කිරීමට නොහැකි වූවා නම් ඔහු/ඇය විසින් එය ඉටු කරන්නේ කළා හෙවත් අත පසුවූ සලාතය නැවැත ඉටු කිරීමක් වශයෙන් නොව ඔහු කෙරෙහි පැවැරී ඇති වගකීමක් නින්දෙන් අවදි වූ විට සහ මතක් වීමෙන් පසු ඉටු කිරීමක් වශයෙනි.

දෙවනුව: ඉස්තිහාළා හෙවත් ඔසප් දිනයන් හැර වෙනත් දිනයන්හි අක්රමත්ව රුධිර වහනය වීම.

ඉස්තිහාළාවට අදාළ නීති.

ඉස්තිහාළා යනු ඔසප් චක්රය සිදුවන කාලයෙන් පිටත කාලයක අක්රමවත්ව රුධිරය වහනය වීමකි. ඉස්තිහාළා නම් රුධිරයේ ඔසප් රුධිරය ඇති බවට සැකයක් ඇතිවීම නිසා ඇයට ගැටළුකාරී තත්වයක් ඇති වේ.

රුධිරය අඛණ්ඩව හෝ බොහෝ කාලයක් වහනය වන්නේ නම්, ඇයගේ නිර්ණයට අනුව එය ඔසප් වීම ලෙස සැලැකීමට හෝ ඉස්තිහාළා ලෙස සැලැකීමට හැක. ඉස්තිහාළා ලෙස සළකන්නේ නම් උපවාසය සහ සලාතය අත් හැරිය නොහැක. ඉස්තාහාළා තත්ත්වයකදී ඇය පිරිසිදුව කාන්තාවකගේ නීති රීති අනුගමනය කළ යුතුයි.

ඒ මත පදනම්ව, ඉස්තිහාළා තත්ත්වයේ සිටින කාන්තාව සම්බන්ධයෙන් අවස්ථා තුනක් පවතී. පළමු අවස්ථාව: ඇයට ඉස්තිහාළා ඇති වීමට පෙර ඒ ගැන හුරු පුරුද්දක් සහ අවබෝධයක් තිබීම. ඉස්තිහාළා සිදු වීමට පෙර දින පහක් හෝ අටක් හෝ ඔසප් පිට වීම සිදුවුනේ නම් උදාහරණ වශයෙන් මාසයේ ආරම්භයේ හෝ අවසානයේ එසේ සිදු වී එහි දින ගණන මෙන්ම එහි කාලය පිළිබඳ ඇය දන්නේ නම් ඇගේ සාමාන්ය ඔසප් කාලයට අනුව කටයුතු කිරීම අවශ්ය වේ. ඇය උපවාසයයෙහි යෙදීම හා සලාත් කිරීම යනාදිය නොකළ යුතුයි. මෙම කාලය ඔසප් වීමේ කාලය ලෙස සලකනු ලැබේ. ඇගේ සාමාන්ය සිරිතට අනුව ඔසප් කාලය අවසන් වුවහොත් ඇය ජලස්නානය කර සලාත් සහ වෙනත් ඉබාදතයන් ඉටු කරයි. ඉතිරි කාලයේ ඇතිවන රුධිර වහනය ඉස්තිහාළා රුධිරය ලෙස සලකනු ලබයි. උම් හබීබා (අල්ලාහ් ඇයට ආශීර්වාද කර සාමය ලබා දෙත්වා) තුමියට නබි (සල්ලලල්ලාහු අලයිහි වසල්ලම්) තුමාණන් මෙසේ පැවසුවේය. ඔබට ඔසප් චක්රය සිදුවෙමින් තිබෙන තාක් කල් ඒ අනුව කටයුතු කරන්න. ඔසප් වීම අවසන් වීමෙන් පසු ජලස්නානය කර යාච්ඥා කරන්න. නබි (සල්ලල්ලාහු අලෙයිහිස් සලාම්) තුමාණන් ෆාතිමා බින්ත් අබී කුබෛෂ් තුමියට මෙසේ පැවසූහ. "එය ඔසප් තත්ත්වයේ වහනය වන රුධිරය නොව දහඩියකි. එබැවින් ඔසප්වීම සිදු වුවහොත් සලාතය අත්හැර දමන්න." දෙවන අවස්ථාව: ඇයට ඉස්තිහාළා පිළිබඳ නුපුරුදු තත්වයක් ඇති නමුත් ඇගේ රුධිරය වෙනස් ලක්ෂණයක් පෙන්නුම් කිරීමය. නමුත් එම රුධිරය කළු හෝ කැටි ගතියකින් යුක්ත වේ නම් හෝ එහි දුගඳක් හමයි නම් එය ඔසප් ස්වභාවය උසුලනු ඇත. ඒ හැර සෙසු රුධිරය එය රතු පැහැයෙන් යුක්ත වී දුඟදක් හෝ කැටි ගතියක් හෝ නොවී නම් එය ඔසප් ස්වභාවය උසුලන්නේ නැත. මෙහිදී ඔසප් තත්තවයේ රුධිර ලක්ෂණ උසුලන්නේ නම් පමණක් එය ඔසප් තත්ත්වයේ රුධිරය ලෙස සළකා සලාත් කිරීමෙන් සහ උපවාසයෙහි යෙදීමෙන් වැළකී සිටිය යුතුයි. ඉහත සඳහන් කළ ආකාරයට වෙනත් ලක්ෂණ පෙන්නුම් කරන්නේ නම් එය ඉස්තිහාළා ලෙස සළකා පිරිසිදු වී සලාතය ඉටු කළ යුතු අතර උපවාසයේද යෙදිය යුතුයි. මන්ද මේ දෙවනි තත්වය පිරිසිදු තත්වයක් සේ සලකනු ලැබේ. නබි (සල්ලල්ලාහු අලෙයිහි වසල්ලම්) තුමා ෆාතිමා බින්ත් අබී හුබෛෂ් තුමියට මෙසේ පැවැසුවේය. ඔසප් තත්ත්වයේ වහනය වන රුධිරය හඳුනන පරිදි කළු පැහැයෙන් යුක්ත නම් ඔබ සලාතය කිරීමෙන් වැළැකිය යුතුයි. වෙනත් ලක්ෂණයකින් වී නම් ඔබ වුදූ හෙවත් අර්ධ ස්නානය කර සලාතය ඉටු කරන්න. එහිදී ඉස්තිහාළා තත්ත්වයේ පසුවන කාන්තාව එම රුධිර ලක්ෂණ ගැන සැළකිලිමත් විය යුතුය. ඒ අනුව එය ඔසප් වීමක්ද නැත්නම් වෙනත් දෙයක්ද යන්න එහි වෙනස ඇය විසින් හඳුනා ගත යුතුය. තුන්වන අවස්ථාව: ඇයට එහි ස්වභාවය ගැන නුපුරුදුනම් එසේම ඔසප් සහ ඉස්තිහාළා අතර වෙනස වෙන්කර හඳුනා ගත නොහැකි වී නම් ඇය විසින් සෑම මසකම උපරිම දින හයක් හෝ හතක් ඔසප් වීමේ තත්වයෙහි සිටිය යුතුයි. මන්ද මෙය සාමාන්යයෙන් කාන්තාවන්ගෙන් බහුතරයක් අතර සිදු වෙන නිසා වෙනි. මේ ගැන නබි (සල්ලලල්ලාහු අලයිහි වසල්ලම්) තුමාණන් හම්නා බින්ත් ජහෂ් තුමියට මෙසේ පැවැසුවේය. මෙම රුධිරය (ඔසප් චක්රය නිසා සිදුවන්නක්ද නැත්නම් චක්රය අක්රමත්වී සිදුවන්නක්ද යනුවෙන්) ෂයිතාන් විසින් ඇති කරන කෙලෙස් සිතුවිල්ලකි. එබැවින් දින හයක් හෝ හතක් ඔසප් වීමෙන් පසුව ජලස්නානය කරන්න. ඔබ පිරිසිදු වීමෙන් පසු (මසකට ඔබේ සම්පූර්ණ ඔසප් චක්ර වාරය දවස් හයක් නම්) දවස් විසිහතරක් හෝ (මසකට ඔබේ සම්පූර්ණ ඔසප් චක්ර වාරය දවස් හතක් නම්) දවස් විසිතුනක් සලාත් කරන්න. උපවාසයෙහි සහ යාච්ඥාවෙහි නිරත වන්න. මෙසේ කිරීම ඔබට වලංගු වේ. එසේ (සෑම මාසයකම) ඔසප් වීමේදී ඔසප් තත්ත්වයේ පසුවන කාන්තාවකට අදාල නීති රීති අනුගමනය කරන්න.

ඉහත ප්රතිඵලය නම් මෙම (ඔසප්) විෂයේදී (මාසිකව) සුපුරුදු තත්වයට හුරු කාන්තාව එහි පුරුද්දට අනුව මේ සම්බන්ධයෙන් කටයුතු කරන අතර එහි වෙනස තෝරා බේරා ගෙන කටයුතු කරන තැනැත්තිය ඒ වෙනස සමඟ කටයුතු කරයි යන්නෙන් අදහස් වේ. මෙම දෙපාර්ශ්වයම ඔසප් වීම දින හයක් හෝ හතක් වශයෙන් ගණනය කරනු ඇත. මෙය ඉස්තිහාළා සම්බන්ධයෙන් නබි (සල්ලල්ලාහු අලයිහි වසල්ලම්) තුමා විසින් විස්තර කරන ලද පිළිවෙත් තුන අතර වූ ගොනුවකි.

ෂෙයික් අල්-ඉස්ලාම් ඉබ්නු තයිමියා (අල්ලාහ් එතුමාට කරුණාව දක්වත්වා!) තුමා පවසන ආකාරයට, මේ සම්බන්ධයෙන් පවසන ලද සළකුණු හයකි. සාමාන්යයෙන් වෙනසකින් තොරව පුරුදු පරිදි පිටවෙන ඔසප් සම්බන්ධයෙන් ගත් කල, එය ප්රබලම ලකුණයි. ඔසප් හඳුනා ගැනීම සම්බන්ධයෙන් මූලික කරුණු වන්නේ එක්කෝ සුපුරුදු චක්රයකට අනුව හටගැනීම පමණක් මුල් කරගෙන ඇය විසින් ඊට සම්බන්ධ නීති රීති අනුගමනය කිරීමයි. නැත්නම් ඔසප් හටගැනීමේදී ඇති වන වෙනස්කම් හේතු කොටගෙන පවතින තත්වය ගැන සැළැකීමයි. එනම් රතු පැහැයෙන් යුත් රුධිරයට වඩා කළු, කැටි සහිත, දුගඳ රුධිරයෙහි ලක්ෂණය ඔසප් වීමේ ලක්ෂණයට ඉතා සමීප වේ. එබැවින් බොහෝ කාන්තාවන් එම සළකුණ සුපුරුඳු සළකුණක් ලෙස සලකති.මෙම මූලික සළකුණු සුන්නා මගින් විස්තර කර ඇති අතර, මේ සම්බන්ධයෙන් වෙනත් කිසිවක් පිළි නොගත යුතුයි. නිමි.

ඉස්තිහාළා තත්ත්වයේ පසුවන කාන්තාවක් පිරිසිදු වීමේදී පිළිපැදිය යුතු නීති රීති.

ඉහත විස්තර කළ පරිදි, ඇය විසින් ගණනය කරන ලද ඔසප් කාලය සලකා බලා, ඔසප් වීම අවසානයේදී ඇය විසින් ජලස්නානය කර පිරිසිදු විය යුතුයි.

සෑම යාච්ඥාවකදීම පිටතින් ඇති (අපිරිසිදු) දේ ඉවත් කිරීම සඳහා ඇය තම යෝනි මාර්ගය පිරිසිදු කර, පිටතට පිට වෙන දෑ වැළැක්වීම සඳහා කපු (පුලුන්) හෝ ඒ හා සමාන දෙයක් (යෝනිය) පිටතින් තබන අතර ඒවා වැටීමෙන් වළක්වනු පිණිස ඒ මත (ප්ලාස්ටර් වැනි) යමක් තද ට අලවා තැබීම අවශ්යයයි, ඉන්පසු සෑම යාච්ඥාවකටම ඒ සඳහා නියමිත කාලය ආරම්භ වන විට ඇය විසින් වුළු හෙවත් අර්ධස්නානය කළ යුතුයි. නබි (සල්ලල්ලාහු අලයිහි වසල්ලම්) තුමාණන් විසින් ඉස්තිහාළා තත්ත්වයේ පසුවන කාන්තවකට මෙසේ පවසා ඇත. ඔබ ඔසප් සිදුවෙන දිනවලදී සලාතය අත්හරින්න, ඉන්පසු සෑම සලාතයකටම එය ඉටු කිරීම සඳහා ඔබ සෝදා පිරිසිදු කර වුළු හෙවත් අර්ධස්නානය කරගන්න. සල්ලල්ලාහු අලය්හි වසල්ලම් මෙසේ ද පවසා සිටියහ: පුඵන් වැනි දෙයකින් එම ස්ථානයෙහි (වසා) තබන්න. ඒ සඳහා කපු රෙදි හෝ වර්තමානයේ දකින්නට ලැබෙන් සනීපාරක්ෂක වෙළුම් භාවිතා කළ හැකිය.

තෙවනුව: - දරු ප්රසූතියේදී සහ දරු ප්රසූතියෙන් පසු පිටවන රුධිරය

අර්ථ දැක්වීම සහ එහි කාලසීමාව

දරු ප්රසූතියෙන් පසු වහනය වන රුධිරය යනු, එය දරු ප්රසූතිය නිසා වහනය වන සහ ඉන් පසු පිටවන රුධිරය වන අතර එය ගර්භණී සමයේදී ගර්භාෂයේ රැඳුනු රුධිරයේ ඉතිරි කොටස වේ, එබැවින් ස්ත්රීයක් දරු ප්රසූතිය සිදු කළහොත් මෙම රුධිරය ටිකෙන් ටික පිටතට පැමිණේ. දරු ප්රසූතියේ සළකුණත් සමඟ දරුවා බිහි කිරීමට පෙර දක්නට ලැබෙන රුධිරය නිෆාස් වන අතර,මෙම නිෆාස් තත්ත්වය ඉස්ලාමීය නීති විශාරදයින් විසින් දරු ප්රසූතියට දින දෙකකට හෝ තුනකට පෙර සිට වහනය වන බව සඳහන් කර ඇත. මෙම රුධිර වහනය බහුල වශයෙන් දරු ප්රසූතියේ සිට ආරම්භ වේ. මෙහිදී අවධානය කළ යුතු කරුණ නම්, ප්රසූතියේදි එය මිනිස් හැඩයකින් තිබිය යුතුයි. දරුවා මව්කුස තුළ පිළිසිඳ ගත් දිනයේ සිට ඇතිවෙන කලලය මිනිස් හැඩයක ස්වරූපයක් ගන්නා අවම කාලය දවස් අසූ එකකි. උපරිම කාලය මාස තුනකි.මෙම කාල පරිච්ඡේදයට පෙර (කලලයක් වැනි) දෙයක් කුසෙන් පිට කර ඒ සමඟ රුධිරයද සිදුවුවහොත් ඇය ඒ පිළිබඳව නොසලකා හැරිය යුතු වේ. (එනම් අවධානය යොමු කළ යුතු නොවේ.) ඒ අනුව ඇය විසින් සලාතය සහ උපවාසය අත් නොහැරිය යුතුයි. මන්ද එය වහනය වන අපිරිසිඳු රුධිරය බැවිනි. මේ සඳහා ක්රියාත්මක නීතිය වන්නේ ඉස්තිහාළා සඳහා වූ නීතියම වේ.

නිෆාස් හෙවත් ප්රසව කාලයේ වහනය වන රුධිරය බොහෝ විට දින හතළිහක් වන අතර එය දරු උපත සිදු වූ දින සිට හෝ දරු උපත සිදු වීමට දින දෙකකට හෝ දින තුනකට පෙර සිට ආරම්භ වේ. එය උම්මු සල්මා (රළියල්ලාහු අන්හා) තුමිය විසින් දැනුම් දෙන ලද හදීසයකට අනුවය. එනම්: නබි (සල්ලල්ලාහු අලයිහි වසල්ලම්) තුමාණන්ගේ කාලයේදී, දරු ප්රසූති තත්ත්වයේ සිටි කාන්තාවන් (නිෆාස්) තත්තවයෙහි දින හතළිහක් ගත කළහ.

ඉස්ලාමීය විද්වතෙකු වන තිර්මිදි සහ වෙනත් විද්වතුන්ගේ එකඟතාවයට අනුව, දින හතළිහකට පෙර ඇයගෙන් රුධිරය පිටවීම අවසන් වන්නේ නම් ඇය ස්නානය කොට පිරිසිදු වූ වී සලාත් කළ යුතුයි. මේ සඳහා නිශ්චිත අවම කාල සීමාවක් නැත.(එබැවින් මෙහිදීද ඔසප් සම්බන්ධයෙන් පවතින පිළිවෙත් අනුගමනය කළ යුතු වේ.) එනම් දින හතළිහක් සම්පූර්ණ වී රුධිරය නතර නොවූයේ නම් ඇගේ නිෆාස් කාල පරිච්ඡේදය ඇගේ ඔසප් වීම සමග ගලපා එය නිෆාස් කාලය ලෙස සළකන්නේ නම්, එය නිෆාස් කාලය සේ සැලැකේ. (මෙහිදී සලාත් ඉටුකිරීමක් හෝ උපවාසයෙහි යෙදීමක් හෝ සිදු නොකළ යුතුයි.) එය ඔසප් වීමේ කාලයට සමපාත නොවී අඛණ්ඩව පැවතුනහොත් හා නතර නොවන්නේ නම්, එය ඉස්තිහාළා (අක්රමවත් ලෙස ලේ වහනය) වීමකි. ඒ හේතුවෙන් දින හතළිහකට පසු සලාත් හා සව්ම් වැනි වන්දනාමානයන් අත් නොහළ යුතුය. එය දින හතළිහ ඉක්මවා ගොස් එය අඛණ්ඩව සිදු නොවන්නේ නම් සහ සාමාන්ය වශයෙන් සිදු නොවන්නේ නම් එහි දී විද්වතුන්ගේ විවිධ මත පවතී.

නිෆාස් හෙවත් ප්රසව රුධිරය වහනය වීම සම්බන්ධ නීති රීති.

පහත සඳහන් කරුණුවලදී නිෆාස් හෙවත් ප්රසව රුධිර වහනය වන කාන්තාවක් සම්බන්ධ නීති රීති සහ ඔසප් කාලයට සම්බන්ධ නීති රීති එක සමාන වේ.

ඔසප් වන කාන්තාවක් සමග ලිංගික සංසර්ගය තහනම් කර ඇති ආකාරයටම ප්රසව රුධිර වනහනය වන කාන්තාවන් සමඟ ද සංසර්ගයෙහි යෙදීම තහනම් කර ඇත. නමුත් සෘජුව ලිංගික සංසර්ගයකින් තොරව ස්පර්ශ කිරීම් හරහා ලිංගික ආශාවන් ඉටු කර ගැනීමට අවසර ලබා දී ඇත.

ප්රසව රුධිරය වහනය වන කාන්තාවකට ඔසප් රුධිරය වහනය වන කාන්තාවක් මෙන් උපවාසයෙහි යෙදීම, සලාත් කිරීම හෝ කව්බතුල්ලාහ් වටේ තවාෆ් කිරීම තහනම්ය.

ප්රසව රුධිරය වහනය වන කාන්තාවකට ඔසප් තත්ත්වයේ සිටින කාන්තාවකට මෙන් අල්කුර්ආනය ස්පර්ශ කිරීම, අල්-කුර්ආනය කියවීම යන දී දෑ තහනම්ය.(එනමුත් එයින් කටපාඩම් කර ගත් කොටස් අමතක වී යනු ඇතැයි බිය වන්නේ නම්, ඒවා පාරායන කිරීම වරදක් නොවේ.)

ප්රසව රුධිරය වනහය වන අවස්ථාවේ අතපසු කළ අනිවාර්යය උපවාසය ඔසප් වූ කාන්තාව මෙන් ඒවා පසුවට ඉටු කිරීම අනිවාර්යය වේ.

ඔසප් වූ කාන්තාවක් මෙන් ප්රසව රුධිරය වහනය වන තත්ත්වයෙහි පසුවන කාන්තාවක් එම කාලය අවසන් වීමෙන් පසු ජලස්නානය කර පිරිසිදු වීම අනිවාර්යය වේ. උම්මු සලමා (රළියල්ලාහු අන්හා) තුමිය විසින් මෙසේ ප්රකාශ කරන ලදී. නබි (සල්ලල්ලාහු අලයිහි වසල්ලම්) තුමාණන්ගේ කාලයේදී, ප්රසව රුධිර වහනය වන තත්ත්වයේ පසුවන කාන්තාවන් දින හතළිහක් ගත කරන්නන් ලෙස සිටියෝය.

අල් මජ්ද් ඉබ්නු තයිමියියා (රහිමහුල්ලාහ්) තුමා මේ පිළිබඳව (අල් මුන්තකා) නැමැති ග්රන්ථයේ පිටු (1/84) හි සඳහන් කර ඇත. එනම් මෙම හදීසයෙහි අර්ථය නම්, ප්රසව රුධිරය වහනය වන තත්ත්වයේ සිටින කාන්තාවන් දවස් හතලිහක් (කිලිටි තත්ත්වයේ) ගත කරන ලෙස නබි (සල්ලල්ලාහු අලෛහිව සල්ලම්) තුමාණන් විසින් අණ කර තිබීමයි. මන්ද හයිළ් සහ නිෆාස් විෂය සම්බන්ධයෙන් සෑම කාන්තාවකගේම චක්ර කාලය එක සමානයි යන මතයට එකඟ වීමට නොහැකි වන බැවිණි. මන්ද නබි (සල්ලල්ලාහු අලෛහිව සල්ලම්) තුමාණන් විසින් ප්රකාශිත කරුණු අසත්ය නොවෙයි.

උම්මු සලමා (රළියල්ලාහු අන්හා) තුමිය මෙසේ පැවසුවාය. නබි (සල්ලල්ලාහු අලයිහි වසල්ලම්) තුමාණන්ගේ කාලයේදී ප්රසව රුධිර වහනය වෙමින් සිටි කාන්තාවක් දවස් හතලිහක් (අපවිත්ර දවස් ලෙස) සිය කාලය ගත කළ අතර එතුමාණන් අත පසුවූ සලාතයන් නැවත ඉටු කිරීමට අණ කළේ නැත.

ප්රසව රුධිර වහනය වන තත්ත්වයේ සිටි කාන්තාවකට දින හතලිහකට පෙර ලේ වහනය වීම අවසන් වුයේ නම් (එම කාන්තාවට අදාල නීති රීති පහත සඳහන් වේ.)

ප්රසව රුධිර වහනය වෙමින් සිටින කාන්තාවකට (දරු ප්රසූතිය සිදු වී) දින හතලිහකට පෙර ලේ වහනය වීම අවසන් වී, එම කාන්තාව විසින් ජල ස්නානය කර පිරිසිදු වී සලාතය කරමින් සහ උපවාසයෙහි යෙදෙමින් සිටිනා විටක නැවැත (දින හතලිහ අවසන් වීමට පෙර) ලේ වහනය සිදු වූයේ නම්, ඒ සඳහා වූ නිවැරදිම ප්රකාශය වන්නේ එම කාලය ප්රසූති කාලයක් සේ සැළැකීමයි. පිරිසිදුව සිටි කාලය තුළ ඇය විසින් ඉටුකරන ලද උපවාසයය වලංගුය. ඒවා නැවැත ඉටුකිරීම අවශ්ය නොවේ.(අශ්ෂෙයික් මුහම්මද් බින් ඉබ්රාහීම් තුමාගේ මජ්මූඅතුල් ෆතාවා ග්රන්ථයෙහි පිටුව 2/102, අශ්ෂෙයික් අබ්දුල් අසීස් බින් බාස් තුමාගේ මජල්ලතුල් දාවා ග්රන්ථයේ පිටු 1/44, හාෂියතු ඉබ්නු කාසිම් 1/405, රිසාලත් ෆිද්දිමා අත්තබීඉයියා ලින්නිසා පිටු 55, 56, සහ ෆතාවා අස්සඅදියියා පිටු137 යන සාධක ග්රන්ථ බලන්න.)

නිෆාස් හෙවත් පශ්චාත් ප්රසව රුධිරය දරු ප්රසූතිය නිසා පිට වෙයි.ඉස්තිහාදා යනු ඉඳහිට පිට වන අතිරේක ඔසප් රුධිරයයි. හයිද් හෙවත් ඔසප් යනු මාස චක්රය අනුව පිට වෙන රුධිරයයි.

අෂ්-ෂෙයික් අබ්දුර් රහ්මාන් බින් සඃදී රහිමහුල්ලාහ් මෙය සම්බන්ධයෙන් ප්රයෝජනවත් වන තවත් ආකාරයට මෙසේ පවසයි. ඉහත සඳහන් කරුණු අනුව පැහැදිලි වන්නේ "නිෆාස්" හෙවත් පශ්චාත් ප්රසව රුධිරය, දරු ප්රසූතිය නිසා පිට වෙයි. ඉස්තිහාදා යනු යම් රෝගී තත්ත්වයක් නිසා ඉඳහිට පිට වන අතිරේක (ඔසප්) රුධිරයයි. හයිළ් යනු මාස චක්රය අනුව විධිමත් ලෙස පිට වෙන ඔසප් රුධිරයයි. අල්ලාහ් සියල්ල දනී.

බෙහෙත් පෙති ගැනීම: කාන්තාවක් ඇගේ ඔසප් වීම වළක්වනු සඳහා බෙහෙත් පෙති වැනි යමක් ගැනීම ඇගේ සෞඛ්යයට හානියක් නොවන්නේ නම් එහි කිසිදු වරදක් නැත. එබැවින් ඇය එවැනි බෙහෙත් පෙති ගෙන ඔසප් වීම නැවැත්වුවහොත් ඇය විසින් උපවාසයෙහි යෙදීම, සලාත් කිරීම සහ තවාෆ් කිරීම වැනි ආගමික කටයුතු සිදු කරනු ඇත. වෙනත් පිරිසිදු තත්ත්වයේ සිටින කාන්තාවන් මෙන් ඇය මත මේවා වලංගු වේ.

ගබ්සා කිරීමේ නීතිය: මුස්ලිම් මව්වරුණි!, දෙවියන් වහන්සේ ඔබේ ගර්භාෂය තුළ මැවූ ගැබ් ගැනීම නීත්යානුකූලව ඔබට භාර දී ඇත, එබැවින් එය නොසඟවන්න. අල්ලාහ් අල්කුර්ආනයේ මෙසේ සඳහන් කරයි. ඔවුන් අල්ලාහ් හා පරමාන්ත දිනය විශ්වාස කරන්නේ නම් ඔවුන්ගේ ගර්භයන් තුළ අල්ලාහ් මැවූ දෑ සැඟවීම ඔවුන්ට අනුමත නොමැත.

(ගර්භාෂය තුළ සිටින දරුවා) කිසිම ආකාරයකින් ගබ්සා කර අතහැර දමන්නට හෝ බැහැර කිරීමට නො පෙළඹෙන්න.මන්ද අල්ලාහ් රමදාන් මාසයේදී උපවාසයේ යෙදීම ඔබට දුෂ්කර නම් හෝ එය ගර්බනී භාවයට බලපාන්නේ නම් එයින් මිදී සිටීමට අවසර ලබා දී ඇත. මෙම යුගයේ බහුලව දක්නට ලැබෙන ගබ්සා කිරීමේ ක්රමය තහනම් වූ ක්රියාවකි. කලලය සෑදී ගර්භාෂය තුළ සෑදෙන කලලයකට ප්රාණය ලැබීමෙන් පසු, ගබ්සාව හේතුවෙන් මිය ගියේ නම්, මෙය අල්ලාහ් විසින් තහනම් කරන ලද, ආත්මයක් ඝාතනය කිරීමේ වරදක් ලෙස සලකනු ලැබේ. ආගමානුකූල විස්තර අනුව එහි ප්රමාණයට අනුව වන්දියක් දීමේ වගකීම ඉටු කිරීමට සිදු වේ. එනම් විශ්වාස කරන වහල් කාන්තාවක් නිදහස් කිරීමකි. ඔහු වහල් කාන්තාවක් සොයා නොගත්තේ නම්, ඔහු අඛණ්ඩව මාස දෙකක් උපවාසයෙහි යෙදිය යුතුයි. සමහර විද්වතුන් මෙම ක්රියාව අල්-මව්ඌදතු අල්-සුග්රා හෙවත් (ඉස්ලාමයට පෙර ආරාබියේ මහා පරිමාණයෙන් සිදු වූ ආකාරයට) මෙය සුළු පරිමානයෙන් කරනු ලබන, ආත්මයක් පණ පිටින් වැලැලීමකි යැයි පවසති. ෂෙයික් මුහම්මද් බින් ඉබ්රාහිම්,(රහිමහුල්ලාහ්) එතුමාගේ [මජ්මූඋ ෆතාවා] (11/151) පිටුවෙහි මෙසේ පැවසීය. ගර්භාෂය තුළ සිටිනා දරුවා මිය ගිය බව තහවුරු වීමෙන් පසු එසේ ඉවත් කිරීමට හැක. ඒ හැර ගැබ් ගැනීමෙන් පසු ප්රාණය සහිත දරුවෙකු ගබ්සා කිරීම සඳහා උත්සාහ නො කළ යුතුයි. නිමි.

ඉහත සඳහන් කරුණු සම්බන්ධයෙන් විද්වතුන්ගේ සභාව විසින් නිකුත් කරන ලද අංක (140) දරණ හිජ්රි වර්ෂ 1407/06/20 දිනැති පහත සඳහන් ප්රකාශයෙහි මෙසේ සඳහන් කර ඇත. නීත්යානුකූලව, යුක්ති සහගත කටයුත්තක දී සහ අත්යවශ්ය හේතුවක් නිසා හැර,ඉතා පටු අරමුණක් මුල් කරගෙන, ගැබ් ගැනීමෙන් පසු කුස තුළ පවතින කලලය එහි විවිධ අවස්ථා වලදී ගබ්සා කිරීමට අවසර නැත. ගර්භණීභාවය පළමු අදියරයේදී - එනම් එය දවස් හතළිහක කාල පරිච්ඡේදයක් නම් - එය දරුවන් ඇති දැඩි කිරීමේ දී ඇති වන දුෂ්කරතා, බිය නිසා හෝ ඔවුන්ගේ ජීවන හා අධ්යාපන වියදම් පියවා ගැනීමට නොහැකි වේ යැයි බියෙන් හෝ ඔවුන්ගේ අනාගතය ගැන සිතා, අඹු සැමියන්ට දැන් සිටින දරුවන් ගැන සෑහීමකට පත් වීම යනාදි වශයෙන් ගන්නා තීරණයකදී ගබ්සා කළ නො හැකිය. විශ්වාසදායක වෛද්ය කමිටුවක් විසින් කලලය දිගටම පැවතීම මවගේ ආරක්ෂාවට අනතුරක් යැයි තීරණය කරන තුරු ගැබ් ගැනීම ලේ කැටියෙන් හෝ මස් පිඩුවෙන් යුක්ත නම් ගබ්සා කිරීම සුදුසු වන්නේ නැත. එය අඛණ්ඩව පැවතීමෙන් එය විනාශ වී යයි යන බියෙන්, මෙම අනතුර වළක්වා ගැනීම සඳහා වූ සියළුම උපායන් අපොහොසත් වූ පසු එය ගබ්සා කිරීමට අවසරය ඇත. තුන්වන අදියරෙන් පසු සහ ගැබ්ගෙන මාස හතරක් සම්පූර්ණ වූ පසු, මවගේ ගර්භාෂයේ බිළින්දාගේ පැවැත්ම නිසා ඇය මියයෑමට හේතු වන බව විශ්වාසදායක විශේෂඥ වෛද්යවරුන් කණ්ඩායමක් තීරණය කරන තෙක් එය ගබ්සා කිරීමට අවසර නැත. ගර්භාෂයේ සිටින බිළින්දාගේ ජීවිතය බේරා ගැනීම සඳහා සියලු උපක්රම යෙදීමෙන් පසුව,මෙම කොන්දේසි යටතේ ගබ්සා කිරීමට අවසර ලබා දෙන ලදී. එනම් මෙහිදී හානි දෙකෙන් විශාලතම හානිය ඉවත් කිරීම සහ විශාලතම ප්රතිලාභය ගෙන ඒමේ න්යාය අනුගමනය කළ හැක. විද්වත් සභාව විසින් ඉහත කරුණු තීරණය කිරීමේදී දෙවියන්ට බැතිමත්ව නිර්දේශ කර සනාථ කරනු ඇත. තවද මෙය සම්බන්ධයෙන් අල්ලාහ්ගේ සහාය පතමු. ශාන්තිය සහ සමාදානය අපගේ මුහම්මද් නබි (සල්ලල්ලාහු අලෛහිව සල්ලම්) තුමාණන්ට, එතුමාගේ පවුලේ අයට සහ එතුමාගේ සගයන්ට හිමි වේවා! නිමි.

අෂ්-ෂෙයිහ් මුහම්මද් ඉබ්නු උසයිමීන් තුමාගේ "කාන්තාවගේ ඔසප් චක්රය" නමැති පොතෙහි ඉහත සඳහන් කරුණු සම්බන්ධයෙන් මෙසේ සඳහන් වේ. ගර්භාෂයේ ඇති ජීවය ගබ්සා කිරීමේ අරමුණ, එහි ඇති ජීවය විනාශ කිරීමකි. නිසැකවම එය තහනම්ය. මන්ද එය යුක්ති සහගත හේතුවකින් තොරව, ආත්මයක් ඝාතනය කිරීමකි. අල්-කුර්ආනය, සුන්නාව සහ සම්මුති මතයට අනුව ආත්මයක් ඝාතනය කිරීම තහනම් කර ඇති බැවිනි.

ඉමාම් ඉබ්නු අල් ජව්සී "කාන්තා නීතිය" නමැති පොතෙහි පිටු 108, 109 හි මෙසේ සඳහන් කරයි. විවාහයේ අරමුණ දරුවෙකු බලාපොරොත්තු වන අතර, සෑම ශුක්රාණු බින්දුවකින් ම දරුවෙකු බිහි නොවේ. කුස තුළ දරුවා බිහිවී ඇත්නම් අපේක්ෂිත අරමුණ ඉටු වී ඇත. එබැවින් හිතාමතාම එය ගබ්සා කිරීම ප්රඥාවට පටහැනිය. දරුවෙකු පිළිසිඳ ගත් ආරම්භක අවදියේම ගර්භාෂය තුළ ඇති ප්රාණය ගබ්සා කිරීම විශාල පාපයකි. මක්නිසාද යත් එය පරිපූර්ණත්වය කරා පවතින අතර (දරුවකු බිහිවීමේ) අවසන් නිමාව දක්වා ගමන් කරන නිසා ය. නමුත් එසේ ගබ්සා කිරීම ගර්භාෂය තුළ ඇති ප්රාණය ඇති බිළිඳෙකු ගබ්සා කිරීමට වඩා පාපකමින් අඩු ක්රියාවකි. එලෙසම ගර්භාෂය තුළ ඇති ප්රාණය ඇති බිළිඳෙකු ගබිසා කිරීම දෙවත්වය විශ්වාස කරන්නෙකු ඝාතනය කිරීමට සමානය. අල්ලාහ් මේ ගැන මෙසේ පවසයි. පණ පිටින් මිහිදන් කරනු ලැබු ගැහැනු දරුවා (මරණින් මතු දිනයේදී) අසනු ලැබේ. ඇය ඝාතනය කරනු ලැබුවේ කුමන වරදකටද? යැයි නිමි

එබැවින් මුස්ලිම් කාන්තාවනි! දෙවියන්ට බිය වී කිසිම අරමුණක් සඳහා මෙම අපරාධය නොකරන්න. තර්කානුකූලව හෝ ආගම් මත පදනම් නොවන සහ බුද්ධි ගෝචර නොවූ ව්යාජ සම්ප්රදායන් වලට සහ අසත්ය ප්රචාරවලට රැවටීමෙන් වළකින්නැයි ඉල්ලා සිිටිමු.

හතරවන ඡේදය

කාන්තාවන්ගේ හිජාබය සහ ඇඳුම් පිළිබඳ නීති රීති

පළමුව. ඉස්ලාමීය නීතිය විසින් කාන්තාවන් කෙරෙහි අනුමත කරන ලද ඇඳුම් පැළැඳුම් වල ලක්ෂණ.

මුස්ලිම් කාන්තාවකගේ ඇඳුම ඇගේ මහ්රම් (මහ්රම් යනු විවාහය කර ගන්නට ඥාති සබඳතා අනුව තහනම් වූ පිරිස වේ) නොවන පිරිමින්ගෙන් ඇයගේ මුළු සිරුරම ආවරණය වන පරිදි වස්ත්රයක් විය යුතුයි. සාමාන්ය අවස්ථාවන්හි දී සමාජ පුරුද්දක් වශයෙන් තම මහ්රම් පිරිමියෙකු ඉදිරියේ ඇයගේ මුහුණ, අත් සහ පාද නිරාවරණය කිරීම හැරෙන්නට ඇය තම ශරීරය නිරාවරණය නොකළ යුතුයි.

පිට වස්ත්රයකින් ඇතුළත ඇති දෑ හොඳින් ආවරණය කිරීම, වස්ත්රයේ ඇතුලත ඇති ඇගේ සමේ පැහැය දැකීමට තරම් වස්ත්රය විනිවිද නොවීම.

ඇයගේ ශරීරයෙහි අවයවයන් කැපී පෙනෙන ආකාරයට ඇඳුම් හිරට සකස් වී තිබිය නොයුතුයි.(සහීහ් අල් මුස්ලිම්) ග්රන්ථයෙහි නබි (සල්ලල්ලාහු අලෙයිහි වසල්ලම්) තුමාණන් පැවැසූ බව මෙසේ සඳහන් වේ. එතුමාණන් මෙසේ පැවැසූහ. නිරයේ මම දැක නැති මිනිසුන් වර්ග දෙකක් සිටී. ගවයින්ගේ වලිගය වැනි කසයෙන් මිනිසුන්ට පහර දෙන පිරිසක් සහ ඔවුහ් ඇඳුම් ඇඳගෙන සිටියද, නිරුවතින් සිටින බව පෙනෙන සහ ඔටුවෙකුගේ මොල්ලිය මෙන් ඇලවෙන හා වැනෙන කොණ්ඩා (මෝස්තර) සහිත කාන්තාවන් එහි සිටිති. ඔවුන්ගේ හිස (තලප්පාවක් බඳින ලද ඔලුවක් මෙන්) ලොකුවට දර්ශනය වෙයි. ඔවුහු ස්වර්ගයෙට ඇතුළු නොවන අතර එහි සුගඳ පවා ඔවුන් වෙතට හමන්නේ නැත.එහි සුවඳ මෙන්න මේ ආකාරයට විහිදී යයි යනුවෙන් පැවැසූහ. ෂෙයිකුල් ඉස්ලාම් ඉබ්නු තයිමියියා එතුමාගේ මජ්මූඅතුල් ෆතාවා නම් ග්රන්ථයේ (පිටු 146/22) නබි (සල්ලල්ලාහු අලයිහි වසල්ලම්) තුමාණන්ගේ ප්රකාශය මෙසේ අර්ථ විවරණය කරයි. ඔවුන් (එම කාන්තාවන්) ඇත්ත වශයෙන්ම ඇඳ සිටිය ද ඔවුන් නිර්වතින් සිටින්නන් මෙනි. ඇය ඇඳගෙන සිටින්නේ ඇගේ සම විනිවිද පෙන්වන තුනී ඇඳුමක් ඇඳ සිටින අයෙකු ලෙස ය, නැතහොත් කලව වැනි ඇගේ මැවීමේ හැඩ රුව පෙන්වන පටු ඇඳුමකි. ආවරණය කළ යුතු තැන් ආවරණය නොකරයි. මේ අනුව සැබැවින්ම ඇය නිර්වස්ත්රව සිටින්නීය. උදා: ඇයගේ පිටුපස පැත්ත පාද හා වෙනත් අවයවයන් කැපී පෙනෙන ආකාරයට තදට ඇඳීම) කාන්තාවගේ ඇඳුම් ඇයව ආවරණය කරන දෙයක් විය යුතු අතර එමඟින් ඇගේ ශරීරය හෝ ඇගේ අවයවවල හැඩය හා ප්රමාණය ප්රදර්ශනය නොවිය යුතුයි. අඳින වස්තරය පුළුල්ව තිබිය යුතුයි. නිමි.

ඇගේ ඇඳුම් පිරිමින් අනුකරණය කරන ආකාරයේ ඇඳුමක් නොවිය යුතුයි. නබි (සල්ලල්ලාහු අලෙයිහි වසල්ලම්) තුමාණන් පුරුෂයින් අනුකරණය කරමින් අදින පළඳින ස්ත්රීන්ට සහ ස්ත්රීන් අනුකරණය කරමින් අදින පළඳින පිරිමින්ට ශාප කළහ. පිරිමියාට ආවේනික වූ දෙයක් අඳින සහ සෑම සමාජයකටම අයත් චාරිත්ර අනුකරණය කරමින් විශේෂිත වූ ඇඳුමින් සැරසුණු ඇයව පිරිමියෙකුට සමාන කළේය.

ෂෙයිකුල් ඉස්ලාම් ඉබ්නු තය්මියියා මජ්මූඅතුල් ෆතාවා නම් ග්රන්ථයේ පිටු (155,149,148,/22) හි මෙසේ පවසයි.පිරිමින්ගේ හා කාන්තාවන්ගේ ඇඳුම් අතර වෙනස යනුවෙන් අදහස් කරන්නේ පිරිමින්ට සුදුසු දේ පිරිමින් විසින්ද, කාන්තාවන්ට සුදුසු දේ කාන්තාව විසින්ද ඇඳ ගත යුතුයි යන්නයි. එය පිරිමින් සඳහා අණ කර ඇති ඇඳුම්හි සහ කාන්තාවන් සඳහා අණ කර ඇති ඇඳුම්හි සංකේතයයි. (ශාරීරික අවයවයන්) ප්රදර්ශනය නොකර ඒවා ආවරණය කිරීමට කාන්තාවන්ට අණ කර ඇත. එබැවින් කාන්තාවන් කෙරෙහි යාච්ඥාවට (අදාන්) කැඳවීමේදී, තල්බියා පාරායනය කිරීමේදී, අදාල ප්රාර්ථනාවන් ශබ්ද නගා පාරායනය කිරීමට අවසර නැත, තවද සෆා සහ මර්වා කඳු වෙත නැගීමට හෝ පිරිමි හාජිවරුන් මෙන් ඉහ්රාම් ඇඳුම් ඇඳ සිරුර බැහැර කිරීමටද නියම කර නැත. පිරිමින්ගේ හිස් නිරාවරණය කර ගන්නා ලෙසටත්, ඔහුගේ ශරීර ප්රමාණයට අනුව මසා නිම කරන ලද සුපුරුදු ඇඳුම් නොඅඳින ලෙසටත්, එනම් කමිස, කලිසම්, තෝබ් වැනි දෑ නොඅඳින ලෙසට සහ සපත්තු වැනි දෑ නොපළඳින ලෙසටත් අණ කර ඇත. (හජ් කර්තව්වය දී) කාන්තාවන් සඳහා, ඔවුන්ගේ ඇඳුමෙන් කිසිවක් තහනම් කර නැත. ආවරණය කිරීමට හා වසාගැනීමට ඇයට අණ කර ඇති හෙයින්, ඊට පටහැනිව (හජ් මෙහෙය සඳහා විශේෂිත ඇඳුම් පැළැඳුම්) ඇය වෙනුවෙන් නියම කර නොමැත. එහෙත් ඇයට මුහුණ ආවරණය කිරීම සහ අත්වැසුම් පැළඳීම තහනම් කර ඇත. මන්ද අත්වැසුම් කෙනෙකුගේ ශරීර අංගයට සරිලන පැළැඳුම් ලෙස සාදා ඇති බැවින් එහි අවශ්යතාවයක් නොමැත. තවද "ඇය තම මුහුණ හා වෙනත් දෑ පිරිමින් නොදකිනා ආකාරයට ආවරණය කළ යුතුය" යැයි එතුමා සඳහන් කළේය.මේ අනුව පැහැදිලි වන්නේ පිරිමින්ගේ හා කාන්තාවන්ගේ ඇඳුම් අතර වෙනසක් තිබිය යුතු බවත්, ඒ තුලින් පිරිමින් කාන්තාවන්ගෙන් වෙන්කර හඳුනාගත හැකි බවත් ය. මෙම පරිච්ඡේදයේ මූලික අරමුණ වන්නේ ද ආවරණය වී තිබීම සහ වැසී තිබීම කාන්තාවන්ගේ ඇඳුම්හි ඇතිවිය යුතු ලක්ෂණයක් බව පැහැදිලි කිරීමයි. තවද යම් ඇඳුම් කට්ටලයක්, එය අඳින්නේ බහුතරයක් පිරිමි පක්ෂය නම්, එම ඇඳුම් කාන්තාව සඳහා තහනම් බව පැහැදිලිය. තවද, සම්පූර්ණ ආවරණයක් රහිත කාන්තා ඇඳුමක් සහ පිරිමින්ගේ ඇඳුමට සමානකම් ඇති ඇඳුමක් නම්, ඒ දෙවර්ගයේම ඇඳුම් කාන්තාවක් සඳහා එතුමා තහනම් කර ඇත යනුවෙන්ද පැවැසුවේය. අල්ලාහ් සියල්ල දනී. නිමි.

ඇයද සැරසිලි භාණ්ඩවලින් එකක් නොවීම සඳහා, නිවසින් පිටව යන විට කිසිවෙකුගේ අවධානය ඇද ගන්නා කිසිදු සැරසිලි නොතිබිය යුතුය.

දෙවනුව: හිජාබ්: එහි අර්ථය, සාධක සහ එහි ප්රතිලාභ.

හිජාබ්: එහි අර්ථය: සර්වබලධාරි අල්ලාහ් පැවසූ පරිදි කාන්තාවක් තම මහ්රම් නොවන පිරිමින්ට නොපෙනෙන පරිදි තම ශරීරය ආවරණය කිරීමයි. අල්ලාහ් මෙසේ පවසයි. ඔවුන්ගේ අලංකාරයන් එහි මතු පිටින් පෙනෙන දෑ හැර වෙනෙකක් හෙළි නොකරන මෙන් ද ඔවුන්ගේ ළැම පෙදෙස මතට ඔවුන්ගේ මොට්ටැක්කිලිය දමන මෙන් ද නුඹ පවසනු. තවද ඔවුන්ගේ අලංකාරය ඔවුන්ගේ ස්වාමිපුරුෂයින්ට හෝ ඔවුන්ගේ පියවරුන්ට හෝ ඔවුන්ගේ ස්වාමිපුරුෂයින්ගේ පියවරුන්ට හෝ ඔවුන්ගේ දරුවන්ට හෝ ඔවුන්ගේ ස්වාමිපුරුෂයින්ගේ දරුවන්ට හෝ ඔවුන්ගේ සහෝදරයින්ට හෝ ඔවුන්ගේ සහෝදරයින්ගේ දරුවන්ට හෝ ඔවුන්ගේ කාන්තාවන්ට හෝ ඔවුන්ගේ දකුණත් හිමිකරගත් අයට හෝ පිරිමින් අතුරින් කාමාශාවකින් තොර ව උපස්ථාන කරන්නන්ට හෝ ස්ත්රීන්ගේ රහස්ය පෙදෙස් ගැන (කාමාශාවක්) මතු නොවන දරුවන්ට මිස වෙනත් කිසිවකුට හෙළි කළ නොයුතුය. උත්තරීතර අල්ලාහ් මෙසේ ද පවසා ඇත. ඔවුන්ගෙන් යම් වස්තුවක් ඉල්ලා සිටින විට තිරය පසුපසින් සිට ඔවුන්ගෙන් ඉල්ලා සිටිනු. හිජාබ් යන්නෙන් අදහස් කරන්නේ කාන්තාව ඇයගේ ශරීරය ආවරණය කිරීමයි. එම ආවරණය බිත්තියකට, දොරකට මුවාවීමෙන් හෝ ඇඳුම් වලින්ද විය හැකිය. මෙම අල්කුර්ආන් පදය නබි (අල්ලාහ් එතුමාට ආශීර්වාද කර එතුමාට සාමය ලබා දෙත්වා) තුමාණන්ගේ භාර්යාවන් වෙනුවෙන් පහළ වූ දෙයක් වුවද අල්ලාහ්ගේ ඒ තීන්දුව දේවත්වය විශ්වාසව කරන සියලු කාන්තාවන් සඳහා අදාල වේ. සර්වබලධාරී අල්ලාහ් මෙසේ පැහැදිලි කරයි. එය නුඹලාගේ සිත් හා ඔවුන්ගේ සිත් වලට වඩාත් පිවිතුරුය. මෙය සාමාන්ය ස්වභාවයකි, එබැවින් එහි සාමාන්ය ස්වභාවය ඔහුගේ සාමාන්ය නීතියට සාක්ෂියකි. සර්වබලධාරී අල්ලාහ් මෙසේ පවසයි. අහෝ නබිවරය! ඔබ ඔබේ බිරියන්ටත් ඔබේ දූවරුන්ටත් විශ්වාස කරන්නන්ගේ බිරියන්ටත් ඔවුන්ගේ මතු පිට වස්ත්රයෙන් ඔවුන් මත (හිසේ සිට) පහළට හෙළනු යැයි පවසනු.

ෂෙයිකුල් ඉස්ලාම් ඉබ්නු තයිමියියා 'මජ්මූඅතුල් ෆතාවා' නම් ග්රන්ථයේ (පිටු 111,149,110, /22) හි මෙසේ පවසයි. ජිල්බාබ් යනු වස්ත්රයකි. එය ඉබ්නු මස්ඌද් සහ වෙනත් විද්වතුන් විසින් හඳුන්වනු ලබන්නේ රෙදි කඩක් යන නමිනි. පොදු ජනයා එය ඉzසාර් යනුවෙන් හඳුන්වති. එනම් එය කාන්තාවකගේ හිස ඇතුලු ඇගේ ශරීරයේ අනෙක් කොටස් ආවරණය කරන විශාල ඇඳුම් වර්ගයකි. අබු උබයිදා සහ වෙනත් විද්වතුන් විසින් මෙම ඇඳුම් වර්ගය විස්තර කර ඇත්තේ එය ඇගේ හිස ඉහළ සිට පහළ දක්වා ආවරණය වන අතර ඇගේ ඇස් පමණක් දිස්වන ආකාරයේ වස්තරයක් වන බවයි. මෙම වර්ගයටම අයත් ඇඳුම් නිකාබ් යනුවෙන් හඳුන්වනු ලබන කාන්තා ඇඳුම් වර්ගයවේ. නිමි.

කාන්තාවක් තම මහ්රම් හැර වෙනත් අයෙකු ඉදිරියේ පෙනී සිටින විටක තම මුහුණ වසා ගත යුතුය යන්නට නබි (සල්ලල්ලාහු අලෙයිහි වසල්ලම්) තුමාගේ හදීසයට සාක්ෂියක් වශයෙන් අයිෂා (රලියල්ලාහු අන්හා) තුමිය විසින් වාර්තා කරනු ලබන හදීසය ගෙන හැර දැක්වීමට හැක. එය මෙසේය. අල්ලාහ්ගේ දූතයාණන් (අල්ලාහ්ගේ ආශිර්වාදය සහ සාමය එතුමාණන්ට ලැබේවා!) සමඟ අපි ඉහ්රාම් තත්ත්වයේ සිටියදී මගී කණ්ඩායම් දෙකක් අප පසුකර ගියහ. ඔවුන් අප වෙත ලඟා වෙත්ම, අපගෙන් එක් අයෙක් ඇයගේ හිස මත තිබූ ආවරණය ගෙන මුහුණ වසා ගනී. ඔවුන් (එම මගීන්) අපගෙන් ඉවත්ව ගිය පසු (මුහුණ) නිරාවරණය කර ගත්තෙමු.

මහ්රම් නොවන වෙනත් පිරිමින් ඉදිරියේ කාන්තාවකගේ මුහුණ ආවරණය කිරීමේ අවශ්යතාව පිළිබඳ සාක්ෂි අල්-කුර්ආනයේ සහ සුන්නාවේ බහුලව දක්නට ලැබේ. අහෝ මුස්ලිම් සොයුරිය! මෙම විෂය සම්බන්ධයෙන් (වැඩි විස්තර සඳහා) පහත සඳහන් කෘතීන් වෙත ඔබේ අවධානය යොමු කිරීමට කැමැත්තෙමි. ෂෙයිකුල් ඉස්ලාම් ඉබ්නු තයිමියියා තුමාගේ "කාන්තාවකගේ හිජාබය සහ සලාතයේ ඇයගේ ඇඳුම" අෂ්-ෂෙයික් අබ්දුල් අසීස් බින් අබ්දුල්ලාහ් බින් බාස් තුමාගේ "ගමනේ හා හිජාබයේ නීතිය" අෂ්-ෂෙයික් හමූද් බින් අබ්දුල්ලාහ් අත්තුවෙයිජරීගේ "නිරාවරණය වෙත පෙළඹෙන කතුන්" අෂ-ෂෙයික් මුහම්මද් බින් සාලිහ් අල් උසයිමීන් තුමාගේ "රිසාලා අල් හිජාබ්" යන කෘතීන්හි ඔබට අවශ්ය තරම් කරුණු කාරණා අඩංගු වී ඇත.

මුස්ලිම් සහෝදරියනි! ඔබේ මුහුණ නිරාවරණය කර ගැනීමට අවසර දුන් විද්වතුන්ගේ කියමන අනුමත කළ නොහැක්කක් වුවද, එසේ ඔබට එම විද්වතුන් අවසර දී ඇත්තේ ඔබ අධාර්මික පරීක්ෂනවලින් ආරක්ෂා වීමේ කොන්දේසිය මත බව දැනගනු මැනවි. කුමක් නිසාද යත් ෆිත්නා හෙවත් අධාර්මික පරීක්ෂණයන් සමාජය තුල අනාරක්ෂිතය. විශේෂයෙන් පුරුෂයින් හා ස්ත්රීන් අතර දේව විශ්වාසය හීන වූ මොහොතකදී සහ නිහතමානිකම දක්නට නොලැබෙන අවස්ථාවකදී ෆිත්නා හෙවත් අධාර්මික පරීක්ෂණයන් වෙත ආරාධනා කරන පිරිස් බහුලව දක්නට ලැබේ. කාන්තාවන් විවිධ වර්ගයන්ගෙන් ප්රගුණ කර ඇති ඔවුන්ගේ මුහුණු අලංකරණය කිරීම යනු ෆිත්නා හෙවත් අධර්මය වෙත නැඹුරු කරන්නා වූ අකුසලාත්මක දෙයකි. අල්ලාහ් මත විශ්වාසය තබමින් හිජාබ් හෙවත් ආවරණය කිරීමේ පිළිවෙත අනුගමනය කරන්න. එබැවින් මුස්ලිම් සහෝදරිය, ඒ ගැන පරෙස්සම් වන්න. කාන්තාවන් වැටී ඇති මෙවැනි අධාර්මික කටයුතු වලට අතීතයේ විසූ පිළිගත් මුස්ලිම් විද්වතුන් අනුමතිය දුන්නේ නැත. වර්තමානයේ එවැනි විද්වතුන් අනුමතිය දෙන්නේද නැත. මුස්ලිම් කාන්තාවන් අතර හිජාබ් හෙවත් වැස්ම භාවිතයේදී කුහක කමින් හැසිරෙන අයද සිටිති. ඔවුන් ආවරණය කිරීමේ පිළිවෙත් හෙවත් හිජාබ් සමග බැඳී සිටින සමාජයක සිටීන විටකදී ඔවුන් හිජාබ් ක්රමයට අනුගත වෙති. ඔවුන් හිජාබ් වැස්ම පිළිපදින්නේ නැති සමාජයක සිටින්නේ නම්, ඔවුන්ද හිජාබ් වැස්මකින් තොරව සිටිති. තවද ඔවුන් අතර ප්රසිද්ධ ස්ථාන වලදී හිජාබයෙන් ආවරණය වී සිටින කාන්තාවන්ද සිටිති. එනමුත් ඔවුහු කඩ සාප්පුවකට හෝ රෝහලකට ඇතුළු වුවහොත් හෝ එසේත් නැත්නම් ස්වර්ණාභරණ වෙළඳ ස්ථානයකට හෝ කාන්තාවන්ගේ ඇඳුම් මසන පුද්ගලයෙකු සමග ගනුදෙනු කරන්නේ නම්, එවිට ඇය ඇගේ මුහුණ සහ දෑත් නිරාවරණය කරමින් ඇගේ ස්වාමිපුරුෂයා හෝ ඇයගේ මහ්රම් අය සමග කතා කරන්නාක් මෙන් වෙනසකින් තොරව හැසිරෙති. එබැවින් මෙසේ හැසිරෙන කාන්තාවන් අල්ලාහ්ට බිය බැතිමත් විය යුතුයි. තවද පිටරටින් ගුවන් යානා මගින් පැමිණෙන සමහර කාන්තාවන් හිජාබය තොරව පැමිණෙන අතර (ඉස්ලාම් නීතය පවතින) රටේ ගුවන්තොටුපළකට යානය ගොඩබසින විට පමණක් හිජාබය පළඳින ආකාරය අප දකිමු. හිජාබය ආගමික වත්පිළිවෙතක් වශයෙන් නොව එය එක්තරා සිරිතක් බවට පත්වී ඇති බවක් අපි දකිමු.

පස්වන ඡේදය

මුස්ලිම් කාන්තාවනි! ඔබේ හිජාබ් වැස්ම, මිනිස් (වෙස් වලාගත්) සුනඛයින්ගේ විකෘති මානසික හැඟීම් තුලින් පිටවන විෂ සහිත දැක්මෙන් ඔබව ආරක්ෂා කරන අතර ඔබේ මනසෙහි ඇති වන උමතු අභිලාෂයන් කපා කප්පාදු කර දමයි. එබැවින් හිජාබ් පිළිවෙතට ඇල්මක් දක්වමින් එය වෙතට තදින් නැඹුරුවන්න. හිජාබ් ක්රමයට විරුද්ධව ද්වේෂ සහගත ප්රචාරයන් සහ හිජාබ් පිළිවෙත අවම කිරීමේ ප්රචාරයන් කෙරෙහි අවධානය යොමු නොකරන්න.මන්ද එය ඔබට නපුරක්ම ගෙන දෙන බැවිනි. සර්වබලධාරි අල්ලාහ් මෙසේ පවසයි. තවද අල්ලාහ් නුඹලාගේ පාපක්ෂමාව පිළිගැනීමට අපේක්ෂා කරයි. නමුත් මනෝ ආශාවන් අනුගමනය කරන්නන්, නුඹලා සම්පූර්යෙන්ම (සත්යයෙන් දුරස් ව) නොමඟට නැඹුරු වීම අපේක්ෂා කරති. කාන්තාවන්ට අදාල නීති පිළිබද විස්තර.

සලාතය සහ කාන්තාව

මුස්ලිම් කාන්තාවනි! ඔබගේ (සලාත්) යාච්ඤාව එහි කොන්දේසි, කුළුණු සහ යුතුකම් මනාව වටහාගෙන එය කලට වේලාවට ඉටු කිරීම කෙරෙහි සැලැකිලිමත් වන්න. අල්ලාහ් විශ්වාසීන්ගේ මව්වරුන් අමතා මෙසේ පවසයි. තවද සලාතය විධිමත් ව ඉටු කරනු. තවද සකාත් ද පිරිනමනු. තවද අල්ලාහ්ට හා ඔහුගේ දූතයාණන්ට අවනත වනු. මෙය පොදුවේ මුස්ලිම් කාන්තාවන්ට දෙනු ලබන අණකි. එබැවින් (සලාත්) යාච්ඤාව ඉස්ලාමයේ දෙවන කුළුණ වන අතර එය ඉස්ලාමයේ ස්ථම්භයයි. එය අත්හැරීම දේවත්වය ප්රතික්ෂේප කිරීමක් වන අතර ඔහු ආගමෙන් ඉවත් කරනු ලබන්නකි. සලාතය නොකරන පිරිමින්ට සහ කාන්තාවන්ට දහමක් හෝ ඉස්ලාමීය පිළිවෙතක් නැත. නීත්යානුකූලව නිදහසට කරුණක් නොමැතිව සලාතයක් ඒ අදාල කාලයෙන් ඔබ්බට ප්රමාද කිරීම එම සලාතය නාස්ති කිරීමකි. අල්ලාහ් මෙසේ පවසයි. ඔවුනට පසු ව, පසුපරම්පරාවක් පැමිණියේය. ඔවුහු සලාතය පැහැර හැරියෝය. තවද ආශාවන් අනුගමනය කළෝය. එහෙයින් ඔවුහු නපුරු විපාකයට මතු මුහුණ දෙනු ඇත. නමුත් පසුතැවිලි වී විශ්වාස කොට යහකම් කළවුන් හැර. ඔවුහු වනාහි (ස්වර්ග) උයනට පිවිසෙන්නන් වෙති. තවද කිසිවකින් ඔවුහු අපරාධ කරනු නොලබති.

ඉහත සඳහන් කරුණු සම්බන්ධයෙන්, අල්-හාෆීස් ඉබ්න් කසීර් තුමා සිය අර්ථවිවරණ ග්රන්ථයෙහි, විචාරක ඉමාම්වරුන් කණ්ඩායමකගේ අදහස් මුල්කරගෙන මෙසේ සඳහන් කළේය. සලාතය නාස්ති කිරීම යන්නෙහි අර්ථය, එහි නියමිත කාල වේලාව නාස්ති කිරීමයි, නියමිත කාලය ගෙවී ගිය පසු අදාල සලාතය ඉටු කිරීමයි. එතුමා විසින් සලාතය සඳහා වූ කාලය මකා දැමීම අලාභයක් ලෙස අර්ථකථනය කළ අතර එය නිරය වෙත ගෙන යන මාර්ගයක් ලෙසද විස්තර කර ඇත.

පිරිමින්ගේ සලාත් ක්රමවේදයට වඩා කාන්තාවන්ට විශේෂිත වූ සලාත් ක්රම වේදයට අදාල නීති පහත සඳහන් වේ. කාන්තාවකට අදාන් හෝ ඉකාමා නැත.

කාන්තාවකට සලාත් වේලාව සඳහා ආරාධනා කිරීම හෙවත් "අදාන් " හෝ සලාත් ඉටුකිරීම සඳහා ආරාධනා කිරීම හෙවත් "ඉකාමා" පාරායනය කිරීම හෝ අවශ්ය නොවේ. මන්ද යත්, කටහඬින් සලාතයට කැඳවීම නියම කර තිබුණ ද කාන්තාවකට එසේ කටහඬ උස් කිරීමට අවසර නැත. ඒ අවස්ථා දෙකෙහි ඇගේ හඬ උස් කිරීම හෝ ශබ්ද නගා කෑගැසීම අනුමත නැත. එතුමා [අල්-මුග්නි] (පිටු 2/68) හි මෙසේ පැවසුුහ. මෙයට විරුද්ධව කිසිදු විකල්ප අදහසක් අපි නොදනිමු.

සලාතය කරන විට, සෑම කාන්තාවක්ම ඇගේ මුහුණ හැර ශරීරය සම්පූර්ණයෙන් ආවරණය කර ගත යුතුය.

සෑම කාන්තාවක්ම ඇගේ සලාතය ඉටු කරන විට ඇගේ මුහුණ, ඇගේ අත් සහ පාද දෙක මහ්රම් අය හැර වෙනත් පුද්ගලයින් නොදකින සේ වසා ගත යුතුය. යම් විදිහකින් වෙනත් පුද්ගලයෙකු ඇයව දකින විට ඒවා වසා ගැනීම අනිවාර්ය වේ. තවද සලාත් නොවන වේලාවන්හි දී (ඇගේ ශරීරය සම්පූර්ණයෙන්ම) ආවරණය කර ගැනීම අනිවාර්ය වේ. තවද සලාත් අවස්ථාවේදී ඇගේ හිස, බෙල්ල සහ ඇගේ පාදය පවා නොපෙනෙන පරිදි ඇගේ සිරුර ආවරණය කළ යුතුයි. නබි (සල්ලල්ලාහු අලයිහි වසල්ලම්) තුමාණෝ මෙසේ පැවසුහ. මොට්ටැක්කිලියකින් තොරව මල්වර වයසට පත් කතක් ඉටු කරන සලාතය අල්ලාහ් පිළිගන්නේ නැත. අර්ථය: ඔසප් වීමේ (වයස) කරා ළඟා වූ තැනැත්තිය. අල් හිමාර් යනු හිස සහ බෙල්ල ආවරණය කරන වැස්මයි. උම්මු සලමා (රළියල්ලාහු අන්හා) තුමිය නබි (සල්ලල්ලාහු අලයිහි වසල්ලම්) තුමාගෙන් මෙසේ විමසුවාය. "කාන්තාවක් සළුවක් නොමැතිව අද්දර්උ හෙවත් යුධ කබායකින් හා මොට්ටැක්කිලියකින් සලාතය ඉටු කළ හැකිද?" එවිට එතුමාණෝ: "එම යුධ කබාය (සම්පූර්ණයෙන්) ශරීරයේ උඩ කොටස සිට පාදය දක්වා ආවරණය කරන්නේ නම් (සලාතය කළ) හැක." යනුවෙන් පැවැසුුහ.

ඉහත සඳහන් හදීස් දෙකට අනුව පැහැදිලිවන්නේ කාන්තාවක් සිය සලාතයේදී හිස සහ බෙල්ල ආවරණය කළ යුතු බවයි. එමෙන්ම ආඉෂා තුමිය දැනුම් දෙන හදීසයකට අනුව ඇගේ අනිකුත් ඇඟ පසඟ සහ පාදයන් නොපෙනෙනසේ ආවරණය කළ යුතු බව අවධාරනය කර ඇත. උම්මු සලාමා දැන්වූ හදීසයට අනුව පිටස්තර කෙනෙකු නොදකින ආකාරයට ඇගේ මුහුණ නිරාවරණය කර ගැනීමට අවසර ඇත. විද්වතුන් ඒකමතිකව මේ සම්බන්ධයෙන් එකඟ වී ඇත.

ෂෙයිකුල්-ඉස්ලාම් ඉබ්නු තයිමියා [මජ්මූ අල්-ෆතාවා] හි (පිටු113,114/22) මෙසේ පැවසීය. කාන්තාවක් තනිවම සලාත් ඉටු කිරීමේදි ඇයට ආවරණය කිරීමට අණ කරනු ලැබ ඇත. සලාත් කිරීම හැරුණු විට ඇයට සිය නිවස තුළ තමන්ගේ හිස ආවරණය නොකිරීමට අවසර ඇත.එබැවින් සලාත් අවස්ථාවේදී ඇය (හිජාබයෙන්) අලංකාර කර ගැනීම අල්ලාහ් සඳහා වූ අයිතියකි, එබැවින් රාත්රී කාලයේදී තනිව සිටින විටක වුවද කිසිවෙකු කඃබාව (ඉස්ලාමයට පෙර වූ යුගය මෙන්) නිරුවතින් තවාෆ් කීරීම හෝ නිරුවතින් සලාත් කිරීම අවශ්ය නැත. මන්ද ඒ සඳහා ඇඳුම් පිළිවෙතක් හඳුන්වා දී ඇති බැවිනි. කාන්තාවක් ශරීරය ආවරණය කිරීම යනුවෙන් අදහස් කරනු ලබන්නේ සලාතයකදී පමණක් ඇයව දැකීමෙන් ආවරණය කිරීම නොවේ. (නිමි)

එතුමා අල්-මුග්නි පොතෙහි (පිටු 2/ 328) හි මෙසේ පැවැසුවේය. නිදහස් ස්ත්රියකගේ ශරීරයේ සියලු කොටස් සලාත් වේලාව අතරතුර ආවරණය කළ යුතුයි. එයින් යමක් නිරාවරණය වුවහොත්, ඇගේ සලාතය අවලංගු වේ. ඉතා සුලු ප්රමාණයක් ආවරණය නොවී නම් වලංගු වේ. මාලික්, අල් අව්සායි සහ අෂ්-ෂාෆී යන විද්තුන්ගේ අදහසද මෙයයි.

කාන්තාවක් රුකූඋ සහ සුජූද් අවස්ථාවන්වලදී (පිරිමින් මෙන් නොව ශරීර අවයව) ඈත් කිරීමකින් තොරව සිරුරට ළං කර ගනී.

එතුමා සිය අල්-මුග්නි පොතෙහි (පිටු 2/258) මෙසේ සඳහන් කර ඇත. කාන්තාවක් රුකූඋ සහ සුජූද් අවස්ථාවන්වලදී අවයවන් ඈත් කරනු වෙනුවට තම ශරීරයට ළං කර තබා ගත යුතුය. ඇය වාඩිවන විට තවර්රුක් හා ඉෆ්තිරාෂ් හිඳුම වෙනුවට ඇය කකුල හරස් කර ඒ මත හිඳගත හැකි බවත්, නැතහොත් ඇගේ පාද පහළට දමා ඇගේ දකුණු පැත්තෙන් තබා ගැනීමට හැකි බවත් සඳහන් කර ඇත. මෙය ඇයගේ ශරීරය වසා ගන්නා යහපත් ක්රමය වේ.

අල්-නවවි (අල්-මජ්මූ පොතෙහි ) (3 / 455) හි මෙසේ පැවසීය: අල්- ෂාෆී තුමා එතුමාගේ (අල්මුක්තසර්) හි මෙසේ පවසයි. සලාත් කිරීමේ කාර්යයේදී ස්ත්රීන් හා පුරුෂයන් අතර වෙනසක් නැත. එනමුත් කාන්තාවක් සිය අවයවයන් එකිනෙක සමඟ ළං කිරීමක් හෝ වසා ගැනීම යහපත් ක්රමයකි. තවද සුජූද්හි සිටින විට ඇගේ උදර ප්රෙද්ශය කලවා ප්රදේශය සමග යා කර ගැනීමටද හැක. මෙය රුකුඋ ඉරියව්වේදි කරන්නේ නම් වඩාත් අගනේය. එබැවින් මෙම ක්රමය සෑම සලාතයකදීම අනුගමනය කිරීම වටී.(නිමි)

ස්ත්රීන් සාමුහිික (ජමාඅත්) වශයෙන් සලාත් ඉටුකරන විටදී ඔවුන්ගෙන් එක් අයෙකු ඉමාමා වශයෙන් පත් කිරීම සම්බන්ධයෙන් (විද්වතුන් අතර) මතභේද පවතී.

කාන්තාවන් සලාතයක් (ජමාඅත්) සාමුහිික වශයෙන් මෙහෙයවන විටදී ඔවුන්ගෙන් එක් තැනැත්තියක් ඉමාමා (සලාතය මෙහෙයවන්නියක්) ලෙස තෝරා ගැනීම සම්බන්ධයෙන් එය තහනම් ක්රියාවක් ද? නැත්නම් අවසර ඇති දෙයක් ද? යනුවෙන් විද්වතුන් අතර (ප්රතිපත්තිමය වශයෙන්) මත භේද පවතින අතර, බහුතරයගේ අදහස නම් එහි කිසිදු වරදක් නොමැති බවයි. මෙයට සාක්ෂියක් වශයෙන් ඔවුන් පෙන්වා දෙන්නේ නබි (සල්ලල්ලාහු අලෙයිහිව සල්ලම්) තුමාණන් උම්මු වරකා තුමියට තම නිවසේ වැසියන්ට ඉමාමාත් හෙවත් සලාතයේදී නායකත්වය දෙන ලෙස අණ කර සිටීමය. කෙසේ වෙතත් විද්වතුන්ගෙන් සමහරු මෙම ක්රියා පිළිවෙත සුදුසු නොවන බව සිතන අතර, සමහරු එය (මක්රූහ්) ප්රිය මනාප නොවන දෙයක් හැටියට දකිති. වෙනත් සමහරු එය දකින්නේ් එසේ කිරීම (ෆර්ල්) අනිවාර්ය සලාතයන් සඳහා නොව (නෆිල්) වෛකල්පිත සලාත් සඳහා අවසර දී ඇති බවයි. වඩාත්ම නිවැරදි නිගමනය නම් එසේ කළ හැකි බවයි. මේ සම්බන්ධයෙන් වැඩි විස්තර සඳහා [අල්-මුග්නි] (2/202) සහ අල් නවවී තුමාගේ (අල් මජ්මූඋ) (4/ 84,85) යන ග්රන්ථ දෙක වෙත යොමු වන්න.

මහ්රම් නොවන පිරිමින් ශ්රවණය කිරීමට නොහැකි අයුරින් කාන්තාවකට (අල්කුර්ආන් වදන්) තරමක් හඬ උස් කොට පාරායනය කිරීමට හැක.

මස්ජිද් හෙවත් දේවස්ථාන වෙත පිරිමින් සමඟ සලාත් කිරීම සඳහා කාන්තාවන්ට නිවසින් පිටව යාමට අවසර ඇත.

දේවස්ථානවලට පිරිමින් සමඟ සලාත් කිරීම සඳහා කාන්තාවන්ට නිවෙස්වලින් පිටවී යාමට අවසර ඇති අතර, ඔවුන්ගේ නිවෙස්වල සිට ඔවුන්ගේ සලාතයන් ඉටු කරගැනීම ඔවුන්ට වඩා යහපත්ය. මෙය සම්බන්ධයෙන් ඉමාම් මුස්ලිම් තුමා තමන්ගේ සහීහ් ග්රන්ථයේ මුහම්මද් (සල්ලල්ලාහු අලෙයිහි වසල්ලම්) තුමාණන්ගේ හදීසයක් වාර්තා කර ඇත. නබි තුමාණෝ මෙසේ වදාලහ. අල්ලාහ්ගේ දේවස්ථානය වෙත පැමිණෙන අල්ලාහ්ගේ ගැත්තන්ව නො වළක්වන්න. සල්ලල්ලාහු අලෛහි වසල්ලම් තුමාණන් මෙසේද පවසා සිටියහ: කාන්තාවන් දේවස්ථානයට යාම ඔබ නො වළක්වන්න. (සලාතය සඳහා) ඔවුන්ගේ නිවාස ඔවුන්ට වඩා යහපත්ය. ආවරණය වී සිටීමට හැකි බැවින් ඔවුන් නිවසේ රැඳී සිටිමින් ඔවුන්ගේ සලාතය ඉටු කිරීම වඩා යහපත්ය. ඔබ සලාතය කිරීම සඳහා මස්ජිදයට ගියහොත්, ඔබ පහත සඳහන් ආචාර විධි පිළිපැදිය යුතුය. ඇය ඇඳුම් හා සම්පූර්ණ වැස්මකින් ආවරණය වී සිටිය යුතුය. ආඉෂා (රළියල්ලාහු අන්හා) තුමිය මෙසේ පැවැසුවාය. කාන්තාවෝ අල්ලාහ්ගේ දූතයාණන් සමඟ සලාත් ඉටු කළෝය.-ඔවුන් නැවත පිටවී යන විට ඔවුන් කව්රුන්දැ?යි කිසිවෙකුට හඳුනා ගැනීමට නොහැකි ලෙස සිය වස්ත්රෙයන් ඇඟ පසඟ ඔවුහු සම්පූර්ණයෙන්ම වසා සිටියෝය. කාන්තාවන් මස්ජිදය බලා පිටත්ව යන විට සුවඳ විලවුන් තවරා ගැනීමකින් තොරව යා යුතුය. මේ ගැන නබි (සල්ලල්ලාහු අලෙයිහි වසල්ලම්) තුමාණෝ මෙසේ පැවැසූහ. අල්ලාහ්ගේ දේවස්ථානය වෙත පැමිණෙන අල්ලාහ්ගේ ගැත්තන් නො වළක්වන්න. ඔවුහු සුවඳ විලවුන් තවරා නොගත් කාන්තාවන් ලෙස පැමිණෙත්වා! -තෆ්ලාත්- යනු සුවඳ විලවුන් තවරා නොගත් කාන්තාවන්ය. නබි (සල්ලල්ලාහු අලෙයිහි වසල්ලම්) තුමාණන් මෙසේ ප්රකාශ කළ බව අබූ හුරෙයිරා (රළියල්ලාහු අන්හු) තුමා විසින් වාර්තා කරන ලදී. කුමන කාන්තාවක් වුවද සුවඳ විලවුන් තවරා ගත්තේද, ඇය රාත්රී ඉෂා සලාතය සඳහා අප සමඟ සහභාගි නොවිය යුතුය. ඉබ්නු මස්ඌද්ගේ බිරිය වන සයිනබ් තුමියගේ හදීසයක් මුස්ලිම් තුමා මෙසේ වාර්තා කරයි. ඔබලා (කාන්තාවන්) අතරින් කෙනෙකු මස්ජිදයට පිය නගන්නේ නම් සුවඳ විලවුන් තවරා නොගන්න.

ඉමාම් අල්-ෂව්කානි තුමා [නයිලුල් අව්තාර්] (3/140,141) හි මෙසේ සඳහන් කර ඇත."ෆිත්නා හෙවත් අධර්මය වෙත පොළඹවන සහ ඒ වෙත ආකර්ෂණය වන අන්දමේ සුවඳ විලවුන් වැනි දෙයක් තැවරීමෙන් තොරව කාන්තාවන්ට දේවස්ථානය වෙත යාමට අවසර ඇත" තවද එතුමා මෙසේ පැවැසුවේය. සුවඳ විලවුන්, ස්වර්ණාභරණ හෝ වෙනත් අලංකරණ වැනි දෙයක් පැළඳීම නිසා ෆිත්නාවක් හෙවත් දූෂිත දෙයක් සිදු නොවන්නේ නම් පමණක් භාරකාර පිරිමියෙකු විසින් දේවස්ථාන වෙත යාමට ඔවුන්ගේ කාන්තාවන්ට අවසර ලබා දීමට හැකි බව මෙම හදීස් වලින් පැහැදිලි වේ.(නිමි).

අලංකාර ඇඳුම් හා ආභරණවලින් සැරසී පිටතට යා යුතු නොවේද? (යනුවෙන් අසනු ලැබූ ප්රශ්නයකට පිළිතුරු දෙමින්) විශ්වාසීන්ගේ මව වන අයිෂා (රළියල්ලාහු අන්හා) තුමිය මෙසේ පැවැසුවාය. "අප විසින් කාන්තාවන් තුළ දුටු දේ අල්ලාහ්ගේ දූතයාණන් (සල්ලල්ලාහු අලයිහි වසල්ලම්) දුටුවේ නම්, ඉස්රායිල් දරුවෝ ඔවුන්ගේ කාන්තාවන් වැළැක්වූයේ යම් සේද එසේම එතුමාණන් කාන්තාවන් දේවස්ථානයට පැමිණීම නියත වශයෙන්ම වළක්වනවා ඇත."

ඉමාම් අල්-ෂව්කානි [නයිලුල් අව්තාර්] යන කෘතියෙහි අයිෂා තුමියගේ ඉහත සඳහන් (අප කාන්තාවන් දෙස දුටු දේ නබි (සල්) තුමාණන් දුටුවේ නම්) යන ප්රකාශය මෙසේ විස්තර කර ඇත. එහි අර්ථය නම් අලංකාර ඇඳුම්, සුවඳ විලවුන්, අලංකරණ ප්රදර්ශන යනාදියෙන් යුත් කාන්තාවන්ය. නමුත් (ධාර්මික) කාන්තාවන් නිසි ලෙස ඇඳුම් පැළැඳුම්වලින් සැරසී සහ තමන්ගේ ශරීරය සම්පූර්ණයෙන්ම වැසෙන ආකාරයට නිවසින් පිටතට ගියහ.

ඉමාම් ඉබ්න් අල්-ජව්සි සිය (අහ්කාමුන් නිසා) නමැති කෘතියේ 39 වන පිටුවෙහි මෙසේ සඳහන් කරයි. "කාන්තාවක් තමන් ගැන කෙතරම් ආත්ම විශ්වාසයක් පැවැතියද නිවසින් පිටතට යාමේදී පරිස්සම් විය යුතුය. ඇයට තමාගේ සිත් තුළ ආරක්ෂිත තත්ත්වය ගැන බියක් නැති වුවද, (විවිධ) මිනිසුන්ගෙන් ඇය ප්රවේශම් වීමට වග බලා ගත යුතුය. නිවසින් පිට වීමට අත්යවශ්ය හේතුවක් ඇත්නම් ඔබේ ස්වාමි පුරුෂයාගේ අවසරය මත සෙනඟ අඩු වීදි හරහා ගමන් කරන්න. වෙළඳ පොලවල් සහිත වීදිවල ගමන් කිරීමෙන් සහ අනවශ්ය හඬ හා නාද වලට සවන් දීමෙන් වැළැකී සිටින්න. පාර මැද නොව වීදි අයිනේ ගමන් කිරීමට වගබලාගන්න" (නිමි.)

එක් ස්ත්රියක් නම් ඇයට පිරිමින් පිටුපස තනිවම සිටීමට හැක. අනස් (රළියල්ලාහු අන්හු) තුමා දැනුම් දෙන හදීසයක මෙසේ සඳහන් වේ. ඔවුන් සමග නබි (සල්ලල්ලාහු අලයිහි වසල්ලම්) තුමාණන් සලාහ් ඉටු කළ අවස්ථාවේදී, මම සහ අනාථ පුද්ගලයෙකු එතුමාණන් පිටු පස සිටි අතර අප පිටුපස වයෝවෘද කාන්තාවක් සිටියාය. ඔහු විසින් වාර්තා කරන හදීසයක මෙසේද සඳහන් වේ. මම සහ අනාථ දරුවා නබි (සල්ලල්ලාහු අලයිහි වසල්ලම්) තුමාණන් පිටුපසට වී අපගේ නිවසේ දී සලාත් ඉටු කළෙමු - මගේ මව (උම් සුලෙයිම්) අප පිටුපසින් සිටිමින් සලාත් ඉටු කළාය. (මූලාශ්රය: බුහාරි) (සලාතය සඳහා) කාන්තාවන් එක් අයකුට වඩා වැඩියෙන් පැමිණ සිටියා නම්, ඔවුන් පිරිමින්ට පිටුපස පේළියකින් හෝ පේළි කිහිපයකින් හෝ සිට ගනිති. මන්ද නබි (සල්ලල්ලාහු අලයිහි වසල්ලම්) තුමාණන්, වැඩිහිටි පිරිමි පුද්ගලයින් ඉදිරියේ ද, පිරිමි ළමයින් ඔවුන් පිටුපස ද, පිරිමි ළමයින්ට පිටුපස කාන්තාවන් ද යනාදි වශයෙන් සලාතයේ පේළි සකස් කළහ.(මූලාශ්රය අහමද්) අබු හුරෙයිරා (රළියල්ලාහු අන්හු) තුමාණන් වාර්තා කරන හදීසයක නබි (සල්ලල්ලාහු අලයිහි වසල්ලම්) තුමාණන් මෙසේ පැවැසූහ. පිරිමින් සඳහා හොඳම පේළිය පළමු පේළියයි, ඔවුන් සඳහා නරක පේළිය අවසන් පේළියයි. කාන්තාවන් සඳහා හොඳම පේළිය අන්තිම පේළියයි ඔවුන් සඳහා නරක පේළිය පළමු පේළියයි.

අනිවාර්ය වූ සලාතයක දී හෝ වේවා තරාවීහ් සලාතයක දී හෝ වේවා (සමූහ, ජමාත් සලාතයකදී හෝ වේවා) කාන්තාවන් පිරිමින් පිටිපස පෙළ ගැසී සලාත් ඉටු කළ යුතු අතර එසේ ඔවුන් පිරිමින් පිටිපසට වී පේළි ගැසුවත් වෙන් වී වෙනම සලාත් ඉටු කළ නොයුතු බව ඉහත සඳහන් හදීස් දෙක තුළින් පැහැදිලි වේ.

නබි (සල්ලල්ලාහු අලයිහි වසල්ලම්) තුමාගේ කියමනට අනුව,ඉමාම් වරයා විසින් සලාතයේදී අමතක වීමකින් වරදක් සිදු කළ විටක, කාන්තාවක් අත්පුඩි ගසා ඔහුට සංඥා අඟවයි. යම් අමතකවීමක් ඔබලාගේ සලාතයේ දී සිදුවූ විටක (ඒ බව අඟවනු පිණිස) පිරිමින් (සිහින් හඬකින්) තස්බීහ් කරත්වා, කාන්තාවන් අත්පුඩි ගසත්වා!

මෙම හදීසය සලාත් අවස්ථාවේදී සලාතය මෙහෙයවන ඉමාම්වරයාට අමතකවීම් හෝ යමක් අතහැර දැමීම වැනි දැයක් සිදුවූ විට (එය ඉමාම්ට දන්වනු පිණිස) කාන්තාවන්ට අත්පුඩි ගැසීමට අවසර ඇක. මෙයට හේතුව කාන්තාවගේ කටහඬ පිරිමින්හට අධාර්මික පරීක්ෂණයක් වන නිසාය. එබැවින් ඇයට අත්පුඩි ගැසීමට හා කථා නොකරන්නට අණ කෙරිණි.

ඉමාම් (සලාත් අවසානයේදී) සලාම් දුන් විට, ප්රථමයෙන් කාන්තාවන් මස්ජිදයෙන් පිටත් ව යා යුතු අතර පිරිමින් එහි වාඩි වී සිටිය යුතුයි. එය කාන්තාවන් අතරින් පිටත් වූයේ කව්රුන්දැයි ඔවුනට දැනගත නොහැකි වනු පිණිසය. උම්මු සලාමා (රළියල්ලාහු අන්හා) තුමිය මෙම හදීසය වාර්තා කිරීමේදී මෙසේ පැවසුවාය. අනිවාර්ය සලාතයන් අවසන් කරනු ලැබුවහොත්, කාන්තාවන් නැගිට පිටත්ව ගිය අතර අල්ලාහ්ගේ දූතයාණන් හා අල්ලාහ්ගේ අභිමතය පරිදි එහි සලාත් ඉටු කළ පිරිමින් රැඳී සිටියහ. (මස්ජිදයෙන් පිටවීමට) නබි (සල්ලල්ලාහු අලයිහි වසල්ලම්) තුමාණන් නැගිට සිටි විට ඔවුහු ද නැගිට සිටියෝය.

අල්-සුහ්රි මෙසේ පැවසීය. ඉහත සඳහන් කරුණු නිවරැදි යැයි දකිමු. අල්ලාහ් සියල්ල හොඳින් දනී - මෙය එසේ සිදුවන්නේ මනා පාලනයකින් යුක්තව (සහ විනයට අනුව) කාන්තාවන් මස්ජිදයෙන් පිටවීමට සැළැස්වීම සඳහාය. මූලාශ්ර ග්රන්ථය -බුහාරි- වැඩි විස්තර සඳහා [අෂ්-ෂර්හුල් කබීර් අල්-මුක්නි] 1/422 බලන්න.

නයිලුල් අව්තාර් (පිටුව 2/ 326) නමැති කෘතියෙහි ඉමාම් අෂ්-ෂව්කානි මෙසේ පැවසීය. "මෙම හදීසයෙන් ඇඟවෙන්නේ ඉමාම්වරයාට මඃමූන්වරුන්ගේ තත්ත්වයන් නිරීක්ෂණය කිරීම සතුටුදායක මෙන්ම තහනමට හේතු විය හැකි දේ වළක්වා ගැනීම ද සතුටුදායක වන බවයි. තවද සැකයට තුඩු දෙන ස්ථාන, සහ මාර්ගවල මෙන්ම නිවෙස්වල පිරිමින් කාන්තාවන් සමඟ මිශ්ර වීමට ඉඩ ඇති තැන් වළක්වා ගැනීම ද සතුටුදාක වේ. (නිමි.)

ඉමාම් අන් නවවී රහ්මතුල්ලාහ් අල් මජ්මූ (3/455) හි මෙසේ පවසයි. "සලාතයක් ජමාඅත් හෙවත් සාමුහිකව ඉටු කිරීමේදී කාන්තාවන් පිරිමින්ට වඩා බොහෝ කරුණුවලදී වෙනස් ආකාරයකට කටයුතු කරති. පළමුව - මෙම සලාතයේදී පිරිමියෙකු වඩාත් සැලැකිලිමත් විය යුතු ආකාරයට කාන්තාවක් සැලැකිලමත් විය යුතු නැත.

දෙවනුව - සලාතය මෙහෙයවන්නිය සලාත් කරන කාන්තාවන් මැද සිටගනිමින් සලාතය මෙහෙයවයි.

තෙවනුව - කාන්තාවක් පිරිමියෙකු පසුපසින් සිට ගනී. ඇය පිරිමියෙකු මෙන් ඉමාම්ට අසළින් සිට ගන්නේ නැත.

සිව්වනුව - ඔවුන් පිරිමින් සමඟ පේළිවලට සාමුහික සලාත් ඉටුකරන්නේ නම්, පළමු පේළියට වඩා ඔවුනට වඩාත් උතුම් වන්නේ ඔවුන්ගේ අවසන් පේළියයි. (නිමි)

ඉහත සඳහන් කළ කරුණුවලින් පිරිමින් සහ කාන්තාවන් අතර මිශ්රවීම තහනම් කර ඇති බව පෙනේ.

කාන්තාවන් ඊද් උත්සව සඳහා මස්ජිදයට යාම: උම්මු අතියියා (රළියල්ලාහු අන්හා) තුමිය මෙසේ පවසයි. ඊද් අල් ෆිත්ර් සහ ඊද් අල් අද්හා සලාතයන් සඳහා කාන්තාවන් එනම් තරුණියන්, ඔසප් තත්වයේ සිටින කාන්තාවන් හා වැඩීවියට පත් කතුන් බැහැරට ගෙන යන ලෙස අල්ලාහ්ගේ දූතයාණෝ අපට අණ කළහ. ඔසප් තත්වයේ සිටින කාන්තාවන් සලාතයෙන් ඉවත්ව සිටියහ. තවත් ප්රකාශයක සලාතය ඉටු කරන ස්ථානයෙන් ඉවත්ව සිටියහ. එවැනි කාන්තාවන් යහපත් දේ දැක බලාගනිමින් සහ මුස්ලිම්වරුන්ට ප්රාර්ථනා කරමින් පසුවෙති.

ශව්කානී තුමා මෙසේ පවසයි. ඉහත සඳහන් හදීසයෙන් අර්ථවත් වන්නේ කාන්තාවකට එනම් ඔසප් තත්වයේ පසුවන - තරුණ, මහලු, මැදිවිය යනාදි වශයෙන් කිසිදු වයස් බේදයකින් තොරව, ඊද් සලාත් දෙක සඳහා සලාත් ඉටු කරන ස්ථානය වෙත පිටත්ව යාමට ෂරීආ නීතියෙන් අවසර දී ඇති බවයි. එනමුත් ඇයට වැළැක්විය නොහැකි හේතුවක් නිසා හෝ එසේ පිටවී යාම නිසා (ෆිත්නා හෙවත්) දූෂිත සිදුවීමක් හට ගනීදෝ යැයි සිතන්නේ නම් හෝ ඉද්දා තත්ත්වයේ සිටින්නේ නම් හෝ එසේ පිට නොවීමට අවසර ඇත. නිමි. (නයිලුල් අව්තාර් 3/306) බලන්න.

ෂෙයිකුල් ඉස්ලාම් ඉබ්නු තයිමියියා 'අල් මජ්මූඃ' ග්රන්ථයෙහි, (6/458, 459) මෙසේ පවසයි. දේවත්වය විශ්වාස කරන කාන්තාවන්ට ඊද් සලාතයන් දෙක හැර ජුම්ආ සලාතය සහ ජමාඅත් (සාමුහික) සලාතයන් සිය නිවසෙහිදී ඉටුකිරීම වඩාත් යෝග්ය බව දන්වා සිටියි. එමෙන්ම අවුරුදු සලාතය සඳහා නිවසින් පිටත්ව මස්ජිදය වෙත යාම සඳහා නබි (සල්ලල්ලාහු අලයිහි වසල්ලම්) තුමාණන් අණ කර ඇත. අල්ලාහ් සියල්ල දනී. මේ සඳහා විවිධ හේතුන් ඇත. පළමුවැන්න ජමාඅත් සහ ජුම්ආ සලාත් මෙන් නොව ඊද් සලාත් දෙක වසරකට දෙවරක් පමණක් ඉටු කරනු ලැබේ.

දෙවැන්න: ඊද් සලාතයන් වෙනුවට වෙනත් සලාතයක් ඉටු කළ නොහැක. නමුත් ජුම්ආ දිනයේ ඇය නිවසේදී ඉටු කරන ලුහර් සලාතය ඇයගේ ජුම්ආ සලාතයයි.

තුන්වැන්න: එය අල්ලාහ් සිහි කිරීම සඳහා කාන්තාරයට යන්නාක් මෙනි. එය යම් ආකාරයකින් හජ් මෙහෙයට සමාන වේ. හජ් සමයේ ඊද් අල් අක්බර් හෙවත් විශාලතම උත්සවය හජ් වන්දනාකරුවන්ට අනුගත වූයේ එබැවිනි. නිමි.

ඊද් සලාතය සඳහා හැඩ ගැන්වීමෙන් තොරව කාන්තාවන් (නිවසින්) පිටව යාම ෂාෆී තුමා විසින් කොන්දේසි ලෙස පනවන ලදී.

ඉමාම් අල්-නවවි (අල්-මජ්මූ) [5/13) හි මෙසේ පැවසීය: අල්-ෂාෆි සහ ඔහුගේ සගයන් (රහිමහුල්ලාහ්) මෙසේ පවසා ඇත.“හැඩ අලංකාරයෙන් තොරව කාන්තාවන් ඊද් උත්සව සලාතයට සහභාගී වීම සතුටු දායකය. නමුත් එසේ හැඩ අලංකාරයෙන් සැරසුණු කාන්තාවන් මෙසේ සලාතයට සහභාගී වීම පිළිකුල් සහගතය. එතුමා මෙසේද පැවැසුවේය. ඔවුන් එසේ පිටතට ගියහොත්, ඔවුන් සාමාන්ය ඇඳුමකින් පිටතට යාම සුදුසුය, තවද ඔවුන් විසින් අලංකරණය කරන ලද ඇඳුම් කිසිවක් ඇඳිය යුතු නොවේ. ඔවුන් ජලයෙන් පිරිසිදු විය යුතු අතර සුවඳ විලවුන් වර්ග කිසිවක් තැවැරිය යුතු නොවේ. මෙම නීතිය (පිරිමින්ට) ආශාවන් ඇති නොකරන මහලු කාන්තාවන්ටත් අදාළය. තරුණ, සුරූපි සහ මන රංජිත කතක් නම්, ඔවුන් එසේ සහභාගි වීම ප්රිය මනාප කරුණක් නොවේ. මෙසේ වළක්වා ඇත්තේ, ෆිත්නා හෙවත් සමාජ දූෂණය කෙරෙහි ඇති බිය නිසා සහ ඔවුන් විසින් එවැනි දෙයක් සිදුවීමට හැකි බිය නිසා වෙනි. මෙම ප්රකාශය උම්මු අතියා තුමියගේ හදීසයට පටහැනි යැයි කියනු ලැබුවහොත්, අපි මෙසේ පවසමු: විශ්වාසීන්ගේ මව වන ආයිෂා (රළියල්ලාහු අන්හා) තුමිය මෙසේ පැවැසුවාය. "අප කාන්තාවන් සිදු කරන දෑ නබි (සල්) තුමාණන් දුටුවේ නම්, ඊස්රායිල් වරුන් විසින් ඔවුන්ගේ කාන්තාවන් වළක්වනු ලැබුවාක් මෙන් නබි (සල්ලල්ලාහු අලයිහි වසල්ලම්) තුමාණන් කාන්තාවන් දේවස්ථානයට පැමිණීම නියත වශයෙන්ම වළක්වනවා ඇත." පෙර කාලය මෙන් නොව වර්තමානය සමාජ දූෂණයෙන් සහ නපුරෙන් පිරිහී ගොස් ඇත. අල්ලාහ් සියල්ල දනී. නිමි.

මම මෙසේ පැවැසුවෙමි. අපේ මේ කාලය හරිම දරුණුයි.

ඉමාම් ඉබ්න් අල්-ජව්සි [අහ්කාම් අන්-නිසා] නම් සිය කෘතියෙහි පිටු 38 හි මෙසේ පවසයි: කාන්තාවන්ට (නිවසින්) පිටතට යෑමට අවසර ඇති බව අපි පැහැදිලි කර ඇත්තෙමු, නමුත් ෆිත්නා හෙවත් සමාජ දූෂණය කෙරෙහි ඔවුන් බිය වේ නම් හෝ ඔවුන්ගෙන් සමාජයට එවැනි අයහපතක් සිදු වේ යැයි බිය වන්නේ නම්, පිටත්ව යාමෙන් වැළකී සිටීම වඩා හොඳය, මන්ද පෙර පරම්පරාවේ කාන්තාවන් මේ කාලයේ කාන්තාවන් හැදී වැඩෙන තත්වයට වඩා වෙනස් බැවිනි. පිරිමින්ද එලෙසමය. නිමි.

ඔවුහු මහත් භක්තිමත් දනන් වූහ.

අහෝ මුස්ලිම් සහෝදරිය! ඔබට ඊද් සලාතය සඳහා (නිවසින්) පිටත්ව යාමට නීත්යානුකූලව අවසර දී ඇති බව ඉහත උපුටා දක්වන ලද ලිපි වලින් ඔබට වැටහෙන්නට ඇත. එසේ අවසර දී ඇත්තේ (අල්ලාහ්ගේ අණ) පිළිපදිමින්, නිසි ලෙස ආවරණය වෙමින්, අල්ලාහ් වෙතට සමීප වීමේ අරමුණ ඇතුව සහ මුස්ලිම්වරුන්ගේ යාච්ඤාවලට සහභාගී වීම සහ ඉස්ලාමයේ මහිමය ප්රදර්ශනය කිරීම යන කොන්දේසි මතයි. එසේ ඔබේ සහභාගිත්වය, ඔබේ අලංකාරය ප්රදර්ශනය නොවන ආකාරයට හෝ ඔබේ සහභාගිත්වය සමාජ දූෂණයට ලක් නොවන ආකාරයට සිදු විය යුතුයි. එබැවින් මෙවැනි තත්ත්වයෙන් වැළකී සිටීමට ඔබ වග බලා ගත යුතුයි.

හයවන ඡේදය

කාන්තාවන්ට අදාල නීති රීති. කාන්තාවන්ට අදාල (මරණ) අවමංගල්ය කටයුතුවල විධිවිධාන පිළිබඳ නීති රීති. අල්ලාහ් සෑම ආත්මයකටම මරණය නියම කර ඇති අතර, සර්වබලධාරි අල්ලාහ් ඔහුගේ සදාතනික පැවැත්ම, ඔහුටම විශේෂිත ගුණාංගය හිමි කර ගෙන සිටියි. අල්ලාහ් මෙසේ පවසයි. තවද තේජාන්විතභාවයෙන් හා ගෞරවාන්විතභාවයෙන් යුක්ත නුඹගේ පරමාධිපතිගේ මුහුණ නිත්යයව පවතී. ආදම්ගේ දරුවන්ගේ අවමංගල්ය කටයුතු, ජීවතුන් අතර සිටින්නන් විසින් වගකීමකින් යුතුව ක්රියාවට නැංවිය යුතු අතර, මෙම පරිච්ඡේදයේ මේ සම්බන්ධයෙන් කාන්තාවන්ට විශේෂිත වූ කරුණු ඇතුළත් වේ: ඒ අතරින් මියගිය කාන්තාව නෑවීම කාන්තාවන් විසින් භාරගත යුතුය. මියගිය කාන්තාව නෑවීම කාන්තාවන් විසින් සිදු කළ යුතුය. කාන්තාවකගේ දේහය, ඇගේ ස්වාමිපුරුෂයා විසින් හැර වෙනත් පිරිමින් විසින් ඇයව නෑවීමට අවසර නැත. මක්නිසාද යත්, තම බිරිඳ නෑවීමට ඇයගේ ස්වාමි පුරුෂයාට අයිතියක් ඇති අතර, මියගිය පුරුෂයාව නෑවීමේ භාරකාරත්වය පිරිමින් විසින් දරනු ඇත. මන්ද, අලි (රළියල්ලාහු අන්හු) තුමා විසින් සිය බිරිඳ වන අල්ලාහ්ගේ දූතයාණන්ගේ දියණිය ෆාතිමා (රළියල්ලාහු අන්හා) තුමිය නෑවූ අතර අබූ බක්ර් (රළියල්ලාහු අන්හා) තුමා වෆාත් වූ අවස්ථාවේදී එතුමාගේ බිරිඳ වන අස්මා බින්ත් උමයිස් (රළියල්ලාහ් අන්හා) තුමිය විසින් එතුමාව නාවන ලදී. කාන්තාවගේ දේහය සුදු වස්ත්ර පහකින් ආවරණය කිරීමට නිර්දේශ කරනු ලැබේ. (ඉණ වටා) වේට්යකින් පැළඳීම, ඇගේ හිස හිජාබයකින් වැසීම, කමිසයකින් වැසීම සහ තවත් වස්ත්ර දෙකකින් මේ සියල්ල එතීම. මේ සම්බන්ධයෙන් ලයිලා අස්සකෆිය්යා මෙසේ වාර්තා කරයි. අල්ලාහ්ගේ දූතයාණන්ගේ දියණිය වූ උම්මු කුල්සූම් (රළියල්ලාහු අන්හා) තුමිය මරණයට පත් වූ අවස්ථාවේදී ඇගේ මෘත ශරීරය ස්නානය කළ අය අතර මම ද සිටියෙමි. එවිට නබි (සල්ලල්ලාහු අලයිහි වසල්ලම්) තුමාණන් (ඇගේ මෘත ශරීරය ආවරණය කිරීම සඳහා) පළමුව වේට්ටියක් ලබා දුන් අතර පසුව කමීසයක් ලබා දුන්නේය. ඉන්පසු හිස වැසීම සඳහා හිජාබයක් ලබා දුන් අතර පසුව එය එතීම සඳහා රෙද්දක් ලබා දුන් අතර ඉන් පසුව තවත් වරක් එතීම සඳහා වෙනත් වස්ත්රයක් ලබා දුන්නේය. අල් හිකා යනු (ඉණට ඔතන) වේට්ටියයි.

ඉමාම් අෂ් ෂව්කානී සිය (නයිලුල් අව්තාර්) නම් කෘතියෙහි මෙසේ සඳහන් කර ඇත. ඉහත සඳහන් හදීසය කාන්තාවකගේ මෘත ශරීරය වස්ත්රයකින් ආවරණය කිරීම අනිවාර්ය බව සනාත කරයි. එනම් ඒ සඳහා අවශ්ය වන්නේ වේට්ටියක්, හිස වැසීමට හිජාබයක්, කමිසයක්, ඒවා වැසීමට වස්ත්රයක් සහ (සම්පූර්ණයෙන්) වැසීමට තවත් වස්ත්රයක් යනාදි වශයෙනි.නිමි. (නයිලුල් අව්තාර් 4/42)

මියගිය කාන්තාවගේ කෙස් කලඹට කරනුයේ කුමක් ද?

කොණ්ඩය කරල් තුනකට ගොතා ඒවා ඇගේ ශරීරයේ පිටපස තැබීම. උම්මු අතියියා (රළියල්ලාහු අන්හා) තුමිය විසින් දැනුම් දෙන හදීසයක. නබි (සල්ලල්ලාහු අලෙයිහි වසල්ලම්) තුමාණන්ගේ දියණියගේ මෘත ශරීරය ජලස්නානය කළ ආකාරය ගැන මෙසේ විස්තර කර ඇත. එහි 'අපි ඇයගේ කොණ්ඩය කොටස් තුනකට බෙදා එය ඇයගේ පසුපසට දැමුවෙමු.

(මළ ගමනේ) මිනියක් පිටුපසින් කාන්තාවන් ගමන් කිරීම පිළිබඳ නීතිය.

උම්මු අතියියා (රළියල්ලාහු අන්හා) තුමිය මෙසේ පැවසුවාය. මෘත දේහයක් පිටුපසින් (මළ ගමනේ) ගමන් කිරීම අප වළක්වන ලදි. තවද, අප වෙත එය අනිවාර්ය නොකරන ලදි. පිළිගත් හදීසයක් වන ඉහත සඳහන් හදීසයෙන් (එම ක්රියාව) තහනම් බව පෙනෙන්නට තිබෙන අතර, උම්මු අතියියාගේ, "අප කෙරෙහි අනිවාර්ය නොකරන ලදි "යන ප්රකාශය සම්බන්ධයෙන් ෂෙයිකුල් ඉස්ලාම් ඉබ්නු තයිමියියා (මජ්මූඅ් ෆත්වා) (24/355) හි මෙසේ පවසයි. ඇය විසින් මෙහිදී අදහස් කර ඇත්තේ (නිවසින් පිටවී යාමේ) තහනම තහවුරු වී නැති බවයි. නමුත් මෙහිදී තහනම ඉවත් කර නැත. ඇය විසින් අදහස් කර ඇත්තේ ද තහනම ඉවත් කර නැති බවයි. නමුත් සාධක ඉදිරි පත් කිරීමේදී අවශ්ය වන්නේ නබි (සල්ලල්ලාහු අලයිහි වසල්ලම්) තුමාණන්ගේ ප්රකාශය මිස ඒ පිළිබඳ අන් අයගේ මතය නොවේ.

කාන්තාවන් සුසාන භූමියට යෑම තහනම්ය.

සැබැවින්ම අල්ලාහ්ගේ දූතයාණන් (සල්ලල්ලාහු අලයිහි වසල්ලම්) පැවසූ බව අබූ හුරෙයිරා (රළියල්ලාහු අන්හු) තුමා විසින් මෙසේ වාර්තා කරන ලදී. සුසාන භූමි නරඹන්නට යන කාන්තාවන් හට එතුමාණෝ ශාප කළහ. ෂෙයිකුල්-ඉස්ලාම් ඉබ්නු තයිමියා, (අල්ලාහ් එතුමාට අනුකම්පා කරත්වා:) “කාන්තාවකට මේ සඳහා දොර විවෘත කළහොත්, ස්වභාවයෙන්ම ඇය දුර්වල බැවින්ද, ඉවසීමේ ශක්තිය හීන බැවින්ද, අධික ලෙස කනස්සල්ලට පත්වන බැවින්ද ඇය කාංසාවට, වැලපීමට හා වේදනාවට පත් වන බව කවුරුත් දන්නා කරුණකි. ඇයගේ හඬා වැලපීම මියගිය තැනැත්තා වේදනාවට පත්වීමට හේතුවක් විය හැක. වෙනත් හදීසයක සඳහන් පරිදි පිරිමින් ඇගේ කටහඬට සහ රූපයට වසඟ වීමටත් එය හේතුවක් වේ. මක්නිසාද යත් ඔවුන් ජීවත්ව සිටින අය (ගේ සිත් ආකර්ශන කිරීමෙන්) දූෂිත කරන අතර මළවුන්ට වේදනාව ගෙන දෙති. කාන්තාවන් සොහොන් වෙත යාම - වැරදි සහගත ද? නැත්නම් කාන්තාවන් හා පිරිමින් සම්බන්ධයෙන් තහනම් කරන ලද දෙයක් සිදුවීම කෙරෙහි එය හේතුවක් වේද? යන්න සම්බන්ධයෙන් නිරීක්ෂණය කිරීමේදී පෙනී යන්නේ, මෙහිදී මේ සම්බන්ධයෙන් පවතින ඥාණාන්විත අරමුණු පැහැදිලි නොවන බවයි. මන්ද, මේ සම්බන්ධයෙන් අහිත කරන හේතු ප්රමාණය සීමා කළ නොහැකි අතර, එහි තත්ත්වය එකින් එක වෙන්කර විස්තර කිරීමට නොහැකි වීමයි. ෂරීආ නීතියෙහි පදනම් වී ඇති එක් කරුණක් නම් පවතින ඥාණාන්විත කරුණක් පැහැදිලි නැති විටක හෝ සමාජගත නොවී පවතින විටක එහි විනිශ්චය හෘද සාක්ෂිය වෙත යොමු කිරීමයි. කරුණු එසේ බැවින් දූෂිත තත්ත්වයෙන් වැළකී සිටීම පිණිස මෙම විෂය තහනම් කරනු ලැබේ. එසේම දූෂිත ස්වභාවයක් ඇති වන බැවින් කාන්තාවකගේ බාහිර අලංකාරය වෙත බැලීම, මහ්රම් නොවන අය සමග එකිනෙකා මිශ්රව සිටීම සහ එවැනි වෙනත් කරුණු තහනම් කර ඇත. එබැවින් කාන්තාවන් සොහොන් වෙත යාම නිසා යහපතට වඩා වැඩි වශයෙන් දූෂිත තත්ත්වයක් ඇති වෙනවාට කිසිම සැකයක් නැත. කාන්තාවක් සොහොන් වෙත යාමෙන් ඇයට කළ හැක්කේ මිය ගිය තැනැත්තා හෝ තැනැත්තිය වෙනුවෙන් ප්රාර්ථනා කිරීම පමණයි. එම ප්රාර්ථනාවන් ඇයට සිය නිවසේ සිට කළ හැක. නිමි. [මජ්මූ අල්-ෆතාවා] (24/355,356) මගින් උපුටා දක්වන ලදි.) නිමි.

විලාප නැගීම තහනම් කර තිබීම:

එනම්: හඬ නගා විලාප දීම, ඇඳුම් ඉරා ගැනීම, තම කම්මුලට ගසා ගැනීම, හිසකෙස් අවුල් කර ගැනීම, මුහුණ කළු පැහැ ගැන්වීම සහ මුහුණ සූරා ගෙන තුවාල කර ගැනීම, මළවුන් කෙරෙහි ඉහවහා ශෝක වීම, විනාශය අයැදීම, තවද අල්ලාහ්ගේ විනිශ්චය සහ ඉරණම පිළිබඳ කනස්සල්ල සහ ඉවසීම නොමැතිකම යනාදියයි. එබැවින් සහීහ් ග්රන්ථයේ සඳහන් වී ඇති ආකාරයට මෙය මහත් වූ වරදක් මෙන්ම හනම් කරනු ලැබූවකි. අල්ලාහ්ගේ දූතයාණන් (සල්ලල්ලාහු අලයිහි වසල්ලම්) මෙසේ පැවසූහ. (කෙනෙකුගේ මරණයකදී) කවරෙකු කම්මුල් වලට ගසා ගන්නේද, වස්ත්රවල සාක්කු ඉරා ගන්නේද, ඉස්ලාමයට පෙරවූ (අඥාන යුගයේ ජනයා) මෙන් ප්රාර්ථනා කරන්නේද ඔහු, අප අතර කෙනෙකු නොවේ. නියත වශයෙන්ම අල්ලාහ්ගේ දූතයාණන් (සල්ලල්ලාහු අලයිහි වසල්ලම්) මෙසේද පැවසූහ. කව්රුන් ශබ්ද නගා විලාප දෙන්නේද, කොන්ඩේ කඩාගෙන විලාප දෙන්නේද, ඇඳුම් ඉරාගෙන විලාප දෙන්නේද ඒ සම්බන්ධයෙන් මා වගකියන්නේ නැත. මෙම හදීසයට අනුව අස්සාලිකා යනු අගතියේදී/විපතකදී ශබ්ද නගා විලාප දෙන අයයි. අල් හාලිකා යනු කරදරයකදී කොණ්ඩෙ කඩාගෙන විලාප දෙන අයයි. අෂ්-ෂාක්කා යනු විපතකදී ඇඳ සිටින ඇඳුම් ඉරාගනෙ විලාප දෙන අයයි. සහීහ් මුස්ලිම් ග්රන්ථයේ මෙසේද සඳහන් වේ. නබි (සල්ලල්ලාහු අලයිහි වසල්ලම්) තුමාණෝ ශබ්ද නගා විලාප දෙන අයට ශාප කළහ. ශබ්ද නගා විලාප දෙන්නන් යනුවෙන් අදහස් කරනු ලබන්නේ අනුන්ගේ ආකර්ෂනය හා අනුකම්පාව තමන් වෙත ඇද ගැනීමේ අරමුණෙන් විලාප දීමයි.

එබැවින්, මුස්ලිම් සහෝදරිය! විපතකදී මෙවැනි තහනම් ක්රියාවෙන් ඔබ වැළකී සිටිය යුතු අතර, ඔබ ඉවසිලිවන්තව හා දරාගැනීමේ ශක්තියෙන් යුක්තව සිටිය යුතුය. එවිට එම විපත ඔබේ නරක ක්රියාවන් සඳහා වන්දියක් ලෙස පරිවර්තනය වීමටත්, ඔබේ යහපත් ක්රියාවන්හි පින වැඩි වීමටත් හේතුවක් වේ.

උත්තරීතර අල්ලාහ් අල් කුර්ආනයේ මෙසේ පවසයි. තවද බියෙන් හෝ සාගින්නෙන් හෝ වස්තුව, ජීවිත හා බවභෝග හිඟ කරමින් හෝ එවැනි යම් දෙයකින් අපි නුඹලා ව පිරික්සුමට ලක් කරන්නෙමු. (නබිවරය!) නුඹ ඉවසිලිවන්තයිනට ශුභාරංචි දන්වනු. ඔවුහු කවරෙහු ද යත් යම් අභාග්යක් තමන්ට ඇති වූ විටෙක, "සැබැවින්ම අප අල්ලාහ් සතුය, සැබැවින්ම අපි ඔහු වෙතම නැවත යොමුවන්නන් වෙමු" යැයි පවසති. තම පරමාධිපතිගෙන් වූ ආශිර්වාදයන් ද කරුණාව ද තමන් වෙත ඇත්තෝ මොවුන්ය. මොවුන්මය යහමඟ ලැබූවන් වන්නෝ.

ඔව්, කඳුළු සලන්නට ඉස්ලාමයේ අවසර ඇත. නමුත් එය ශබ්ද නගා ලතෝනි දීමක් හෝ තහනම් කරන ලද ක්රියාවන් සහිත වැලපීමක් නොවිය යුතුයි. එලෙසම අල්ලාහ්ගේ (කලා කද්ර් හෙවත්) විනිශ්චය හා ඉරණම ගැන කෝප නොවිය යුතුයි. මන්ද මේ කඳුළු සැලීම මළවුන්ට දයාවක් හා මළ ගියාවූ ඥාතීන්ට හදවතින්ම සහනය ගෙන දෙන්නක් විය යුතුයි. කෙසේ වෙතත් මරණයක් යනු වැලැක්විය හැකි දෙයක් නොවේ. එබැවින් (මරණයකදී විලාපය යනු) එයට අවසර දී ඇති අතර එය ප්රිය කළ හැකි අනුමැතියකි. අල්ලාහ් සියල්ල වෙනුවෙන් සහායකයා වේ.

හත්වන ඡේදය

(සව්ම් හෙවත්) උපවාස ශීලය සම්බන්ධව කාන්තාවන්ට අදාල නීති රීති. රාමසාන් මාසයෙහි (සීමිත වේලාවක්) නිරාහාරව සිටීම සෑම මුස්ලිම් පිරිමි හා මුස්ලිම් කාන්තාවකටම අනිවාර්ය වන අතර එය ඉස්ලාමයේ ප්රධාන කුඵණු අතර එක් කුළුණකි. අල්ලාහ් දෙවිඳාණන් මෙසේ පවසයි. "අහෝ විශ්වාස කළවුනි! නුඹලා බැතිමතුන් විය හැකි වනු පිණිස නුඹලාට පෙර වූවන් කෙරෙහි අනිවාර්යය කරනු ලැබුවාක් මෙන් නුඹලා කෙරෙහි ද උපවාසය අනිවාර්යය කරනු ලැබීය." (කතබ) යන්නෙහි තේරුම, අනිවාර්ය විය යන්නයි, එබැවින් ගැහැනු ළමයෙක් වැඩිවියට පැමිණීමේ එක් සලකුණක් හෝ ඇය තුළින් මතුවී අනිවාර්ය වන වයසට එළඹෙන්නේ නම් සහ ඒ සළකුණ සහ වයස අතර ඔසප් වීමද සිදු වේ නම්, එවැනි තත්තයකදී උපවාසයේ යෙදීම ඇය කෙරෙහි අනිවාර්ය වේ. තවද වයස අවුරුදු නවයේදී, සමහර ගැහැනු ළමුන්ට ඔසප් වීම සිදු විය හැක. එවැනි තත්ත්වයකට පත් ව ඇති කතුන් කෙරෙහි උපවාසය අනිවාර්ය බව නොදැනුවත්කම නිසා ඔවුන් උපවාසයෙහි නිරත නොවැති. මන්ද එම කතුන්ගේ පවුලේ අය ඔවුන්ට උපවාසයේ නිරත වීමට මග නොපෙන්වන නිසාවෙන් හා ඔවුන් කුඩා දරුවන් බව ඔවුන් සිතන නිසාවෙනි. මෙය ඉස්ලාමයේ ප්රධාන එක් කුළුණක් බැවින් මෙසේ උපවාසය ඉටු නොකිරීම මහත් වූ වරදක් වන්නේය. එබැවින් මෙවැනි තත්ත්වයක සිටින කාන්තාවක් ඔසප් වූ කාලයේ සිට ඇය විසින් නොසැලකිලි කමින් අත් හල උපවාසය, ඒවා දීර්ඝ කාලයක් තිස්සේ වුවද, ඇය විසින් නැවත ඉටු කළ යුතුවේ. මන්ද මෙය ඇය කෙරෙහි ඇති වගකීමක් වන බැවිනි.

උපවාසය අනිවාර්යය කරනු ලැබ ඇත්තේ කාටද?

රාමළාන් මාසය ආරම්භ වූ විට සෑම නිරෝගී වැඩිහිටි මුස්ලිම්වරයෙක්ම (සීමිත කාලයක් තුළ) නිරාහාරව සිටිය යුතු අතර, මේ මාසය තුළ අසනීප වූ හෝ ගමන් බිමන් වල යෙදෙන ඕනෑම කෙනෙකු ආහාර පාන ගැනීමට හැකි අතර (රමළාන් හැර) වෙනත් දිනක අතපසු වූ උපවාසය නැවත ඉටු කළ යුතුය. අල්ලාහ් මෙසේ පවසයි. "එහෙයින් නුඹලා අතරින් කවරෙකු රෝගියෙකු ව හෝ ගමනක නිරත ව සිටියේ නම් හෝ එවිට ඔහු වෙනත් දින ගණන් ගණනය කර(උපවාසයේ නියැළෙ)ත්වා!" එමෙන්ම, උපවාසයේ යෙදීමට නොහැකි වැඩිහිටි, මහලු කෙනෙකු හෝ කිසිවිටක නිට්ටාවට සුව කළ නොහැකි නිදන්ගත රෝගයකින් පෙළෙන පිරිමියෙක් හෝ ස්ත්රියක් හෝ රමධාන් මාසයට ප්රවිශ්ඨ වූයේ නම් ඔවුන් විසින් උපවාසයේ යෙදීම අවශ්ය නැත. නමුත් රමධාන් මාසයේ සෑම දිනකම, සෑම උපවාසයක් සඳහාම ඒ ඒ ප්රදේශයේ ප්රධාන ආහාර වලින් සෑහෙන ප්රමාණයෙන් (කිලෝ භාගයක්) පමණ දුප්පත් පුද්ගලයකුට සැපයිය යුතුය. අල්ලාහ් දෙවිඳාණන් මෙසේ පවසයි. එයට හැකියාව ඇති උදවියට වන්දිය වනුයේ දුගියෙකුට ආහාර සැපයීමය.

අබ්දුල්ලාහ් බින් අබ්බාස් (රළියල්ලාහු අන්හුමා) මෙසේ පවසයි. සුවය ලැබීමේ බලාපොරොත්තුවක් නැති වැඩිහිටියන් සඳහා (ඉහත සඳහන් නීතිය බලපැවැත්වේ) (අල්-බුහාරි). තවද සුවය ලැබීමේ බලාපොරොත්තුවක් නැති (සාමාන්ය වයසේ) රෝගියාටද වැඩිහිටි රෝගියෙකුට අදාල තීන්දුව ක්රියාත්මක වේ. ඒ දෙපාර්ශ්වයටම උපවාසයේ යෙදීමට හැකියාවක් නොමැති බැවින් එය අනිවාර්ය නොවන අතර ඒවා නැවැත ඉටු කිරීම අවශ්ය නොවේ.

රාමධාන් සමයේ උපවාසයෙන් මිදී සිටීමට කාන්තාවට නිදහසට කරුණු තිබේ. රාමධාන් සමයේ උපවාසයෙන් මිදී සිටීම සඳහා කාන්තාවට නිදහසට කරුණු ඉදිරිපත් කර ඇති අතර, ඒ වෙනුවට ඇයට පහසු වෙනත් දිනවල ඇයට උපවාසයේ යෙදීමට හැක. රාමධාන් සමයේ උපවාසයෙන් මිදී සිටීමට කාන්තාවට ඇති නිදහස පහත සඳහන් වේ. ඔසප් වීම සහ පශ්චාත් ප්රසව කාලය:- කාන්තාවක් මේ කාලය තුළ උපවාසයේ යෙදීම තහනම් කර ඇති අතර, ඇය තමාට පහසු වෙනත් දිනවල එම උපවාසය ඉටු කළ යුතුයි. අයිෂා (රළි) තුමිය විසින් වාර්තා කරන හදීසයක ඇය මෙසේ පවසයි. "අප (අතපසුවූ) උපවාසය නැවත ඉටු කිරීමට අණ කරනු ලැබුවෙමු නමුත් (අතපසුවූ) සලාතය නැවත ඉටු කිරීමට අණ කරනු නො ලැබුවෙමු." එසේ පවසා සිටියේ "ඔසප් වූ කාන්තාවක් අතපසුවූ උපවාසය නැවැත ඉටු කරන නමුත් සලාතය නැවත ඉටු නොකිරීමේ ස්ථාවරය කුමක්ද?" යන්නෙන් කාන්තාවක් එතුමියගෙන් ඇසු විටය. එවිට එතුමිය "මේ සම්බන්ධව පැහැදිලි කර ඇති නබි වදන් අප විසින් අනුගමනය කළ යුතු අතර එහි අභ්යන්තර අර්ථය අල්ලාහ් දනී"යනුවෙන් විස්තර කළාය.

ඉහත සඳහන් කරුණු වල ඇති ප්රඥාන්විත වැදගත්කම මෙසේය: ෂෙයික් අල්-ඉස්ලාම් ඉබ්නු තයිමියා [මජ්මූ අල්-ෆතාවා] (25 /251) හි මෙසේ පවසයි: මාසික චක්රයට අනුව ඔසප් වන කාන්තාවක් සම්බන්ධයෙන් පවතින්නේ රුධිරය පිටවීම පිළිබඳ විෂයයි. ඔසප් තත්වයේ සිටින කාන්තාවකට රුධිරය පිට නොවන කාලයන්හිදී උපවාසයෙහි යෙදිය හැකිය.ඒ කාලයන්හිදී ඇය විසින් ඉටු කරන උපවාසය (අනිකුත් කාන්තාවන්ගේ උපවාසය මෙන්) සාමාන්ය උපවාසයක් වන අතර, ඒ කාලයන්හිදී ශරීරයේ සාරය වන රුධිරය පිට නොවීම නිසා ඇගේ ශරීර ශක්තිය රැඳී පවති. ඔසප් තත්වයකදී ඇය උපවාසයේ නිරත වීමේදී ශරීරයේ සාරය වන රුධිරය පිට වී යයි. එවිට ඇගේ ශරීර ශක්තිය අඩුවන අතර ඇගේ උපවාසය අසාමාන්ය එකක් බවට පත්වේ. එබැවින් (ප්රඥාන්විත වැදගත්කම ලෙස) ඔසප් නොවන කාලයන්හිදී උපවාසයේ යෙදීමට ඇයට නියෝග කර ඇත.

ගර්භණී කාන්තාවකගේ සහ මව්කිරි දෙන කාන්තාවකගේ උපවාස පිළිබඳ නීති රීති: (ඉහත සඳහන්) කාන්තාවන් උපවාසයේ යෙදී සිටීම නිසා දරුවාට හෝ කාන්තාවට හෝ ඔවුන් දෙදෙනාටම හානියක් වේ නම් ගැභිණි කාන්තාව සහ මව්කිරි දෙන කාන්තාව උපවාසයේ නොයෙදී සිටීම අවශ්ය වේ. තවද, ඇය උපවාසයේ යෙදීම නිසා සිදුවන හානිය ඇයට නොව දරුවාට බලපාන්නේ නම් ඇය විසින් අතපසුවූ උපවාසය වෙනත් දිනක ඉටු කළ යුතු අතර ඇය නිරාහාරව නොසිටි ඒ දින සඳහා සෑම දුප්පත් පුද්ගලයෙකුටම දිනපතා ආහාර සැපැයිය යුතුයි. උපවාසයේ යෙදී සිටීම නිසා සිදුවන හානිය බලපාන්නේ ඇයට නම් ඇය විසින් අතපසුවූ උපවාසය වෙනත් දිනක ඉටු කිරීම ප්රමාණවත්ය. ගර්භනී සහ මව්කිරි දෙන කාන්තාවන් යන දෙපාර්ශවයමට මෙම නීතිය අදාල වේ. අල්ලාහ් අල් කුර්ආනයේ මෙසේ පවසයි. "උපවාසය ඉටු කිරීම අසීරු දෙයක් ලෙස දකින්නන්, ඒ වෙනුවට දුගියෙකුට ආහාර දිය යුතුය" (අල් බකරා: 184)

අල් හාෆිස් ඉබ්නු කසීර් (රහිමහුල්ලාහ්) ඔහුගේ තෆ්සීර් හි (1/379) හි මෙසේ පවසයි. ගර්භණී කාන්තාවක් සහ මව්කිරි දෙන කාන්තාවක් (උපවාසයේ යෙදීමේදී) තමන් ගැන හෝ තම දරුවන් ගැන බිය වන්නේ නම් ඉහත සඳහන් නීතිය අදාල වන බවයි.

අෂ් ෂෙයික් ඉස්ලාම් ඉබ්නු තයිමියියා (රහිමහුල්ලාහ්) මෙසේ පවසයි. ගර්භණී කාන්තාවක් උපවාසයේ යෙදීම නිසා ඇයගේ කුස තුළ සිටින කළලයට හානියක් සිදුවේ යැයි බිය වෙන්නේ නම්, ඇය උපවාසයේ නොයෙදී අතපසුවූ උපවාසය වෙනත් දිනක ඉටු කළ යුතු අතර ඇය නිරාහාරව නොසිටි ඒ සෑම දිනක් සඳහා දුප්පත් පුද්ගලයෙකුට දිනපතා ආහාර (රොටි රාත්තලක්) සැපැයිය යුතුයි. (318/25)

අවවාදයයි.

අල් ඉස්තිහාදා යනු ඔසප් වීමේ චක්රයට අදාල නොවන රුධිරයකි. එබැවින් ඉස්තිහාදා තත්වයේ සිටින කාන්තාවක් විසින් උපවාසය ඉටු කළ යුතු අතර, ඉස්තිහාදා නිසා උපවාසයේ නොයෙදී සිටීමට ඇයට අවසර නැත.

ඔසප් තත්වයේ පසු වන කාන්තාව උපවාසය ඉටු නොකිරීම ගැන පැවැසීමේදී අෂ්-ෂෙයික් ඉබ්නු තයිමියියා තුමා මෙසේ පැවසීය: (එය ඉස්තිහාදා තත්වයේ පසු වන කාන්තාවක මෙන් නොව, ඉස්තිහාදා තත්තවයට පත්වීමට නිශ්චිත අවස්ථාවක් නොපවතින නිසා, උපවාසයේ යෙදීම සඳහා නියෝග කිරීමට විශේෂ අවශ්යතාවයක් නොමැති ඇතර එවැනි ඉස්තිහාදා කාන්තාවන්ට, උපවාසයේ යෙදීමෙන් වැළැකී සිටීය නොහැක. සරළව පැවසුුවතොත් ඉස්තිහාදා තත්වය යනු වමනය දැමීම, ශල්ය කර්මයක් නිසා හෝ වෙනත් විවරයකින් රුධිරය පිටවීම, නින්දේ දී සිහිනයේ ශුක්ර පිටවීම යනාදියට නිශ්චිත කාලයක් නොමැත්තාක් මෙන් ඉස්තිහාදා සඳහාද නිශ්චිත කාලයක් නොමැත. ඔසප් රුධිර වහනය මෙන් නොව ඉස්තිහාදා ඇතිවීම හේතුවෙන් උපවාසයේ නොයෙදී සිටීමේ තත්ත්වයට පත් කරන්නේ නැත.

ඔසප් තත්ත්වයේ පසුවන කාන්තාවන්, ගර්භනී සහ මව්කිරි දෙන කාන්තාවන්, උපවාසයේ නිරත නොවුුවහොත්, ඔවුන් ඉටු නොකළ රාමධාන් උපවාසය හා ඊළඟ වසරේ රාමධාන් අතර කාලය තුළ අතපසු වූ උපවාසය ඉටු කළ යුතු අතර, හැකි පමණින් වඩා ඉක්මනට ඒවා ඉටු කිරීම හොඳය. ඊළඟ රාමධාන් සඳහා ඉතිරිව ඇත්තේ ඇය විසින් අතපසු කරන ලද උපවාසයට අදාල දින ගණන නම් එවැනි අවස්ථාවකදී ඇයට කදා හෙවත් අතපසුවූ උපවාසය තිබෙන තත්ත්වය යටතේ නව රමධාන් මාසයක් උදා වීමට පෙර ඇයට අතපසු වූ උපවාසය ඉටු කිරීම අනිවාර්ය වේ. ඔවුන් එසේ අතපසු වූ උපවාසය නිදහසට කිසිඳු හේතුවක් නොමැතිව අත්හැර දැමූ තත්ත්වයේ නව රමධාන් මාසය ආරම්භ වී ඇත්නම් ඔවුන් අතපසු වූ උපවාසය නැවත ඉටු කළ යුතු අතරම අතපසු වූ සෑම දිනක් සඳහා දුප්පත් පුද්ගලයෙකුට ආහාර සැපයිය යුතුය.එසේ අතපසු වූ උපවාසය ඉටු නොකිරීම සඳහා නිදහසට කරුණක් තිබේ නම්, එවිට ඔවුන්ට එම උපවාසයන් නැවත ඉටුකිරීම පමණක් සෑහේ. රෝගාබාධයක් හෝ ගමන් බිමන් නිසා උපවාසය ඉටු කිරීමට නොහැකිවූ අයට පවතින නීතිය,පෙර සඳහන් කළ ආකාරයට ඔසප් වීම නිසා උපවාසය අත්හල කාන්තාවකට ඇති නීතියට සමානය.

බිරිඳකට තම ස්වාමිපුරුෂයා (ගමන් බිමන් වල නොයෙදී නිවසේ) සිටිනා විටකදී ඔහුගේ අවසරයකින් තොරව ස්වේච්ඡාවෙන් කරනු ලබන අතිරේක උපවාසයෙහි යෙදීම තහනම් ය. ඒ ගැන බුහාරි හා මුස්ලිම් මෙන්ම වෙනත් අය වාර්තා කළ අබු හුරෙයිරා (රළියල්ලාහු අන්හු) තුමා වසිින් දැනුම් දෙන හදීසයක නබි (සල්ලල්ලාහු අලයිහි වසල්ලම්) තුමාණෝ මෙසේ පැවැසූහ. "බිරිඳකට තම ස්වාමිපුරුෂයා (ගමන් බිමන් වල නොයෙදී නිවසේ) සිටිනා විටකදී ඔහුගේ අවසරයකින් තොරව ස්වේච්ඡාවෙන් අතිරේක උපවාසයේ යෙදීමට අනුමත නැත." අහ්මද් සහ අබු දාවුද් වාර්තා කරන සමහර හදීස්වල මෙසේ සඳහන් වේ. ඉහත සඳහන් නීති රීතිය අනිවාර්ය වූ රමධාන් උපවාසය සම්බන්ධයෙන් අදාල නැත. ස්වේච්ඡාවෙන් අතිරේක උපවාසයේ යෙදීමට ඇගේ ස්වාමිපුරුෂයා ඇයට අවසර දෙන්නේ නම් හෝ ඔහු (ගමන් බිමනක යෙදී) ඇය සමඟ නොසිටින්නේ නම් හෝ ඇයට ස්වාමිපුරුෂයෙකු නොමැති නම් ඇයට ස්වේච්ඡාවෙන් අතිරේක උපවාසයේ යෙදීම යෝග්ය වේ. විශේෂයෙන් ස්වේච්ඡාවෙන් අතිරේක උපවාසයේ යෙදීමට සුදුසු දින (මෙසේය) එනම්. සඳුදා සහ බ්රහස්පතින්දා, (අයියාමුල් බීල්) හෙවත් සෑම මසකම සුදු රාත්රි දින තුනක්, ෂව්වාල් මාසයේ දින හයක්, දුල් හිජ්ජා මාසයේ දින දහයක්, අරෆා දිනය සහ අෂුරා දිනය, එදිනට පෙර දින හෝ ඊට පසු දින යනාදි වශයෙන් උපවාසයේ යෙදීමයි. එනමුත් ඇය විසින් රමධාන් මාසයට අදාල උපවාසයන් අතපසු කළේ නම් එය ඉටුකිරීමෙන් තොරව ස්වේච්ඡාවෙන් අතිරේක උපවාසයේ නොසිටිය යුතු අතර ඇය විසින් රාමසාන් මාසයට අදාල උපවාසය ඉටු කළ යුතුය. අල්ලාහ් සියල්ල දනී.

ඔසප් තත්ත්වයේ සිටින කාන්තාවක් රමධාන් මාසයේ දිවා කාලයේදී පිරිසිඳු වූ විටක එම දවසේ ඉතුරු කාලයට ගරුකිරීමක් වශයෙන් නොකා, නොබී සිටීම අනිවාර්ය වන අතර ඔසප් හට ගත් දිනයන්හි දී අතපසුවූ උපවාසය, වෙනත් දිනයන්හි දී නැවත ඉටු කළ යුතුයි.

අටවන ඡේදය

හජ් කර්තව්ය ඉටු කිරීම සම්බන්ධව කාන්තාවන්ට අදාල නීති රීති: සෑම වසරකම අල්ලාහ්ගේ ශුද්ධ ගෘහය වෙත ගොස් හජ් කර්තව්ය ඉටුකිරීම සෑම මුස්ලිම්වරයෙකු කෙරෙහි ප්රිය මනාප යුතුකමක් වන අතර, හජ් ඉටු කිරීම සඳහා අවශ්ය කොන්දේසි සපුරාලන සෑම මුස්ලිම්වරයෙකුම ජීවිත කාලය තුළ එක් වරක් හජ් ඉටු කිරීම අනිවාර්ය වේ. කෙනෙකු විසින් එක් වරකට වඩා හජ් මෙහෙය ඉටු කරන්නේ නම් එය ඔහුගේ/ඇයගේ අතිරේක පුණ්ය ක්රියාවකි. හජ් යනු ඉස්ලාමයේ ප්රධාන ස්ථම්භවලින් එකකි. කාන්තාවක් විසින් හජ් මෙහෙය ඉටු කිරීම වනාහි එය ජිහාද් (හෙවත් මහා කැපැකිරීමක්) කළ තත්ත්වයෙහිලා සලකනු ලැබේ. ආඉෂා (රළියල්ලාහු අන්හා) තුමිය විසින් දැනුම් දෙන හදීසයක මෙසේ සඳහන් වේ. එතුමිය නබි (සල්ලල්ලාහු අලයිහි වසල්ලම්) තුමාණන් අමතා මෙසේ පැවසුවාය. "අල්ලාහ්ගේ දූතයාණනි! කාන්තාවන් විසින් ජිහාද් (හෙවත් මහා කැපැකිරීමක්) ඉටු කළ යුතුද?" එයට පිළිතුරු දෙමින් නබි (සල්ලල්ලාහු අලයිහි වසල්ලම්) තුමාණන්, "එසේය ඔවුන් විසින් ජිහාද් (හෙවත් මහා කැපැකිරීමක්) ඉටු කළ යුතුය. නමුත් එහි මිනිස් ඝාතන කිසිවක් නැත. එය හජ් සහ උම්රා මෙහෙයන් ඉටු කිරීමයි." යැයි පැවැසුහ. බුහාරි ග්රන්ථයේ වාර්තා වී ඇති ආකාරයට ආඉෂා තුමිය, නබි (සල්ලල්ලාහු අලයිහි වසල්ලම්) තුමාණන් අමතා මෙසේ පැවසුවාය. "අල්ලාහ්ගේ දූතයාණනි! ජිහාද් (හෙවත් මහා කැපැකිරීම) විෂිශ්ඨ යහපත් ක්රියාවක් ලෙස දකිමු, එබැවින් ජිහාද් (හෙවත් මහා කැපැකිරීම) අප විසින් ඉටු කළ යුතු නොවේද?" යැයි ප්රශ්න කළාය. එවිට අල්ලාහ්ගේ දූතයාණන් "ජිහාද් (හෙවත් මහා කැපැකිරීම) අතරින් වැදගත් වන්නේ අල්ලාහ් විසින් පිළිගත්තා වූ හජ් මෙහෙයයි." යනුවෙන් පිළිතුරු දුන්හ.

කාන්තාවන්ට අදාල නීති පිළිබද විස්තර.

මහ්රම්වරු: හජ් කර්තව්ය ඉටු සඳහා පිරිමි පක්ෂයට සහ කාන්තා පක්ෂයට පොදු කොන්දේසි ඇත. ඒවා නම්, ඉස්ලාම් දහම අදහන්නෙකු වීම, වැඩිවියට පත් සිහිබුද්ධිය ඇති සහ ජීවිතය තුළ හජ් කිරීමට කායික සහ මූල්යමය ශක්තිය ඇති සෑම නිදහස් මුස්ලිම්වරයෙකුටම එය ඉටු කිරීම අනිවාර්යය වගකීමකි. කාන්තාවකට හජ් අනිවාර්යය වීම සඳහා ඇය සමග ගමන් කිරීම පිනිස (ඉස්ලාමානුකූල) මහරම් පිරිමියෙකු සිටිය යුතුයි. එනම් තම ස්වාමි පුරුෂයා හෝ කවදත් ඇයට විවාහ වීමට තහනම් වුණු ඇයගේ පියා, ඇයට දාව උපන් පුතා, එකකුස උපන් සහෝදරයා වැනි මහ්රම් කෙනෙකු හෝ (අවශ්යතාව නිසා) එක් මවකුගෙන් කිරි බීමෙන් ලැබු ඇගේ සහෝදරයා, මවගේ ස්වාමිපුරුෂයා හෝ මවගේ සැමියාගේ පුතා වැනි මහ්රම් කෙනෙකු හෝ ගමනේදී සිටීම කොන්දේසි වශයෙන් පැන වේ. ඒ සඳහා සාධකය ලෙස ඉදිරිපත් කර ඇත්තේ ඉබ්නු අබ්බාස් (රළියල්ලාහු අන්හු) තුමා විසින් සවන් දී වාර්තා කළ නබි තුමාණන් පැවැත්වූ දේශනාවය. එහිදී නබි (සල්ලල්ලාහු අලයිහි වසල්ලම්) තුමාණෝ මෙසේ පැවැසූහ. පිරිමියෙක් මහ්රම් නොමැතිව සිටින කාන්තාවක් සමඟ තනිව නොසිටින්න. ස්ත්රිය, සිය මහ්රම් කෙනෙකු සමග මිස ගමන් බිමන්වල නොයෙදෙන්න. එවිට පුද්ගලයෙකු නැගිට මෙසේ කීවේය. “අල්ලාහ්ගේ දූතයාණෙනි! මාගේ භාර්යාව හජ් ඉටු කිරීම සඳහා තනිව පිටත්ව ගොස් ඇත. මා අසවල් අසවල් සටන්වලට සහභාගි වීමට නියම කරනු ලැබ ඇත." එවිට නබි (සල්ලල්ලාහු අලයිහි වසල්ලම්) තුමාණෝ මෙසේ පැවසූහ. "ඔබ ඔබේ බිරිඳ සමඟ එක්වී හජ් ඉටු කිරීම සඳහා පිටත්ව යන්න." ඉබ්නු උමර් (රළියල්ලාහු අන්හුමා) විසින් දැනුම් දෙන හදීසයක මෙසේ සඳහන් වේ. අල්ලාහ්ගේ දූතයාණෝ මෙසේ පැවසූහ. කාන්තාවන් (රාත්රි) තුනකට අධික දුර ගමනක මහ්රම් නොමැතිව යෑමට අනුමත නැත.

මහ්රම් නොමැතිව කාන්තාවක් හජ් සහ වෙනත් ගමන් සඳහා ගමන් කිරීම තහනම් බවට බොහෝ හදීස් ඇත. මන්ද කාන්තාවන් ස්වභාවයෙන් දුර්වල වන අතර ගමන් බිමන් වලදී මුහුණ දිය හැකි රෝග ලක්ෂණ හා දුෂ්කරතාවන්ගෙන් පීඩා විඳ දරා ගැනීමට පිරිමින්ට මෙන් ඔවුන්ට නොහැක. තවද ඇය ගමන් බිමන් වලදී දුර් ගුණයන්ගෙන් යුත් අශිෂ්ඨ මිනිසුන් හමුවීමට අවස්ථා ඇත. එබැවින් ඔවුන්ව එවැනි හානිවලින් ආරක්ෂා කරන මහරම්වරයෙක් ඔවුන් සමග සිටිය යුතුය.

කාන්තාවක් සමග ඇගේ හජ් සමයේදී සිටින මහ්රම් පුද්ගලයා ඉස්ලාම් දහම අදහන්නෙකු වීම, වැඩිවියට පත් සිහිබුද්ධිය සහිත කෙනෙකු වීම යනාදී කොන්දේසි සම්පූර්ණ කළ කෙනෙකු විය යුතුයි. මන්ද, දේවත්වය ප්රතික්ෂේප කරන්නෙකු විසින් එම ගමන ප්රතික්ෂේප කරන නිසා ඔහු සුදුසු නැත. හජ් සඳහා මහ්රම් කෙනෙකු සොයා ගැනීමට නොහැකි විටක ඇය වෙනුවෙන් හජ් ඉටු කිරීම සඳහා යමෙකු පත් කළ යුතුය.

හජ් වන්දනා ගමන නෆිල් හෙවත් අතිරේක එකක් වී නම්, එවැනි හජ් මෙහෙයක් ඉටු කිරීමට කාන්තාවක් විසින් ඇගේ සැමියාගෙන් අවසරය ලබා ගැනීම කොන්දේසියකි. මන්ද ඔහුට ඇය කෙරෙහි ඇති අයිතිය පැහැර හැරීමක් සිදු වන බැවිනි.[අල්-මුග්නි] (3/240) හි මෙසේ සඳහන් වේ: අතිරේක හජ් සම්බන්ධයෙන් ගත් කල ඔහුට ඇයව වළක්වා ගත හැකිය. ඉබ්නු මුන්දිර් මෙසේ පවසයි. විද්වතුන්ගේ ඒකමතික තීරණය නම්, බිරිඳගේ අතිරේක හජ් මෙහෙය වැළක්වීමට ස්වාමි පුරුෂයාට හැකි බවයි. මෙයට හේතුව ස්වාමියෙකුට තමන් යටතේ සිටින සේවකයන් කෙරෙහි වගකීම් ඇත්තා සේ කාන්තාවකට අනිවාර්ය නොවන මෙහෙයන් වළක්වාලීමට ස්වාමිපුරුෂයාට අයිතියක් ඇති බැවිනි.

හජ් සහ උම්රා සඳහා පිරිමියෙකු වෙනුවට කාන්තාවක් නියෝජනය කළ හැක:

ෂෙයික් අල්-ඉස්ලාම් ඉබ්නු තයිමියා මජ්මූ අල්-ෆතාවා (13/26) හි මෙසේ සඳහන් කරයි: විද්වතුන්ගේ සම්මුතියට අනුව, කාන්තාවක් වෙනත් කාන්තාවක් වෙනුවෙන් හජ් කිරීමට අවසර ඇත. ඇය ඇගේ දියණිය හෝ දියණිය නොවන වෙනත් කෙනෙකු විය හැකිය. එසේම ඉමාම්වරුන් සිව්දෙනාගේ සහ විද්වතුන් බහුතරයකගේ තීණ්දුවකට අනුව පිරිමියෙකු වෙනුවෙන් කාන්තාව සඳහා හජ් කිරීමට අවසර ඇත. එසේම නබි තුමා විසින් අල් හුස්අමියියා නම් ස්ත්රියකට තම පියා වෙනුවෙන් හජ් ඉටු කරන ලෙස අණ කර ඇත්තේ ඇය විසින් නබි තුමාණන්ගෙන් මෙසේ විමසූ අවස්ථාවේදීය. "අල්ලාහ්ගේ දූතයාණෙනි! අල්ලාහ්ගේ ගැත්තන්ට හජ් ඉටු කිරීම අනිවාර්යය. නමුත් මාගේ පියා වයෝවෘද්ධ කෙනෙකු බවට පත් වී ඇත." යැයි ඇය පැවසුවාය. (නබි තුමාණන්) පිරිමියෙකු ගේ ඉහ්රාම් තත්ත්වය කාන්තාවකට වඩා සම්පූර්ණ වුවද, ඇයට ඇගේ පියා වෙනුවෙන් හජ් ඉටු කරන ලෙස නියෝග කළේය. නිමි. හජ් සඳහා යන අතරමගදී කාන්තාවක් අසනීප වුවහොත්, ඇය ඔසප් වීම හෝ පශ්චාත් ප්රසව තත්වයට පත්වෙයි නම්, ඇය ඇයගේ ගමන දිගටම යා යුතුය. එවැනි තත්වයක් ඉහ්රාම් අවස්ථාවේදී ඇයට සිදුවුවහොත්, වෙනත් පිරිසිදු කාන්තාවන් මෙන් ඇයටද ඉහ්රාම් කටයුතු ඉටු කිරීමට හැක. මන්ද, ඉහ්රාම් වගකීම සඳහා පිරිසිදු භාවයට අවශ්ය නොවන බැවිනි. අල්-මුග්නි කෘතියේ (3/293,294) හි මෙසේ සඳහන් කර ඇත. සමස්තයක් වශයෙන් ගත් කල, පිරිමින් සඳහා නියම කරන ලද පරිදි, ඉහ්රාම් අවස්ථාවේදී කාන්තාවන්ට ද ජලස්නානය කිරීම ඉස්ලාමීය නීතියට අනුව නියම කර ඇත.මන්ද එය ඉස්ලාමීය චාරිත්රානුකූල වත් පිළිවෙතක් වන අතර එය ඉටු කිරීම ඔසප් තත්ත්වයේ සිටින කාන්තාවක් හා පශ්චාත් ප්රසව තත්ත්වයේ සිටින කාන්තාවන් කෙරෙහිද පැවරී ඇත. මෙවැනි කාන්තාවන් සම්බන්ධයෙන් හදීස් වාර්තා වී ඇත. මේ සම්බන්ධයෙන් ජාබිර් (රළියල්ලාහු අන්හු) තුමා මෙසේ පවසයි. "අපි හුලයිෆා නමැති ස්ථානයට පැමිණි විට අස්මා බින්ත් උමයිස් මුහම්මද් බින් අබි බකර් නමැති සහාබාවරිය දරුවකු ප්රසූත කළාය. එවිට, මේ සම්බන්ධයෙන් මා කටයුතු කළ යුත්තේ කෙසේද? යැයි විමසා නබි (සල්ලල්ලාහු අලයිහි වසල්ලම්) තුමා වෙත යොමු කරන ලදි. එවිට එතුමාණෝ මෙසේ පැවැසුහ. ජලස්නානය කරගන්න. වස්ත්රයකින් ආවරණය කර ගන්න. පසුව ඉහ්රාම් තත්වයට ප්රවිශ්ඨ වන්න. නබි (සල්ලල්ලාහු අලයිහි වසල්ලම්) තුමා ප්රකාශ කළ බවට ඉබ්නු අබ්බාස් (රළියල්ලාහු අන්හු) තුමා විසින් දැනුම් දුන් හදීසයක මෙසේ සඳහන් වේ. "ප්රසව රුධිර වහනය හා ඔසප් තත්වයට පත් වූ කාන්තාවන් හජ් ඉටු කිරීම සඳහා වූ නියමිත වේලාවට පැමිණියහොත් කාඃබාව වටා තවාෆ් කිරීම හැර ඔවුන් හජ්වලට අදාල සියලු නැමදුම් ඉටු කරති. ආඉෂා (රළියල්ලාහු අන්හා) තුමිය ඔසප් තත්වයේ සිටි අතර හජ් සඳහා ඉහ්රාම් තත්ත්වයට පත්වීම සඳහා ඇයට ජලස්නානය කරන මෙන් නබි (සල්ලල්ලාහු අලයිහි වසල්ලම්) තුමාණෝ අණ කළහ. නිමි.

මෙහිදී ඥානාන්විත පාඩමක් ඇත. එනම් ඔසප් තත්ත්වයට පත් වූ කාන්තාවන් සහ දරු ප්රසූත තත්ත්වයට පත් වූ කාන්තාවන් හජ් මෙහෙයේදී ඉහ්රාම් තත්ත්වයට පත් වීම සඳහා ජලස්නානය කර ගැනීමෙන් පවිත්රතාවක් ඇති වේ. විශාල ජන ගංගාවක් සමග හජ් ඉටු කිරීමේදී දුගඳ අනුන් වෙත හමා යාම වළක්වා ගත හැක. අපිරිසිදු දෑ අවම කර ගැනීමට හැක. හජ් වන්දනාවේ යෙදීම සඳහා චේතනාව පිහිටුවා ගැනීම හෙවත් ඉහ්රාම් තත්ත්වයට පත් වු කාන්තාවක් ඔසප් හෝ දරු ප්රසූති රුධිරන වහන තත්ත්වයට පත් වන්නේ නම්, ඇයගේ ඉහ්රාමය හජ් කටයුතු පවත්වාගෙන යාමට බාධාවක් වන්නේ නැත. ඔවුන් දෙදෙනාට ඉහ්රාම් තත්ත්වයේම සිටිය හැක. ඔවුන් දෙදෙනා විසින් හජ් මෙහෙය නිෂ්ඵල කරන ක්රියාවන් ගෙන් වැළැකී සිටීම අවශ්ය වේ. එලෙසම ඔසප් හා ප්රසව රුධිර වහන තත්ත්වයෙන් මිදී, පිරිසිඳු වී, ජලස්නානය කර සාමාන්ය තත්ත්වයට පත් වන තුරු කඃබාව තවාෆ් කිරීමෙන් වැළැකී සිටිය යුතුය. අරෆා දිනයට පැමිණියද ඔවුන් දෙදෙනා ඔසප් හා ප්රසව රුධිර වහන තත්ත්වයේ සිටින්නේ නම් සහ ඔවුන් දෙදෙනා උම්රා තමත්තුඋ යටතේ ඉහ්රාම් කර ඇත්නම් එවැනි අවස්ථාවකදී ඔවුන් දෙදෙනා හජ් සඳහා ඉහ්රාම් කර උම්රා මෙහෙය සඳහා ප්රවිශ්ඨ වී හජ් ක්රමයක් වන 'කාරින්' තත්ත්වයට පත්වීමට හැක.

මේ සඳහා එක් සාක්ෂියක් නම් ආයිෂා (රළියල්ලාහු අන්හා) තුමිය ඔසප් තත්ත්වයට පත් වූ අතර ඇය උම්රා ඉටු කිරීම සඳහා චේතනාව ඇති කරගෙන සිටියාය. නබිතුමා ඇය වෙත පැමිණි විට ඇය අඬමින් සිටියාය. “ඔබ අඬන්නේ කුමක් නිසාද? ඔබට මාසික චක්රය සිදූවෙලා වත්ද?" යැයි නබි (සල්ලල්ලාහු අලයිහි වසල්ලම්) තුමාණෝ විමසුහ. ඇය "එසේය" යැයි පිළිතුරු දුන්නාය. එවිට නබි තුමාණෝ "අල්ලාහ් දෙවිඳාණන් ආදම්ගේ දූවරුන්ට ලබා දී ඇති තත්ත්වය මෙයයි. එබැවින් කාඃබාව තවාෆ් කිරීම හැර හාජිවරුන් විසින් කරනු ලබන සියලු වත්පිළිවෙත් ඔබද ඉටු කරන්න." යැයි උපදෙස් දුන්හ. බුහාරි හා මුස්ලිම් හි සඳහන් ජාබිර් (රළියල්ලාහු අන්හු) තුමා විසින් දැනුම් දෙන සහීහ් හදීසයක මෙසේ ද සඳහන් වී ඇත. පසුව නබි (සල්ලල්ලාහු අලයිහි වසල්ලම්) තුමාණන් ආඉෂා වෙතට පැමිණි විට, ඇය වැලපෙමින් සිටිනු දුටුවේය. එවිට එතුමාණෝ, “ඔබට සිදුවී ඇත්තේ කුමක්ද?" යනුවෙන් ප්රශ්න කළහ. ඇය මෙසේ පැවසුවාය, "මම ඔසප් තත්ත්වයට පත්ව සිටිමි. ජනයා උම්රා ඉටුකර ඒ වගකීමෙන් මිදුනෝය. නමුත් මම එම තත්වයෙන් මිදුනේ නැත. කාඃබාව තවාෆ් කළේද නැත. ජනයා දැන් හජ් වෙතද යති," එවිට නබි (සල්ලල්ලාහු අලයිහි වසල්ලම්) තුමාණෝ මෙසේ පැවසූහ. "අල්ලාහ් දෙවිඳාණන් ආදම්ගේ දූවරුන්ට ලබා දී ඇති තත්ත්වය මෙයයි, එබැවින් ඔබ ජලස්නානය කරන්න, පසුව හජ් සඳහා ඉහ්රාම් තත්ත්වයට ප්රවිශ්ඨ වන්න." එබැවින් ඇය එසේ කර හජ් සඳහාවූ වත් පිළිවෙත් ඉටු කර ඔසප් තත්වයෙන් පවිත්ර වූ විට ඇය කාඃබා වටා තවාෆ් ඉටු කළ අතර සෆා සහ මර්වා අතරද ගමන් කළාය. එවිට එතුමාණන් මෙසේ පැවසීය: “ඔබ සියලු හජ් වලින් සහ උම්රා වලින් නිදහස් වී ඇත." (ග්රන්ථය බුහාරි) නිමි. විශාරද ඉබ්නු අල්-කයිම් 'තහ්දීබ් සුනන්' (2/303) හි මෙසේ පවසයි. ඉහත සඳහන් නිවැරදි හදීස් වලින් පැහැදිලි වන්නේ ඇය (ආඉෂා) මුලින්ම උම්රා සඳහා ඉහ්රාම් තත්ත්වයට පත්ව ඇති බවයි. පසුව ඇය ඔසප් තත්ත්වයට පත්වූ බැවින් හජ් සඳහා ඉහ්රාම් තත්ත්වයට පත්වන ලෙස අල්ලාහ්ගේ දූතයාණන් ඇයට අණ කර ඇත. එබැවින් ඇය අල් කාරින් ක්රමය යටතේ හජ් ඉටු කරන්නියක් බවට පත් වූවාය. නබි (සල්ලල්ලාහු අලයිහි වසල්ලම්) තුමාණෝ ඇය අමතා... "ඔබේ හජ් සහ උම්රා සඳහා කාඃබා නිවස වටා තවාෆ් කිරීම සහ සෆා සහ මර්වා අතර සැරිසැරීම ප්රමාණවත්වේ."යනුවෙන් පැවසූහ. නිමි.

ඉහ්රාම් අවස්ථාවේදී කන්තාවක් කළ යුතු දෑ

මෙහිදී පිරිමියෙකු කටයුතු කරන්නේ කෙසේද එසේම කාන්තාවක්ද පිළිවෙත් රකියි. එනම් ජලස්නානය කිරීම, පවිත්රවීම, ශරීරයේ රහසිගත ස්ථානයේ ඇති රෝම වැනි දෑ අවශ්ය ප්රමාණයට ඉවත් කර දැමීම, නියපොතු කැපීම, දුගඳ දෑ ඉවත් කිරීම යනාදිය වේ. මන්ද ඇය ඉහ්රාම් තත්ත්වයට පත් වීමෙන් පසු ඇය එවැනි පිරිසිදුවීම් වල නිරත වීමට අවශ්ය නොවන ආකාරයට සියල්ල ඉටු කළ යුතු බැවිනි. ඉහ්රාම් තත්ත්වයට පත් වීමේන් පසු එවැනි දෑ කිරීම තහනම් වේ. ඉහ්රාම් අවස්ථාවේදී එවැනි දෑ කිරීමට අවශ්යතාවයක් නැත්නම් එසේ පිරිසිදුවීම අවශ්ය නොවේ. මන්ද මෙවැනි දෑ ඉටු කිරීම ඉහ්රාම් සඳහාම වූ විශේෂිත කරුණු නොවන බව දැන ගත යුතු වේ. අනුන්ව ආකර්ෂණය කරන ආකාරයේ සුවඳ විලවුන් වර්ගයක් නොවේ නම් ඒවා ශරීරයෙහි තවරාගැනීම වරදක් නොවේ. මේ සම්බන්ධයෙන් ආඉෂා තුමිය විසින් දැනුම් දෙන හදීසයක මෙසේ සඳහන් වේ. අපි අල්ලාහ්ගේ දූතයාණන් සමග හජ් මෙහෙය සඳහා පිටත්ව ගියෙමු, අපි ඉහ්රාම් තත්ත්වයට පත්වීමේදී කස්තූරි (වැනි) සුවඳ විලවුන් අපේ නළල මත තබා ගනිමු, අප අතරින් කෙනෙකුට ඩහදිය දැමූ විට ඒ සුවඳ විලවුන් මුහුණ මත විහිදී යයි. (සුවඳ හමා යයි) නබි (සල්ලල්ලාහු අලයිහි වසල්ලම්) තුමාණන් එය දුටුවද එය වැළැවූයේ නැත.

ශව්කානී තුමා (නයිලුල් අව්තාර්) (5/12) හි මෙසේ පවසයි. නබි (සල්ලල්ලාහු අලයිහි වසල්ලම්) තුමාණන් නිහඬව සිටීම එම ක්රියාව අනුමත කළා යන්නට සාක්ෂියකි. කුමක් නිසාද යත් එතුමාණන් වරදක් දුටු විටක නිහඬ නොවන නිසාය.

ඉහ්රාම් තත්ත්වයට ඇතුළු වීමට අදහස් කරන විට බුර්කාව සහ නිකාබ් ඉවත් කිරීම.

කාන්තාවක් ඉහ්රාමයට පෙර ඒවා පැළඳ සිටියා නම් (ඒවා ඉවත් කිරීම අවශ්ය වේ.) ඒවා කාන්තාවන් බැලීම සඳහා දෑසට ඍජුව පවතින සිදුරු දෙකක් සහිත මුහුණ ආවරණය කරන පැලඳුමකි. නබි (සල්ලල්ලාහු අලයිහි වසල්ලම්) තුමාණන්ගේ ප්රකාශය මෙසේය. "ඉහ්රාම් තත්වයේ සිටින කාන්තාවන් නිකාබ් පිළිපදින්නේ නැත." බුහාරි තුමා මෙසේ වාර්තා කරයි: නිකාබයට වඩා බුර්කාව ආවරණය අතින් ශක්තිමත්ය. තවද ඉහ්රාමයට පෙර අත්වැසුම් පැළඳ සිටියා නම් ඒවා ගලවා දැමිය යුතුය- ඒවා දෙඅත්හි පහළ කොටස ආවරණය කරන වැස්මකි. - තවද මහ්රම් නොවන පිරිමින් ඇයව දකින විට කාන්තාවක් නිකාබ් සහ බුර්කාවකින් තොරව වෙන කුමක් හෝ වස්ත්රයකින් මුහුණ වසා ගනී. ඇය අත්වැසුම් නොමැතිව වෙනත් දෙයකින් ඇගේ දෑත් ආවරණය කරයි. මන්ද ඔවුන්ගේ මුහුණ සහ අත් 'අව්රා' හෙවත් අනිවාර්යයෙන් වැසිය යුතු ස්ථාන අතරින් වූවකි.

ෂෙයික් අල්-ඉස්ලාම් ඉබ්නු තයිමියා මෙසේ පැවැසූහ. “ස්ත්රිය සම්බන්ධයෙන් ගත් විට ඇය අව්රාත හෙවත් සම්පූර්ණයෙන් ආවරණය විය යුතු තැනැත්තියකි. එබැවින් ඇය වැසී සිටින ආකාරයට ඇඳුමින් සැරසී සිටීමට හැකිය. ඇය දරා සිටින දෙයකින් ඇයට ආවරණය වීමට අවසර ඇත. නමුත් නබි (සල්ලල්ලාහු අලෛහිව සල්ලම්) තුමා ඇයට මුහුණු වැස්මක් හෝ අත්වැසුම් පැළඳීම තහනම් කර ඇත. අත් වැසුම් යනු දෙඅත්හි පහළ කොටස ආවරණය කිරීම සඳහා වන ආවරණයකි. කාන්තාවකට ඇයගේ මුහුණට නො වැදෙන, යම් දෙයකින් ඇගේ මුහුණ ආවරණය කරන්නේ නම්, ඒ සඳහා අවසර ඇත. එලෙසම ඇගේ මුහුණ ස්පර්ශ කරන යම් දෙයකින් ආවරණය කරන්නේ ද, එයද නිවැරදි ක්රමය වේ. ඇයගේ මුහුණ ඝණ ආවරණයකින් හෝ අතෙන් වැසීය යුතු යැයි කියා ඇයව දුෂ්කර තත්ත්වයට පත් කළ යුතු නැත. නබි (සල්ලල්ලාහු අලෙයිහි වසල්ලම්) තුමාණන් විසින් (හජ් කටයුතු වලදී) කාන්තාවන්ගේ සහ පිරිමින්ගේ මුහුණ සහ අත් අතර සමානත්වයක් ඇති කළ අතර පිරිමියකුගේ හිස සම්බන්ධයෙන් පවතින නීතිය වෙනස් වේ. නබි (සල්ලල්ලාහු අලෛහිව සල්ලම්) තුමාගේ බිරින්දෑවරු ඔවුන්ගේ මුහුණු පහත් කර ගැනීමට පුරුදුව සිටියහ. තවද විද්වතුන් කිසිවෙක්, " කාන්තාවකගේ ඉහ්රාමය ඇත්තේ ඇයගේ මුහුණේය " යන ප්රකාශයක් නබිතුමාගෙන් වාර්තා වූ බවට සඳහන් කර නැත. නමුත් මෙය සලෆ් හෙවත් පෙර විසූ සමහර විද්වතුන්ගේ මතයකි. නිමි.

විශාරද ඉබ්නු අල්-කයිම් සිය කෘතිය වන 'තහ්දීබ් අස්සුනන්' (2/350) හි මෙසේ සඳහන් කරයි. “නිකාබයෙන් මුහුණ වසා ගැනීමෙන් වැළැකී සිටින ලෙස නබි තුමාණන් විසින් සඳහන් කර ඇති නමුත්, ඉහ්රාම් අවස්ථාවේ දී කාන්තාවක් සිය මුහුණ අනාවරණය කර ගැනීමේ අවශ්යතාවය ගැන නබිතුමාගෙන් ප්රකාශයට පත් වූ එකදු වදනක් හෝ නැත. අස්මා (රළියල්ලාහු අන්හා) තුමිය ඉහ්රාම් තත්ත්වයේ සිටියදී ඇගේ මුහුණ වසාගෙන සිටි බව සඳහන් වේ. ආඉෂා තුමිය මෙසේ පවසයි: අල්ලාහ්ගේ දූතයා (අල්ලාහ්ගේ ආශිර්වාදය සහ සාමය ලැබේවා!) සමඟ අපි මුහර්රම්වරුන් වශයෙන් සිටියදී මගියන් දෙදෙනෙකු අප පසුකර ගියහ. ඔවුන් අප වෙත ළඟා වන විට, අපගෙන් එක් අයෙක් ඇයගේ හිස මත තිබූ මුහුණු ආවරණය ගෙන මුහුණ වසා ගනී. ඔවුන් අපගෙන් ඉවත්ව ගිය පසු (මුහුණ) නිරාවරණය කරගත්තෙමු. නිමි.

එබැවින් ඉහ්රාම් තත්වයේ සිටින මුස්ලිම් කාන්තාවනි! විශේෂයෙන් මැසූ දේවලින් සකස් කරන ලද නිකාබ් සහ අත්වැසුම් වැනි දෙයින් මුහුණ සහ අත් ආවරණය කිරීම ඔබට තහනම් කර ඇත. වස්ත්රයකින් හෝ එයට සමාන වන දෙයකින් මහ්රම් නොවන පිරිමින්ගෙන් (ඔවුන් ඔබ දුටු විටක) ඔබේ මුහුණ සහ අත් ආවරණය කළ යුතු බවත් දැනගන්න. මුහුණ ස්පර්ශ කරන ආකාරයේ ලෑලි කැබැලි වලින් හෝ ජටාවකින් හෝ වෙනත් කිසිවකින් මුහුණ වැසිය යුතු යැයි යන කියමනහි කිසිදු පදනමක් නැත.

කාන්තාවකට ඉහ්රාම් තත්ත්වයේ සිටින විට අලංකාරය ප්රදර්ශනය නොකරන තමන් කැමැති වස්ත්රයකින් සැරසී සිටීමට හැක.

එය පිරිමි වස්ත්රයකට සමාන නොවිය යුතුය, තම අවයවයන් (හැඩය) පෙන්නුම් කරන ආකාරයේ සිරුරට තදට අඳින ඇඳුමක් නොවිය යුතය. අවයවයන් පිටතට පෙනෙන අකාරයේ විනිවිද පෙනෙන වස්ත්රයක් ද නොවිය යුතුයි. තමන්ගේ පාද සහ දෙඅත් පෙනෙන ආකාරයේ කොටට අඳින වස්ත්රයක් ද නොවිය යුතුය. නමුත් එම ඇඳුම් තම ශරීර ප්රමාණයට සරිලන ආකාරයේ මඳ විශාලත්වයකින් සකස්වී තිබිය යුතුය.

ඉහ්රාම් තත්ත්වයේ සිටින කාන්තාවකට දිග කමිසයක්, ඊට උඩින් පළඳින වස්ත්රයක්, කලිසමක්, හිස වැසෙන ආකාරයේ වස්ත්රයක් යනාදිය ඇඳීමට සහ පාවහන් පැළැදීමට හැකි බව සමස්ත විද්වතුන්ගේ ඒකමතික තීරණයක් බව ඉබ්නු අල් මුන්දිර් පවසයි. (මුග්නී 3/328)

තවද ඇයට කොල පාට වැනි නිශ්චිත ඇඳුමක් අඳින ලෙස අණ කිරීමට නොහැක. නමුත් ඇයට කැමැති ආකාරයට රතු, කොල හෝ කඵ වැනි විවිධ වර්ණවලින් යුත් ඇඳුම් කට්ටල භාවිතා කළ හැක. තවද අවශ්ය වූ විටක කැමැති ආකාරයට ඇඳුම් මාරු කිරීමටද හැක.

ඉහ්රාම් තත්ත්වයට පත් වීමෙන් පසු ඇයට පමණක් ඇසෙන ප්රමාණයකට තල්බියා පාරායනය කිරීම සුන්නත් වේ.

ඉබ්නු අබ්දුල් බර් තුමා මෙසේ පැවැසුවේය. විද්වතුන්ගේ ඒකමතික තීරණයකට අනුව කාන්තාවක් විසින් (තල්බියා පාරායනය කිරීමේදී) හඩ නගා පාරායන නොකළ යුතු අතර, ඇය තමන්ට පමණක් ඇසෙන ලෙස පාරායනය කළ යුතුය. හඬ නගා පාරායනය කිරීම වළක්වනු ලද්දේ ඒ මගින් ෆිත්නා හෙවත් දූෂිත ක්රියාවක් සිදුවීමට ඇති අවධානම නිසාය. එලෙසම ඔවුන්ට අදාන් හෝ ඉකාමා කීම සුන්නාහ් නොවේ. (අවසර නැත). සලාතයේදී ඉමාම්ගේ වරදක් දුටු විට ඔවුන් විසින් තස්බීහ් නොකියා, අත මත තට්ටු කර සංඥා කිරීම සුදුසු වේ. නිමි.(අල් මුග්නී 2/330,331)

ඇය තවාෆ් කිරීමේ දී තමන්ව සම්පූර්ණයෙන් ආවරණය කරගැනීම අවශ්ය වේ.

ඇගේ ශබ්දය අවම කර ගැනීම, බැල්ම පහත් කර ගැනීම, පිරිමින් අතර තෙරපීමෙන් වැළැකී සිටීම, විශේෂයෙන්ම රුක්න් අල් යමානි සහ හජර් අල් අසවද් යන ස්ථානයන්හි තෙරපීමෙන් වැළැකී සිටීම, කඃබාවට සමීපව සෙනඟ අතර තෙරපී තවාෆ් කිරීමට වඩා කාබාවට දුරින්, සෙනඟ සමඟ තෙරපීමකින් තොරව තවාෆ් කිරීම සුදුසු වේ. මන්ද ෆිත්නා හෙවත් දූෂිත දෑ සිදුවීමට හැකි බැවින් සෙනඟ අතර තෙරපීම තහනම්ය. පහසු ලෙස කඃබාවට සමීප වීම සහ හජර් අල් අස්වදය ඉඹීම සුන්නාහ්ය. එබැවින් සුන්නාහ් ක්රියාවක් කිරීමට ගොස් තහනම් දෙයක් සිදු කර ගැනීමෙන් වැළැකී සිටීම වැදගත් වේ. එබැවින් මෙලෙස සෙනග අධික ලෙස ගැවසෙන අවස්ථාවක, ඇය කෙරෙහි එම ක්රියාවන් සුන්නත් නොවේ. නමුත් මෙවැනි අවස්ථාවක ඇය කෙරෙහි සුන්නත් වන්නේ හජර් අල් අස්වදය පෙනෙන තාක් මානයෙන් ගමන් කිරීමේදී ඒ වෙත සංඥා කිරීමයි.

ඉමාම් අන් නවවී තුමා මෙසේ පවසයි. කාන්තාවකට කඃබාව අසලට ළං වීම හෝ හජර් අල් අස්වදය ඉඹීම දුෂ්කර නම්, තවාෆ් රාත්රි කාලයක හෝ වෙනත් වේලාවක සෙනග අඩුවෙන් හෝ හිස්ව පවතින අවස්ථාවක ඉටුකිරීම සුදුසු වේ. එසේ කිරීමෙන් ඇයට සහ වෙනත් අයට සිදු විය හැකි අනතුරෙන් වැළැකී සිටීමට හැකි වන බැවිනි. නිමි.

අල් මුග්නී ග්රන්ථයේ (3/331) හි මෙසේ සඳහන් වේ. කාන්තාවක් රාත්රී කාලයේදී තවාෆ් කිරීම වඩාත් සුදුසු වේ. එම වෙලාව තෙරපීම සහ තදබදය අවම වන අතර ඇයට රැකවරණයද ලබා දෙයි. එවිට ඇයට කඃබාවට සහ හජර් අල් අස්වද් වෙතට බාධාවකින් තොරව පහසුවෙන් සමීප වීමට හැක. නිමි.

කාන්තාවන්ගේ කඃබාව වටා තවාෆ් කිරීම සහ සඊ අතර ගමන් කිරීම යන දේ දිවීමකින් තොරව ගමන් කිරීමකින් පමණක් සිදු විය යුතුයි.

අල් මුන්දිර් (අල් මුග්නී (3/394) හි මෙසේ පවසයි: කාන්තාවන්ගේ 'ඉද්තිබාත්' හෙවත් තවාෆ් කරන අවස්ථාවේදී උරහිස විවෘත කිරීමක් අවශ්ය වන්නේ නැත. තවද කඃබාව තවාෆ් කරන අවස්ථාවේදී සහ සඊ කරන අවස්ථාවේදී (පිරිමින් මෙන්) වේගයෙන් යෑම අවශ්ය වන්නේ නැත. මන්ද, එහිදී කාන්තාව ආවරණය වීම අපේක්ෂා කෙරෙන අතර රම්ල් සහ ඉද්තිබාත් යන අවස්ථා දෙකේදීම කාන්තාවකට නිරාවරණය වීමට සිදු වේ.

ඔසප් තත්ත්වයේ සිටින කාන්තාවක් හජ් මෙහෙයේදි ඉටු කළ යුතු කර්තව්යයන් සහ ඇය පිරිසිඳු වන තෙක් නොකළ යුතු කර්තව්යයන්.

ඔසප් තත්වයේ සිටින කාන්තාවක් හජ් මෙහෙයේදී සියලු කර්තව්යයන් ඉටු කරන්නීය. එනම් ඉහ්රාම් තත්වයට පැමිණීම, අරෆාවේ රැඳී සිටීම, මුස්තලිෆාවේ රැඳී සිටීම, ජම්රාවට ගල් ගැසීම යනාදි වශයෙන් සියලු පිළිවෙත් ඉටු කරයි. ඇය ඔසප් තත්වයෙන් පිරිසිදු වන තුරු කඃබාව තවාෆ් නොකරයි, හජ් අවස්ථාවේදී ආඉෂා (රළියල්ලාහු අන්හා) තුමිය ඔසප් වූ විටක, නබි (සල්ලල්ලාහු අලෙයිහි වසල්ලම්) එතුමියට දුන් උපදෙස් පහත සඳහන් වේ. "හජ් වන්දනාකරුවන් කරන අයුරින්ම ඔබ ද කරන්න. නමුත් ඔබ පිරිසිදු වන තෙක් කඃබාව (අල්ලාහ්ගේ නිවස) (වටා ඇවිද පැදකුණු) තවාෆ් නොකරන්න." මුස්ලිම් සතු වාර්තාවක මෙසේ සඳහන් වේ. "හජ් වන්දනාකරුවන් කරන අයුරින්ම ඔබ ද කරන්න. නමුත් ඔබ පිරිසිදු වන තෙක් කඃබාව (අල්ලාහ්ගේ නිවස වටා ඇවිද පැදකුණු) තවාෆ් නොකරන්න."

නයිල් අල් අව්තාර් (5/49) හි අල් ශව්කානී මෙසේ පවසයි. ඉහත හදීසයෙන් පැහැදිලි වන්නේ ඔසප් තත්ත්වයේ පසුවන කාන්තාවක් හටගත් රුධිරය නැවතී ඇය ජලස්නානය කර පිරිසිදු වන තෙක් තවාෆ් කිරීමේ තහනම පවතින බවයි. මන්ද තහනමකින් සිදු කරනු ලබන්නේ, නොහොබිනා ක්රියාවක් වැළැක්වීමයි. එබැවින් ඔසප් කාන්තාව විසින් ඉටු කරනු ලබන තවාෆය අවලංගු වේ. මෙය විද්වතුන්ගේ ඒකමතික තීරණයයි.

ඇය සෆා මර්වා අතර සඊ නොකරයි. සඊ මෙහෙය ඉටු කළ යුත්තේ තවාෆ් මෙහෙය ඉටු කිරීමෙන් පසුවය. මන්ද නබි (සල්ලල්ලාහු අලයිහි වසල්ලම්) තුමාණන් තවාෆ් කිරීමකින් තොරව සඊ ඉටු කළේ නැත.

ඉමාම් නවවී තුමා සිය 'අල්මජ්මූඃ' නම් කෘතියෙහි (8/82) හි මෙසේ සඳහන් කරයි. අපේ දැනුමට අනුව කෙනෙකු තවාෆ් කිරීමට පෙර, සඊ කළේ නම් එය වලංගු වන්නේ නැත. බහුතර විද්වතුන්ගේ අදහසද එයම විය. මාවර්දී විසින් සඳහන් කර ඇති පරිදි එහි පවතින ඒකමතික මතය අනුව අවලංගු වන්නක් බවයි. මාලික්, අබූ හනීෆා සහ අහ්මද් යන ගුරුකුලවල මතයද එයම වේ. අතා තුමා හා වෙනත් ඇතැම් හදීස්වේදීන් ප්රහාශ කර ඇති පරිදි සැබැවින්ම එය වලංගුය. අතා සහ දාවූද් යන අය විසින් ලබා අපගේ උදවිය වාර්තා කරයි.

මේ සඳහා වූ අපගේ සාක්ෂි නම්, නබි (සල්ලල්ලාහු අලෛහිවසල්ලම්) තුමා තවාෆ් ඉටු කිරීමෙන් පසු සඊ කිරීමයි. එතුමාණන් මෙසේද පැවැසූහ. ඔබේ චාරිත්ර පිළිවෙත් ඉටු කිරීමේදී මා අනුගමනය කරන්න. තවද ඉබ්නු ෂ්රීක් සහාබිවරයා මේ සම්බන්ධයෙන් දැනුම් දෙන හදීසයක මෙසේ සඳහන් වේ. මම හජ් වන්දනාකරුවෙකු ලෙස අල්ලාහ්ගේ දූතයා සමඟ ගියෙමි. හජ් වන්දනාවේ යෙදී සිටි මිනිස්සු (හජ් සම්බන්ධ ගැටඵ විසඳ ගැනීම සඳහා) එතුමා ළඟට පැමිණියහ. එවිට කෙනෙකු එතුමාණන්ගෙන් මෙසේ විචාලේය. "අල්ලාහ්ගේ දූතයාණනි! මම තවාෆ් කිරීමට පෙර සඊ කළෙමි. මම සමහර පිළිවෙත් කලින් ඉටුකළෙමි. තවත් සමහර චාරිත්ර පසුව ඉටු කළෙමි." එවිට එතුමාණෝ මෙසේ පැවැසුහ. "මුස්ලිම් කෙනෙකු වෙත අසාධාරන ලෙස අයුක්තියක් කිරීම හැරෙන්නට (හජ් කටයුතු වලදී සිදුවන සුඵ වැරදි ප්රශ්නයක් නොවේ) කුමක් නිසාද යත් එය (අසාධාරණයක් කිරීම) පාපී ක්රියාවකට සහ විනාශයට මග පාදයි." උසාමා ඉබ්නු ෂරීක් හැර වාර්තා කළ සෙසු සියලුම පුද්ගලයින් නිවැරදි සම්බන්ධතාවයකින් යුතුව දැනුම් දී ඇති මෙම වාර්තාව අබු දාවුද් තුමා මෙසේ වාර්තා කළේය. මෙම හදීසය පදනම් වී ඇත්තේ අල්-හඃතාබී සහ වෙනත් අයගේ මතය අනුවය. එනම්, මම තවාෆ් කිරීමට පෙර සඊ ඉටු කළෙමි. එනම්, එහි අර්ථය "(හජ් උම්රා සඳහා) පැමිණීමෙන් පසුව සහ අල්ඉෆාදා තවාෆයට පෙර මම සඊ ඉටු කළෙමි" යනුවෙනි.නිමි.

අපගේ ෂෙයික්, අෂ්-ෂෙයික් මුහම්මද් අල්-අමීන් අල්-ෂන්කීති (රහ්මහුල්ලාහ්) ඔහුගේ අර්ථකතන කෘතිය වන [අද්වා අල් බයාන්] (5/252)හි මෙසේ සඳහන් කරයි: සඊ මෙහෙය තවාෆයෙන් පසුව මිස, ඊට පෙර වලංගු නොවන බව විද්වතුන්ගෙන් බහුතරයකගේ ඒකමතික තීරණය බව වටහා ගනු මැනව. බහුතර විද්වතුන් සහ ප්රධාන පෙළේ ඉමාම් වරුන්ට අනුව, තවාෆ් කිරීමට පෙර සඊ කළේ නම් ඒ සඊ පිළිවෙත වලංගු වන්නේ නැත. අන්-නවවිගේ ප්රකාශයට අනුව, ඉබ්නු ෂරීක්ගේ හදීසයට පිළිතුරු දෙමින් ඔහු මෙසේ පැවසීය: එහි සඳහන් ආකාරයට, "මා තවාෆ් කිරීමට පෙර සඊ කළෙමි" යනුවෙන් ඔහු අදහස් කර ඇත්තේ: හජ්හි ප්රධාන ස්ථම්බයක් වන තවාෆ් අල්-ඉෆාදා වන අතර හජ්හි ප්රධාන ස්ථම්බයක් නොවන තවාෆ් කුදූමයෙන් පසු ඔහු සඊ කළ බව ප්රතික්ෂේප කර නැත. නිමි.

අල් මුග්නී ග්රන්ථයේ (5/245) හි මෙසේ සඳහන් වේ. සඊ මෙහෙය තවාෆයට පරව පිහිටිය යුතුයි. තවාෆට පෙර එය ඉටු කිරීම නිවැරදි නොවන්නේය. ඊට පෙර සඊ ඉටු කළේ නම් එය වලංගු නොවන්නේය. එබැවින් ඉහත පිළිවෙතම ෂාෆි, මාලික් සහ වෙනත් විද්වතුන් විසින් පිළිගෙන ඇත. අතා තුමා මෙසේ පවසයි: මේ සඳහා යහපත් ප්රතිඵල ලැබේ. අහ්මද් තුමාට අනුව කෙනෙකු විසින් තවාෆයට පෙර සඊ අමතක වීමෙන් ඉටු කළ විට කුසල් හෙවත් යහපත් ප්රථිඵල ලැබෙන නමුත් උවමනාවෙන් ඉටු කළ විට යහපත් ප්රතිඵල කිසිවක් නොලැබේ. මන්ද තවාෆ් සහ සඊ මෙහෙයන් අමතක වීමක් නිසා හෝ නොදැනුවත් කම නිසා හෝ අනුපිළිවෙල මාරුකරමින් පෙර පසු ඉටු කිරීම පිළිබඳව මුහම්මද් නබි (සල්ලල්ලාහු අලෛහිව සල්ලම්) තුමාගෙන් ඇසූ ප්රශ්ණයකට පිළිතුරු දෙමින් එතුමා පවසා සිටියේ එසේ කිරීමෙන් වරදක් නොවන බවයි. පළමු ක්රමය වනුයේ නබි (සල්ලල්ලාහු අලයිහි වසල්ලම්) තුමාණන් සඊ කර ඇත්තේ තවාෆ් කිරීමෙන් පසුවය. එතුමාණෝ මෙසේ පැවැසූහ. "ඔබලා චාරිත්ර පිළිවෙත් ඉටු කිරීමේදී මා අනුගමනය කරන්න." (නිමි)

ඉහත සඳහන් කරුණුවලින් පැහැදිලි වන්නේ තවාෆ් කිරීමට පෙර සඊ කිරීමට හැකි යැයි හදීසයක් මුල් කරගෙන, ගෙන හැර දැක්වූ සාධකය නිවරදි නොවන බවයි. මෙම විෂය කරුණු දෙකක් යටතේ පදනම් වී ඇත. එනම් කෙනෙකු විසින් තවාෆ් අල් ඉෆාදා කිරීමට පෙර සඊ ඉටු කළ හැක, එය තවාෆ් අල් කුදූම් (කාඃබාව වෙත පැමිණීම නිමිත්තෙන්) සඳහා වූ තවාෆයට පසු ඉටු කළ සඊ වශයෙන් ගණනය කිරීමට හැක. කෙසේ වෙතත් එම සඊ මෙහෙය තවාෆයකට පසු සිදු වූවකි. දෙවන කරුණ නම්, එසේ සඊ ඉටු කිරීම නොදැනුවත් කමක් හෝ උවමනාවෙන් නොව අමතක වීමක් නිසා ඉටු කිරීමක් විය හැකිය. මම මෙම කරුණු සම්බන්ධයෙන් දීර්ඝ විස්තරයක් කිරීමට හේතුව සමහර අය විසින් පොදුවේ තවාෆ් කිරීමට පෙර සඊ කිරීමට හැකියැයි මතයක් ගොඩ නගන බැවිනි. අල්ලාහ්ගේ උපකාරය ලැබේවා.

අවවාදයයි.

තවාෆ් කරමින් සිටින කාන්තාවක් ඇයගේ තවාෆය අවසන් වීමෙන් පසු ඔසප් තත්ත්වයට පත්වන්නේ නම් ඇය මෙවැනි තත්ත්වයක් යටතේ සඊ මෙහෙය ඉටු කරයි. මන්ද සඊ ඉටු කිරීම සඳහා කාන්තාවකගේ පිරිසිදුකම කොන්දේසියක් නොවන බැවිනි. අල් මුග්නී නම් කෘතියෙහි 5/246 මෙසේ සඳහන් වී ඇත. ඉමාම්වරුන් වන ෂාෆී, මාලික්, අතා ඇතුලු බොහෝ විද්වතුන් සඊ ඉටු කිරීම සඳහා කාන්තාවකගේ පිරිසිඳු කම කොන්දේසියක් නොවන බව පවසා ඇත. අබූ දාවුද් මෙසේ පවසයි. අහ්මද් තුමා මෙසේ පවසනවා අසා ඇත්තෙමි. තවාෆ් කරමින් සිටින කාන්තාවකට ඇගේ තවාෆය අවසන් වීමෙන් පසු ඔසප් ඇති වන්නේ නම්, මෙවැනි තත්ත්වයක් යටතේ ඇය විසින් සඊ මෙහෙය ඉටු කර පසුව එම ස්ථානයෙන් නික්ම යයි. ආඉෂා සහ උම්මු සලමා යන දෙදෙනා විසින් දැනුම් දෙන හදීසයක මෙසේ සඳහන් වේ. තවාෆ් කරමින් සිටින කාන්තාවකට ඇගේ තවාෆය අවසන් කර, පසුව රකආත් දෙකක් ඉටුකිරීමෙන් පසු ඔසප් තත්ත්වයට පත් වන්නේ නම්, මෙවැනි අවස්ථාවකදී ඇයට සඊ මෙහෙය ඉටු කළ හැක.

කාන්තාවකට ඇයගේ දුර්වලතාවය හේතු කොටගෙන, සඳ බැස යාමත් සමගම මුස්දලිෆාවෙන් පිටවී යාමට හැක.

තවද මිනාවට පැමිණීමෙන් පසු සෙනග ගැන ඇති බිය නිසා ඇයට ජම්රතුල් අකබාව වෙත ගල් විසිකිරීමට හැක.

අල්මුග්නී කෘතියෙහි 5/286 හි අල් මව්ෆික් මෙසේ පවසයි. ශාරීරික දුර්වලතා ඇති අයට සහ කාන්තාවන්ට මෙසේ කල්වේලා ඇතුව මීනාවට පිටත් වීම වරදක් නොවේ. අබ්දුර් රහ්මාන් බින් අව්ෆ් (රළියල්ලාහු අන්හු) තුමාගේ පවුලේ සාමාජිකයින් සහ ආඉෂා තුමිය මෙසේ කල්වේලා ඇතුව මීනාවට පිටත් වූ පිරිස වේ. විද්වතුන් වන අතා අස්සව්රී, අශ් ෂාෆිඉ, අබූ සව්ර් යන අයගේ අදහස් අනුව මෙසේ විශේෂ අවශ්යතා ඇත්තන් සහ කාන්තාවන් කල්වේලා ඇතුව මීනාවට පිටත් වීම වරදක් නොවේ. මෙවැනි සහනයක් ඔවුන්ට ලබා දී ඇත්තේ ඔවුන් කෙරෙහි ඇති කාරුණිකබව, සෙනග තදබදය නිසා ඇති වීමට හැකි අපහසුතාවය සහ එය නබි තුමාණන්ගේ මග පෙන්වීමක් තිබෙන බැවිනි. නිමි.

ඉමාම් අල්-ෂව්කානි [නයිලුල් අල් අවතාර්] (5/70) හි මෙසේ සඳහන් කර ඇත. ඉහත සඳහන් සාධකවලින් පෙනී යන්නේ නිදහසට හේතූන් නැති අයට ගල් වීසි කිරීම සඳහා වූ කාලය හිරු උදාවීමෙන් පසුව වන අතර එසේ නිදහසට හේතූන් ඇති අයට එනම් කාන්තාවන් සහ වෙනත් දුර්වල අයට - ඊට පෙර ගල් විසි කිරීම සඳහා අවසර ඇත. නිමි.

[අල්-මජ්මූ] (8/125) හි ඉමාම් අන්-නවවි මෙසේ පැවසීය: අෂ්-ෂාෆී සහ ඔහුගේ සගයන් මෙසේ පවසා ඇත. මෙය සම්බන්ධයෙන් සුන්නාව හෙවත් නබි මග නම්, සෙනග තදබදය නිසා ඇති වීමට හැකි අපහසුතාවය සැලැකිල්ලට ගනිමින් කල් ඇතිව ජම්රතුල් අකබාවට ගල් විසිකිරීම සඳහා දුර්වල හාජිවරුන්, කාන්තාවන් සහ වෙනත් එවැනිම අයට හිරු උදාවීමට පෙර රාත්රියේ මැද භාගයෙන් පසු මිනා වෙත පැමිණීමට ඇති අවසරයයි. ඉන්පසු ඉහත සඳහන් කරුණු සඳහා සාක්ෂි වශයෙන් හදීස් කිහිපයක් සඳහන් කළේය.

කාන්තාවක් හජ් සහ උම්රා වෙනුවෙන් ඇගේ හිසකෙස් හි කෙළවරින් ඇඟිලි තුඩුවෙහි ඉහළ සන්ධි ප්රමාණයක් (අඟලක්) පමණ කපා හරියි.

හිස මුඩු කිරීමට අවසර නැත. අල්අන්මිලා යනු ඇඟිලි තුඩුවෙහි ඉහළ සන්ධි කොටසහි ප්රමාණය (අඟලක්) ක් පමණ වේ.

අල්-මුග්නි කෘතියේ (5/310) හි මෙසේ පැවසීය: ඉස්ලාමයට අනුව කාන්තාවකට නියම කර ඇත්තේ හිස කෙස් මුඩු කිරීමකින් තොරව කොණ්ඩය (අඟලක් පමණ) කැපීමයි. ඒ සම්බන්ධයෙන් කිසිදු මතභේදයක් නොමැත. අල් මුන්දිර් මෙසේ පවසයි. මේ සම්බන්ධයෙන් විද්වතුන්ගේ ඒකමතික තීරණය නම් හිසකෙස් මුඩු කිරීම ඔවුන්ගේ අයිතියට විරුද්ධ වූ දෙයකි. ඉබ්නු අබ්බාස් (රළියල්ලාහු අන්හු) තුමා දැනුම් දෙන හදීසයක නබි තුමාණෝ මෙසේ පැවැසූහ: "කාන්තාවකට අවශ්ය වන්නේ හිස කෙස් මුඩු කිරීමකින් තොරව කොණ්ඩය (අඟලක් පමණ) කොට කිරීමයි." අලි (රළියල්ලාහු අන්හු) තුමා දැනුම් දෙන හදීසයක මේසේ සඳහන් වේ. කාන්තාවන් සිය හිසකෙස් බූ ගෑම නබි තුමාණන් විසින් තහනම් කර ඇත. අහ්මද් තුමා මෙසේ පැවැසූහ. කාන්තාවක් සිය හිසකෙස් සියල්ල එක මිටකට ගෙන එයින් ඇඟිල්ලේ ඉහළ සන්ධි තුඩුවේ (අඟලක) ප්රමාණයට කපා හරී, මෙම අදහස ඉබ්නු උමර්,ෂාෆී,ඉස්හාක්, අබී සව්ර් යන විද්වතුන් විසින් පවසන ලදී. අබූ දාවුද් තුමා මෙසේ පැවැසුවේය. අහ්මද් තුමා සිය හිසකෙස් කොටට කැපූ ආකාරය ගැන කාන්තාවකගෙන් විමසනවා ඇසුවෙමු. එතුමා ඒ ගැන මෙසේ පැවැසූහ. එසේය, ඇය සිය හිසකෙස් සියල්ල එක මිටකට සකස්කර එය ඉදිරියට ගෙන එයින් ඇඟිල්ලේ ඉහළ සන්ධි තුඩුවේ (අඟලක) ප්රමාණයට කපා හරී. නිමි.

අල් මජ්මූඃ (8/154,150) නම් කෘතියෙහි අල්ඉමාම් නවවි මෙසේ පවසයි. සියලු විද්වතුන් ඒකමතිකව මෙසේ එකඟ වූහ. එනම්, කාන්තාවක් කිසි විටක ඇගේ හිසකෙස් බෑමට හෙවත් (බූ ගෑමට) අණ කරනු නොලබයි. (හජ් වන්දනාවේ දී ) ඇයට හිමි වගකීම (අඟල් භාගයක) ප්රමාණයකට කොටට කැපීමයි. මන්ද ඔවුන් විසින් එසේ කිරීම බිද්අත් හෙවත් නව ක්රියාවකි. ඇයට ලැබී තිබෙන ශාරීරික අලංකාර අයිතියක් අහිමි කිරීමකි.

ඔසප් තත්වයේ සිටින කාන්තාවක් ජමරත් අල්-අකබාවට ගල් ගසා ඇගේ හිස කෙස් වලින් (අඟල් භාගයක්) පමණ කපා දැමුවහොත් ඇයට ඉහ්රාම් තත්වයෙන් මිදීමට අවසර ලැබේ:

එබැවින් ඉහ්රාම් තත්වයේ සිටියදී ඇයට තහනම් වූ සියල්ල සිදු කිරීමට ඇයට අවසර ඇත. එනමුත් ඇයගේ ස්වාමි පුරුෂයාට ඈ සමග කිසිදු කම් සැපක් විඳීමට නොහැක. එබැවින් ඇය තවාෆ් අල් ඉෆාදා ඉටු කරන තුරු ඇයගේ ස්වාමි පුරුෂයාට එසේ ඉඩ දීමට ඇයට අනුමත නැත. මෙම කාලය තුළ ඇගේ ස්වාමිපුරුෂයා විසින් ඈ සමග කම් සැප වින්දේ නම් ඇය කෙරෙහි ෆිද්යා (වන්දියක්) දීම අනිවාර්ය වේ. එම ෆිද්යාව නම් මක්කාවේදී එඵවෙකු කුර්බාන් කර ඒවා මක්කාවේ සිටින දුප්පතුන් අතර බෙදා දීමයි. මන්ද මෙම සිදුවීම පළමු තහල්ලුල් තත්වයේ සිටින විට දී සිදුව ඇති බැවිනි.

ඉෆාදා තවාෆ් මෙහෙය ඉටු කිරීමෙන් පසු කාන්තාවක් ඔසප් වුවහොත්, ඇයට අවශ්ය ඕනෑම වේලාවක ගමන් කිරීමට හැකි අතර තවාෆුල් විදා හෙවත් සමුගැනීමේ තවාෆය ඉටු කිරීමෙන් ඇය නිදහස් වනු ඇත: ආඉෂා (රළියල්ලාහු අන්හා) තුමිය විසින් මෙසේ වාර්තා කරන ලදී: එතුමිය මෙසේ පවසයි. සෆිය්යා බින්ත් හුයයි, ඇගේ ඉෆාදා තවාෆය ඉටු කිරීමෙන් පසු ඇය ඔසප් තත්ත්වයට පත් වූවාය. ඇය මෙසේද පැවැසුවාය. මම මේ ගැන අල්ලාහ්ගේ දූතයාණන්ට පැවැසුවෙමි. එවිට එතුමාණෝ, "ඇය අපේ ගමනට බාධාවක් කරන්න හදනවාද ? "යැයි විමසූහ. එවිට මම මෙසේ පැවැසුවෙමි. "අල්ලාහ් ගේ දූතයාණනි! ඇය ඇගේ අල් ඉෆාදා තවාෆය ඉටුකිරීමෙන් පසු ඔසප් තත්වයට පත් විය". එවිට නබි (සල්ලල්ලාහු අලයිහි වසල්ලම්) තුමාණෝ "එසේ නම් ඇයට ඇගේ ගමන යන්නට ඉඩ දෙන්න." යනුවෙන් පැවසූහ. ඉබ්නු අබ්බාස් තුමා දැනුම් දෙන හදීසයක මෙසේ සඳහන් වේ. හාජිවරුන්ගේ අවසාන මෙහෙය තවාෆ් අල් විදා හෙවත් සමුගැනීමේ තවාෆය විය යුතු යැයි නබි (සල්ලල්ලාහු අලයිහි වසල්ලම්) තුමාණෝ අණ කළහ. නමුත් ඔසප් තත්ත්වයේ පසු වන කාන්තාවකට (මෙය ඉටු නොකර සිටීමට) සහනයක් ලබා දෙන ලදී. එතුමා විසින් මෙසේද දැනුම් දෙන ලදි. ඔසප් තත්වයේ පසු වන කාන්තාවකට ඇය තවාෆ් අල් ඉෆාදා ඉටු කළ තත්ත්වය යටතේ තවාෆ් අල් විදා ඉටු නොකර ගමන් කිරීමට නබි (සල්ලල්ලාහු අලයිහි වසල්ලම්) තුමාණන් විසින් සහනයක් ලබා දී ඇත.

ඉමාම් අන්-නවවි 'අල්-මජ්මූ' (8/281) හි මෙසේ පැවසීය: ඉබ්නු අල්-මුන්දීර් තුමා මෙසේ පවසයි: මේ අදහසම විද්වතුන් අතර පිරිසක් පොදුවේ ප්රකාශ කර ඇත. ඔවුන් අතර මාලික්, අල් අව්සාඊ, අල් තව්රි, අහමඩ්, ඉස්හාක්, අබු තව්ර්, අබු හනීෆා සහ තවත් විද්වතුන්ද වේ. නිමි.

'අල්-මුග්නි' (3/461)හි කතෘ මෙසේ පැවසීය: මෙය නීතිවේදීන්ගෙන් සැදුම් ලත් සාමාන්ය ජනතාවගේ කියමනකි. කතෘ මෙසේද පැවසීය: දරු ප්රසූත තත්වයේ සිටින කාන්තාවන් පිළිබඳ නීතිය ඔසප් තත්ත්වයේ සිටින කාන්තාවන්ගේ නීතියට සමානය. මන්ද නීතිය ඉදිරියේ සමහර දෑ ඔවුන්ට අනිවාර්ය වීම සහ සමහර දැයින් ඔවුන් නිදහස් වීම අනුව ගත් කළ, දරු ප්රසූත තත්ත්වයේ සිටින කාන්තාවන් පිළිබඳ නීතිය ඔසප් තත්ත්වයේ සිටින කාන්තාවන්ගේ තීන්දුවට සමානය.

කාන්තාවක් මස්ජිදුන් නබවී හෙවත් නබිතුමාගේ මස්ජිදය බැහැදැකීම සතුටුදායකය. කාන්තාවක් ඒ වෙත පැමිණීම සලාත් කිරීම හා දුආ හෙවත් අයැදීම යනාදිය සඳහා විය යුතුය, නමුත් නබි (සල්ලල්ලාහු අලෛහිව සල්ලම්) තුමාගේ සොහොන නැරඹීමට ඇයට අවසර නැත. කුමක් නිසාද යත් කාන්තාවන්ට මිනී වළවල් නැරඹීම තහනම් කර ඇති බැවිනි.

සවුදි අරාබියේ (හිටපු) ඉස්ලාමීය විද්වතුන්ගේ නායකයෙකු වන ෂෙයික් මුහම්මද් බින් ඉබ්රාහීම් ආල්-ෂෙයික් (රහිමහුල්ලාහ්) 'මජ්මූ ෆත්වාහ්' (3/239) හි මෙසේ පවසයි: මෙම විෂයෙහි නිවැරදි පිළිවෙත නම් කාන්තාවන් නබි තුමාණන්ගේ සොහොනට යාමට නොදී වැළැක්වීමයි. මේ සඳහා කරුණු දෙකක් ඇත. පළමුව (විශේෂ සොහොනක් සඳහන් නොකර) පොදුවේ කාන්තාවන් කිසිදු සොහොනක් වෙත නොයා යුතුයි බවට (ආගමානුකූල) සාක්ෂි ඇත. එසේ නම් කිසිදු සාක්ෂි නොමැතිව අසවල් සොහොන නැරඹීමට හැකිය අසවල් සොහොන නැරඹීමට නොහැකිය යනුවෙන් නිගමනය කිරීමට නොහැක. දෙවනුව කාන්තාවන් සොහොන් වෙත යාමෙන් සිදු වෙන අහිතකර සිදුවීම් (සාක්ෂි සහිතව) මෙම කෘතියෙහි සඳහන් කර ඇත. නිමි.

ෂෙයික් අබ්දුල් අසීස් බින් බාස් (අල්ලාහ් එතුමාට කරුණාව, දයාව දක්වත්වා!) එතුමාගේ කෘතියෙහි මෙසේ සඳහන් කරයි. ගෞරවාන්විත නබි (සල්ලල්ලාහු අලයිහි වසල්ලම්) තුමාණන්ගේ මස්ජිදයට පැමිණි කෙනෙක්, නබි (සල්ලල්ලාහු අලයිහි වසල්ලම්) තුමාණන්ගේ සොහොන නැරඹීම සම්බන්ධයෙන් සඳහන් කිරීමේදී එතුමා මෙසේ විස්තර කරයි. මෙම බැහැදැකීම ආගාමානුකූලව නියම කර ඇත්තේ විශේෂයෙන් පිරිමින් සම්බන්ධයෙන් පමණි. කාන්තාවන් සඳහා, ඔවුන්ට කිසිදු සොහොනක් බැහැදැකීමට අවසර නැත. මේ ගැන නබි (සල්ලල්ලාහු අලෛහිව සල්ලම්) තුමා ගේ හදීසයක් තහවුරු කරයි. එනම්. "සොහොන් බැහැදකින කාන්තාවන්ට, එහි සුජූද් (වැනි ආගමික කටයුතු) ඉටු කරන අයට සහ එහි පහන් දල්වන අයට නබි (සල්ලල්ලාහු අලෛහිව සල්ලම්) තුමාණෝ ශාප කර ඇත්තාහ.

මදීනා මස්ජිදයට පැමිණීමේ ප්රධාන පරමාර්ථය සලාත් කිරීම, දුආ ප්රාර්ථනාව හා සෙසු මස්ජිද්වල ආගමානුගත කර ඇති වෙනත් ආගමික කටයුතු ඉටු කිරීමය. සෑම සියලු දෙනා කෙරෙහිම ආගමානුගත කරන ලද්දකි. නිමි.

නවවන ඡේදය

විවාහ ගිවිසුම හා එය අවසන් කිරීම සම්බන්ධ විධිවිධාන උත්තරීතර අල්ලාහ් මෙසේ ප්රකාශ කරයි. "නුඹලා ඇය සමග වාසය කරනු පිණිස නුඹලා තුළින්ම නුඹලා වෙනුවෙන් බිරියන් මවා තිබීම ද ඔහුගේ සංඥා අතරිනි. තවද නුඹලා අතර ආදරය හා කරුණාව ඇති කළේය. නියත වශයෙන්ම එහි වටහා ගන්නා ජනයාට සංඥා ඇත." උත්තරීතර අල්ලාහ් මෙසේ ප්රකාශ කරයි. තවද නුඹලා අතරින් අවිවාහකයින්ට සහ නුඹලාගේ වහලුන් හා නුඹලාගේ වහලියන් අතරින් දැහැමියන්ට නුඹලා විවාහ කර දෙනු. ඔවුන් දිළිඳුන් නම් අල්ලාහ් තම භාග්යයෙන් ඔවුන් පොහොසත් කරනු ඇත. තවද අල්ලාහ් සර්ව ව්යාපකය. සර්ව ඥානීය. ඉමාම් ඉබ්න් කසීර් (අල්ලාහ් එතුමාට කරුණාව දක්වත්වා!) මෙසේ පවසයි: මෙය විවාහය සඳහා වූ නියෝගයක් වන අතර, විද්වතුන් පිරිසකගේ තර්කයකට අනුව විවාහය සඳහා හැකියාවක් ඇති සෑම කෙනෙකුටම එය අනිවාර්ය බවයි. එම විද්වතුන් ඔවුන්ගේ කියමනට සාක්ෂියක් වශයෙන් ගෙන හැර දක්වන්නේ නබි (සල්ලල්ලාහු අලයිහි වසල්ලම්) තුමාණන්ගේ පහත දැක්වෙන වදනයි. එනම්, “අහෝ තරුණයිනි! ඔබ අතරින් විවාහ වීමට හැකියාව දරන ඕනෑම අයෙකු විවාහ විය යුතුය. මක්නිසාද යත්, ඔහුගේ බැල්ම පහත් කිරීමටත් ඔහුගේ ලිංගික අවයවන් රැක ගැනීමටත් එය වඩාත් උචිතය. එසේ කළ නොහැකි කෙනෙක් උපවාසයේ නිරතවිය යුතුයි, එය ඔහුට උපකාර වන බැවිනි.” මෙය බුහාරි හා මුස්ලිම් හි වාර්තා වී ඇති ඉබ්නු මස්ඌද් තුමාගේ හදීසයකි. පසුව එතුමා අල්කුර්ආනයේ වදනක් මුල් කරගෙන විවාහය යනු, සමෘද්ධිය සඳහා හේතුවක් බව සඳහන් කළේය. ඔවුන් දිළිඳුන් නම් අල්ලාහ් තම භාග්යයෙන් ඔවුන් පොහොසත් කරනු ඇත. තවද අල්ලාහ් සර්ව ව්යාපකය. සර්ව ඥානීය. එතුමා අබුබක්ර් අල්-සිද්දික් (රළියල්ලාහු අන්හු) තුමාණන්ගේ ප්රකාශයක් ගැන මෙසේ සඳහන් කළේය. එතුමා මෙසේ පැවසීය: "විවාහය සම්බන්ධයෙන් අල්ලාහ් ඔබට සමෘද්ධිය ගැන පොරොන්දු වූ දෑ ඔබට ඉටු කර දෙයි." උත්තරීතර අල්ලාහ් මෙසේ පවසා සිටියි. "ඔවුන් දිළිඳුන් නම්, අල්ලාහ් තම භාග්යයෙන් ඔවුන් පොහොසත් කරනු ඇත. තවද අල්ලාහ් සර්ව ව්යාපකය. සර්ව ඥානීය." ඉබ්නු මස්ඌද් තුමා විසින් මෙසේ වාර්තා කර ඇත. "විවාහය තුළින් සමෘද්ධිමත් වීමට උත්සාහ කරන්න." සර්වබලධාරි අල්ලාහ් මෙසේ පවසයි. ඔවුන් දිළිඳුන් නම් අල්ලාහ් තම භාග්යයෙන් ඔවුන් පොහොසත් කරනු ඇත. තවද අල්ලාහ් සර්ව ව්යාපකය. සර්ව ඥානීය. මෙය ඉබ්නු ජරීර් විසින් වාර්තා කර ඇති අතර, අල්-බගවි තුමා එය උමර්ගේ වාර්තාව මත පදනම්ව සඳහන් කර ඇත. තෆ්සීර් ඉබ්නු කතීර් (5/94,95) දාර් අල් අන්දලූස් ප්රකාශනය.

අෂ්-ෂෙයික් ඉබ්නු තයිමියියා, 'මජ්මූඅ අල් ෆතාවා' (32/90) හි මෙසේ පවසයි. දේවත්වය විශ්වාස කරන්නන්හට විවාහ වීමට සහ දික්කසාද වීමට අල්ලාහ් අනුමැතිය ලබා දී ඇත. ස්වාමිපුරුෂයා විසින් දික්කසාද කරනු ලැබූ කාන්තාවකට (විවාහය අවලංගු කළ) ස්වාමිපුරුෂයා හැර වෙනත් කෙනෙකු සමග විවාහ වීමෙන් පසු, (විවාහය අවලංගු කළ පෙර ස්වාමියා සමග) යලි විවාහ වීමට අනුමතිය ඇත. මෙවැනි විවාහ ක්රමවේදය කිතුනු විශ්වාසය විසින් තහනම් කර ඇති අතර විවාහය සඳහා අනුමතිය ලබා දී තිබෙන්නේ කවුරුන් වෙතද, ඔවුන් ගෙන් දික්කසාද වීමට අනුමතිය නැත. යුදෙව්වන් දික්කසාදය අනුමත කරන අතර දික්කසාදයට ලක් වූ කාන්තාවක් නැවත, පෙර ස්වාමිපුරුෂයා හැර වෙනත් පිරිමියෙකු සමග විවාහ වී නම්, පෙර ස්වාමියා නැවත විවාහ වීම තහනම් කර ඇත. කිතුනු සමාජයේ දික්කසාදයට ඉඩ නැත. යුදෙව්වන් අතර ස්වාමිපුරුෂයා විසින් දික්කසාද කරනු ලැබූ කාන්තාවකට (විවාහය අවලංගු කළ) ස්වාමිපුරුෂයා හැර වෙනත් කෙනෙකු සමග විවාහ වීමෙන් පසු (විවාහය අවලංගු කළ ස්වාමියා සමග) විවාහ වීමට අනුමතිය නැත. නමුත් අල්ලාහ් විශ්වාස කරන්නන් කෙරෙහි විකල්ප ක්රමවේදය සමග විවාහය අනුමත කර ඇත. නිමි.

ඉමාම් ඉබ්නු අල්-කයිම් සිය කෘතිය වන 'අල්හද්යුන් නබවිය්යි' (3/149) හි විවාහය තුලින් සිය ලිංගික අවශ්යතාවය ඉටු කිරීම එක් අරමුණක් බව පැහැදිලි කරමින් මෙසේ සඳහන් කරයි. ස්වාමිපුරුෂයා සහ බිරිඳ සම්බන්ධ වීමෙන් කාරණා තුනක් තහවුරු වේ. ඒවා මූලික කරුණුය. ඒවායින් එකක් නම්: අල්ලාහ්ගේ නියමය පරිදි ඔවුන් විසින් දරුවන් බිහි කිරීම සහ මිනිස් ජීවීන්ගේ පැවැත්ම ආරක්ෂා කිරීම.

දෙවැන්න:ශුක්රාණුව ශරීරයේ රඳවා තබා ගැනීම ශරීරයට හානි කිරීමට හැකි බැවින් එය නිසියාකාරව පිටතට යැවීමට ඇති හැකියාව.

තුන්වැන්න: මානසික සුවයෙන් කාලය ගත කිරීම, සතුට ලබා ගැනීම සහ කරුණාව ආශිර්වාදයක් වශයෙන් භුක්ති විඳීම. නිමි.

විවාහ වීම නිසා සිදුවන යහපත අති විශිෂ්ඨයි. එය දුරාචාරයේ යෙදීම වළක්වයි. ලිංගික වශයෙන් තහනම් දේ කෙරෙහි නෙත් යොමු කිරීම දුරු කරයි.

දරුවන් ඇති කිරීම සහ පෙළපත් ආරක්ෂා කිරීම සඳහා මඟ පාදයි.

බිරිඳ හා සැමියා අතර සාමය ඇතිවීම සහ මානසික ස්ථාවරත්වය ඇති වීම.

මුස්ලිම් ප්රජාවගේ මූලික අවශ්යතාවන් අතරින් එකක් වන ධර්මිෂ්ඨ පවුලක් ගොඩනැගීම සඳහා අඹුසැමියන් දෙදෙනා සහයෝගයෙන් කටයුතු කිරීම.

තවද ස්වාමිපුරුෂයාගේ අනුග්රහය සහ නඩත්තුව, බිරිඳ ලබාගැනීම, කාන්තාව ගෙදර දොරේ වැඩ කටයුතු වල යෙදීම සහ ඇයගේ ජීවිතයේ නිවැරදි රැකියාවක් ඉටු කිරීම. නමුත් ප්රතිවිරුද්ධ අදහස් දක්වන්නන් සහ එවැනි ම අදහස් දරණ සමාජය විසින් කියා සිටින්නේ කාන්තාවකට පුරුෂ පක්ෂයට මෙන් සමාන අයිතියක් ඇති බැවින් නිවසට පිටතින් රැකියා කිරීමට, පීරිමින් මෙන් ඇයට ද අයිතියක් ඇති බවයි. එබැවින්, ඔවුන් විසින් ඔවුන්ගේ කාන්තාවන් නිවසින් පිටතට ගෙන ගියේය. ඔවුන්ට සුදුසු නිවැරදි රැකියාවෙන් ඉවත් කොට වෙනත් රැකියාවකට යොමු කළේය. ඇයට අයිති ඇගේ වැඩ කොටස වෙන කෙනෙකුට භාර දුන්නේය. මෙහි ප්රතිඵලයක් වශයෙන් පවුල් පද්ධතිය කඩාකප්පල් වූ අතර අඹුසැමියන් අතර වරදවා තේරුම් ගැනීම හා විරසක ඇති වීම මඟින් ඔවුන් අතර වෙන් වීමක් සිදු විය. නැත්නම් ඔවුන් අතර අසමගිය හා පීඩාව ඔවුන්ගේ පවුල් ජීවිත බිලි ගත්තේය.

අපගේ ෂෙයික්,ෂෙයික් මුහම්මද් අල්-අමීන් අල්-ෂන්කීති තම අර්ථකථනයක් වන 'අද්වා අල්-බයාන්' (3/422) හි මෙසේ පැවසීය: කාන්තාවනි! දැනගන්න, අල්ලාහ් ඔබටත් මටත් ආශිර්වාද කිරීීීමට සහ ඔහුට තෘප්තිමත් දේ කිරීමට උදව් කරත්වා! (ඉස්ලාමීය මතවාද වලට පටහැනිව ඉදිරිපත් කරන්නන්ගේ) වැරදි ආකල්ප නිසැකවම බුද්ධි ගෝචර නොවන ව්යාජ අදහස්ය. ඒවා අර්ථ වශයෙන් මෙන්ම තර්කයට පටහැනිය. දිව්යමය එළිදරව්ව සහ මැවුම්කරුගේ නීතිය සමග ගැටෙන සුඵය. ඔවුන් පවසා සිටින්නේ පිරිමි පක්ෂය හා කාන්තා පක්ෂය නීතිය ඉදිරියේ සහ සෑම ක්ෂේත්රකදීම සමාන වන බවයි. එසේ වූ කළ මානව සමාජ පද්ධතිය දූෂිත වී කඩාකප්පල් වීමට හැකිය. මෙම යථාර්තයෙහි ඇත්ත ඇති සැටි දකින අයට මිස, නුවණින් අන්ධ වූ අයට මෙහි යථාර්තය අවබෝධ කර ගැනීමට නොහැක. මන්ද, සර්වබලධාරි අල්ලාහ් විසින් කාන්තා පක්ෂය තුළින් මනුෂ්ය ප්රජාව ගොඩනැගීම සඳහා විවිධ ආකාරයේ සහභාගීත්වයන් සඳහා සුදුසු ගුණාංගයන් ඔවුන් තුළ ඇති කර ඇත. එනම් ගැබ් ගැනීම, දරු ප්රසූතිය, මව්කිරි දීම, දරුවන් ඇති දැඩි කිරීම සහ නිවසෙහි සහ මුඵතැන් ගෙයෙහි අදාල සේවාවන් කිරීමයි. එබැවින් (ඔවුන්ගේ ස්වභාවික පිහිටීමට අනුව) වෙනත් කිසිවක් ඔවුන්ට සුදුසු නොවේ. කුමක් නිසාද යත් ඇය ගෞරවය, නිර්මලකම, ගුණවත්කම සහ මානව සාරධර්ම ආරක්ෂා කිරීම යන කරුණු තුළ මානව ප්රජාව වෙනුවෙන් නිවස තුළ සිට කරන මෙම සේවාවන් පිරිමි පක්ෂය විසින් නිවසින් පිට කරන සේවයට වඩා අඩු තක්සේරුවක් කළ නොහැකි බැවිනි. එනමුත් අදූරදර්ශී දැක්මක් ඇති බුද්ධිමතුන් යැයි කියා ගන්නා පිරිස්, කාන්තාවන්ට පිරිමින්ට මෙන් නිවසින් පිට සේවාවන්හි නිරත වීමට හැකි බවට තර්ක කරති. (එසේ නිවසින් පිට සේවයක නිරතවන කාන්තාවක්) ගැබ් ගැනීම, මව්කිරි දීම සහ පශ්චාත් ප්රසව කාලය තුළ ඇයට දුෂ්කරතාවයකට මුහුණ දෙන කිසිදු කාර්යයක් කිරීමට නොහැකි වන අතර, ඇය සහ ඇගේ ස්වාමිපුරුෂයා නිවසින් පිටතට ගියහොත්, සිය කුඩා දරුවන් ආරක්ෂා කිරීම, මව්කිරි දීමට නියමිත අවස්ථාවේදී මව්කිරි දීම, පිරිමින්ට අවශ්ය ආහාර පාන සූදානම් කිරීම වැනි සියළුම ගෘහ සේවාවන් (සහ ළමා අයිතිවාසිකම්) අහිමි වේ. ඇය වෙනුවට එම ස්ථානයේ වැටුපක් යටතේ සේවිකාවක් යෙදවීමෙන් නිවසක නිසි ලෙස සිදු විය යුතු සියලු කටයුතු අක්රමත්ව පවතිනු ඇත. එබැවින් කාන්තාවක් නිවසින් රැකී රක්ෂා සඳහා පිට වීම නිසා ආගමික සාරධර්ම සහ මනුෂ්යත්වය නැතිවීම වැනි අහිතකර ප්රතිඵල ගෙන දෙනවාට කිසිම සැකයක් නැත.

එබැවින් මුස්ලිම් සහෝදරිය! අල්ලාහ් දෙවියන්ට බියබැතිමත් වන්න. මෙම ද්වේෂ සහගත ප්රචාරයට නො රැවටෙන්න, කුමක් නිසා ද යත් මෙසේ රැවටුණු කාන්තාවන් (චින්තනාත්මක) දූෂණයට සහ (ජීවිතයේ) අසාර්ථකත්වයට පත්වීමේ යථාර්ථය මේ සඳහා හොඳම සාධකයක් වන අතර (ඒ තුළින් ලබාගත්) අත්දැකීම් හොඳම සාක්ෂියකි. අන්න ඒ නිසා මුස්ලිම් සහෝදරිය! සාර්ථක විවාහයක් වෙත යුහුසුඵ වන්න. ඔබේ වැඩි දුර අධ්යාපන කටයුතු නිසා හෝ ඔබේ රැකී රක්ෂාව නිසා හෝ එය කල් නොදමන්න. මන්ද විවාහය යනු ඔබේ සතුට හා සැනසීම වන අතර, එය සෑම අධ්යයනයක් හා රැකියාවකට වඩා ඔබට සහනය ලබා දෙයි. විවාහය කොතරම් වැදගත් ද යත් එය ඔබේ උසස් අධ්යයනයට හෝ රැකියාවක කොතරම් උසස් වුවද විවාහයක් එවාට සමාන කළ නොහැක.

ඔබ ඔබේ නිවසේ වැඩ කටයුතු කරමින්, දරුවන් ඇති දැඩි කරන්න. මක්නිසාද යත් මෙය ඔබගේ ජීවිතයේ ප්රධානතම ඵලදායි කාර්යය වන අතර ඔබේ ඒ ස්ථානයට වෙනත් කෙනෙකු පත් කරන මෙන් ඉල්ලීමක් නොකරන්න. මන්ද ඒ සඳහා (ඔබ හැර වෙන) කිසිවෙකු සමාන නොවන බැවිනි. තවද ධර්මිෂ්ඨ පුද්ගලයෙකු සමඟ විවාහ වීම අතපසු නොකරන්න. මන්ද නබි (සල්ලල්ලාහු අලෛහිව සල්ලම්) මෙසේ පැවැසූහ. "ඔබ සමග විවාහය සඳහා ආගම් දහමට ලැදියාවක් ඇති, ගති ගුණ අතින් උසස් චරිතයකින් යුතු කෙනෙකු ඔබ වෙත පැමිණියහොත් ඔහු සමග විවාහ වෙන්න. ඔබ එසේ නොකළහොත් පොළොව මත අධාර්මික බව හා දූෂණය සිදුවනු ඇත."

විවාහය සම්බධයෙන් කාන්තාවකගේ කැමැත්ත ලබා ගැනීම

විවාහ වීමට නියමිත තැනැත්තිය තත්ත්වයන් තුනක පසුවෙයි: එක්කෝ ඇය ළමා වසයේ පසුවන කන්යාවක් විය යුතුයි. නැතහොත් ඇය තරුණ කන්යාවක හෝ ඇය වයසක කාන්තාවක් විය යුතුය. පෙර සඳහන් සෑම කොටසකටම ආවේනික වූ විශේෂ තීන්දු ඇත.

ළමා කන්යාව සම්බන්ධයෙන් ගත් කල ඇගේ පියාට ඇගේ අවසරයකින් තොරව ඇයව විවාහ කර දීමට හැකි බවට කිසිදු විවාදයක් නොමැත.මන්ද ඒ සඳහා ඇයගේ අවසරයක් අවශ්ය නැති නිසාය.(ඒ සඳහා සාක්ෂියක් නම්) අබු බකර් අල්-සිද්දික් (රලියල්ලාහු අන්හු) අවුරුදු හයක් වයසැති ඔහුගේ දියණිය වන ආයිෂා තුමියව අල්ලාහ්ගේ දූතයා වන මුහම්මද් නබි (සල්ලල්ලාහු අලෛහිව සල්ලම්) තුමාට විවාහ කර දුන්නේය. තවද ඇය වයස අවුරුදු නවයට පිවිසීමත් සමගම ඇය සමග නබි (සල්ලල්ලාහු අලෛහිව සල්ලම්) තුමාණන් විවාහ දිවියට ඇතුළත් වුුහ.

නයිලුල් අව්තාර් කෘතියෙහි (6/128,129) ඉමාම් අල්-ෂව්කානි මෙසේ පැවසීය. වැඩිවියට පැමිණීමට පෙර පියකුට තම දියණිය විවාහ කර දීමට අවසර ඇති බවට හදීසයේ (නබි තුමාගේ ප්රකාශයෙහි) සාක්ෂි ඇත. තවද ඔහු මෙසේ පැවසීය: වැඩිහිටියකු සමඟ ළමා වියේ පසුවන කන්යාවක් විවාහ කර දීමට පියෙකුට අවසර ඇත. බුහාරි ග්රන්ථයේ මේ සම්බන්ධයෙන් ආඉෂා තුමියගේ හදීස් සඳහන් කර ඇත. නිමි.

අල්-මුග්නි කෘතියෙහි (6/487) මෙසේ සඳහන් වේ. ඉබ්නු අල්-මුන්දිර් මෙසේ පැවසීය: සියලුම විද්වතුන්ගේ සම්මුතියට අනුව, පියාට තම කුඩා දියණිය සුදුසු පුද්ගලයකු සමග විවාහ කර දීමට අවසර ඇත්තේය. නිමි.

මම මෙසේ පවසමි: අබු බකර් (අල්ලාහ් එතුමාව පිළිගනිත්වා!) තුමා විසින් තම හය හැවිරිදි දැරිය වන ආඉෂා තුමිය වැඩිහිටියෙකු වන මුහම්මද් නබි (සල්ලල්ලාහු අලයිහි වසල්ලම්) තුමාණන්ට විවාහය කර දීම ප්රතික්ෂේප කරන සහ එම විවාහය විකෘති කොට සලකා හෙළා දකින අය වෙත වඩාත් ප්රබල ප්රතිචාරයක් දක්වමි. මෙය ඔවුන් විසින් හෙළා දකින්නේ ඔවුන්ගේ නොදැනුවත්කම නිසා හෝ ඔවුන් අගතියට පත්ව සිටින නිසා බැවිනි.

තරුණ කන්යාවක් සම්බන්ධයෙන් ගත් කල, නබි (සල්ලල්ලාහු අලයිහි වසල්ලම්) තුමාණන්ගේ ප්රකාශයට අනුව ඇයගේ විවාහය ඇගේ අවසරය ඇතිව පමණක් සිදු කළ යතුයි. ඇගේ අවසරය ඇගේ නිහඬතාවයයි. "තරුණ කන්යාවක් ඇගේ අවසරය ලබා දෙන තුරු ඇය විවාහ වන්නේ නැත. මෙය අසා සිටි එතුමාණන්ගේ මිතුරන් “අල්ලාහ්ගේ දූතයාණෙනි! ඇය විසින් අවසරය ලබා දිය හැක්කේ කෙසේද?" යැයි විමසුහ. එවිට නබි (සල්ලල්ලාහු අලයිහි වසල්ලම්) තුමාණන් පිළිතුරු දෙමින්:"ඇය නිහඬව සිටීම" (ඇගේ අවසරය) යි" පැවසුහ. විද්වතුන්ගේ නිවැරදි නිගමනය අනුව (තරුණ කන්යාවක්) ඇයව විවාහ කර දෙන්නේ ඇගේ පියා වුවද ඇගේ අවසරය ලබා ගැනීම අත්යවශ්ය වේ.

විද්වතෙකු වන ඉබ්නු අල්-කයිම් [අල්-හුදා] නම් කෘතියෙහි (5/96) මෙසේ පැවසීය: මෙය පෙර විසූ බහුතර විද්වතුන්ගේ කියමනක් වන අතර අබු හනීෆා සහ අහමද් යන ඉමාම් වරුන් එක් වාර්තාවක මෙසේ පවසති. අපි අල්ලාහ්ගේ දහම අනුගමනය කරමු, අපි අල්ලාහ් හැර වෙන කිසිවක් විශ්වාස නොකරමු. එබැවින් එය අල්ලාහ්ගේ දූතයාගේ අණ කිරීම් සහ තහනම් කිරීම් යනාදී තීන්දුවට අනුකූල වේ. නිමි.

කලින් විවාහ වූ කාන්තාවක් සම්බන්ධයෙන් ගත් කල ඇයගේ විවාහය ඇගේ (වාචික) අවසරය ඇතිව පමණක් සිදු විය යුතුයි. තරුණ කන්යාව මෙන් නිහඬතාවය ඇයගේ අවසරය නොවන අතර, ඇයට ඇගේ අවසරය සම්බන්ධයෙන් වාචිකව ප්රකාශයක් කළ යුතු වේ.

අල්-මුග්නි කෘතියෙහි (6/493) මෙසේ පැවසීය: කලින් විවාහ වූ කාන්තාවකගේ විවාහය, අවසරය ඇතිව සිදු විය යුතුයි. මේ සම්බන්ධයෙන් විකල්ප අදහස් අප අතර නැත. ඇයට ඇගේ අවසරය සම්බන්ධයෙන් වාචිකව ප්රකාශයක් කිරීමට අනුමතිය ඇත. හදවතේ ඇති දේ දිව ප්රකාශ කරයි. මෙම පිළිවෙත අවසර ලබා ගැනීමේ සෑම කටයුත්තකදීම සලකා බැලිය යතුයි. නිමි.

ෂෙයික් අල්-ඉස්ලාම් ඉබ්නු තයිමියියා (අල්ලාහ් එතුමාණන්ට අනුකම්පා කරත්වා!) 'මජ්මූ අල්-ෆතාවා' (32/39,40) හි මෙසේ සඳහන් කරයි. නබි (සල්ලල්ලාහු අලයිහි වසල්ලම්) තුමාණන් අණ කළ ආකාරයට කාන්තාවකගේ අවසරය ඇතිව මිස ඇයව විවාහ කර නොදිය යුතුය. ඇය විවාහය පිළිකුල් කරන්නේ නම් ඒ සඳහා බල කළ නොයුතුය. නමුත් තරුණ කන්යා දැරිය සම්බන්ධයෙන් මෙම නීතිය බල නොපැවැත්වේ. මන්ද ඇගේ පියාට ඇයව විවාහ කර දීමට අවසර ඇත. ඇය ඇගේ විවාහය ප්රතික්ෂේප කළද පියා විසින් ඇගේ විවාහය සිදු කිරීමට අවසර ඇත. ඇගේ අවසරය අවශ්ය නොවේ. නමුත් කලින් විවාහ වූ කාන්තාවකගේ අවසරයකින් තොරව ඇයව විවාහ කර දීමට ඇගේ පියාට හෝ වෙනත් කෙනෙකුට අවසර නැත. මෙය විද්වතුන්ගේ සහ මුස්ලිම් වරුන්ගේ ඒකමතික තීරණයයි. තවද කන්යාවකගේ විවාහය පියා හෝ සීයා හැර වෙනත් කෙනෙකුට ඇයව විවාහ කර දීමට නොහැක. මෙය විද්වතුන්ගේ සහ මුස්ලිම් වරුන්ගේ ඒකමතික තීරණයයි. එබැවින් පියා හෝ සීයා ඇයගේ අවසරය ලබා ගත යුතුය.

විවාහය සඳහා අවසර ලබා ගැනීම චාරිත්රානුකූල යුතුකමද? නැත්නම් අනිවාර්ය වගකීමක්ද?යන කරුණු සම්බන්ධයෙන් විද්වතුන් අතර මතභේද පවතී.

නිවැරදි මතයට අනුව නම් එය අනිවාර්යය වගකීමකි, විවාහ වීමට සිටින ස්ත්රියගේ භාරකරු ඇය කවුරුන් සමග විවාහ වීමට යන්නේද ඒ ස්වාමිපුරුෂයා සුදුසු ද, කාර්යක්ෂම ද යන්න ගැන සොයා බැලීමේ මෙහෙවරයේදී භාරකරු අල්ලාහ්ට බිය විය යුතුය. එබැවින් භාරකරු ඇයව විවාහ කර දිය යත්තේ ඇගේ යහපත ගැන සිතා මිස ඔහුගේ යහපත ගැන සිතා නොවිය යුතුය.

කාන්තාවක් විවාහ කර දීමේදී භාරකරුවෙකු විසින් සපුරාලිය යුතු කොන්දේසි සහ එහි ප්රඥාව.

සිය පවුලේ සාමාජිකයින්ට හා ඥාතී හිතවතුනට පවා අයහපත් ලෙස ප්රතිඵල ගෙන දෙන ආකාරයක වුවද, කාන්තාවකට තමන් සුදුසු ස්වාමිපුරුෂයෙකුව තෝරා ගැනීමේ අයිතිය ලබා දීම හෝ ඇය කැමැති ආකාරයට පෙම්වතෙක් තෝරා ගැනීම මෙයින් අදහස් නොකරේ. එනමුත් මෙයින් අදහස් කරනු ලබන්නේ, ඇය ඇගේ භාරකරුවකුගේ අධීක්ෂණය යටතේ සිටින බැවින් ඔහු විසින් ඇයට සුදුසු, ගැලපෙන මනමාලයෙක් තෝරාගැනීමේදී මගපෙන්විය යුතු අතර ඇයගේ විවාහය ගිවිස ගන්නා කටයුතුවලදී භාරකරු සැලකිලිමත්ව මූලිකත්වය ගත යුතුයි යන්නයි. මේ හැර ඇය විසින් ඇගේ කැමැත්ත පරිදි විවාහ ගිවිසුමකට එළඹීම නොවේ. එසේ ඇයගේ විවාහ ගිවිසුම ඇගේ සිය කැමත්ත අනුව සිදු වන්නේ නම්, එම ගිවිසුම නිශ්ඵල වේ. ආඉෂා තුමිය විසින් දැනුම් දෙන හදීසයක මෙසේ සඳහන් වේ. තම භාරකරුගේ අවසරයකින් තොරව විවාහ වූ ඕනෑම කාන්තාවකගේ විවාහය අවලංගුය, ඇගේ විවාහය අවලංගුය, ඇගේ විවාහය අවලංගුය. (යනුවෙන් තුන්වතාවක් පවසා ඇත.) මෙය හදීසයකි. තිර්මිදීට අනුව "හදීස් හසන්' වර්ගයට අයත්සය. එමෙන්ම සහීහ් හදීස් ග්රන්ථ හතරක සඳහන් වේ." භාරකරුවෙක් නොමැතිව විවාහයක් සිදු කිරීමට නොහැක. මෙම හදීස් දෙක සහ ඒවායේ අර්ථය අනුව පැහැදිලි වන්නේ භාරකරුවෙකු නොමැතිව විවාහය වලංගු නොවන බවයි. තහනම් කිරීමේ මූලික කරුණ නම් (භාරකරු නැති විවාහයේ) වලංගුභාවය ප්රතික්ෂේප කිරීමයි. තිර්මිදි මෙසේද පැවසීය. (උමර්, අලි, ඉබ්න් අබ්බාස්, අබු හුරෙයිරා සහ වෙනත් සහාබාවරුන් ඇතුළු විද්වතුන් මෙම ප්රකාශය අනුමත කරති.) තාබිඌන්වරුන්ගේ නීති විශාරදයින් මෙසේ පැවසූහ. භාරකරුවෙක් නොමැතිව විවාහයක් සිදු කළ නොහැක. ඉහත වදන අෂ්-ෂාෆී, අහ්මද්, ඉස්හාක් යන විද්වතුන්ගේ ප්රකාශය වේ. 'අල් මුග්නි' (6/449) බලන්න.

විවාහය නිවේදනය කිරීම සඳහා කාන්තාවන් විසින් රබන් ගැසීම පිළිබඳ නීතිය.

විවාහය ගැන දැන්වීමට සහ එය ප්රසිද්ධියට පත් කිරීමට හැකි පරිදි කාන්තාවන්ට විශේෂයෙන් කාන්තාවන් අතර රබන් ගැසීම සුදුසු වේ. තවද එයට සංගීතය, විනෝදාත්මක භාණ්ඩ හෝ කාන්තා ගායිකාවන්ගේ ස්වරයන් ඇතුළත් නො කළ යුතුයි. මෙවැනි අවස්ථාවක පිරිමි පක්ෂයට නො ඇසෙන පරිදි කාන්තාවන් විසින් ගීත/කවි ගායනා කිරීම වරදක් නොවේ. අල්ලාහ්ගේ දූතයාණන් මෙසේ පැවැසූහ. විවාහයේදී රබන් ගැසීම හා ශබ්ද නිකුත් කිරීම හලාල් හෙවත් අවසරය සහ හරාම් හෙවත් තහනම අතර පවතින වෙනසයි.

අල්-ෂව්කානි තුමා (නයිලුල් අව්තාර්) (6/200) හි මෙසේ පැවසීය. විවාහයේදී රබන් ගැසීම, විවාහය ගැන කියවෙන වදන්, වෙනත් දෑ වර්ණනා කරමින් ශබ්ද නගා ගායනා කිරීම සඳහා අවසර ඇත. නමුත් අයහපතට මග පෙන්වන සංගීත භාණ්ඩ භාවිතයෙන්, ඒවා අලංකාර කිරීම, මත්පැන් භාවිතය වැනි දෑ තහනම් වේ. මෙවැනි ක්රියා විවාහයේදී පමණක් නොව රාත්රී සමාජශාලා වල මෙන්ම වෙනත් අවස්ථාවන්හි දී ද තහනම්ය. නිමි.

මුස්ලිම් කාන්තාවනි! විවාහ දිනය සඳහා අනවශ්ය ලෙස නාස්තිකාරී ලෙස ස්වර්ණාභරණ සහ රෙදිපිළි මිල දී ගැනීමට නොයන්න. මක්නිසාද යත් මෙය අල්ලාහ් විසින් තහනම් කරන ලද අතිශයෝක්තියක් වන අතර, මෙසේ කටයුතු කරන අය කෙරෙහි ඔහුගේ අප්රසාදය පළ කර ඇත. අති උතුම් අල්ලාහ් අල්කුර්ආනයේ මෙසේ පවසයි. නුඹලා නාස්ති නොකරන්න. නියත වශයෙන්ම ඔහු නාස්තිකාරයින් ව ප්රිය නොකරයි. එබැවින් මධ්යස්ථව කටයුතු කරන්න. ඔබව සීමාව ඉක්මවා ප්රදර්ශනය කිරීමට ඉඩ නො දෙන්න.

කාන්තාවක් තම ස්වාමි පුරුෂයාට කීකරු වීම කෙරෙහි බැඳී සිටීමේ සහ ඔහුට අකීකරු වීමෙන් වැළැකී සිටීමේ අවශ්යතාවය.

මුස්ලිම් කාන්තාවනි! ඔබ ඔබේ ස්වාමිපුරුෂයාට යහපත් දේ කිරීමෙන් කීකරු විය යුතුය. අබු හුරෙයිරා (රළියල්ලාහු අන්හු) දැනුම් දෙන හදීසයක මෙසේ පැවසීය. අල්ලාහ්ගේ දූතයාණන් මෙසේ පැවසුවේය. කාන්තාවක් ඇගේ පස් වේලේ සලාතය ඉටු කරමින්, රමධාන් මාසයේ උපවාසයේ යෙදෙමින් සහ පතිවත ආරක්ෂා කරමින් තම ස්වාමි පුරුෂයාට කීකරු වන්නේද ඇයට අවශ්ය ඕනෑම දොරටුවකින් ස්වර්ගයට ඇයට ඇතුල් වීමට හැක. සැබැවින්ම අල්ලාහ්ගේ දූතයාණන් (සල්ලල්ලාහු අලයිහි වසල්ලම්) පැවසූ බව අබූ හුරෙයිරා (රළියල්ලාහු අන්හු) තුමා විසින් මෙසේ වාර්තා කරන ලදී. "තම ස්වාමිපුරුෂයා (නිවසේ) සිටිනා විට ඔහුගේ අවසරයකින් තොරව බිරිඳකට උපවාසයේ යෙදීමට අනුමැතිය නැත. ඔහුගේ අවසරයකින් තොරව නිවසට කිසිවෙකුට පැමිණීමට ද අවසර ලබා දෙන්නේ නැත." අල්ලාහ්ගේ දූතයාණන් (සල්ලල්ලාහු අලෙයිහි වසල්ලම්) පැවැසූ බව අබූ හුරෙයිරා රළියල්ලාහු අන්හු) තුමා විසින් මෙසේ වාර්තා කරන ලදී. "ස්වාමිපුරුෂයෙකු තම බිරිඳ සමඟ යහන්ගත වීමට කැඳවා, ඇය නොපැමිණියේ නම්, ඇය ඔහුගේ (ස්වාමිපුරුෂයාගේ) කෝපයට පත් වන අතර අලුයම කාලය උදාවෙන තුරු (මලාඉකා හෙවත්) දේවදූතයන්ගේ ශාපයට පාත්ර වනු ඇත." බුහාරි සහ මුස්ලිම් මූලාශුයෙහි සඳහන් වී ඇති ආකාරයට අල්ලාහ්ගේ දූතයාණෝ (සල්ලල්ලාහු අලයිහි වසල්ලම්) මෙසේ ප්රකාශ කළහ. මාගේ ආත්මය කවුරුන් සන්තකයේ ඇත්තෙද ඔහු මත දිවුරා පවසමි. ස්වාමිපුරුෂයෙකු තම බිරිඳව ඇය සමග යහන්ගත වීමට කැඳවා, ඇය ඔහුගේ එම ආරාධනය ප්රතික්ෂේප කරන්නේ නම්, ඇයගේ ස්වාමිපුරුෂයා ඇය සමග සුහදත්වය ඇති කර ගන්නා තුරු ස්වර්ගයේ සිටින දේව දූතයින් ඇය සමඟ කෝප වනු ඇත. සැමියාගේ නිවස රැකබලා ගැනීම, ඔහුගේ අවසරයකින් තොරව නිවසින් පිටව නොයෑම බිරියගේ වගකීම වේ. මුහම්මද් (සල්ලල්ලාහු අලෛහිව සල්ලම්) තුමාණන් මේසේ පැවැසූහ. බිරිය සිය සැමියාගේ නිවස රැකබලා ගන්නියකි. ඇගේ එම වගකීම ගැන මතුවට අසනු ලබන්නීය.

ස්වාමිපුරුෂයාගේ වගකීම් අතරින් සිය බිරිඳගේ අවශ්යතා මෙන්ම නිවසේ කටයුතු ගැන සොයා බලා ඒවා ඉටු කිරීම වැදගත් වන අතර, ගෘහ සේවිකාවක් ගෙදරට ගෙන්වා ගැනීමේ තත්ත්වයක් උදා නොකරන අයුරින් වගබලා ගත යුතුය. එවැනි තත්ත්වයකදී ඇය අපහසුතාවයට පත් වීමට ඉඩ ඇත. තවද ගෘහ සේවිකාවක් ඔහු කෙරෙහි සහ ඔහුගේ දූදරුවන් කෙරෙහි අනතුරු දායක වීමේ අවධානමක්ද ඇත.

අෂ්-ෂෙයිහුල් ඉස්ලාම් ඉබ්නු තයිමියියා (රහිමහුල්ලාහ්) 'මජ්මූඅ අල්ෆතාවා' (32/260,261) නම් කෘතියෙහි මෙසේ පවසයි. සුචරිත ධර්මිෂ්ට ස්ත්රීන් වනාහි අවනත වී ක්රියා කරන්නියන් වෙති. එමෙන්ම (තම සැමියා නොසිටින අවස්ථාවල) අල්ලාහ්ගේ ආරක්ෂාව මත තමන්ව ආරක්ෂා කරන්නියන් වෙති. මෙම ශුද්ධ වූ වදන, පොදුවේ ඇය විසින් තම සැමියාට උදව් උපකාර කිරීම, ගමන් බිමන් වලදී ඔහු කැටුව ගමන් කිරීම ඒ තුලින් ඔහුට පහසුව සළසා දීම හා වෙනත් කරුණුද ඇතුලත් වේ. මේ සම්බන්ධ විස්තර නබි (සල්ලල්ලාහු අලෛහිව සල්ලම්) තුමාණන්ගේ හදීසයේද සඳහන් වේ. විශාරද ඉබ්නු අල්-කයියුම් තම කෘතිය වන 'අල්-හුදා' (5/188,189) හි මෙසේ පැවසීය. බිරිඳගේ උදව් උපකාරය ස්වාමියා කෙරෙහි අවශ්යයි යනුවෙන් තර්ක කරන අයට ඒ සම්බන්ධයෙන් අල්ලාහ්ගේ වදන් අවශ්ය තරම් ඇති බව කව්රුත් හොඳින් දන්නා කරුණකි. මෙයට පටහැනිව බිරිඳගේ උසස් තරාතිරම ගැන සළකා ස්වාමි පුරුෂයා බිරිඳට උදව් උපකාර කිරීම එනම්, ගේ අතුගෑම, පිටි කොටා දීම, ඒවා සකස්කර දීම, රෙදි සෝදා දීම, ගේ දොර අස්පස් කිරීම වැනි නිවසේ සියලු සේවාවන් ඉටුකර දීමට ස්වාමිපුරුෂයා බැඳී නැත. (අඹුසැමියන් හොඳ අවබෝධයෙන් සහ සහයෝගයෙන් කටයුතු කිරීම වැදගත් වේ.) අල්ලාහ් අල්කුර්ආනයේ මෙසේ පවසයි. ඔවුන් කෙරෙහි (ස්වාමි පුරුෂයා) යහ අයුරින් කටයුතු කරන සේම ඔවුනටත් (තම ස්වාමි පුරුෂයා කෙරෙහි යහ අයුරින් කටයුතු කිරීමට) අයිතීන් ඇත. මෙසේද පවසා ඇත: "පුරුෂයෝ කාන්තාවන් මත වූ පාලකයෝය."

ස්ත්රිය සිය ස්වාමි පුරුෂයාට සේවය නොකරන්නේ නම්, ඔහු ඇයගේ සේවකයෙකු බවට පත් වන අතර ඔහුට වඩා ඇය බලවත් වනු ඇත. කතෘ පවසන පරිදි, ස්වාමි පුරුෂයා ඇයගේ සේවය භුක්ති විීඳීම වෙනුවෙන් අල්ලාහ් විසින් ස්වාමිපුරුෂයා කෙරෙහි ඇයගේ නඩත්තුව, ඇඳුම් පැළඳුම් හා නිවාස පහසුකම් යනාදිය සැලැස්වීම ඔහු කෙරෙහි අනිවාර්ය කර තිබේ. සාමාන්යයෙන් ස්වාමිපුරුෂයන් විසින් ඉහත සඳහන් සේවාවන් පවුලේ සමෘධිය සඳහා සිදු කරනු ලැබේ.

එසේම අඹුසැමි යුවලගේ සම්බන්ධතාව සමාජ සිරිත් විරිත් මත පදනම් වී ඇත. සාමාන්ය චාරිත්රයට අනුව කාන්තාවගේ සේවය ගෘහස්ථ සහ නිවසේ අභ්යන්තර කටයුතු සපුරාලීම වේ. එතුමා මෙසේ ද පැවසුවේය. සෑම බිරියකටම තරාතිරම නොබලා එක හා සමානව සැලැකීම අවශ්ය වේ. උස් පහත්, දුප්පත් හා පොහොසත් යනාදි වශයෙන් වෙනස අනුව සැලැකීම නිවැරදි ක්රමය නොවේ. ලොව වඩාත්ම ගෞරවනීය කාන්තාව වන නබි තුමාණන්ගේ දියණිය වූ ෆාතිමා තම ස්වාමිපුරුෂයාට සේවය කරමින් සිටියාය. ඇය කරමින් සිටින සේවාවේ දූෂ්කර තත්ත්වය ගැන සිය පියාණන්ට පැමිණිලි කළාය. එයට පිළිතුරක් වශයෙන් එතුමාණන් ඒවා ඇයගේ යුතුකමක් ලෙස ඇයට පැහැදිලි කළේය. නිමි.

ප්රශ්නය: බිරිඳක් තම ස්වාමිපුරුෂයා තමන් කෙරෙහි අකැමැත්තක් දක්වන අතර ඔහු සමඟ රැඳී සිටීමට ඇය කැමැත්තක් දක්වන්නී නම්, මෙම ගැටලුව විසඳන්නේ කෙසේද?

පිළිතුර: උත්තරීතර අල්ලාහ් මෙසේ ප්රකාශ කරයි. "කාන්තාවක් ඇයගේ සැමියාගෙන් යම් මුරණ්ඩු කමක් හෝ පිටුපෑමක් ගැන බිය වන්නී නම්, ඔවුන් දෙදෙනා අතර එකඟතාවයකින් සමතයට පැමිණීම, ඔවුන් දෙදෙනා අතර වරදක් නැත. සමතය ශ්රේෂ්ඨය." අල්-හාෆිස් ඉබ්න් කසීර් මෙසේ පැවසීය. කාන්තාවක් තම ස්වාමිපුරුෂයා තමාගෙන් ඈත් වීමට සූදානම් වන බව හෝ ඇයට අකමැත්ත පෙන්වන බව දැනී ඇය බියට පත්වන්නී නම් (අවම වශයෙන් ඇයට ඔහු සමග ඇති සබඳතාවය පවත්වාගෙන යාමට) ඔහුගෙන් ඇයට ලැබිය යුතු නිවාස, ඇඳුම් පැළඳුම් වැනි වෙනත් දීමනා හෝ පහසුකම් වැනි අයිතිවාසිකම් අතහැරීමට ඇයට අයිතියක් ඇත. සිය බිරිඳ විසින් ලබා දෙන යෝජනාව පිළිගැනීමේ අයිතියක් ඔහුට ඇති අතර, ඇය විසින් ඔහුට එම පොරොන්දු ඉෂ්ඨ කිරීමට ඉඩ දීම ගැන කිසිදු වරදක් නැත. අල්ලාහ් මෙසේ පවසා සිටින්නේ එබැවිනි. ඔවුන් දෙදෙනා අතර එකඟතාවකින් සමතයට පැමිණීම ඔවුන් දෙදෙනා අතර වරදක් නැත. මෙම ශුද්ධ වූ වදනින් අදහස් වන්නේ ඒ දෙපළ වෙන්වීමට වඩා, එක්වී සිටීම වෙන්වීමට වඩා උසස් බවයි. කතෘ මේ සඳහා කදිම නිදසුනක් පෙන්වා දෙයි. එනම් නබි තුමාණන් ඔහුගේ බිරිඳකු වන සව්දා බින්ත් ජම්ආ මහළු වයසට පත් වූ අවස්ථාවේදී ඇයගෙන් වෙන්වීමට අදහස් කළ බව පැවසුවේය. එවිට එතුමාණන්ගේ නෑකම දිගට පවත්වාගෙන යාම අගය කළ ඇය, නබි තුමාණන් ඇය සමග ගෙවන දිනය, එතුමාගේ තවත් බිරිඳක් වන අයිෂා තුමිය වෙනුවෙන් පරිත්යාග කළාය. එතුමාණන් ද ඇයගේ තීරණයට එකඟ වීමෙන්, එතුමා ඇයගේ සබඳතාවය දිගට පවත්වා ගෙන ගියහ. 'තෆ්සීර් ඉබ්න් කසීර්' (2/406) අවසන් සංස්කරණය බලන්න.

ප්රශ්ණය: කාන්තාවක් තම ස්වාමිපුරුෂයාට වෛර කරනවා නම් සහ ඔහු සමඟ සිටීමට අකමැති නම් ඇය කළ යුත්තේ කුමක්ද?

පිළිතුර: උත්තරීතර අල්ලාහ් මෙසේ ප්රකාශ කරයි. "අල්ලාහ්ගේ සීමාවන් ඉටු කළ නොහැකි වේවි යැයි නුඹලා බිය වෙතොත්, එවිට ඇය ඔහුට යමක් වන්දි වශයෙන් ලබා දී, නිදහස ලබා ගැනීම නුඹලා කෙරෙහි වරදක් නොවන්නේය."

අල්-හාෆීස් ඉබ්න් කසීර් සිය තෆ්සීර්හි (1/483) මෙසේ පැවසීය. (අඹු සැමියන් අතර මතභේද ඇති වූ විටක, බිරිඳ පුරුෂයාගේ අයිතිවාසිකම් ඉටු නොකරන්නේ නම් හෝ ඇය ඔහුට වෛර කරන්නේ නම්, එවැනි තත්ත්වය යටතේ ඔවුන් අතර සබඳතාව ගොඩනගා ගැනීමට නොහැකි වේ නම්, එවිට ඔහු ඇයට දුන් දෙය ඇයගෙන් ආපසු ලබා ගත හැකි අතර, ඒවා ඇය විසින් ඔහුට ලබා දීම ගැන කිසිදු වරදක් නැත. ඔහු ඇයගෙන් ඒවා පිළිගැනීම සම්බන්ධයෙන් කිසිදු වරදක් ද නැත. මෙය ඉස්ලාමීය විවාහ නීතියේදී "හුඃල්ආ" යනුවෙන් හඳුන්වනු ලැබේ. නිමි.

ප්රශ්ණය:- කිසිදු හේතුවක් නොදක්වා, ඔහුගෙන් වෙන්වන බව ඇය ඔහුට පැවසුවහොත්, ඇයට ඇති වන තර්ජනය කුමක්ද?

ආඉෂා (රළියල්ලාහු අන්හා) තුමිය විසින් වාර්තා කළ හදීසය මෙය තහවුරු කරයි. එනම්, නබි (සල්ලල්ලාහු අලයිහි වසල්ලම්) තුමාණෝ මෙසේ පැවසූහ. "කිසිම වරදක් නොමැතිව දික්කසාද වන ලෙස තම ස්වාමිපුරුෂයාගෙන් ඕනෑම බිරිඳක් ඉල්ලා සිටින්නේ නම් ඇයට ස්වර්ගය සුවඳ තහනම් කරනු ඇත." ඉස්ලාමයට අනුව, අල්ලාහ් විසින් අනුමත දී ඇති නමුත් ඔහුට වඩාත්ම පිළිකුල් සහගත ක්රියාව දික්කසාදයයි. දික්කසාදය යනු එය අත්යවශ්ය වන විට පමණක් සිදු කළ යුතු ක්රියා මාර්ගයකි. නමුත් වලංගු කාරණාවක් නොමැතිව දික්කසාද කිරීමෙන් ඇති විය හැකි හානිය හේතුවෙන් එය පිළිකුල් සගතත වන්නේය. දික්කසාදය ලබා ගැනීමට අවශ්යතාව ඇති වන්නේ, ඔහු සමඟ රැඳී සිටින්නට සළස්වා ඇය අගතියට පත්වන අයුරින්, ඔහු විසින් ඇගේ අයිතීන් හා යුතුකම් ඇයට ඉටු කිරීමෙන් වැළකී සිටින විටකය. "ඉන් පසුව යහපත් (අයුරින්) රඳවා ගැනීම හෝ කාරුණික අයුරින් මුදවා හැරීම" උත්තරීතර අල්ලාහ් මෙසේ ද පවසා ඇත. "(ලිංගික ඇසුරෙන්) තම බිරියන්ගෙන් තමන් ඉවත් ව සිටින බවට දිවුරා සිටිනවුනට මාස හතරක අවකාශ පොරොත්තු කාලයක් ඇත. නමුත් ඔවුන් (එම කාලය තුළ) නැවත හැරුණේ නම් එවිට නියත වශයෙන්ම අල්ලාහ් අති ක්ෂමාශීලීය, අසමසම කරුණාන්විතය." (එම කාලය තුළ) ඔවුන් දික්කසාදය ස්ථීර කර ගත්තේ නම්, එවිට නියත වශයෙන්ම අල්ලාහ් සර්ව ශ්රාවකය. සර්ව ඥානීය.

විවාහ ගිවිසුම අවසන් කරගත් මොහොතක කාන්තාවක් කළ යුතු දේ:

අඹුසැමියන් අතර වෙන්වීම ක්රම දෙකකින් සිදු වේ. ඉන් එකක්: විවාහ ජීවිතයේ වෙන්වීමක් ඇති වීමයි. දෙවැන්න, මරණය සමඟ වෙන්වීමක් ඇතිවීමයි. මෙම අංශ දෙකෙහිම කාන්තාවක් ඉද්දා (පොරොත්තු) කාලයෙහි සිටීම අනිවාර්ය වේ. එනම් ඉස්ලාමයට අනුව පොරොත්තු කාලය සීමිත දින ගණනකි. මෙහි උගත හැකි පාඩම් ඇත. එනම් පෙර විවාහ ගිවිසුමට ගරු කිරීම, නැවැත ඇය සමග විවාහ වීමට නියමිත කෙනෙකුට සැකයක් ඇති නොවන ආකාරයට ඇගේ ගර්භාෂය පිරිසිඳු තත්ත්වයට පත් කිරීම, බිහිවීමට ඇති දරුවන්ගේ නිර්මළ බව රැකීම, පෙර විවාහ ගිවිසුමට ගරුකිරීම, වෙන් වූ ස්වාමිපුරුෂයාගේ ගරුත්වය රැකීම සහ ඔහුගෙන් වෙන්වීමෙන් ඇතිවන බලපෑම හෙළි කිරීම.

ඉද්දා (පොරොත්තු) කාලය සිව් වර්ගයකි.

පළමු වර්ගය: ගර්භනී කාන්තාවගේ ඉද්දා (පොරොත්තු) කාලය: එය පොදුවේ දරුවා ප්රසූත කිරීමෙන් අවසන් වන්නකි. ඇය දික්කසාදය සම්පූර්ණ වූ හෝ අසම්පූර්ණ වූ තත්ත්වයක සිටිය ද ඇය විවාහ ජීවිතයෙන් වෙන් වූ හෝ මරණයකින් වෙන් වූ තැනැත්තියක් වුවු ද එය පොදු නීතියකි. සර්ව බලධාරී අල්ලාහ් මෙසේ පවසයි. ගර්භිණී මාතාවන් වනාහි ඔවුන්ගේ (ඉද්දා) කාල සීමාව ඔවුන්ගේ ගැබිනි තත්ත්වය බහා ලීමයි. දෙවන වර්ගය: ඔසප් ඇතිවන තත්ත්වයේ පසුවන දික්කසාද වූ කාන්තාවගේ පොරොත්තු කාලය: එය උත්තරීතර අල්ලාහ් පවසා ඇති පරිදි මාස් ශුද්ධි තුනක කාලයකි. "දික්කසාද කරනු ලැබූ ස්ත්රීන් මාස් ශුද්ධි තුනක කාලයක් (විවාහ නොවි) බලාපොරොත්තුවෙන් සිටිය යුතුය." එනම්: ඔසප් වාර තුනක කාලයකි. තෙවන වර්ගය: ඔසප් ඇති නොවන කාන්තාවකගේ තත්ත්වය: එය වර්ග දෙකකි: ඔසප් නොවන වයසින් අඩු කාන්තාවකගේ තත්ත්වය සහ ඔසප් වීම නතර වූ වැඩිහිටි කාන්තාවකගේ තත්ත්වය. "නුඹලාගේ බිරියන්ගෙන් ඔසප් තත්ත්වය ඇති වීම ගැන බලාපොරොත්තු සුන් කර ගත්තවුන් වනාහි නුඹලා ඔවුන් ගැන සැක කළෙහු නම් ඔවුන්ගේ ඉද්දා කාලය මාස තුනකි. ඔසප් තත්ත්වයට පත් නොවූ කාන්තාවන්ට ද (එලෙසමය.)" එනම් ඔවුන්ගේ ඉද්දා (පොරොත්තු) කාලය ද එසේමය. සිව්වන වර්ගය: සැමියා මියගිය වැන්දඹු කාන්තාව ඇයගේ ඉද්දා (පොරොත්තු) කාලය අල්ලාහ් මෙසේ විස්තරය කරයි. "නුඹලා අතුරින් බිරියන් හැර දමා මරණයට පත් වූවන් ගැන (සඳහන් කරන්නේ) නම් ඔවුන් (බිරියන්) විසින් මාස හතරක් හා (දින) දහයක් ඉද්දා හෙවත් පොරොත්තුවෙහි සිටිය යුතුය." මෙය ලිංගික සම්බන්ධතාවයට ලක් වූ වයසින් අඩු හෝ වයසින් වැඩි කාන්තාවන් මෙම කොටසට අයත් වන අතර ගර්භනී කාන්තාවන් මෙම කොටසට ඇතුල් නොවේ. මන්ද එය සර්වබලධාරි අල්ලාහ්ගේ කියමනට අනුව ඇය මින් බැහැර වන බැවිනි. ගර්භනී මාතාවන් වනාහි ඔවුන්ගේ (ඉද්දා) කාල සීමාව ඔවුන්ගේ ගැබනි තත්ත්වය බහා ලීමයි. ඉබ්නු අල්-කයිම් විසින් රචිත 'අල්හද්යුන් නබවී' හි (5/594, 595) සංශෝධිත සංස්කරණය.

ඉද්දා (පොරොත්තු) සමයේ සිටින කාන්තාවන් සම්බන්ධයෙන් තහනම් වන දෑ:

ඇගේ විවාහ ගිවිස ගැනීම ගැන නීතිය:

අවසන් නොවූ දික්කසාද නඩුවක් ඇති, ඉද්දා වේ සිටින කාන්තාවක් සමග සෘජුව හෝ වක්රව හෝ තවත් පිරිමියෙක් විවාහ ගිවිස ගැනීම තහනම් කර ඇත. මන්ද ඇය කෙනෙකුගේ භාර්යාවකට සමාන වන බැවින් කිසිවෙකුට ඇයට විවාහ යෝජනාවක් ඉදිරිපත් කිරීම තහනම්ය. තවද ඇය තවමත් ඇගේ ස්වාමිපුරුෂයාගේ විවාහ ගිවිසුම යටතේ සිටින බැවිනි.

දික්කසාද නඩුව අවසන් වූ නමුත් ඉද්දා (පොරොත්තු) වේ සිටින කාන්තාවක් සමග සෘජුව විවාහ ගිවිස ගැනීම තහනම් කර ඇත. නමුත් වක්රව විවාහ යෝජානවක් ඉදිරිපත් කිරීම ගැන තහනම් කර නොමැත. මක්නිසාද සර්වබලධාරී අල්ලාහ් මෙසේ පවසයි. එම කාන්තාවට යම් (විවාහ) යෝජනාවක් නුඹලා ඉදිරිපත් කළ ද, නැතහොත් නුඹලාගේ හදවත් තුළ නුඹලා (ඔවුන් ගැන අදහසක්) සඟවා ගත්ත ද නුඹලා කෙරෙහි වරදක් නැත.

සෘජුව විවාහ ගිවිස ගැනීම යනු ඇයව විවාහ කර ගැනීමට ඇති ආශාව ඇය ඉදිරියේ ප්රකාශ කිරීමය. එනම්, "ඔබව විවාහ කර ගැනීමට මම කැතියි", යනාදි වශයෙන් පැවැසීමයි. මෙයින් විවාහ වීමට ඇති ආශාව නිසා ඇගේ ඉද්දා හෙවත් පොරොත්තු කාලය අවසන් වීමට පෙර එය අවසන් බව ඇය පැවසීමට ඇයව පෙළඹවීමට හේතු විය හැක. නමුත් ව්යංගන මාර්ගයෙන් කරන යෝජනාව එසේ නොවේ. එය සෘජුව විවාහය ගැන කැමැත්ත හෙළිදරව් කිරීමක් නොවන හෙයින් එය තහනම් කර නැත. ශුද්ධවූ අල්කුර්ආන් පදයෙන් පැහැදිලි වන්නේද එම කාරණයයි.

ව්යංගන මාර්ගයෙන් විවාහ ගිවිස ගැනීමට උදාහරණයක් නම්: කෙනෙකුට ඇය ගැන තිබෙන අදහස ඇඟවීමෙන් ප්රකාශ කිරීමයි.- දික්කසාද නඩුව අවසන් වූ, ඉද්දා (පොරොත්තු) වේ සිටින කාන්තාවකට ඇඟවීමෙන් අසන යෝජනාවකට වක්ර ලෙස පිළිතුරු දීමට හැකි අතර ඇයට සෘජුව පිළිතුරු දීමට නොහැක. දික්කසාද නඩුව අවසන් නොවූ, ඉද්දා (පොරොත්තු) වේ සිටින කාන්තාවකට කෙනෙකු විසින් විවාහ යෝජනාවක් ඉදිරිපත් කළ විටක ඇය විසින් සෘජුව හෝ ව්යංගන ලෙස පිළිතුරු දීමට හෝ ප්රතිචාර දැක්වීමට අවසර නැත.

ඉද්දා (පොරොත්තු) වේ සිටින කාන්තාවකට විවාහ ගිවිස ගැනීම තහනම් කර ඇත. කුමක් නිසාද යත් සර්වබලධාරී අල්ලාහ් මෙසේ පවසා ඇත. අල්ලාහ් මෙසේ පවසයි. එහි නියමිත කාලය නිම වන තෙක් නුඹලා විවාහ ගිවිසුම ස්ථීර නොකරනු.

ඉබ්නු කතීර් සිය අර්ථ විවරණ කෘතියෙහි (1/509) මෙසේ පැවසීය: මෙහි අර්ථය නම්:(ඉද්දා)පොරොත්තු කාලය ඉකුත්වන තුරු විවාහ ගිවිසුමක් අත්සන් නොකරන්න, යන්නයි. (ඉද්දා) පොරොත්තු කාලය තුළ ගිවිස ගන්නා විවාහ ගිවිසුම වලංගු නොවන බව විද්වතුන්ගේ ඒකමතික එකඟතාවයයි. නිමි.

ඉහත සඳහන් කරුණු අනුව එහි ප්රතිලාභ දෙකක් ඇත.

පළමුවැන්න: කාන්තාවක් විවාහ වී සංසර්ගයේ යෙදීමට පෙර දික්කසාද වූවා නම් ඇය වෙනුවෙන් (ඉද්දා) පොරොත්තු කාලයක් සිටිය යුතු නැත. මක්නිසාද සර්වබලධාරී අල්ලාහ් මෙසේ පවසයි. අහෝ විශ්වාස කළවුනි! නුඹලා දෙවියන් විශ්වාස කරන කාන්තාවන් විවාහ කොට, පසු ව නුඹලා ඔවුන් ස්පර්ශ කිරීමට පෙර නුඹලා ඔවුන් දික්කසාද කළහොත් නුඹලා ගණන් කරන පොරොත්තු කාලයක් නුඹලා වෙනුවෙන් ඔවුන් කෙරෙහි අනිවාර්යය නොවන්නේය.

ඉබ්නු කසීර් සිය තෆ්සීර් ග්රන්ථයේ (5/479) මෙසේ පවසයි: මෙය විද්වතුන් විසින් ඒකමතිකව එකඟ වූ කාරණයකි, එනම් විවාහ වූ කාන්තාවක් ඇය ලිංගික වශයෙන් එකතු වීමට පෙර දික්කසාද වූවා නම්, ඇය වෙනුවෙන් (ඉද්දා) පොරොත්තු කාලයක් සිටිය යුතු නැත. එබැවින් දික්කසාද වූ වහාම සුදුසු කෙනෙකු සමග විවාහ වීමට ඇයට හැක.

දෙවැන්න: විවාහයෙන් පසු සංසර්ගයේ යෙදීමට පෙර දික්කසාද කරන ලද කාන්තාවකට දෙනු ලැබූ මහර් නම් විවාහ ත්යාගය අඩක් ඇය සතු විය යුතු අතර, මහර් නියම නො කළේ නම්, ඇයට ත්යාග වශයෙන් ඇඳුම් පැළඳුම් සහ වෙනත් දේ ලබා දීම හරහා ඇය සතුටට පත් කර වීම සුදුසුය.

කවුරුන් හෝ සංසර්ගයේ යෙදීමෙන් පසු දික්කසාද කරන්නේ නම් ඇයට (මහර්) දෑවැද්ද ප්රධානය කළ යුතුය. සර්වබලධාරී අල්ලාහ් අල්කුර්ආනයේ මෙසේ පවසයි. "නුඹලා ඔවුන් ව ස්පර්ශ නොකර තිබිය දී හෝ ඔවුනට (මහර්) නියමයක් නියම නොකර තිබිය දී හෝ කාන්තාවන් ව නුඹලා දික්කසාද කළෙහු නම් නුඹලා කෙරෙහි වරදක් නැත. තවද ධනවතා කෙරෙහි ඔහුගේ හැකියාව අනුව ද දුප්පතා කෙරෙහි ඔහුගේ හැකියාව අනුව ද (නඩත්තු මුදල් ලබා දීමට සලස්වනු)." තවදුරටත් එම පාඨයේ මෙසේ පවසයි. ඔවුනට (මහරයෙන්) නියමයක් නුඹලා නියම කර තිබිය දී ඔවුන් ව නුඹලා ස්පර්ශ කිරීමට පෙර නුඹලා ඔවුන් ව දික්කසාද කළේ නම්, එවිට නුඹලා නියම කරන දැයින් අඩක් (ඇයට දිය යුතු)ය. එනම්: අහෝ ස්වාමිපුරුෂවරුනි! ඔබ මහර් නම් විවාහ ත්යාගය නියම කර තිබියදී ඔබ බිරියන් සමග සංසර්ගයේ නිරත වීමට පෙර ඔබ ඔවුන් දික්කසාද කිරීම ඔබ කෙරෙහි වරදක් නැත. එහි දී ඇයට යම් අඩුවක් වී නම් මුත්ආ හෙවත් නඩත්තු මුදල් වලින් පියවෙනු ඇත. එය විය යුත්තේ සෑම පුරුෂයකුගේම දුප්පත් හා පොහොසත්කම අනුවය. පසුව අල්ලාහ් ඇයට මහරය නම් කර ඉන් අඩක් පිරිනැමීමට නියෝග කොට ඇත.

අල්-හාෆීස් ඉබ්න් කතීර් සිය අර්ථ විවරණ කෘතියෙහි (1/512)හි මෙසේ පවසයි. (ඉහත සඳහන් කළ ආකාරයට මහර්) විවාහ ත්යාගයෙන් අඩක් පිරිනැමීම විද්වතුන් අතර ඒකමතික කරුණක් වන අතර එහිදී ඔවුන් අතර මතභේදයක් නැත. නිමි.

ස්වාමිපුරුෂයාගේ මරණය නිසා (ඉද්දා) පොරොත්තු කාලය තුළ සිටින කාන්තාවකට කරුණු පහක් තහනම් ය:

ඒවායින් එකක්: සියලු වර්ගවල සුවඳ විලවුන් ඇගේ ශරීරයෙහි හෝ ඇඳුම් මත භාවිතා කිරීම, එවැනි සුවඳ විලවුන් වෙනත් ක්රමයකින් හෝ ඇය විසින් භාවිතා නොකළ යුතුයි. නබි තුමාණන්ගේ හදීසයක මෙසේ සඳහන් වේ. "සුවඳ විලවුන් භාවිතා නොකරන්න."

දෙවැන්න: ඇය විසින් සිය ශාරීරික පෙනුම අලංකාර කර ගැනීමයි: ඇය විසින් තමන්ව අලංකාර කර ගැනීම තහනම් කර ඇති අතර, ඇස් බැමි සඳහා භාවිතා කරනු ලබන ආලේප සහ විවිධ වර්ගයේ සායම් වැනි සියලු ආකාරයේ අලංකාර කිරීම් තහනම් කර ඇත. නමුත් ඇයට ඒවා ඖෂධයක් ලෙස භාවිතා කිරීමට අවසර ලැබේ. එබැවින් එය බෙහෙතක් මිස අලංකාර කිරීමක් වශයෙන් භාවිතා කිරීමට නොහැක. එම ඖෂධය රාත්රියේ දී ඒවා ආලේප කර දිවා කාලයේදී ඒවා පිස දැමීම යෝග්ය වේ.

තෙවනුව: විලාසිතාවන්ට අනුව අලංකාර කිරීම සඳහාම නිර්මාණය කර ඇති ඇඳුම් වලින් සරසා ගැනීම, විවිධ අලංකාර මෝස්තර වලින් සරසා ඇති ඇඳුම් ඇඳීම සහ විශේෂ වර්ණයෙන් යුත් ඇඳුම් පැළැඳුම් භාවිතය සඳහා ගැනීම සුදුසු නොවේ.

හතරවනුව: මුදු ඇතුලු සියලු වර්ගවල ආභරණ පැළඳීම.

පස්වනුව: තම ස්වාමිපුරුෂයා මිය ගියේ කුමන නිවසකද එම නිවස හැර වෙනත් නිවසක රාත්රිය ගත කිරීම. නීත්යානුකූල ආගමික හේතුවක් ඇති විටක හැර ඇය ඔහුගේ එම නිවසින් පිටත් නොවිය යුතුයි. රෝගී පුද්ගලයෙකු බැලීමට හෝ ඥාතී හිත මිතුරන් හමු වීමට හෝ නිවසින් පිටව යාමෙන් වැළැකී සිටිය යුතුය. නමුත් ඇගේ අත්යවශ්ය අවශ්යතාවක් සඳහා දිවා කාලයේදී පිටතට යාමට ඇයට අවසර ඇති අතර, මෙම කරුණු පහ හැරුනු විට අල්ලාහ් විසින් අවසර දී ඇති කාරණා සඳහා කටයුතු කිරීමට ඇයව වළක්වන්නට නොහැක.

ඉමාම් ඉබ්න් අල්-කය්යුම් (අල්හුදා අන්නබවී) (5/507) හි මෙසේ පවසයි: නියපොතු කැපීම, රහසිගත ස්ථානයන්හි රෝම හා වෙනත් අවශය කෙස් ඉවත් කිරීම, ජලයේ ඖෂධ කොළ වර්ග මිශ්ර කර ජලස්නානය කිරීම යානාදි දෑ තහනම් කර නැත. නිමි.

ෂෙයික් අල්-ඉස්ලාම් ඉබ්නු තය්මිය්යා 'මජ්මූ අල්-ෆතාවා' නම් ග්රන්ථයෙහි (34/27, 28) මෙසේ පවසයි: අල්ලාහ් විසින් අනුභව කිරීමට අවසර දී ඇති සියලු වර්ගයේ පලතුරු හා මස්, මාංශ වැනි සෑම දෙයක්ම අනුභව කිරීමට මෙන්ම අවසර ලත් සියලුම බීම වර්ග පානය කිරීමට ඇයට අවසර ඇත. එම්බ්රොයිඩරි මැහුම්,ගෙතුම් වැනි සාමාන්ය කාන්තාවන් කරන සියලු අත්වැඩ කිරීම ඇයට තහනම් නොවේ. තවද ඇයට අවසර ලත් සියල්ල කිරීමට ඇයට අවසර ඇත. තවද සාමාන්ය දවස්වල මෙන් තිරයකට මුවා වී කතා කළ යුතු පිරිමින් සමග සාරධර්මයට අනුකූලව කතා කරීමටද පොරොත්තු කාලය තුළ අවසර ඇත. නිමි.

සාමාන්ය ජනයා පවසන ආකාරයට සඳ බැලීමෙන් ඇයගේ මුහුණ ආවරණය කර ගැනීම, නිවසේ වහලය වැනි උස් ස්ථාන වලට නොනැගීම, කතා කිරීමට අවසර ලබා තිබෙන පිරිමින් සමග පවා කථා නොකිරීම යන සියලු ප්රකාශයන් කිසිදු පදනමක් නොමැති මිත්යාවන්ය. අල්ලාහ් සියල්ල දනී.

දහවන ඡේදය

කාන්තාවන් සඳහා වූ ආරක්ෂිත නීති පිළිබද විස්තර. ඇගේ ගෞරවය හා ඇගේ නිර්මලකම ආරක්ෂා කිරීම කාන්තාවක් පිරිමින් මෙන් ඇගේ බැල්ම පහත හෙළීමට සහ පතිවත ආරක්ෂා කිරීමට අණ කරනු ලැබ ඇත. උත්තරීතර අල්ලාහ් මෙසේ පවසයි. "දේවත්වය විශ්වාස කරන පුරුෂයින්හට ඔවුන්ගේ බැල්ම පහත හෙළන මෙන්ද, ඔවුන්ගේ ලිංගේන්ද්රියන් ආරක්ෂා කරන මෙන් ද නුඹ පවසනු. එය ඔවුනට වඩාත් පිවිතුරු වනු ඇත. නියත වශයෙන්ම අල්ලාහ් නුඹලා සිදු කරන දෑ පිළිබඳ ව අභිඥානවන්තය." "එමෙන්ම දේවත්වය විශ්වාස කරන කාන්තාවන්ටද ඔවුන්ගේ බැල්ම පහත හෙළන මෙන්ද ඔවුන්ගේ ලිංගේන්ද්රියන් ආරක්ෂා කරන මෙන් ද නුඹ පවසනු." අපගේ ෂෙයික්, ෂෙයික් මුහම්මද් අල්-අමීන් අල්-ෂන්කීතී, රහිමහුල්ලාහ්, ඔහුගේ තෆ්සීර් ග්රන්ථය වන "අද්වා අල් බයාන්" හි මෙසේ පැවසීය: සර්ව බලධාරි අල්ලාහ්, දේවත්වය විශ්වාස කළ පිරිමින්ට සහ විශ්වාස කළ කාන්තාවන්ට, ඔවුන්ගේ බැල්ම පහත් කර ගන්නා ලෙසද, ලිංගික ස්ථාන (පතිවත) ආරක්ෂා කරන ලෙසද මෙම වදනෙහි අණ කර ඇත. ලිංගික ස්ථාන (පතිවත) ආරක්ෂා කරන ලෙස අණ කර සිටීමේදී, කාමයේ වරදවා හැසිරීම, කාන්තා සමලිංගික හැසිරීම, පිරිම සමලිංගික හැසිරීම යනාදී පහත් ගුණාංග සහ කාන්තාවගේ අලංකාරය ප්රසිද්ධියේ ප්රදර්ශනය කිරීම හා ආවරණය නො කිරිම යනාදි වශයෙන් සියල්ලක්ම එයට අයත් වේ. අල්ලාහ්ගේ මෙම අණට අනුව කටයුතු කරන සියලු දෙනාට සමාව සහ මහත් වූ යහපත් ප්රතිඵල ලැබෙන බවට ඔහු සූරා අල්-අහ්සාබ්හි සඳහන් කර ඇත. "නියත වශයෙන්ම මුස්ලිම්වරුන් හා මුස්ලිම්වරියන් ද," යන වදනේ සිට පහත සඳහන් වදන දක්වා. "තමන්ගේ ලිංගේන්ද්රියන් ආරක්ෂා කරන්නන් හා ආරක්ෂා කරන්නියන් ද අල්ලාහ් ව අධික ලෙස මෙනෙහි කරන්නන් හා මෙනෙහි කරන්නියන් ද අල්ලාහ් ඔවුනට සමාව හා මහත් ප්රතිඵල සූදානම් කර ඇත." නිමි. අද්වා උල් බයාන් (6/186,187)

ඔහුගේ කියමනට අනුව: අල්මුසාහකා යනු ස්ත්රීයක් තවත් ස්ත්රීයක් සමග රාගික හැඟීමෙන් සමලිංගික ක්රියාවෙහි යෙදීමයි. එය මහා අපරාධ ක්රියාවකි. ඒ සඳහා අදාල දෙදෙනාටම දැඩි දඬුවම් ලබා දිය යුතුය.

ඔහු [අල්-මුග්නි] කෘතියෙහි (8/198) මෙසේ පවසයි: තවද, කාන්තාවන් දෙදෙනෙකු එකිනෙකා සමග සමලිංගික සේවනයේ යෙදී ඇත්නම්, ඔවුන් දෙදෙනා ශාප ලත් කාම මිථ්යාචාරයෙහි යෙදුනු තැනැත්තියන් සේ සළකනු ලැබේ. නබි (සල්ලල්ලාහු අලෛහිව සල්ලම්) තුමාණෝ මෙසේ පැවැසූහ: "ස්ත්රියක් තවත් ස්ත්රියක් සමහ සමලිංගික සේවනයේ යෙදුනේ නම් ඔවුන් දෙදෙනා ගනිකාවන් දෙදෙනෙක් වෙති." ඔවුන් දෙදෙනාට දැඩි දඬුවම් ලබා දිය යුතු වේ. හේතුව එය සීමාවක් නැති කාම මිථ්යාවේ හැසිරීමක් වන බැවිනි. නිමි.

මුස්ලිම් කාන්තාවන් විශේෂයෙන් තරුණියන් මෙම නීච, කැත පුරුද්දෙන් පරිස්සම් වෙත්වා!

බැල්ම පහතට හෙලීම සම්බන්ධයෙන් විශාරද ඉබ්නු අල්-කය්යුම් 'අල් ජවාබ් අල්-කාෆි' නම් කෘතියෙහි 129, 135 වන පිටුවල මෙසේ පවසා ඇත: මොහොතකට හෝ අපේ හිත පාලනයෙන් තොර වූ විට, එය කාමුක ආශාවන් වෙත ඇදී යයි. එබැවින් සිත මෙන්ම මූලික වශයෙන් ලිංගේන්ද්රියන් ආරක්ෂා කළ යුතු වේ. කෙනෙකු ඔහුගේ හිතට කැමති ආකාරයට ඉඩ දුන් විට ඔහු පරිහානිය කරා ගමන් කරයි. මුහම්මද් නබි (සල්ලල්ලාහු අලෙයිහි වසල්ලම්) තුමාණෝ මෙසේ පැවැසූහ. ඕ අලි! ඔබේ බැල්මට වහල් නොවන්න. ඔබේ පළමු බැල්මට සමාව ඇත. මෙයින් අදහස් කරන්නේ, (සුරූපි කතක් වෙත) නොදැනුවත්ව අනපේක්ෂිත ලෙස සිදුවන හදිසි බැල්මය. නබි (සල්ලල්ලාහු අලයිහි වසල්ලම්) තුමාණන් මේසේ පවසා ඇති බව [ අල් මුස්නාද්] හි මෙලෙස සඳහන් වේ. "බැල්ම යනු ෂෙයිතාන්ගේ ඊතලවලින් විෂ ගැන්වුනු ඊතලයකි. එතුමා මෙසේද පැවසීය. පොදුවේ බැල්ම යනු පුද්ගලයෙකුට අනතුරුවල ආරම්භයයි. මන්ද බැල්ම අනතුරක් ඇති කරන අතර, භයානක ලෙස විවිධ ආශාවන් වෙත යොමු කරයි, පසුව භයානක සිතුවිලි ජනනය කරයි, එවිට එවැනි නපුරු සිතුවිලි රාගය ඇති කරයි, පසුව රාගය ශක්තිමත් වී ස්ථිර අධිෂ්ඨානයක් බවට පත්වේ. පසුව එය නරක ක්රියාව දක්වා ගෙන යයි. එය වැළැක්වීමට විශාල උනන්දුවක් තිබෙන කෙනෙකුට මිස එය වළක්වා ගත නොහැකිය. එබැවින් ඔබේ බැල්ම පහතට යොමු කිරීමෙන් ඉවසිලිවන්තව සිටීමට පුරුදු වී නම්, පසුව සිදුවන වේදනාවෙන් සුරක්ෂිත වීමට ඔබට හැකියාව ලැබෙනු ඇත.

එබැවින්, මුස්ලිම් සහෝදරියනි! පිරිමින් වෙතින් ඔබේ බැල්ම පහත් කර ගන්න. සමහර දූෂිත සඟරා වල හෝ රූපවාහිනී තිරවල හෝ වීඩියෝ පටවල පෙන්වන ආකර්ෂණීය පින්තූර දෙස බැලීමෙන් වැළැකී සිටින්න. එවිට ඔබට අයහපත් ප්රතිවිපාකවලින් මිදී සිටීමට හැක. මෙවැනි අසභ්ය චිත්ර නරඹා සිය ජීවිතය ගින්නෙන් දවා සදා ශෝකාන්තයට පත් සහෝදර සහෝදරියන් කොතරම් නම් සිටිනවාද?

සංගීත හා තාලයන්ට සවන් දීමෙන් ඔබ දුරස් වීම ලිංගේන්ද්රියන් ආරක්ෂා කර ගැනීමට උපකාර වන්නේය.

ඉමාම්, ඉබ්නු අල්-කය්යුම් තුමා 'ඉගාසත් අල්-ලහ්ෆාන්' (1/242,248,264,265) හි මෙසේ පවසයි: ෂෙයිතාන්ගේ යාන්ත්රික පද්දතියට ආකර්ෂණය වන්නේ දැනුම, බුද්ධිය හා ආගමික බිය බැතියෙන් ඌණ වූ අයයි. අල් කුර්ආනයෙන් සිත සාරවත් කිරීම වෙනුවට සංගීතය, සංගීත භාණ්ඩ හා ගීත ප්රසංග වෙත හිත යොමු වන්නේ නුවණින් හා ඥානයෙන් දුර්වල වූ බොලඳ අයයි. මෙය දුරාචාරය හා අකීකරුකම වෙත යොමු කරයි. එය ෂයිතාන්ගේ මග පෙන්වීමයි. දයානුකම්පිත දෙවිඳාගේ යහ මග වෙත යොමු වීමේ නුවණ වසා දමයි. මෙවැනි සංගීතමය ප්රසංගය සමලිංගික සේවනය සහ දුරාචාරය වෙත යොමු කිරීමත් සමගම කාම මිත්යාචාරික පෙම්වතා තම පෙම්වතියගේ අරමුණ සාක්ෂාත් කරගනී. එතුමා මෙසේද පැවැසුවේය.මෙවැනි සංගීත, ස්ත්රියක් විසින් ශ්රවණය කිරීම ඉස්ලාම් දහමට අනුව මහා පරිහානියක් හා සිත් දූෂණය කිරීමේ මාර්ගයකි. දහමට ලැදි සෑම පුද්ගලයෙකුම තම පවුලේ සාමාජිකයින් සංගීතයෙන් හා වාදනයෙන් වළක්වන බවට කිසිම සැකයක් නැත. තවද කතෘ තුමා මෙසේද පැවසීය. පොදුවේ සමාජයේ දක්නට ලැබෙන සිදුවීමක් නම් ස්වාමිපුරුෂයෙකුගේ බිරිඳ දරුණු ගතිගුණ වලින් යුක්ත නම් එයින් මුදවා ගැනීමට ඇයට සංගීතය ඇසීමට සලස්වා ඇය තුල ලයාන්විත බවක් උද්දීපනය කිරීමට වෙර දරයි. මෙයට හේතුව කාන්තාවගේ හිත සංගීත හා එහි නාද වෙත ඉක්මනින් ඇදී යන බැවිනි.මේ නිසා ඇගේ හැඟීම් ගායනය සමග සංගීතය වෙත සහ එහි අර්ථය වෙතට යොමු වෙයි. එතුමා මෙසේද පැවැසීය. තරුණයින් මෙවැනි සංගීත,ගායනා සහ නැටුම් වෙත යොමු වී ඒවා ඔවුන්ගේ සිත් තුළ පැලපදියම් වූ විට ඔවුන් දහමින් නොමග වෙත යොමු වෙති. සංගීත හා ගායනය නිසා නිදහස් ධාර්මික කාන්තාවන් කීදෙනෙක් ගණිකාවන් බවට පත් වූවාද? නිමි.

එබැවින් මුස්ලිම් කාන්තාවනි! අල්ලාහ්ට බිය බැතිමත් වී, විවිධාකාර උපක්රම හා සමාජ මාධ්ය ජාලා තුළින් මුස්ලිම්වරුන් අතර ප්රචලිත වන ගීත වලට සවන් දීමේ භයානකකම යන සහජ රෝගයෙන් පරිස්සම් වන්න. බොහෝ අනුවණ ගැහැණු ළමයින් මේවාට වහල් වී සිටින අතර, ඒ අතර ඔවුුහු සුරතල් වෙති.

තම පවිත්රතාවය ආරක්ෂා කර ගැනීමට, තම මහ්රම්වරයෙකු හැර කාන්තාවක් ගමන් බිමන්වල යෙදීම තහනම් කිරීම එක් මාර්ගයක් වේ.

මහ්රම්වරයෙකු සමග හැර වෙනත් අය සමග කාන්තාවක් ගමන් බිමන්වල යෙදීම තහනම් කිරීම ලිංගේන්ද්රියන් ආරක්ෂා කිරීමේ එක් සාධකයකි. ඔහු ඇයව නපුරෙන් ආරක්ෂා කර, දුෂ්ට හා දුරාචාරයේ අභිලාෂයන්ගෙන් ඇයව රැක ගනී. බොහෝ සහීහ් හදීස් මගින් කාන්තාවක් මහ්රම් නොමැතිව ගමන් බිමන් වල යෙදීම තහනම් කර ඇත. ඒවා අතර, ඉබ්නු උමර් (රළියල්ලාහ් අන්හු) විසින් වාර්තා කර ඇති හදීසය මෙසේය. මුහම්මද් නබි (සල්ලල්ලාහු අලයිහි වසල්ලම්) තුමාණෝ මෙසේ පැවසූහ. "කාන්තාවක් මහ්රම් කෙනෙකු සමග මිස දින තුනක් ගමන් නොකළ යුතුය." මූලාශ්රය: බුහාරි හා මුස්ලිම්. නබි (සල්ලල්ලාහු අලයිහි වසල්ලම්) තුමා පැවසූ බව අබූ සඊද් අල් හුඃද්රි (රළියල්ලාහු අන්හු) තුමා විසින් වාර්තා කරන ලදී. "කාන්තාවකට ඇයගේ සැමියා හෝ මහරම් අයකු නොමැති ව දින දෙකක් හෝ රාත්රී දෙකක දුර ගමනක් යාම එතුමාණෝ තහනම් කළහ." නබි (සල්ලල්ලාහු අලයිහි වසල්ලම්) තුමාණන් ප්රකාශ කළ බවට අබූ හුරයිරා (රළියල්ලාහු අන්හු) තුමා විසින් මෙසේ දැනුම් දෙන ලදී. "අල්ලාහ් සහ අවසාන දිනය විශ්වාස කරන කාන්තාවකට මහරම් කෙනෙකු සමග මිස දිවා රෑ දෙකක දුර ගමනක් යාමට අවසර නැත." බුහාරි හා මුස්ලිම් හි වාර්තා වී ඇත.

හදීසයේ සඳහන් දින තුනක්, දින දෙකක්, දිවා සහ රාත්රියක් යනාදි වශයෙන් තක්සේරු කිරීමෙන් අදහස් කරනුයේ එකල තැනින් තැනට යාමේ මාධ්ය වූ පා ගමන හා සතුන් මත පදනම් වෙමින් තක්සේරු කර තිබීමය. හදීසයේ සඳහන් තක්සේරුවලට අනුව දින තුනක්, දින දෙකක් හෝ දිවා රාත්රියක් හෝ ඊටත් වඩා අඩු ප්රමාණයකින් හෝ විය හැකිය යන්නෙහි මතභේද ඇත. ඒ සම්බන්ධයෙන් විද්වතුන් පිළිතුරු දී ඇත්තේ එය මතුපිටින් පෙනෙන අර්ථය නොව, සැබැවින්ම එහි අර්ථය වන්නේ ගමනක් යනුවෙන් හැඳින්වෙන සෑම ගමනක්ම කාන්තාවට තහනම් කර ඇති බවයි.

'ෂරහ් සහීහ් මුස්ලිම්' ග්රන්ථයෙහි (9/103) ඉමාම් අල් නවාවි මෙසේ පැවසීය. මෙහිදී ගමන් බිමන් යනුවෙන් හැඳින්වන සෑම එකකදීම ස්වාමිපුරුෂයෙකු හෝ මහ්රම් කෙනෙකු නොමැතිව කාන්තාවක් විසින් ගමන් බිමන් වල යෙදීම එය දින තුනක්, දින දෙකක් හෝ එක් දිනක් හෝ වේවා, එවැනි ගමන් තහනම් කර ඇති බවයි. මෙය ඉබ්නු අබ්බාස් තුමා දැන්වූ හදීසයක් බව මුස්ලිම් ග්රන්ථයේ වාර්තා වේ. මහ්රම් සමඟ මිස කාන්තාවක් ගමන් නොකළ යුතුය. මෙය සියලු ගමන් බිමන් වලට අදාල වේ. අල්ලාහ් සියල්ල දනී. නිමි

අනිවාර්ය හජ් සඳහා කාන්තාවන්ගෙන් යුත් කණ්ඩායමක් සමඟ කාන්තාවකට ගමන් කිරීමට හැක යනුවෙන් (ෆත්වා) ආගමික තීන්දුව නිකුත් කළ තැනැත්තාගේ තීන්දුව නබි තුමාගේ සුන්නාහ්වට පටහැනිය. ඉමාම් අල්-කතාබ් තම කෘතිය වන 'මආලිමි අල්-සුනන්'හි (2/ 276, 277) හි 'තහදීබ්'හි ඉබ්නු අල්-කයිම් සමග එක්ව මෙසේ පැවසීය: නබි (සල්ලල්ලාහු අලයිහි වසල්ලම්) තුමාණන්ගේ නිගමනය අනුව කාන්තාවක් මහරම් කෙනෙක් නොමැතිව ගමනක යෙදීම වරදකි. මහ්රම් නොමැතිව හජ් වන්දනාවේ යෑමට කාන්තාවට බල කිරිම, සුන්නාවට පටහැනි වේ. ඇය මහරම් නොමැති කෙනෙකු සමඟ පිටතට ගමන් කරන්නේ නම් එය පාපයකි. එවැනි වාතාවරණයකදී ඇයට හජ් ඉටු කිරීමට බල කිරීමට අවසර නැත. එය පාපයට තුඩු දෙන කාරණයකි. නිමි.

මගේ අදහස මෙයයි: ඔවුන් මහරම් නොමැතිව කාන්තාවකට ගමන් බිමන් වල යෙදීමට කිසිසේත්ම ඉඩ නොදුන් නමුත්, අනිවාර්ය හජ් ගමනේදී පමණක් එසේ කිරීමට ඇයට අවසර දී ඇත.

'අල්-මජ්මූ' නම් කෘතියෙහි (8/249) ඉමාම් අන්-නවවි මෙසේ පවසයි: ස්වේච්ඡාවෙන් යෙදෙන ගමනකදී, වෙළඳාමක් සඳහා කරනු ලබන ගමනකදී, සංචාරක ගමනකදී සහ වෙනත් ගමනකදී, මහ්රම් කෙනෙකු නොමතිව ගමන් කිරීමට අවසර නැත. නිමි.

සෑම ගමනකදීම කාන්තාවක් මහ්රම් නොමැතිව ගමන් කිරීම ගැන සැහැල්ලුවෙන් සිතන පිරිසක් සිටින මෙම වකවානුවේදී, එය විශ්වාසදායක කිසිදු විද්වතෙකු විසින් අනුමත නොකෙරේ.

මේ ගැන සැහල්ලුවෙන් සිතන අය පවසා සිටින්නේ: කාන්තාවක් ගුවන් යානයකින් ගමන් කරන විට ඇගේ මහරම් විසින් ඇයව ගුවන් යානය වෙත යැවීම සඳහා සියලු කටයුතු ඉටු කර දෙයි, ඇය අවශ්ය රටට පැමිණෙන විට ඇගේ තවත් මහරම් කෙනෙකු තවත් ගුවන්තොටුපළදී ඇයව පිළිගනී. ගුවන් යානය ආරක්ෂිත බැවින්, ඔවුන් කියා සිටින්නේ, පිරිමි සහ ගැහැණු යන දෙපක්ෂයේම මගීන් විශාල සංඛ්යාවක් එහි සුරක්ෂිතව ගමන් කරන බවයි.

ඔවුන්ට අප පවසනුයේ: එසේ නොව ගුවන් යානය අනෙක් යාන වාහනවලට වඩා භයානකය. කුමක් නිසාද යත් මගීහු ඇය සමඟ මිශ්ර වෙති. ඇතැම් විට පිටස්තර පිරිමියෙකු අසල වාඩි වී සිටීමට ඇයට සිදු වේ. ඇය ගමන් කරන ඇගේ දිශාවෙන් වෙනත් ගුවන්තොටුපළකට යානය හරවන්නට සිදු වී එහිදී ඇයව පිළිගැනීමට කිසිවෙකු සොයා ගැනීමට නොහැකි වේ. ඇයට මහරම් කෙනෙකු නැති, ඇය නොදන්නා රටකට ගමන් කරන එම කාන්තාවකගේ තත්ත්වය කුමක්ද?

කාන්තාවකගේ පතිවත ආරක්ෂා කිරීමට හේතු සාධක වන කරුණු අතරින් කාන්තාවක් හා ඇයට මහ්රම් නොවන පිරිමියෙකු අතර හුදෙකලාවීම වැළැක්වීමද තවත් එකකි:

කාන්තාවකගේ පතිවත ආරක්ෂා කිරීමට හේතු සාධක වන කරුණු අතර කාන්තාවක් ඇයට විවාහයට තහනම් කර නොමැති පිරිමියෙකු අතර හුදෙකලාවීම වැළැක්වීම සම්බන්ධයෙන් නබි (සල්ලල්ලාහු අලෛහිව සල්ලම්) තුමාණෝ මෙසේ පැවැසූහ. "අල්ලාහ් සහ අවසාන දිනය විශ්වාස කරන්නේ කවුරුන්ද, ඔවුහු මහ්රම් කෙනෙකු නොමැති කාන්තාවක් සමඟ තනිව නොසිටිය යුතුය. මන්ද ඔවුන්ගෙන් තුන්වැන්නා ෂයිතාන් වන බැවින්ය." අල්ලාහ්ගේ දූතයාණන් (සල්ලල්ලාහු අලයිහි වසල්ලම්) ප්රකාශ කළ බවට ඉබ්නු ආමර් බින් රබීආ(රළියල්ලාහු අන්හු) විසින් දැනුම් දෙන හදීසයක මෙසේ සඳහන් වේ. පිරිමියෙකු තමන්ට අනුමත නැති කාන්තාවක් සමඟ තනිව නො සිටිය යුතුය. මක්නිසාද මහරම් නැති විටක ඔවුන්ගෙන් තුන් වැන්නා ෂයිතාන් වන බැවින්ය.

අල් මජිද් 'අල් මුන්තකා'හි සඳහන් කර ඇත්තේ: ඒ දෙකම අහ්මද් තුමා විසින් වාර්තා කර ඇති බවයි. ඉබ්නු අබ්බාස් සතු බුහාරි හා මුස්ලිම් විසින් වාර්තා කළ එම හදීසය පෙර සඳහන් වුනි.

ඉමාම් අල්-ෂව්කානි 'නයිලුල් අවතාර්'හි (6/120) හි මෙසේ පවසා ඇත: තවද මහ්රම් නොවන පිටස්තර කාන්තාවක් සමඟ තනිව සිටීම තහනම් බව විද්වතුන් විසින් ඒකමතිකව එකඟ වී ඇත. අල් හාෆිල්තුමා ද 'අල්ෆත්හ්' හි එසේ පවසා ඇත. ඉහත හදීසයේ තහනම් කිරීමට හේතුව ඔවුන් දෙදෙනා සමග තුන් වැන්නා ෂයිතාන් වීමය. ඇය මහ්රම් අයකු සමග සිටින්නී නම්, එවිට පිටස්තර කෙනෙකු සමග සිටීමට අවසරය ඇත. එය ඔහු සමග සිටීම හේතුවෙන් පාපයේ වැටීම වළක්වා ගත හැකි බැවිනි.

සමහර කාන්තාවෝ සහ ඔවුන්ගේ භාරකරුවෝ විවිධ ආකාරයට පිට අය සමග තනිව සහ මිශ්රව සිටීම ගැන නොසැලකිල්ලෙන් සිටිති. එනම්, කාන්තාව තම ස්වාමි පුරුෂයාගේ ඥාතියෙකු සමඟ තනිව සිටීම සහ ඔහු ඉදිරියේ ඇගේ මුහුණ නිරාවරණය කිරීම උදාහරණ ලෙස පෙන්වා දියහැක. මෙසේ තනිව සිටීම අනෙක් දෙයට වඩා භයානක ය. නබි (සල්ලල්ලාහු අලයිහි වසල්ලම්) තුමාණන් මෙසේ පවසා ඇත. කාන්තාවන් අතරට පිවිසීම ගැන මම නුඹලාට අවවාද කරමි යැයි පැවසූහ. එවිට අන්සාර්වරුන් අතුරින් වූ මිනිසෙකු අල්ලාහ්ගේ දූතයාණනි! බිරියගේ සහෝදරිය පිළිබඳ ඔබ කුමක් සිතන්නෙහි ද? (යැයි විසුවේය) (එවිට) ‘හම්වු’ නොහොත් බිරියගේ සහෝදරිය මරණය (තරම් භයානක) වේ යැයි එතුමා පැවසුහ. හම්වු යන්නෙහි තේරුම: සැමියාගේ සහෝදරයාය, ඔහු මහ්රම් නොවන කතක් සමඟ තනිව සිටීම නබි තුමාණන් පිළිකුල් කළ බවක් පෙන්නුම් කරයි.

අල්-හෆිස් ඉබ්නු හජර් 'ෆත්හ් අල්-බාරි'හි (9/331) හි මෙසේ පැවසීය: අල් නවවී තුමා මෙසේ පවසයි: අල්අහ්මා (හම්වු හි බහු වචනයයි) යනු කාන්තාවකගේ ස්වාමිපුරුෂයාගේ සමීප ඥාතීන් යනුවෙන් විද්වතුන් ඒකමතිකව පිළි ගෙන තිබේ. එනම් ඔහුගේ පියා, මාමා, සහෝදරයා, ඥාතී පුත්රයා, ඥාතී සහෝදරයා වැනි අය වේ. මෙම හදීසයෙහි අර්ථය වන්නේ කාන්තාවකගේ ස්වාමිපුරුෂයාගේ පියවරු සහ පුතුන් හැර අන් අය වේ. ඇයට ඔවුන් සමඟ තනිව සිටීමට අවසර ඇති අතර ඔවුන් මරණය (අනතුරක්) ලෙස විස්තර නොකෙරේ. තවද එතුමා මෙසේ පැවසුවේය: සමාජය සැහැල්ලුවෙන් සිතීම සිරිතකි. එනම්, ස්වාමිපුරුෂයාගේ සහෝදරයා තම සහෝදරයාගේ බිරිඳ සමඟ තනිවම සිටීමට හැක යැයි සිතීම. එබැවින් එය මරණයට සමාන කර ඇති අතර එය වළක්වා ගැනීම වඩාත් සුදුසු වේ. නිමි.

අෂ්-ෂව්කානි 'නයිලුල් අවතාර්'හි (6/122) හි මෙසේ පැවසුවේය: ඔහුගේ කියමනට අනුව: අල් හුමුවු යනු මරණයයි. එනම් සෙසු අයට වඩා අධික ලෙස ඔහු ගැන බියවීමය. මෙසේ අනුමැතිය නොලද අය සමග මිශ්ර වී සිටීම මරණයට ඇති බියට වඩා දැඩිය. නිමි.

එබැවින් මුස්ලිම් කාන්තාවනි!, අල්ලාහ් ට බිය බැතිමත් වන්න. මේ කාරණය ගැන මිනිසුන් සැලකිලිමත් නොවූව ද, මේ සම්බන්ධයෙන් ඔබ සැලකිලිමත් වන්න. මන්ද, වැදගත් වන්නේ ඉස්ලාමයේ නීතියේ ආධිපත්යය මිස ජනතාවගේ සිරිත් විරිත් නොවේ.

සමහර කාන්තාවන් සහ ඔවුන්ගේ භාරකරුවන් කාන්තාවක් තනිවම මෝටර් රථයක නැගී එහි රියැදුරු සමඟ ගමන් කිරීම ගැන සැලකිලිමත් නොවෙති. එනමුත් මෙසේ තනිව ගමන් කිරීම තහනම් කරන ලද ක්රියාවකි.

සවුදි අරාබියේ ප්රධාන විද්වතෙකු වන ෂෙයික් මුහම්මද් බින් ඉබ්රාහිම් ආල්-ෂෙයික්, අල්ලාහ් ඔහුට අනුකම්පා කරත්වා, 'මජ්මූ අල්-ෆතාවා'හි (10/52) මෙසේ සඳහන් කරයි: දැන් පිටස්තර කාන්තාවක් රිය පදවාගෙන යන මෝටර් රථ හිමිකරුවෙකු සමඟ මහ්රම් කෙනෙකු නොමැතිව තනිව ගමන් කරයි. මෙයින් අයහපතක් සිදුවුවත්, නොවුවත්, මෙය වැළැක්විය යුතු නපුරු ක්රියාවකි. කාන්තාවක් එළිපිට සුරූපීව සිටියද අභ්යන්තරව අලංකරනය වී සිටියද, ආගම් දහම් අතින් සහ ආත්මභාවය දුර්වල පිරිමියෙක් කාන්තාවන් සමග තනිව ගමන් කිරීමට කැමැත්තක් දක්වයි. එබැවින් නබි තුමාණන් (සල්ලල්ලාහු අලයිහි වසල්ලම්) මෙසේ දේශනා කළේය. "පුරුෂයෙක් ස්ත්රියක සමඟ තනිව නොසිටිය යුතුය. මන්ද, ඔවුන් දෙදෙනා අතර තුන්වැන්නා ෂයිතාන්ය." ඇය මහරම් නොවන පිරිමියෙකු විසින් පදවන මෝටර් රථයේ නැග ගමන් කිරීම යනු, ඇය පිට පිරිමියෙකු සමඟ නිවසක තනිවම සිටීමට වඩා මෙහි ඇති අනතුර අති විශාලය. මක්නිසාද යත් ඔහුට ප්රදේශයෙන් ප්රදේශයට හෝ ප්රදේශයෙන් පිටතට ඕනෑම තැනකට ඇයගේ කැමැත්ත සහිතව හෝ කැමැත්තෙන් තොරව හෝ ඇය සමඟ යාමට හැකි වන අතර, එහි ප්රතිවිපාකය මහරම් නොවන පිරිමියෙක් සමඟ තනිව සිටීම නිසා ඇති වන ලොකුම අකුසලයයි. නිමි.

හුල්වා හෙවත් මිශ්රවීම මඟ හැරීම සඳහා සිටිය හැකි පුද්ගලයා වැඩිහිටියෙකු විය යුතු අතර ඒ වෙනුවට දරුවෙකු සිටීම ප්රමාණවත් නොවේ. සමහර කාන්තාවන් සිතන්නේ ඇය සමඟ දරුවෙකු සිටි පමණින්ම හෝ ඒ දරුවා ඈ සමග රැගෙන ගිය විටක හුල්වා තත්වයෙන් ඇය මිදෙන බවයි. එය වැරදි සිතිවිල්ලකි.

ඉමාම් අන්-නවවී (9/159) හි මෙසේ පැවසුවේය: මහරම් නොවන පිටස්තර කාන්තාවක් සමඟ පිරිමියෙක් ඔවුන් දෙදෙනා සමග තුන්වැනි පුද්ගලයෙකු නොමැතිව තනිවම සිටීම විද්වතුන්ගේ සම්මුතිය අනුව තහනම් කරුණකි. එසේම එවැනි දෙදෙනෙකු සමග (තුන්වැන්නෙකු ලෙස) ලැජ්ජා හැඟීම නොදන්නා (කිසිවක් අවබෝධ කරගැනීමට නොහැකි) කුඩා දරුවෙකු සිටිය ද ඔවුන් දෙදෙනා තනිවීම යන කරුණ ඉවත් නොවේ.

සමහර කාන්තාවන් සහ ඔවුන්ගේ භාරකරුවන් ඇයට ප්රතිකාර කිරීමේ අවශ්යතාව ඇතැයි යන මුවාවෙන් කිසිදු මහරම් අයකු නොමැතිව කාන්තාවක් වෛද්යවරයා වෙතට යොමු කිරීම ගැන සැලකිලිමත් නොවෙති. මෙය මහත් සේ හෙළාදැකිය යුතු කරුණක් වන අතර විශාල අනතුරකි. මෙය පිළිගැනීමට හෝ නිහඬව ඉවසීමෙන් සිටීමට හෝ හැකි කරුණක් නොවේ.

'මජ්මූ අල්-ෆතාවා'හි (10/13) ෂෙයික් මුහම්මද් බින් ඉබ්රාහිම් (රහිමහුල්ලාහ්) මෙසේ පවසයි: ඕනෑම තත්ත්වයක දී මහ්රම් නොවන පිටස්තර කාන්තාවක් සමඟ හුදෙකලා වීම තහනම්ය. ඇයට ප්රතිකාර කරන වෛද්යවරයෙකුට වුව ද මෙම නීතියෙහි වෙනසක් නැත. ඊට හේතුව හදීසයෙහි මෙසේ සඳහන් වී ඇති බැවිනි. “පිරිමියෙකු ස්ත්රියක් සමග තනිව නොසිටිය යුතුය. එවිට ඔවුන් දෙදෙනාගෙන් තුන්වැන්නා ෂයිතාන් වේ.” එබැවින් ඇගේ ස්වාමිපුරුෂයා හෝ ඇගේ මහරම්වූ පිරිමි ඥාතියෙකු හෝ (ප්රතිකාර කරන විට) ඇය සමඟ සිටිය යුතුය. ඇගේ ඥාතියෙක් සූදානම් නොමැති නම් ඥාතී කාන්තාවන් ඉදිරිපත් විය යුතුය, කිසිවෙකු නොසිටින තත්වයකදී රෝගියාව ප්රමාද කළ නොහැකි තරමේ අනතුරක් නම්, එවිට හෙදියන්ගේ හෝ එවැනි අයගේ පැමිණීම අවශ්ය වේ. මෙය තනිවම සිටීමේ අවස්ථාව මඟහැරීමේ පියවරකි. නිමි.

ඒ හා සමානව, වෛද්යවරයකු පිටස්තර කාන්තාවක් සමඟ තනිව සිටීම, ඇය ඔහුගේ මිතුරු වෛද්යවරියක හෝ වේවා හෝ හෙදියක් හෝ වේවා අනුමත නොවන්නේය. එමෙන්ම අන්ධ ගුරුවරයෙක් හෝ වෙනත් අයෙක් සිසුවියක සමඟ තනිව සිටීම හෝ වේවා කාන්තා ගුවන් සේවිකාවක් මගීන් සමග මිශ්රව සිටීම හෝ වේවා අනුමත නොවන්නේය. මේ සියලු කරුණු ශිෂ්ඨාචාරය සහ සමාජ වෙනස් වීම යන නමින් කියා ගන්නා අයගේ අන්ධ අනුකරණයන් වේ. ඉස්ලාම් නීතිය පිළිබඳ අවබෝධයක් නැති බැවින්, නවීන සදාචාරයේ නාමයෙන් මිනිසුන් නොසැලකිලිමත් ලෙස මේවා අනුගමනය කරති. සර්වබලධාරි අල්ලාහ් හැර වෙනත් ශක්තියක් හෝ බලයක් හෝ නොමැත.

පිරිමියෙකුට තම නිවසේ සේවය කරන ගෘහ සේවිකාවක් සමඟ තනිව සිටීමට හෝ නිවස හිමි කාන්තාවකට සේවකයෙකු සමඟ තනිව සිටීමට හෝ අවසර නැත. සේවක සේවිකාවන්ගේ මෙවැනි සමාජ දූෂිත ගැටලුව මේ වකවානුවේදී බොහෝ දෙනෙකුට පීඩා සහගත බරපතල ගැටලුවක් බවට පත් වී ඇත. මෙයට හේතුව කාන්තාවන් අධ්යයන කටයුතුවල නිරත වීම සහ නිවසින් බැහැරව රැකියාවන්හි නිරත වීමයි. එබැවින් දේවත්වය විශ්වාස කරන කාන්තා හා පිරිමි දෙපක්ෂයම මේ පිළිබඳව ප්රවේසම් විය යුතු අතර සමාජ පරිහානියට තුඩු දෙන ගති පැවැතුම් වලින් වැළැකී සිටිය යුතුයි.

අවසාන වශයෙන්: කාන්තාවක් තම මහරම් නොවන පිරිමියෙකුට අතට අත දී සතුට හුවමාරු කර ගැනීම තහනම්ය:

'අල් බුහූස් අල් ඉල්මිය්යා වල් ඉෆ්තා වද් දඃවා වල් ඉර්ෂාද්' නම් ආයතනවල ප්රධානියා වන ෂෙයික් අබ්දුල් අසීස් බින් අබ්දුල්ලා බින් බාස්, (රහිමහුල්ලාහ්), ඉස්ලාමීය දඃවා මුද්රණාල පදනම විසින් මුද්රණය කරන ලද 'ෆතාවා' හි (1/185) මෙසේ ප්රකාශ කළේය: "මහරම් නොවන කාන්තාවන් ඔවුන් තරුණ හෝ මහලු හෝ වේවා, තරුණයෙකුට හෝ මහලු පුරුෂයෙකුට හෝ අතට අත දීම කිසිසේත් අනුමත කළ නොහැක. කුමක් නිසාද යත්, මෙසේ කරන සෑම කෙනෙකු හරහා සමාජය ගුණ ධර්ම අතින් පරිහානියට පත් වීමේ අනතුර නිසාවෙනි." අල්ලාහ්ගේ දූතයාණෝ (සල්ලල්ලාහු අලයිහි වසල්ලම්) මෙසේ දේශනා කළහ. "මම කාන්තාවන්ට අතට අත නොදෙමි." ආඉෂා (රළියල්ලාහු අන්හා) තුමිය මෙසේ දන්වා සිටියි. "අල්ලාහ්ගේ දූතයාණන්ගේ දෑත කිසි විටෙක ස්ත්රියක් ස්පර්ශ නොකළ අතර ඔවුහු නබි තුමාණන්ට බයිඅත් හෙවත් පක්ෂපාතී බව ප්රකාශ කළේ වාචිකව දිවුරුම් දීමෙන්ය." (අතට අත දීම සම්බන්ධයෙන්) දක්නට ඇති නබි වදන් පොදු අර්තයක් ලබා දී ඇති අතර මෙවැනි පිළිවෙත් ෆිත්නා හෙවත් අධාර්මික ක්රියා කෙරෙහි යොමු කරන බැවින්, දෑත් ආවරණය කර හෝ නොමැතිව හෝ කෙනෙකු සමඟ අතට අත දීම අතර වෙනසක් නැත. නිමි.

ෂෙයික් මුහම්මද් අල්-අමීන් අල්-ෂන්කීතී (රහිමහුල්ලාහ්) එතුමාගේ අර්ථ කථනක් වන 'අද්වා අල්-බයාන්' හි (6/602, 603) මෙසේ පැවසීය: පිරිමියෙකුට මහ්රම් නොවන කාන්තාවක් සමඟ අතට අත දීමට අවසර නැති බව දැන ගන්න. ඔහුගේ අවයවයන් හරහා ඇගේ සිරුරේ කිසිම කොටසක් ස්පර්ශ කිරීමට ඔහුට අවසර නැත. ඒ සඳහා සාක්ෂි බොහෝමයක් ඇත:

පළමුව: නබි (සල්ලල්ලාහු අලෛහිව සල්ලම්) තුමාණන්ගේ ප්රකාශ මෙය ගැන මෙසේ සනාථ කර ඇත. "මම කාන්තාවන්ට අතට අත නොදෙමි" සකල කීර්ති හිමි අල්ලාහ් අල්කුර්ආනයේ මෙසේ පවසයි. "අල්ලාහ් හා අවසන් දිනය අපේක්ෂා කරන, අල්ලාහ් ව අධික වශයෙන් මෙනෙහි කරන අයට සැබැවින්ම අල්ලාහ්ගේ දූතයාණන් තුළ අලංකාර ආදර්ශයක් විය."

එබැවින් අප විසින් කාන්තාවන්ට අතට අත දීමෙන් වැළැකී සිටිය යුතුය. කුමක් නිසාදයත් අප විසින් නබි තුමාණන්ගේ ආදර්ශය අනුගමනය කළ යුතුය. තවද මේ සම්බන්ධයෙන් අප විසින් සූරත් අල්-හජ් හි ඉහ්රාම් සම්බන්ධයෙන් පැහැදිලි කරන කරුණුවලදී සහ සූරතුල් අහ්ඃසාබ් හි හිජාබය සම්බන්ධයෙන් ඉදිරිපත් කර ඇති කරණු වලදී විස්තර කර ඇත්තෙමු. නබි තුමාණන් "මම ස්ත්රීන්ට අතට අත නොදෙමි" යනුවෙන් ප්රකාශ කර ඇත. එමෙන්ම මේ සඳහා කදිම නිදසුනක් ඇත. එනම්, නබි තුමාණන්ට පක්ෂපාතීත්වය සඳහා ප්රතිඥා දෙන අවස්ථාවේදී නබි තුමාණන්ට කාන්තාවන් විසින් අතට අත නොතබා වාචිකව පක්ෂපාතිත්වය ප්රකාශ කර තිබීමය. එබැවින් මෙම කාරණය පිරිමියෙකු විසින් ස්ත්රිය සමඟ අතට අත නොතබන බවට සහ ඔහුගේ ශරීරයේ ඇති කුමක් හෝ අවයවයකින් ඇගේ සිරුර ස්පර්ශ කිරීමට ද අවසර නැති බව පැහැදිලි සාක්ෂියකි. ස්පර්ශය අතරින් සැහැල්ලුම ස්පර්ශය දෑත මත දෑත තැබීමයි. නබි (සල්ලල්ලාහු අලයිහි වසල්ලම්) තුමාණන්ගේ චරිතාපදානය දෙස බලන විට එතුමාගේ ජීවිතයේ හැරවුම් ලක්ෂණයක් වූ අවස්ථාවන් අතර එතුමාට (බයිඅත්) හෙවත් පක්ෂපාතීත්වය (පොරොන්දු) ලබා දෙන අවස්ථාව විශේෂයෙන් සඳහන් කළ හැක. එවැනි අවශ්ය වේලාවට පිරිමින්ට අතට අත දී, කාන්තාවන්ගේ දෑත් එතුමාගේ දෑත මත නොතබා එයින් වැළකී සිටින්නේ නම්, මෙයින් සරලව ඇඟවෙන්නේ පිට කාන්තාවන් අංශු මාත්රයකින් හෝ ස්පර්ශය කිරීමට අවසර නැති බවයි. එබැවින් කිසිවෙකු නබි (සල්ලල්ලාහු අලයිහි වසල්ලම්) තුමාණන්ට මේ සම්බන්ධයෙන් පරස්පර නොවිය යුතුය. මන්ද මුහම්මද් නබි තුමාණන් (සල්ලල්ලාහු අලයිහි වසල්ලම්) එතුමාගේ වචන, ක්රියාව සහ අනුමත කළ වාර්තාවන් සමස්ත මුස්ලිම් සමාජයේම ව්යවස්ථාදායකය වන බැවිනි.

දෙවන කාරණය: මුළු කාන්තාවම ආවරණය විය යුතු සම්පතක් බව අප විසින් ඉහත සඳහන් පරිච්ඡේදවලදී විස්තර කර ඇත. එබැවින් කාන්තාවක් විසින් ඇගේ ශරීරය ආවරණය කළ යුතුය. තවද සමාජ පරිහානියට වැටෙනු ඇතැයි යන බිය නිසා පිරිමි, කාන්තා දෙපාර්ශ්වයටම බැල්ම පහතට හෙළන්න යනුවෙන් ඉස්ලාමය විසින් උගන්වා ඇති බැවින් ශරීරයක් ශරීරයට ස්පර්ශ කිරීම, රාගය ශක්තිමත් කිරීමට ඇති ප්රවණතාවය වඩා ශක්තිමත් වන බවට කිසිම සැකයක් නැත. එය නෙතින් නෙත ගැටීමට වඩා කාමමිත්යාචාරයට වඩාත් සමීප බව කිව යුතුය. මෙහි ඇති අවධානම සහ මෙවැනි නපුරෙන් දුරස්වීමේ සහ ඈත් වීමේ අවශ්යතාවය බුද්ධිමත් මෙන්ම සාධාරණ කරුණකැයි සෑම පුද්ගලයෙක්ටම හොඳින් වැටහෙනු ඇත.

තෙවන කාරණය: මෙවැනි අවස්ථාවක දේව භිය බැති කම අඩු නිසා, දේව විශ්වාසය නැතිවීම නිසා සහ සිත දමනය කිරීමේ හැකියාව නැති නිසා මෙවැනි ස්පර්ශවීම් හේතු කොටගෙන ආගන්තුකයෙකු කෙරෙහි සිත් සතන් ඇදී යාමට ඉඩ කඩ අධිකය. සමාජයේ සමහර පිරිස් අපට මෙසේ කියා සිටිති. සමහර ස්වාමිපුරුෂයන් තමන්ගේ තොල් පෙති දෙක තම බිරිඳගේ සහෝදරියගේ තොල් පෙති සමග යා කර සිප ගන්නා බවත්, (ඔවුන් එම සිපගැනීම වැදගත් සමාජ සදාචාරයක් ලෙස හඳුන්වන බවත්ය.) මේවා විද්වතුන්ගේ සම්මුතියෙන් තහනම් කර ඇත. විද්වතුන් පවසන්නේ ඔවුනට සලාම් කියා සුබ පතන ලෙසයි. ඉහත කරුණුවලින් ඔවුන් අදහස් කරන්නේ: සමාජය ෆිත්නා හෙවත් දූෂිත හැසිරීම් රටාවෙන් මෙන්ම සධාචාරාත්ම නොවන ක්රියාවන් සහ ඒවාට තුඩු දෙන දෙයින් අපව ආරක්ෂා කර ගැනීමේ අවශ්යතාවය ගැනයි.මේ අතරින් වඩාත් අනතුරුදායක හේතු වලින් එකක් වන්නේ පිරිමි හා කාන්තාව ශාරීරික වශයෙන් ස්පර්ශය වීමට ඇති මාර්ගයයි. එබැවින් ඒ සඳහා ඇති බොරු හේතුව සහ මාර්ග අවහිර කළ යුතුය. නිමි.

අවසාන වශයෙන් මෙසේ පවසමි.

දේවත්වය විශ්වාස කරන පුරුෂයන් හා කාන්තාවන් වන ඔබ සැමට අල්ලාහ්ගේ වචනවලින් ඔහුගේ අවවාදය මම මතක් කරමි. "දේවත්වය විශ්වාස කරන පුරුෂයින්හට ඔවුන්ගේ බැල්ම පහත හෙළන මෙන්ද, ඔවුන්ගේ ලිංගේන්ද්රියන් ආරක්ෂා කරන මෙන් ද නුඹ පවසනු. එය ඔවුනට වඩාත් පිවිතුරු වනු ඇත. නියත වශයෙන්ම අල්ලාහ් නුඹලා සිදු කරන දෑ පිළිබඳ ව අභිඥානවන්තය." එමෙන්ම දේවත්වය විශ්වාස කළ කාන්තාවන්හට ඔවුන්ගේ බැල්ම පහත හෙළන මෙන් ද ඔවුන්ගේ ලිංගේන්ද්රියන් ආරක්ෂා කරන මෙන්ද ඔවුන්ගේ අලංකාරයන් එහි මතු පිටින් පෙනෙන දෑ හැර වෙනෙකක් හෙළි නොකරන මෙන් ද ඔවුන්ගේ ළැම පැති මතට ඔවුන්ගේ මොට්ටැක්කිලිය දමන මෙන් ද නුඹ පවසනු. තවද ඔවුන්ගේ අලංකාරය ඔවුන්ගේ ස්වාමිපුරුෂයින්ට හෝ ඔවුන්ගේ පියවරුන්ට හෝ ඔවුන්ගේ ස්වාමිපුරුෂයින්ගේ පියවරුන්ට හෝ ඔවුන්ගේ දරුවන්ට හෝ ඔවුන්ගේ ස්වාමිපුරුෂයින්ගේ දරුවන්ට හෝ ඔවුන්ගේ සහෝදරයින්ට හෝ ඔවුන්ගේ සහෝදරයින්ගේ දරුවන්ට හෝ ඔවුන්ගේ කාන්තාවන්ට හෝ ඔවුන්ගේ දකුණත් හිමිකරගත් අයට හෝ පිරිමින් අතුරින් කාමාශාවකින් තොර ව උපස්ථාන කරන්නන්ට හෝ ස්ත්රීන්ගේ රහස්ය පෙදෙස් ගැන (කාමාශාවක්) මතු නොවන දරුවන්ට මිස වෙනත් කිසිවකුට හෙළි නොකළ යුතුය. තවද ඔවුන්ගේ අලංකාරයෙන් ඔවුන් සඟවන දෑ දන්වා සිටිනු පිණිස ඔවුන්ගේ පාද (ශබ්ද නගන සේ) නොගැසිය යුතුය. තවද, අහෝ දේවත්වය විශ්වාස කළවුනි! නුඹලා ජය ලැබිය හැකි වනු පිණිස නුඹලා සියල්ල පශ්චාත්තාප වී අල්ලාහ් වෙත නැඹුරු වනු.

සියලු ප්රශංසා සියලු ලෝකයන්හි පරමාධිපති වූ අල්ලාහ් සතුය. තවද අපගේ නබි මුහම්මද් කෙරෙහිත් එතුමාගේ පවුලේ උදවිය හා එතුමාගේ මිතුරන් යන සියලු දෙනා කෙරෙහිත් ශාන්තිය හා සමාදනය උදා වේවා.