नबी (सल्लल्लाहु अलैहि वसल्लम) ले नक्कली कपाल जोड्ने तथा जोड्न लगाउने र शरीरमा गोदना (ट्याटु) खोप्ने तथा खोपाउने महिलाहरूलाई अभिशाप दिनुभएको छ।

इब्न हजरले भन्नुभएको छ: "यस सन्दर्भमा निषेध गरिएको कुरा भनेको कपालमा अरू कुनै कपाल जोड्नु हो। तर यदि कोही महिलाले आफ्नो कपालमा कपालबाहेक अन्य कुनै वस्तु—जस्तै कपडाको टुक्रा वा अन्य यस्तै सामग्री—गाँस्छिन् वा जोड्छिन् भने, त्यो यस निषेधको दायराभित्र पर्दैन।"

पाप कार्यमा सहयोग गर्नु निषिद्ध (हराम) छ।

अल्लाहले सृजना गर्नुभएको प्राकृतिक स्वरूपमा परिवर्तन गर्न निषेध गरिएको छ, किनभने यस्तो परिवर्तनमा वास्तविक स्वरूपलाई बदलिने तथा जालसाजी र छलकपट गर्ने कार्य हुन्छ।

सामान्यतया, अल्लाह र उहाँका रसूल (सल्लल्लाहु अलैहि वसल्लम) द्वारा अभिशप्त व्यक्तिहरूलाई अभिशाप दिन अनुमति छ।

वर्तमान समयमा विग (नक्कली कपाल) लगाउनु पनि निषेधित कपाल जोड्ने कार्य (अल-वस्ल) अन्तर्गत पर्दछ। काफिरहरूको नक्कल हुनुका साथै यसमा छल तथा धोकाधडी हुने भएकाले यो कार्य निषेधित छ।

इमाम अल-खत्ताबीले भन्नुभएको छ: "यी कार्यहरूका सम्बन्धमा कडा चेतावनी आउनुको मुख्य कारण यसमा अन्तर्निहित छल-कपट र धोकाधडी नै हो। यदि यीमध्ये कुनै एउटा कार्यमा पनि छुट दिइएको भए, त्यो अन्य प्रकारका छल-कपट र धोकाधडीलाई समेत वैध ठहर्‍याउने आधार बन्ने थियो। साथै, यी कार्यहरूमा अल्लाहले प्रदान गर्नुभएको प्राकृतिक स्वरूप तथा शारीरिक बनावटमा परिवर्तन गर्ने तत्त्व पनि छ। इब्न मसऊद (रजिअल्लाहु अन्हु) को हदीसमा उल्लिखित ‘अल्लाहको सृष्टि परिवर्तन गर्नेहरू’ भन्ने वचनले यसै कुरातर्फ सङ्केत गर्दछ। अल्लाह नै सर्वज्ञ हुनुहुन्छ।"