Encyclopedia of Prophetic Hadiths

((هندی خودێیه‌ غیره‌تێ دبه‌ت، و هندی باوه‌رداره‌ غیره‌تێ دبه‌ت، غیره‌تا خودێ ئه‌وه‌ كو باوه‌ردار ئه‌وێ كریارێ ئه‌نجام بده‌ت یا خودێ ل سه‌ر وی حه‌رام كری)).

هنده‌ك كه‌س ژ صه‌حابییێن پێغه‌مبه‌ری (صه‌لات و سه‌لامێن خودێ ل سه‌ر بن) هاتن و پرسیار ژ وی كر كو: هنده‌ك تشت دهێنه‌ سه‌ر دل و ده‌روونێ مه‌ كو ئێك ژ مه‌ ب مه‌زن دبینیت ب ده‌ڤێ خۆ بیژیت و ده‌ربڕینێ ژێ بكه‌ت، ئینا پێغه‌مبه‌ری (صه‌لات و سه‌لامێن خودێ ل سه‌ر بن) گۆت: ((ئه‌رێ ب ڕاستی هه‌وه‌ (ئه‌و تشت د دل و ده‌روونێ خۆدا) دیتینه‌؟)) گۆتن: به‌لێ، گۆت: ((ئه‌ڤه‌ ڕاستی و دروستییا باوه‌رییێیه‌)).

((شه‌یتان دێ هێته‌ ده‌ڤ ئێك ژ هه‌وه‌ و دێ بێژیت: كێ ئه‌ڤ تشته‌ ئافراندییه‌؟ كێ ئه‌ڤ تشته‌ ئافراندییه‌؟ هه‌تا دبێژیت: پا كێ خودایێ ته‌ ئافراندییه‌؟ ڤێجا ئه‌گه‌ر مرۆڤ گه‌هشته‌ ڤێرێ؛ وی ده‌می بلا خۆ ب خودێ بپارێزیت و بابه‌تی ب دویماهیك بینیت)).

((هوین زێده‌گاڤییێ د په‌سنكرنا مندا نه‌كه‌ن و من ژ ئاستێ من مه‌زنتر لێ نه‌كه‌ن وه‌كی فه‌ڵه‌یان زێده‌گاڤی د عیسایێ كوڕێ مه‌ریه‌مێدا كری، چونكی ئه‌ز ب تنێ عه‌بدێ خودێ مه‌، له‌وا هوین بێژین: عه‌بدێ خودێیه‌ و پێغه‌مبه‌رێ وییه‌)).

ئه‌نه‌سێ كوڕێ مالكی (خودێ ژێ ڕازی بیت) بۆ مه‌ ڤه‌گێڕا كو زه‌لامه‌كی گۆت: ئه‌ی پێغه‌مبه‌رێ خودێ؛ (ل ڕۆژا قیامه‌تێ) چاوا مرۆڤێ كافر دێ ل سه‌ر ڕویێ خۆ هێته‌ حه‌شركرن؟ گۆت: ((ئه‌رێ ما ئه‌و خودایێ د دونیایێدا وه‌ ل وی كری ل سه‌ر دوو پێیان بڕێڤه‌ بچیت نه‌شێت ل ڕۆژا قیامه‌تێ وه‌ ل وی بكه‌ت ل سه‌ر ڕویێ خۆ بڕێڤه‌ بچیت؟))، قه‌تاده‌ی گۆت: به‌لێ ب خودێ دشێت.

من گوھ ل پێغه‌مبه‌رێ خودێ (صه‌لات و سه‌لامێن خودێ ل سه‌ر بن) بوو دگۆت: ((خودایێ مه‌زن گۆت: كوڕێ ئاده‌می؛ مسوگه‌ر هندی تو دوعا ژ من بكه‌ی و داخوازێ ژ من بكه‌ی و ته‌ هیڤی ب دلۆڤانییا من هه‌بن؛ ئه‌ز دێ گونه‌هێن ته‌ ژێبه‌م و ئه‌ز گرنگییێ ب گونه‌هێن ته‌ ناده‌م خۆ چه‌ند د مه‌زن ژی بن. كوڕێ ئاده‌می؛ مسوگه‌ر ئه‌گه‌ر گونه‌هێن ته‌ بگه‌هنه‌ عه‌ورێن ئه‌سمانی، پاشی تو داخوازێ ژ من بكه‌ی ئه‌ز گونه‌هێن ته‌ ژێببه‌م؛ ئه‌ز دێ گونه‌هێن ته‌ ژێبه‌م و ئه‌ز گرنگییێ ب گونه‌هێن ته‌ ناده‌م خۆ چه‌ند د مه‌زن ژی بن. كوڕێ ئاده‌می؛ مسوگه‌ر ئه‌گه‌ر تو ب پڕی ئه‌ردی ب گونه‌هڤه‌ بهێیه‌ ده‌ڤ من و پاشی بگه‌هییه‌ من و ته‌ چ شریك و هه‌ڤال بۆ من دروست نه‌كربن؛ ئه‌ز دێ ب پڕی ئه‌ردی لێبوورین و ژێبرن بۆ وان گونه‌هانڤه‌ هێمه‌ ده‌ڤ ته‌)).

زه‌لامه‌ك هاته‌ ده‌ڤ پێغه‌مبه‌ری (صه‌لات و سه‌لامێن خودێ ل سه‌ر بن) و گۆت: ئه‌ی پێغه‌مبه‌رێ خودێ؛ ئه‌و هه‌ردوو تشتێن مسوگه‌ردكه‌ن چنه‌؟ گۆت: ((هه‌ر كه‌سێ بمریت و وی چ شریك و هه‌ڤال بۆ خودێ په‌یدا نه‌كربن؛ دێ چیته‌ به‌حه‌شتێ و هه‌ر كه‌سێ بمریت و وی شریك و هه‌ڤال بۆ خودێ په‌یدا كربن؛ دێ چیته‌ جه‌هنه‌مێ)).

((كه‌سێن توندڕه‌و تێچوون (ئه‌وێن زێده‌گاڤییێ د دینداری و گۆتن و كریاراندا دكه‌ن و گه‌له‌گ د ناڤ تشتیدا دچن)، سێ جاران گۆت)).