कुनै मुस्लिमको सम्पत्ति हडप्ने नियतले जसले झूटो कसम खान्छ, ऊ अल्लाहसामु यस अवस्थामा उपस्थित हुनेछ कि अल्लाह ऊसँग क्रोधित हुनुहुनेछ।

नबी (सल्लल्लाहु अलैहि वसल्लम) ले अल्लाहको नाममा जानीजानी झुटो कसम खाएर अरू कसैको सम्पत्ति वा धन हडप्ने कार्यप्रति कडा चेतावनी दिनुभएको छ; किनकि त्यसो गर्ने व्यक्तिले अल्लाहलाई यस्तो अवस्थामा भेट्नेछ कि अल्लाह ऊमाथि अत्यन्त क्रोधित हुनुहुनेछ। यसै सन्दर्भमा अशअस बिन कैस (रजिअल्लाहु अन्हु) वर्णन गर्नुहुन्छ कि नबी (सल्लल्लाहु अलैहि वसल्लम) ले यो कुरा त्यसबेला भन्नुभएको थियो, जब उहाँ र एक यहुदी व्यक्तिबीच जग्गाको स्वामित्वलाई लिएर विवाद भएको थियो, र उनीहरू न्यायका लागि नबी (सल्लल्लाहु अलैहि वसल्लम) सामु उपस्थित भए, तब उहाँले अशअसलाई भन्नुभयो: आफ्नो दाबी पुष्टि गर्न तिमीले ठोस प्रमाण पेस गर्नुपर्छ; यदि तिमी प्रमाण दिन असमर्थ भयौ भने, फैसलाका लागि तिम्रो प्रतिवादी (विपक्षी) को शपथ बाहेक अरू केही हुनेछैन।यो सुनेर अशअसले भन्नुभयो: हे अल्लाहका रसूल! यदि त्यसो हो भने त यहूदीले बिना कुनै संकोच झूटो कसम खाएर मेरो सम्पत्ति हडपेर लैजानेछ। त्यसै क्रममा अल्लाहले यस कुराको पुष्टि गर्दै पवित्र कुरआनमा यो आयत अवतरण गर्नुभयो, जसमा महान् अल्लाहले भन्नुभएको छ: {निःसन्देह जुन मानिसहरूले बेच्दछन्} र साट्छन् {अल्लाहसँग गरेको वाचा} र अमानत (धरोहर) पूरा गर्नका लागि मोमिनहरूलाई दिइएको उहाँको आज्ञालाई, {तथा आफ्ना कसमहरूलाई} उहाँको नाममा खाएका झुटा कसमहरूद्वारा यस संसारको क्षणभङ्गुर धन र {तुच्छ मूल्यको बदलामा}; {उनीहरूका लागि परलोकमा कुनै अंश रहनेछैन} र कुनै हिस्सा पनि हुनेछैन। {र अल्लाहले उनीहरूसँग कुरा गर्नुहुनेछैन}, यस्तो कुरा जसले उनीहरूलाई खुसी वा लाभ पुर्‍याओस्, बरु उनीहरूमाथि क्रोधित हुनुहुनेछ; {र प्रलयको दिन उनीहरूतर्फ हेर्नुहुनेछैन} दया र अनुग्रहको दृष्टिले; {र उनीहरूलाई शुद्ध पार्नुहुनेछैन} उत्तम प्रशंसाद्वारा, न त उनीहरूलाई क्षमा गरेर पाप तथा अशुद्धताहरूबाट पवित्र पार्नुहुनेछ; {र उनीहरूका लागि कष्टदायक सजाय हुनेछ}, उनीहरूले गरेका दुष्कर्महरूका कारण अत्यन्त पीडादायी यातना हुनेछ।