अल्लाहका रसूल (सल्लल्लाहु अलैहि वसल्लम) ले हामीलाई सातवटा कुराको आदेश दिनुभएको र सातवटा कुराबाट रोक्नुभएको छ।

रसूल (सल्लल्लाहु अलैहि वसल्लम) ले हामीलाई सातवटा कुराहरूको पालन गर्न आदेश दिनुभएको छ र सातवटा कुराहरूलाई निषेध गर्नुभएको छ; उहाँले आदेश दिनुभएका कुराहरू यस प्रकार छन्: पहिलो: बिरामीलाई भेट्न जानु। दोस्रो: जनाजाको पछि हिड्नु, जनाजाको नमाज एवं दफन (अन्त्येष्टि) मा सहभागी हुनु, तथा मृतकका निम्ति प्रार्थना गर्नु। तेस्रो: हाच्छिउँ गरेर 'अल्हम्दुलिल्लाह' भन्ने व्यक्तिका निम्ति प्रार्थना गर्दै उसलाई ‘यरहमुकल्लाह’ (अल्लाहले तिमीमाथि कृपा गरून्) भन्नु। चौथो: कसम (शपथ) खाने व्यक्तिको कसम पूरा गरिदिनु; अर्थात् यदि कसैले कुनै कुरामा कसम खान्छ र तपाईं त्यसलाई पूरा गर्न सक्षम हुनुहुन्छ भने गरिदिनुहोस्, ताकि उसले आफ्नो कसमको प्रायश्चित्त (कफ्फारा) व्यहोर्नु नपरोस्। पाँचौँ: अन्याय र दमनमा परेका पीडितको पक्षमा उभिएर तथा आफ्नो सामर्थ्यले भ्याएसम्म अत्याचारीलाई रोकेर उसको सहायता गर्नु। छैटौँ: भोज–भतेरको निमन्त्रणालाई स्वीकार ग, चाहे त्यो वलीमा (विवाह भोज) होस्, अकीका वा अन्य कुनै अवसर। सातौँ: सलाम गर्ने कार्यलाई व्यापक बनाउनु, यसको प्रचार-प्रसार गर्नु तथा सलामको जवाफ फर्काउनु। र निषेध गरिएको कुराहरू यस प्रकार छन्: पहिलो: सुनको औँठी धारण गर्नु तथा त्यसद्वारा सौन्दर्य-शृङ्गार गर्नु। दोस्रो: चाँदीका भाँडाकुँडाहरूमा पिउनु। तेस्रो: 'मयासिर' (रेशम निर्मित नरम गद्दाहरू) माथि बस्नु, जसलाई घोडा वा ऊँटको काठीमाथि राखिन्छ। चौथो: रेशम मिश्रित लिनेनबाट बनेको कपडा लगाउनु, जसलाई (अल-कस्सी) भनिन्छ। पाँचौँ: रेशमको पहिरन लगाउनु। छैटौँ: 'इस्तबरक' अर्थात् बाक्लो रेशमको कपडा लगाउनु। सातौँ: 'दीबाज' का वस्त्रहरू लगाउनु, जो रेशमका प्रकारहरूमध्ये सबैभन्दा विशिष्ट र मूल्यवान् मानिन्छ।