"हे मानिसहरू! अल्लाहसामु पश्चात्ताप गर र उहाँसँग क्षमा माग, किनकि म आफैँ पनि दिनमा सय पटक पश्चात्ताप गर्छु।"

प्रत्येक मानिस, उसको आस्थाको स्तर वा स्थान जस्तोसुकै भए तापनि, पवित्र र सर्वोच्च अल्लाहको सामीप्यमा फर्किनु र पश्चात्ताप (तौबा) मार्फत आफूलाई आत्मिक रूपले पुर्ण गर्नु आवश्यक छ। किनभने, कुनै पनि मानव अल्लाहको हक र अधिकार पूरा गर्ने सिलसिलामा हुन जाने कमी-कमजोरी वा त्रुटिहरूबाट मुक्त हुँदैन। अल्लाहको परम वाणी छ: 'हे आस्थावानहरू हो! तिमीहरू सबै जना अल्लाह समक्ष पश्चात्ताप गर।'

पश्चात्ताप भनेको निषेधित कार्य र पाप वा अनिवार्य उपासनाहरूमा कमी वा लापरबाही गरेकोमा गर्ने कार्य हो।

पश्चात्तापमा निष्ठा (इखलास) हुनु यसको स्वीकार्यताको अनिवार्य शर्त हो; अतः जसले अल्लाहका लागि नभई अन्य कुनै कारणले पाप त्याग्दछ, ऊ वास्तवमा पश्चात्तापी (तौबा गर्नेवाला) मानिँदैन।

इमाम नववीले भन्छन्: पश्चात्ताप स्वीकार हुनका लागि तीन सर्तहरू छन्: १- पाप तुरुन्तै छोड्नु। २- त्यो गरेकोमा गहिरो पछुतो गर्नु। ३- फेरि कहिल्यै त्यस्तो पाप नगर्ने दृढ संकल्प लिनु। तर यदि पाप अरू मानिससँग सम्बन्धित छ भने चौथो शर्त पनि थपिन्छ । ४- पश्चात्ताप मान्य हुनका लागि, पीडितलाई क्षति फिर्ता गर्नु वा उससँग क्षमा माग्नु आवश्यक छ।