Ad Nabiyaamã (Wẽnd pʋʋsg lɑ A tɩlgr be ɑ yĩngɑ) a yii tõnd nengẽ raar a yembre, tɩ tõnd yeele: Wẽnd Tẽn-tʋʋmã, ad tõnd bãnga d sẽn ningd foom sallem to-to ninga, la d na n pʋʋs-f-la wãn-wãnɑ?

Sahaabsã soka Nabiyaamã (Wẽnd pʋʋsg lɑ A tɩlgr be ɑ yĩngɑ) b sẽn na n pʋʋs-a to-to ninga, b sẽn bãng b sẽn sɑlld-a to-to ninga poore Attihɩyyaatã pʋgẽ: "Assalaamu Alayka Ayyʋhan Nabiyyʋ, wa rahmatʋllaahɩ wa barakaatʋh.-"? Tɩ Nabiyaamã (Wẽnd pʋʋsg lɑ A tɩlgr be ɑ yĩngɑ) kõ-b kibare, b sẽn na n pʋʋs-a to-to ningã. la a maanã wã: "Allaahumma Salli ʿAlaa Mʋhammadɩn wa ʿAlaa aalɩ Mohammadɩn = M Soab a Wẽnde! Pʋʋs a Mʋhammad la a Mʋhammad zakã rãmba" Rat n na n yeele: pẽg-a ne pẽgr sẽn be neer yĩngr zãmã wã, la neb nins sẽn pʋgd-a dĩinã pʋgẽ wã, la a rog pẽtsã sẽn yɑɑ b muunim-rãmbã. "Kamaa ṣallayta ʿAlaa Aali ɭbraahɩɩma= wala Fo sẽn pʋʋs a ɭbraahɩɩm zakã rãmbã" Wala fo sẽn maan neer n pʋʋs a ɭbraahɩɩm zakã rãmbã, bãmb me la a ɭbraahɩɩm la a ɭsmaa'ɩɩl la a ɭsaak la b kombã la b pʋgdbã sẽn yaa sɩd-kõtbã, sã n yaa woto bɩ F taas F Yɩɩdlem, a Mʋhammade, (Wẽnd pʋʋsg lɑ A tɩlgr be ɑ yĩngɑ). "ɭnnaka hamiidʋn,= ad Foom la Pẽgda, n yaa Zɩsgo" Rat n na n yeel: b sẽn pẽdg a soaba, A Mengẽ wã la A sɩf-rãmbẽ wã la A tʋʋmẽ, sẽn yaa yalengo, F Bedremẽ la F Naamẽ la F Kũunẽ. "Allaahumma baarɩk ʿAlaa Mʋhammadɩn wa ʿAlaa Aalɩ Mʋhammadɩn kamaa baarakta ʿalaa aalɩ ɭbraahɩɩma= M Soab a Wẽnde! Bark a Mʋhammad la a Mʋhammad zakã rãmba, wala Fo sẽn bark a ɭbraahɩɩm zakã rãmbã" Rat n na n yeele: kõ-a somã la waoogre, sẽn tʋg n yaa zɩsg n yɩɩd a soaba, la F paase la F tablg-a.