നോമ്പു തുറക്ക് ധൃതി കൂട്ടുന്നിടത്തോളം ജനങ്ങൾ നന്മയിലായിരിക്കും

നവവി (رحمه الله) പറയുന്നു: "സൂര്യാസ്തമയം ഉറപ്പായതിന് ശേഷം നോമ്പ്തുറ ഉടനെ നിർവ്വഹിക്കണമെന്നതിന് ഈ ഹദീഥ് തെളിവാണ്. നബി ﷺ യുടെ ഈ സുന്നത്ത് ജനങ്ങൾ കാത്തുസൂക്ഷിക്കുന്നിടത്തോളം മുസ്‌ലിം ഉമ്മത്തിൻ്റെ കാര്യം നേർവഴിയിലായിരിക്കും; എന്നാൽ അവർ നോമ്പുതുറ വൈകിക്കാൻ തുടങ്ങുന്നത് കുഴപ്പങ്ങളിൽ വീണുപോയിരിക്കുന്നു എന്നതിൻ്റെ അടയാളങ്ങളിൽ പെട്ടതാണ്."

നബി (സ) യുടെ സുന്നത്ത് പിൻപറ്റുന്നിടത്തോളം ജനങ്ങളിൽ നന്മ നിലനിൽക്കുന്നതാണ്. എന്നാൽ സുന്നത്തുകൾ മാറിമറിയുന്നത് അവരുടെ കാര്യങ്ങൾ കുഴപ്പത്തിലാകുന്നതിൻ്റെ കാരണമാണ്.

നോമ്പുതുറ വൈകിപ്പിക്കുന്ന വേദക്കാരോടും ബിദ്അത്തുകാരോടും എതിരാകുക എന്ന നന്മയും ഈ സുന്നത്ത് പ്രാവർത്തികമാക്കുന്നതിലുണ്ട്.

ഇബ്നു ഹജർ (رحمه الله) പറയുന്നു: "നോമ്പ്തുറ ധൃതികൂട്ടാൻ കൽപ്പിക്കപ്പെട്ടതിൻ്റെ കാരണവും ഇവിടെ ശ്രദ്ധിക്കാം. മുഹല്ലബ് പറയുന്നു: "നോമ്പ്തുറ ധൃതികൂട്ടണമെന്ന് പറഞ്ഞതിൻ്റെ പിന്നിലെ യുക്തി: രാത്രിയിൽ നിന്നുള്ള സമയം പകലിലേക്ക് കൂട്ടിച്ചേർക്കപ്പെടുകയും അതിൻ്റെ അളവ് അധികരിക്കുകയും ചെയ്യാതിരിക്കുക എന്നതാണ്. അതോടൊപ്പം, ഈ രീതിയാണ് നോമ്പുകാരന് കൂടുതൽ എളുപ്പമുള്ളതും, ഇബാദത്തുകളിൽ മുന്നേറാൻ അവന് സഹായകമായിട്ടുള്ളതും. സൂര്യാസ്തമയം സംഭവിച്ചു എന്ന് ഉറപ്പായതിന് ശേഷമോ, വിശ്വസ്തരായ രണ്ടാളുകൾ -ശരിയായ അഭിപ്രായപ്രകാരം ഒരാളാണെങ്കിലും- സൂര്യൻ അസ്തമിച്ചിരിക്കുന്നു എന്ന് അറിയിച്ചതിന് ശേഷമോ മാത്രമേ നോമ്പ്തുറക്കാൻ ധൃതി കൂട്ടേണ്ടതുള്ളൂ എന്നതിൽ പണ്ഡിതന്മാർക്കിടയിൽ ഏകോപനമുണ്ട്."