ណាពី ﷺ តែងសូត្រនៅចន្លោះស៊ូជោតទាំងពីរថា៖ اللَّهمَّ اغْفِرْ لي، وارْحَمْنِي، وعافِني، واهْدِني، وارزقْنِي (ឱអល់ឡោះជាម្ចាស់! សូមទ្រង់មេត្តាអភ័យទោសដល់រូបខ្ញុំ អាណិតស្រឡាញ់ចំពោះរូបខ្ញុំ ផ្តល់ភាពសុខសាន្តដល់រូបខ្ញុំ ចង្អុលបង្ហាញដល់រូបខ្ញុំ និងប្រទានលាភសក្ការៈដល់រូបខ្ញុំផងចុះ)។

ណាពី ﷺ តែងបួងសួងសុំពីអល់ឡោះនៅចន្លោះស៊ូជោតទាំងពីរក្នុងសឡាតរបស់លោកនូវពាក្យបួងសួងទាំងប្រាំនេះដែលជនមូស្លីមតែងតែត្រូវការចំពោះវាបំផុត ដែលការបួងសួងនេះគ្របដណ្តប់ទាំងប្រការល្អក្នុងលោកិយ និងថ្ងៃបរលោក ដូចជាការសុំការអភ័យទោស ការបិទបាំងនូវអំពើបាប ហើយនិងអធ្យាស្រ័យចំពោះអំពើបាបនោះ បួងសួងសុំនូវក្តីមេត្តាករុណា និងភាពសុខសាន្តពីភាពមិនច្បាស់លាស់ ចំណង់តណ្ហា ជំងឺ និងប្រការអាក្រក់ផ្សេងៗ ហើយនិងបួងសួងសុំពីអល់ឡោះនូវការចង្អុលបង្ហាញទៅកាន់ភាពត្រឹមត្រូវ និងបន្តស្ថិតនៅលើភាពត្រឹមត្រូវនោះ ព្រមទាំងបួងសួងសុំនូវលាភសក្ការៈ ទាំងជំនឿ ចំណេះដឹង ទង្វើកុសល និងទ្រព្យសម្បត្តិដែលល្អៗ ស្របច្បាប់។