Yonnente Yàlla bi yal na ko Yàlla dolli xéewal ak mucc bu daan wax: samiha Al-Laahu liman hamidahu, kenn ci nun sëgg ndigam ba keroog Yonnente bi yal na ko Yàlla dolli xéewal ak mucc di rot daal di sujjóot, topp nu sujjóot ginnaawam.

Maamuun bi ak imaamam amna ñenti anam ci roy gi: 1- jiitu ko: ci mu tàmbali dara njëkk imaamam, maamuun bi egg ci ponk njëkk imaam bi di ca egg, niki: mu rukoo njëkk imaam bi di rukoo, walla mu sujjóot njëkk imaam bi di sujjóot, lii dafa araam, te bu tayee jiitu gi ànd ak mu xam ne dañu ko a tere kon julleem gi day yàqu, moo xam da ko a jiitu ci ab ponk, walla mu jiitu ko jëm ci ponk bi, bu dee ci kàbbaru aramal gi la kon julleem gi du fasu, te day war ci moom mu baamtu julli gi. 2- tolloo ak moom: ci mo tolloo ak imaam bi, day rukoo ànd ak rukkoowam, day sujjóot ànd ak sujjóoam, day jug it ànd ak jugam ga, lii nag li gën a néew ci ay mbiram mooy ne dañu ko a sib, te li feeñ ci tegtal yi mooy ne dafa araam; bu tolloo ak imaam bi ci kàbbaru armal gi kon julleem gi fasuwul te dafa war a baamtu julli gi. 3- roy ko: ci mu def jëfi julli gi ginnaaw imaama ci lu dul yeexe, lii mooy li ñu yoonal te mu dëppoo ak sunna. 4- yeexe topp gi: ci mu yeex a topp imaam bi ag yeex gu koy génne ci roy, niki imaam bi rukkoo maamuun des di taxaw ba imaam bi di bëgg a siggi ca rukkoo ba, te lii dafa wuute ak li ñu yoonal, te dafa araam, ndare ngànt waral ko niki feebar ak mage.