Çelësat e fshehtësisë janë pesë.

E fshehta (ar. gajb) është tek Allahu dhe vetëm Ai e njeh atë, dhe Profeti ﷺ ka njoftuar se çelësat e së fshehtës dhe thesaret e saj janë pesë: E para: Kohën kur do të ndodhë Kiameti nuk e di askush tjetër pos Allahut, si tregues për njohjen e ahiretit, sepse Dita e Kiametit është e para e tyre, dhe nëse mohohet dituria për atë që është më e afërt, atëherë mohohet edhe dituria për atë që vjen pas saj. E dyta: Askush nuk e di se kur bie shi përveç Allahut, si tregues për çështjet e botës së lartë. Ai e veçoi shiun, ndonëse ai ka shkaqe të cilat, sipas rrjedhës së zakonshme, mund të tregojnë për ndodhjen e tij, por pa pasur vërtetim dhe siguri të plotë. E treta: Ajo që gjendet në mitra, qoftë mashkull apo femër, i zi apo i bardhë, i plotë apo i mangët, i mjerë apo i lumtur (në botën tjetë), e të ngjashme. Mitra u veçua për t'u përmendur për shkak se shumica e njohin atë nga përvoja e zakonshme, e megjithatë u mohua që dikush ta dijë realitetin e saj, ndaj për gjërat e tjera kjo është aq më e pamundur. E katërta: Atë çfarë do të ndodhë nesër nuk e di askush tjetër pos Allahut, si një aludim për llojet e kohës dhe ndodhitë në to. U përdor fjala "nesër" sepse në të vërtetë ajo është koha më e afërt, dhe nëse, me gjithë këtë afërsi, nuk dihet e vërteta e asaj çfarë do të ndodhë në të, pavarësisht mundësisë së shenjave dhe treguesve, atëherë koha që është më e largët aq më pak mund të dihet. E pesta: "askush nuk di se në ç'vend do të vdesë", është aludim për çështjet e botës së poshtme. Edhe pse është e zakonshme për shumicën e njerëzve që të vdesin në vendin e tyre, kjo nuk është një e vërtetë absolute; madje, edhe nëse njeriu vdes në vendin e tij, nuk e di se në cilën pjesë të tij do të varroset, edhe sikur aty të ndodhet varreza e të parëve të tij. "Me të vërtetë, Allahu është i Gjithëdijshëm dhe njohës i çdo gjëje." Ai i përfshin të jashtmet dhe të brendshmet, të fshehtat dhe të mbuluarat, si dhe sekretet. Kështu, ajeti përmblodhi llojet e së fshehtës dhe hodhi poshtë të gjitha pretendimet e kota.