यदि मानिसहरूलाई अजान दिनुको र पहिलो पङ्क्तिमा उभिएर नमाज पढ्नुको पुण्य एवं महत्त्व थाहा हुन्थ्यो, र गोला प्रथाबिना त्यो प्राप्त गर्न सम्भव हुँदैनथ्यो भने, उनीहरूले त्यसका निम्ति अवश्य पनि गोलाप्रथा गर्ने थिए।

यसमा अजानको श्रेष्ठताको वर्णन छ ।

यसबाट प्रथम पङ्क्ति र इमामको नजिक उभिनुको महत्त्व प्रस्ट हुन्छ।

यसमा नमाजको मुस्तहब (उत्तम) सुरुआती समयमा चाँडै उपस्थित हुनुको श्रेष्ठता स्पष्ट पारिएको छ; किनकि यसमा ठूलो पुण्य छ र यसबाट धेरै फाइदाहरू प्राप्त हुन्छन्, जस्तै: पहिलो पङ्क्ति भेटाउनु, प्रार्थना सुरुदेखि नै पाउनु, (नफिल) ऐच्छिक नमाज पढ्नु, कुरआनको पाठ गर्नु र मानिसका लागि फरिश्ताहरूले क्षमाको प्रार्थना गर्नु। साथै, जबसम्म ऊ सामूहिक नमाजको प्रतीक्षामा रहन्छ, तबसम्म उसलाई नमाजकै अवस्थामा रहेको मानिन्छ र यसबाहेक अन्य धेरै फाइदाहरू छन्।

यस हदीसमा इशा र फज्र नमाजको जमाअतमा उपस्थित हुन ठूलो प्रोत्साहन दिइएको छ र यसमा धेरै पुण्य भएको कुरा उल्लेख छ। किनभने, यी दुवै नमाजहरू पढ्नका लागि सुरुको र अन्तिम समयको निद्रा बिगार्नुपर्ने हुँदा मनका लागि निकै कष्टकर हुन्छन् र यसै कारणले गर्दा यी दुई नमाजहरू पढ्न कपटीहरू (मुनाफिकहरू) का लागि सबैभन्दा कठिन हुन्छ।

इमाम नववीले भन्नुभएको छ: "यसमा ती हक-अधिकारहरूमा गोलाप्रथा गर्ने कार्यको वैधता पुष्टि गरिएको छ, जसमा प्रतिस्पर्धा र विवादको स्थिति सिर्जना हुन्छ।"