هه‌ر تشته‌كێ مرۆڤی سه‌رخۆش بكه‌ت؛ یێ حه‌رامه‌.

نه‌بیز: ئه‌و ئاڤه‌ یا خورمه‌ یان هنگڤین یان جه‌ھ و تشتێن وه‌كی وان دهێنه‌ هاڤێتن بۆ ناڤ، ب ڤێ چه‌ندێ تامه‌كا خۆش و شرین په‌یدا دكه‌ت و دبیت پشتی ڤێ قوناغێ ببیته‌ عه‌ره‌ق و مرۆڤی سه‌رخۆش بكه‌ت.

فه‌رمووده‌ بناخه‌یه‌كه‌ ل دۆر حه‌رامكرنا هه‌می جۆرێن سه‌رخۆشكه‌ران، وه‌كی عه‌ره‌قێ و حه‌شیشێ (مادده‌یێن بێهۆشكه‌ر) و ژ بلی وان.

گرنگییا پرسیاركرنێ بۆ وی تشتێ مرۆڤێ موسلمان پێدڤی دبیتێ.

ئێكه‌م جار ده‌مێ عه‌ره‌ق هاتییه‌ حه‌رامكرن؛ ل ده‌مێ كرنا نڤێژێ بوو، ئه‌گه‌ر ژی ئه‌ڤه‌بوو هنده‌ك مشه‌ختییان ب سه‌رخۆشی نڤێژكر و ده‌مێ قورئان د نڤێژا خۆدا خواندی؛ خواندنا وان ل به‌ر وان تێكچوو، ژ به‌ر هندێ خودێ ئه‌ڤ ئایه‌ته‌ ئینا خوار: {يَا أَيُّهَا الَّذِينَ آمَنُوا لَا تَقْرَبُوا الصَّلَاةَ وَأَنْتُمْ سُكَارَى حَتَّى تَعْلَمُوا مَا تَقُولُونَ} [النساء: 43]، ئانكو: ((ئه‌ى ئه‌وێن باوه‌رى ب خودێ ئيناى و دويكه‌ڤتنا پێغه‌مبه‌رێ وى كرى، ده‌مێ هوين د سه‌رخۆش؛ هوين نێزيكى نڤێژێ نه‌بن دا بزانن كانێ هوين چ دبێژن)). گازیكه‌رێ پێغه‌مبه‌ری ژی (صه‌لات و سه‌لامێن خودێ ل سه‌ر بن) گازی دكر و دگۆت: بلا كه‌سێ سه‌رخۆش نێزیكی نڤێژێ نه‌بیت. پاشی خودێ ب ڤێ گۆتنا خۆ ب ڕه‌هایی و ئێكجاری عه‌ره‌ق حه‌رامكر: {يَا أَيُّهَا الَّذِينَ آمَنُوا إِنَّمَا الْخَمْرُ وَالْمَيْسِرُ وَالْأَنْصَابُ وَالْأَزْلَامُ رِجْسٌ مِنْ عَمَلِ الشَّيْطَانِ فَاجْتَنِبُوهُ لَعَلَّكُمْ تُفْلِحُونَ 90 إِنَّمَا يُرِيدُ الشَّيْطَانُ أَنْ يُوقِعَ بَيْنَكُمُ الْعَدَاوَةَ وَالْبَغْضَاءَ فِي الْخَمْرِ وَالْمَيْسِرِ وَيَصُدَّكُمْ عَنْ ذِكْرِ اللَّهِ وَعَنِ الصَّلَاةِ فَهَلْ أَنْتُمْ مُنْتَهُونَ} [المائدة: 90، 91]، ئانكو: ((گه‌لى ئه‌وێن باوه‌رى ئيناى هه‌ما هندى عه‌ره‌قه‌ (ئه‌و هه‌ر تشته‌كه‌ يێ ئه‌قلى ببه‌ت) و قوماره‌ (ئه‌ڤێ تالع و نه‌صيب ژى دكه‌ڤیته‌ د بنڤه‌ و هه‌ر تشته‌كێ ئێك ژ ئێكى ببه‌ت و پێڤه‌ موژيل ببن و خودێ ژ بير بكه‌ن) و صه‌نه‌مێن چكلاندينه‌ (و ئه‌ڤه‌ ئه‌و به‌ر بوون يێن بوتپه‌رێسان ددانان و قوربان ل نك ڤه‌دكوشتن، وه‌ك مه‌زنكرن بۆ وان و هه‌ر تشته‌كێ بۆ په‌رستنێ بهێته ‌دانان) و تالع زانينا ب ڕێكا تيركێشانێیه‌؛ ئه‌ڤه‌ هه‌مى گونه‌هه‌ و شه‌يتان ل به‌ر مرۆڤان شرين دكه‌ت، ڤێجا هوين خۆ ژ ڤان گونه‌هان بده‌نه‌ پاش؛ دا به‌لكى هوين ب چوونا به‌حه‌شتێ سه‌ركه‌ڤن هه‌ما شه‌يتانى ب شرينكرنا گونه‌هان ل به‌ر هه‌وه‌ دڤێت نه‌ياره‌تییێ و كه‌ربێ بێخيته‌ ناڤبه‌را هه‌وه‌، ب ڕێكا عه‌ره‌قێ و قومارێ و به‌رێ هه‌وه‌ ژ بيرئينانا خودێ و نڤێژێ بده‌ته‌ پاش ژ به‌ر وێ سه‌رخۆشییا د ڤه‌خوارنا عه‌ره‌قێدا هه‌ى و وێ مژويلاهییا د كرنا قومارێدا هه‌ى، ڤێجا هوين وێ چه‌ندێ به‌س بكه‌ن و ده‌ستان ژێ به‌رده‌ن)).

مسوگه‌ر خودێ عه‌ره‌ق حه‌رام كر، ژ به‌ر وان زیان و خرابییێن مه‌زن یێن ژ وێ په‌یدا دبن.