កាលណាចូលដល់ដប់យប់(ចុងក្រោយនៃខែរ៉ម៉ាហ្ទន) រ៉ស៊ូលុលឡោះ ﷺ លោកនៅទល់ភ្លឺ ហើយលោកដាស់គ្រួសាររបស់លោក ព្រមទាំងខិតខំប្រឹងប្រែង(ក្នុងការគោរពសក្ការៈ) និងរឹតបន្តឹងចង្កេះខោ។

អ៊ីម៉ាំ អាន់ណាវ៉ាវី បាននិយាយថា៖ សាសនវិទូឥស្លាមមានការខ្វែងយោបល់គ្នាចំពោះអត្ថន័យនៃពាក្យ៖ “រឹតបន្តឹងចង្កេះខោ”។ អ្នកខ្លះយល់ថា ជាការខិតខំប្រឹងប្រែងនៅក្នុងការគោរពសក្ការៈច្រើនជាងពេលធម្មតារបស់ណាពី ﷺ ។ ដែលនេះមានន័យថា ឧស្សាហ៍ព្យាយាមក្នុងការគោរពសក្ការៈ។ ឧទាហរណ៍គេនិយាយថា៖ ខ្ញុំរឹតបន្តឹងចង្កេះខោរបស់ខ្ញុំសម្រាប់កិច្ចការនេះ មានន័យថា ខ្ញុំឧស្សាហ៍ព្យាយាម និងផ្តោតលើវា។ អ្នកខ្លះទៀតយល់ថា៖ ជាន័យធៀបសម្រាប់ការដែលឃ្លាតឆ្ងាយពីភរិយាដើម្បីផ្តោតលើការគោរពសក្ការៈ។