“មនុស្សពីរប្រភេទដែលស្ថិតក្នុងចំណោមអ្នកឋាននរកដែលខ្ញុំមិនទាន់បានឃើញពួកគេនៅឡើយ គឺក្រុមមួយមានដំបងកាន់ជាមួយដូចជាកន្ទុយគោ ដែលគេយកវាវាយធ្វើបាបមនុស្ស(ដោយអយុត្ដិធម៌) ហើយនិងស្ដ្រីដែលស្លៀកសម្លៀកបំពាក់ដូចនៅអាក្រាតកាយ ធ្វើដំណើរទាក់ទាញទៅរកការប្រព្រឹត្តអំពើអាក្រក់ ហើយខ្លួនពួកនាងក៏មានទំនោរទៅរកវាផងដែរ។

ណាពី ﷺ លោកបានព្រមានពីមនុស្សពីរប្រភេទដែលស្ថិតក្នុងចំណោមអ្នកឋាននរកដែលលោកមិនទាន់បានឃើញនោះឡើយ ហើយក៏មិនទាន់មាននៅក្នុងសម័យកាលលោកនោះដែរ។ ប៉ុន្តែវានឹងកើតមានឡើងបន្ទាប់ពីលោកទទួលមរណភាព៖ ប្រភេទទីមួយ៖ ក្រុមមនុស្សដែលមានរំពាត់វែងប្រៀបដូចជាកន្ទុយគោ ហើយពួកគេយករំពាត់នោះវាយធ្វើបាបមនុស្ស។ ពួកទាំងនោះ គឺជាប៉ូលិស និងអ្នកគាំទ្រភាពអយុត្តិធម៌ដែលវាយធ្វើបាបមនុស្សដោយមិនត្រឹមត្រូវ។ ប្រភេទទីពីរ៖ គឺក្រុមស្ត្រីដែលបោះបង់សម្លៀកបំពាក់ដែលបង្ហាញពីភាពបរិសុទ្ធនិងភាពអៀនខ្មាសដែលជាធម្មជាតិរបស់ស្ត្រីភេទ។ រីឯលក្ខណៈសម្បត្តិរបស់ពួកនាងវិញ គឺពួកនាងស្លៀកពាក់ប្រៀបដូចជាអាក្រាតកាយ ពីព្រោះពួកនាងស្លៀកសម្លៀកបំពាក់ស្តើងបង្ហាញសាច់ បិទបាំងផ្នែកខ្លះនៃរាងកាយ ហើយបញ្ចេញផ្នែកខ្លះទៀតដើម្បីបង្ហាញសម្រស់របស់ខ្លួន។ ពួកនាងទាក់ទាញចិត្តបុរសតាមរយៈការស្លៀកពាក់របស់ពួកនាង និងដំណើរផ្អៀងស្មារបស់ពួកនាង និងនាំអ្នកដទៃឱ្យវង្វេង និងធ្លាក់ចូលក្នុងភាពខុសឆ្គង។ ហើយក្នុងចំណោមលក្ខណៈរបស់ពួកនាងផងដែរ គឺក្បាលរបស់ពួកនាងប្រៀបដូចជាបូកសត្វអូដ្ឋដែលរេរាំ ផ្អៀងចុះ ផ្អៀងឡើង ពីព្រោះពួកនាងធ្វើក្បាលរបស់ខ្លួនឲ្យធំដោយរុំកន្សែង ក្រមា ឬអ្វីផ្សេងទៀត។ ការប្រៀបធៀបទៅនឹងបូកសត្វអូដ្ឋ គឺដោយសារតែស្ត្រីទាំងនោះបួងសក់ហើយចងវាឡើងលើរហូតដល់វាផ្អៀងទៅម្ខាងនៃក្បាល ប្រៀបដូចជាបូកសត្វអូដ្ឋដែលរេរាំ ផ្អៀងចុះ ផ្អៀងឡើង។ ដូចនេះ ស្ត្រីទាំងឡាយណាដែលមានលក្ខណៈសម្បត្តិទាំងនេះនឹងទទួលនូវការព្រមានយ៉ាងធ្ងន់ធ្ងរថា ពួកនាងនឹងមិនបានចូលឋានសួគ៌ មិនអាចធំក្លិនឋានសួគ៌ ហើយក៏មិនអាចទៅជិតឋានសួគ៌បានឡើយ ព្រោះក្លិនឋានសួគ៌នៅចម្ងាយដ៏សែនឆ្ងាយ។