Vrèmanvre, ou poze yon kesyon sou yon gwo zafè (yon bagay ki gran anpil), men an reyalite, li fasil pou moun Allah rann li fasil pou li a.

Mou'az (ke Allah satisfè avèk li) te di: "Mwen te ansanm avèk Pwofèt la (ke lapè ak benediksyon Allah sou li) nan yon vwayaj, epi yon jou maten mwen te vin touprè li pandan nou tap vwayaje a. Epi mwen di: 'O Mesaje Allah, fèm konnen yon zèv kap fè mwen antre nan Paradi epi kap elwanyem de Dife a.' Li di: 'Sètènman, ou poze m kesyon sou yon gwo bagay ki lou pou nanm yo, epi vreman li byen fasil pou moun Allah rann li fasil pou li a; akonpli obligasyon Islam yo:'" Premye a: Adore Allah li menm sèl epi pa asosye anyen avèk Li. Dezyèmman: Fè 5 priyè obligatwa yo pandan jounen an ak lannwit lan: Fajr, Dhuhr, Asr, Maghrib, ak Isha, avèk kondisyon li yo, pilye li yo, ak devwa li yo. Twazyèm pilye a: Bay Zakat ki obligatwa a, ki se yon adorasyon obligatwa ki fèt ak lajan (oswa byen) sou tout richès ki rive nan yon kantite ki espesifik daprè lalwa Islamik, pou bay moun ki gen dwa resevwa li yo. Katriyèm pilye a: Fè jèn nan mwa Ramadan, ki se rete san ou pa manje, san ou pa bwè, epi evite tout lòt bagay ki ka gate jèn nan, ak entansyon pou adore Allah, depi lè douvanjou parèt (Fajr) jouk lè solèy la kouche (Maghrib). Senkyèm pilye a: Ale fè Pèlerenaj (Hajj) nan Kay la, pandan wap fè vwayaj pou ale Lamèk pouw ka akonpli seremoni (rityèl) yo, pou adore Allah Toupwisan an. Aprèsa li di, ke lapè ak benediksyon Allah sou li: Èske mwen pa ta fèw konnen chemen ki mennen nan pòt byen yo? Epi sa se lèw fè obligasyon sa yo swiv ak zèv volontè yo: Premyèman: Jèn volontè a, ki anpeche yon moun tonbe nan peche paske li kase dezi a (tantasyon) epi li afebli fòs kò a ki pousel nan sa ki mal. Dezyèmman: Sadaka (Lacharite) volontè a etenn peche a aprè yon moun fin komèt li, li retire li, epi li efase tras li. Twazyèmman: Lapriyè Tahajjud nan dènye tyè nwit la. Aprèsa, Pwofèt la (lapè ak benediksyon Allah sou li) te li. Men sa senyè toupwisan an ki anwo nan syèl la di nan vèsè sa yo: {Kò yo rete lwen} sa vle di: yo rete lwen {kabann yo} sa vle di: kote yo dòmi an, {yap priye Senyè yo a} nan fè lapriyè, nan fè zikr, nan lekti Koran an, ak nan fè douya, {avèk krentif ak espwa, epi yo depanse nan sa Nou ba yo kòm pwovizyon. Konsa, pa gen okenn nanm ki konnen ki lajwa ki kache pou yo} sa vle di: bèl plezi ki pral fè zye yo kontan nan Jou Jijman an ak nan Paradi a, {kòm rekonpans pou sa yo te konn fè.} Aprèsa, li (se pou lapè ak benediksyon Allah kouvri li) te di: "Èske mwen pa palew sou fondasyon relijyon an? ak poto mitan li ke li chita sou li a? ak pwen ki pi wo nan tèt li?" Mou'az (ke Allah satisfè avèk li) te di: Wi, O Mesaje Allah a. Pwofèt la di: «Baz (tèt) tout bagay se Islam, ki se 2 temwayaj yo, epi avèk yo moun nan vin posede baz relijyon an. Poto mitan li se Lapriyè, donk pa gen Islam san lapriyè, menm jan pa kapab genyen yon kay san poto. Kidonk, moun ki fè lapriyè relijyon li vin djanm epi li elve; epi pwen ki pi wo nan tèt li ak elevasyon li se ak Jihād (batay/efò) ansanm ak fè tout efò nan konbat lènmi relijyon yo pou elve pawòl Allah a.» Aprèsa, li di (ke lapè ak benediksyon Allah sou li): Èskem pa dwe fèw konnen sa ki asire epi ki pèfeksyone tout sa ki sot pase yo? Lè sa a, li (ke lapè ak benediksyon Allah sou li) kenbe lang li, epi li di: Kontwole sa a, epi pa pale sou sa ki pa konsènew. Mou'az di: Èske Seyè nou an ap rann nou responsab, lap mande nou kont epi lap pini nou pou tout sa nap di?! Pwofèt la (Ke lapè ak benediksyon Allah kouvri li) te di: «Se pou manman ou pèdi ou!» Sa pa vle di li tap fè yon move priyè kont li, men pito se nan fason Arab yo pale pou atire atansyon li sou yon bagay li te dwe veye sou li epi konnen li. Aprèsa, li di: «Èske gen lòt bagay ki lage moun epi fè yo tonbe sou figi yo nan dife a, pase sa lang yo rekòlte nan mekrèyans, fo akizasyon, joure, pale moun mal, fè tripotay, fè manti sou moun, ak lòt bagay ki sanble ak sa yo?»