"Sizlərdən birinizin yaradılışı (embrion) anasının bətnində qırx gündə cəm edilir

Abdullah bin Məsud (Allah ondan razı olsun) dedi ki, sözündə düzgün olan və doğruluğu Uca Allah tərəfindən təsdiqlənən Allah Rəsulu (Allahın salavatı və salamı onun üzərinə olsun) bizə belə buyurdu: "Sizdən birinizin yaradılışının mərhələləri bu şəkildədir: Kişi zövcəsi ilə yaxınlıq etdikdə, kişinin dağınıq halda olan mənisi qadının bətnində qırx gün ərzində nütfə halında toplanır, sonra ikinci qırx gündə qatı, laxtalanmış qana çevrilir, sonra üçüncü qırx gündə bir loxma boyda çeynənmiş ət parçasına çevrilir. Üçüncü qırx gün bitdikdən sonra Allah ona mələk göndərir və mələk ona ruh üfürür. Mələyə dörd şeyi yazmaq əmr edilir: ruzisini – yəni: ömrü boyu əldə edəcəyi nemətlərin miqdarını, əcəlini – yəni: dünyada qalma müddətini, əməlini – yəni: nə iş görəcəyini, bədbəxt, yoxsa xoşbəxt olacağını. Sonra Peyğəmbər (Allahın salavatı və salamı onun üzərinə olsun) and içdi ki, bir kimsə Cənnət əhlinin əməlini edər və əməli – yəni: insanlara zahir olan qismində – əməlisaleh olar, bu hal, onun Cənnətə daxil olmasına bir arşın qalana qədər davam edər – yəni onunla Cənnətə daxil olması arasında, yer üzərindəki hər hansı bir yerə çatmağa bir arşınlıq məsafə qalan kimsənin halı kimi olana qədər. Bu an ana bətnində yazılmış qədəri və onun üçün təqdir olunanlar onu qabaqlayar və o, Cəhənnəm əhlinin əməlini edər, nəticədə aqibəti bu əməllə xətm olunar və Cəhənnəmə daxil olar. Çünki əməlinin qəbul olunmasının şərti həmin əməl üzərində sabit qalması və onu dəyişməməsidir. İnsanlardan başqa biri isə Cəhənnəm əhlinin əməlini edər, hətta Cəhənnəmə daxil olmağa o qədər yaxınlaşar ki, elə bil onunla Cəhənnəm arasında yer üzündə yalnız bir arşın məsafə qalar. Bu an ana bətnində yazılmış qədəri və onun üçün təqdir olunanlar onu qabaqlayar və o, Cənnət əhlinin əməlini edər, nəticədə aqibəti bu əməllə xətm olunar və Cənnətə daxil olar."