"dees na gaaral fitna ci xol yi mu mel ni ag basaŋ nekk bant-bant

Njiitu jullit ñi Umar ibnul Xattaab yal na ko Yàlla dollee gërëm dafa nekkoon ci jotaayam am mbooloo ci Sahaaba yi nekk fa moom, mu ne leen: Kan ci yéen moo dégg Yonente Yàlla bi yal na ko Yàlla dolli xéewal ak mucc muy tudd fitna yi? Ñenn ñi wax ne: nun dégg nanu ko muy tudd fitna yi, Umar yal na ko Yàlla dollee gërëm ne: amaana ngeen jublu ci balaa ak nattuy nit ki ci ñi ko jege; ci jabaram ak doomam ngir bëggam gu ëpp ci ñoom, ak li fiir ci ñoom, ak li mu leen yittewoo wolif ay yiw yu bari, walla ag càgganteem ci li mu war a taxawe ci seen i àq ak yar leen ak jàngal leen, niki noonu fitnay waaji ci dëkkandoom, ak lu ko niru, amaana ngeen jublu loolu? Ñu ne ko: waaw waaw, mu ne: yooyu ay fitna yuy waral ñu càmbar ko, amna ci ay bàkkaar yoy yaakaar nañu ñu far ko ci julli ak woor ak saraxe. Waaye kan ci yéen moo dégg Yonente bi di tudd fitna yiy matale ngir ag màggam ak tasaaroom gu bari ba nit ñi di jaxasoo kem ni duusi géej di jaxasoowe? Gaa yi noppi, Husayfata ibn Al-Yamaan yal na ko Yàlla dollee gërëm ne ko: man dégg naa ko, Umar daal di bég, ne ko: waay waay Yàlla xam na ne maa ñee sa baay waat ndax li mu indi ki mel ni yaw; waxal, Husayfata ne: Yonente bi yal na ko Yàlla dolli xéewal ak mucc nee na: Fittna yi day feeñ daal di tafu ci xolu nit ki kem ni ag basaŋ di tafoo ci kiy nelaw, muy jeexital ci xol bi ngir tarug tappaloom ci fitna yi, fitna yi di baamtu bu jàll rekk beneen ñëw, xol bu mu dugg, mu bëgg ko daal di jaxasoo ak moom kem ni li ñuy naan di jaxasoowe ak di dugge; ñu tomb ca ab tomb bu ñuul, xol bu ko delloo ñu tomb ca tomb bu weex, ba mu mujj nekk ñaari xeeti xol; xol bu weex ngir ag taram ci ngëmam, ak muccam ci ayib, ak ne fitna yi tappaloowul ak moom, te jeexitalu ca, mu mel ni aw doj wu weex te rittax nga xam ne dara du ca taq, fitna it du ko lor ba keroog muy daje ak Yàlla. Beneen xol bi melo wi day soppeeku ñuul ngir fitna dem ba mel ni ab gutt gu jeng walla gu ñu juutal nga xam ne ndox du fa sax, niki noonu it xol bii yiw ak xereñte du ca nekk, du xam lu baax du bañ li bon, lu dul li mu bëgg te mu neex bakkanam. Husayfata wax Umar ne ko: fitna yooyu dara du ci génn ci sag dund, ndax sa diggante ak moom dafa am ab bunt bu ñu tëj te leegi ñu toj ko, Umar ne ko: ndax dañu koy toj? Bu ñu ko ubbi woon de dees na ko delloo tëjaat ko, Husayfata ne ko: déedéet, dañu koy toj kay, te bunt boobu benn waay la bu ñuy ray walla mu faatu. Te lii ma wax xibaar bu dëggu la te luy am la du ay nettaliy bindkat yi, te nekkul itam góor-góorlug boroom gis-gis, waaye ci waxi Yonente bi la.