"अल्लाहले राम्रा र नराम्रा दुवै प्रकारका कार्यहरू निर्धारित गरी स्पष्ट पारिदिनुभएको छ

यो हदीसलाई रसूल (सल्लल्लाहु अलैहि वसल्लम) ले आफ्नो पालनकर्ताबाट वर्णन गर्नुभएको छ, जसलाई 'हदीस कुदसी' वा 'हदीस-ए-इलाही' भनिन्छ । यसको शब्द र अर्थ दुबै अल्लाहको हो । तर, कुरआनका विशेषताहरू यसमा पाइँदैन, जस्तै: यसको तिलावत गर्नु, यसको लागि तहारत (शरीरको पवित्रता) प्राप्त गर्नु, उपासना, चुनौती र चमत्कार आदि ।

यसबाट अल्लाह तआलाले पुण्य र पाप लेख्नुभएको छ र त्यसपछि आफ्ना बन्दाहरूका लागि त्यसलाई स्पष्ट पारिदिनुभएको छ भन्ने कुरा प्रमाणित हुन्छ, ताकि उनीहरूले यो कुरा जान्न सकून् र आफ्नो मामिलामा स्पष्ट होऊन्, अनि आफ्नो पालनकर्ताको मार्गदर्शनमा रहेर उहाँको आदेशको पालना गरून् र उहाँले निषेध गरेका कुराहरूबाट बचून् ।

यस उम्मत (समुदाय) प्रति अल्लाह तआलाको ठूलो अनुग्रहको व्याख्या, उहाँले पुण्य लेख्नुहुन्छ र त्यसलाई बढाएर दिनुहुन्छ, तर पापलाई कार्यान्वयन नगरेसम्म लेख्नुहुन्न र कार्यान्वयन गरेपछि एउटा मात्र पाप लेख्नुहुन्छ ।

हृदयमा भएको निष्ठा, लाभको विस्तार र यस्तै कुराहरू अनुसार असल कर्महरूको गुणनमा वृद्धि हुन्छ, अनि अल्लाहले आफ्नो कृपा र अनुग्रहले त्यसलाई गुणन गर्नुहुन्छ।

यस हदीसमा भक्तले आफ्नो पालनकर्ता महान अल्लाहको प्रतिफलको आश र उहाँको सजायको डरले, उहाँकै लागि पाप त्याग्दा, त्यसको आनन्द छोड्दा र आफ्नो वासना त्याग्दा प्राप्त गर्ने पुण्यको स्पष्टिकरण छ।

यो समुदायप्रति अल्लाह सर्वशक्तिमानको दया हो कि उहाँले उनीहरूका असल कर्महरूलाई गुणा गर्नुभयो, तर उनीहरूका नराम्रा कर्महरूलाई गुणा गर्नुभएन।