«Ra maan-y taab sũ-kiir ye, la belg-y taab tɩ b ra n kẽ ye (belg ned t'ɑ rɑ bũmb wɑlɑ f sẽn nɑ n tɑ n dɑ toogo n nɑ yɩl n bleg sẽn rɑt n rɑ wã t'ɑ rɑ n kẽ), la y ra gẽ taab ye, la y ra maan raba-wẽns ne taab ye, yãmb sãnda ra wa koos taab koosg zug ye ( wɑ ne sẽn bɑrsd tɩ fo tʋg n pɑɑs ligdã n reeg n dɑ), yɩ-y Wẽnd yembse, n yaa ma-biisi

Nabiyaamã (Wẽnd pʋʋsg lɑ A tɩlgr be ɑ yĩngɑ) sagla lɩslɑɑm t'a maan neer ne ɑ lɩslaam tɑɑg sẽn yaa a ma-biigã, la a vẽnega yεl sãnda sẽn yaa tɩlae n zao lɩslaam sẽn yaa waagib-rãmba la zʋgdo, a ma-biisã wεεngẽ, la sẽn be rẽnda pʋgẽ: Rẽenem sagellã: Ra maan-y taab sũ-kiir ye, ne sãnda sẽn na n wa rat tɩ sãnda neema gõbg n bas-ba. Yiib soaba: ra belg-y taab tɩ b ra n kẽ ye, ne ned sẽn na n tʋg n raad bũmb n kẽedẽ, la a ka rat n na n ra ye, a ratame n maan bũmb sẽn na n naf kaoosã, maa bũmb sẽn na n nams raadã. Tãab soaba: La y ra gẽ taab ye, la yẽ me la rat n nams taaba, la a tullã yaa nonglem, sã n ka wa n mikame tɩ gẽegã yaa Wẽnd yellã yĩnga, wakat-kãngã yaa tɩlae. Naas soaba: Ra rabs-y taab ye, ra gũd y zãn-kuisd ne taab ye, ne ned fãa sẽn na n rɩk a zãn-kuidg n kõ a ma-bi-taaga, n balld n basd-a, n wãagd-a, n ka baood a zĩigẽ ye. Nu soaba: Yãmb sãnda ra wa koos taab koosg zug ye, wala a sẽn na n tʋg n yeel ned sẽn raad bũmbu: mam tara a buudu t'a ligdã ka ta woto ye, maa a sõmblemã yɩɩdã yãwã, ne fo sẽn ra ligd ningã. Rẽ poorẽ tɩ Nabiyaamã (Wẽnd pʋʋsg lɑ A tɩlgr be ɑ yĩngɑ) kõ sagla sẽn tigim n yeele: la y yɩ wala ma-biisi, n bas b sẽn togs yεl nins sẽn yaa yεl kiti wã, la y nigd pãng ne nonglem maanego, la yol-yole, la nimbãan-zoεεga, la bʋg-bʋge, la sõng-taab sõma pʋgẽ, n lagem ne sũyã yɩlgre la pʋ-peelem maaneg halhaal fãa. La sẽn be ma-biir-kãngã yεl-mɑɑndi wã pʋgẽ: Yaa ɑ ra wẽg a ma-biigã, la a ra maan n zʋʋg a zug ye. La a ra bas a ma-biigã tɩ b wẽgd-a t'a bas n ka sõng-a ye, zĩig ning yẽ sẽn tõe n sõng-a wã la a zẽk wẽgdã n bas-a. La a ra faag a ma-biigã n paoog-a, n ges-a ne boogr la yaalg gesgo, la yẽnda sababã yaa waoog-m-meng sẽn be nebã sũurẽ. Rẽ poorẽ tɩ Nabiyaamã vẽnege (Wẽnd pʋʋsg lɑ A tɩlgr be ɑ yĩngɑ) noor a tãabo, tɩ ad Wẽnd zoεεgã bee sũurẽ wã, la ned ning Wẽnd zoεεg sẽn wa n be a sũurẽ wã, Wẽnd zoeer ning sẽn maand t'a sõmb n tall zʋg-sõngo la Wẽnd yεεsgo, la Wẽnd gũusgu, rẽnd yẽ soab ka na n faag lɩslaam ye. La seka yẽnda yel-wẽnse la zʋg-yoodo tɩ lɩslaam sã n wa paoogd a lɩslaam taaga; la rẽnda yaa waoog-m-meng sẽn be a sũurẽ wã yĩnga. Rẽ poorẽ tɩ Nabiyaamã (Wẽnd pʋʋsg lɑ A tɩlgr be ɑ yĩngɑ) keng n wilg sẽn loogã, tɩ ad lɩslaam zãngã yaa haraam ne a lɩslaam taaga: a zɩɩmã: ne yẽ sẽn na n maan n zʋʋg a zugu, tɩ yaa kʋʋbo, maa sẽn ka ta kʋʋbo, tɩ yaa sãmpoaga maa pãbre, la sẽn wõnd rẽ, yaa woto bala, a arzεkã, yaa haraam ne-a ne yẽ sẽn na n tʋg n reegd arzεk tɩ ka tũ ne yẽ hakε, woto bal la a burkĩndã: ne a sẽn na n tʋg n sãbsd-a a mengẽ wã maa a buudẽ wã.