Èske mwen pa ta dwe fè nou konnen pi bon aksyon nou yo, sila a ki pi bon devan Wa (Mèt) nou an, epi ki pi monte ran nou yo pi wo?

Lè yon moun toujou ap sonje Allah Senyè toupwisan an epi lap repete non li (Dhikr), kit se aklè kit se an kachèt nan kè li, sa se youn nan pi gwo aksyon ki pèmèt li pwoche pi prè Li, epi ki pi itil devan Allah Senyè toupwisan an.

Tout zèv yo te etabli sèlman pou fè rapèl Allah ki Trè O a, Allah ki Trè O a di: (Epi fè lapriyè pou sonje Mwen). Epi Pwofèt la (kè poze ak benediksyon Allah sou li) di: Yo etabli Tawaf la nan Kay la, ant Safa ak Marwa, ak voye wòch yo sèlman pou fè rapèl Allah ki Trè O a. Se Abu Dawud ak Tirmidhi ki rapòte l.

Al-'Izz ibn 'Abd al-Salam te di nan liv li a (Qawa'id): «Hadit sa a se youn nan prèv ki montre rekonpans lan pa depann sèlman sou kantite efò (oswa fatig) nan tout zak adorasyon yo; okontrè, Allah ki Pi Wo a ka bay plis rekonpans pou yon ti aksyon pase sa Li bay pou yon gwo aksyon. Kidonk, rekonpans lan depann pito sou diferans ki genyen nan nivo valè ak diyite zak la.

Al-Munawi te di nan Fayd al-Qadir: «Yo konprann Adis sa a nan sans ke fè louwanj pou Allah (Dhikr) se te pi bon bagay pou moun li tap pale avèk yo a. Si se te yon moun ki brav epi vanyan ki te ka pote avantaj pou Islam nan konba, li tap dil pito: se batay (Djihad); oswa pou yon moun rich ki te ka ede pòv yo ak lajan li, li tap dil: se bay lacharite (Sadaqah); epi pou yon moun ki gen mwayen fè Pelerinaj la, li tap di li: se Pelerinaj (Hajj); oswa pou yon moun ki gen paran li vivan toujou, li tap dil: se pran swen yo ak respè. Se konsa yo rive mete tout pawòl sa yo an amoni.»

Fason ki pi konplè pou sonje Allah (Dhikr) la, se pawòl ki soti nan bouch la ansanm ak refleksyon ki fèt nan kè a, answit se sa ki fèt nan kè a sèlman tankou meditasyon, aprèsa se pawòl ki soti nan bouch la sèlman, epi nan chak nan yo genyen yon rekonpans, si Allah Trèwo a vle.