Кимде-ким тоодон боюн таштап өзүн-өзү өлтүрсө, ал тозок отунда болот жана ал жакта түбөлүктөн-түбөлүккө калып, өзүн таштай берет.

Адам өзүн өзү өлтүрүүсү арам иш. Өз жанын кыюу – жан чыдагыс азапка татыктуу кыла турган чоң күнөөлөрдөн.

Хадисте айтылгандар өз жанын кыюунун кээ бир түрлөрүнө мисал катары гана айтылган. Негизинен, адам кандай гана жол менен өз жанын кыйбасын, ал өзүнө эмне кылган болсо, ошол нерсе менен жазаланат. «Сахих ал-Бухарийде» Пайгамбардын (ага Аллахтын тынчтыгы жана мактоосу болсун) мындай деп айткан сөзү келген: «Ким өзүн-өзү муунтуп өлтүрсө, ал тозокто да өзүн муунтат. Ал эми ким өзүн сайып өлтүрсө, ал тозокто да өзүн сайат».

Имам Навави мынтип айткан: "Ал эми Пайгамбардын (ага Аллахтын тынчтыгы жана мактоосу болсун): «Ал тозок отунда түбөлүктөн-түбөлүккө калат», – деген сөзүнө келсек, бул тууралуу бир нече ойлор айтылган. Биринчиси: Бул анын арам экенин билип туруп, аны адал санап жасаган адамга карата айтылган. Андай адам каапыр болот жана бул анын жазасы. Экинчиси: Түбөлүк калуудан чыныгы чексиздик эмес, өтө узак убакыт жана узак мөөнөткө калуу максат кылынган. Бул кудум: «Аллах падышанын бийлигин түбөлүк кылсын», – деп айтылгандай. Үчүнчүсү: Бул анын тийиштүү жазасы, бирок Аллах Таала ырайым кылып, мусулман болуп өлгөн адамдын тозокто түбөлүк калбай турганын кабарлаган."