Encyclopedia of Prophetic Hadiths

هنده‌ك كه‌سان ده‌رباره‌ی كاهن و فالگران پرسیار ژ پێغه‌مبه‌رێ خودێ (صه‌لات و سه‌لامێن خودێ ل سه‌ر بن) كر، ئینا پێغه‌مبه‌رێ خودێ (صه‌لات و سه‌لامێن خودێ ل سه‌ر بن) گۆته‌ وان: ((ئه‌و چ نینن)) گۆتن: ئه‌ی پێغه‌مبه‌رێ خودێ؛ هنده‌ك جاران ئه‌و تشته‌كی دبێژن و ئه‌و تشت ڕاست ده‌ردكه‌ڤیت، پێغه‌مبه‌رێ خودێ (صه‌لات و سه‌لامێن خودێ ل سه‌ر بن) گۆت: ((ئه‌جنه‌ ڤێ په‌یڤا ڕاست و دروست (ژ ئه‌سمانان) دبه‌ت و پاشی وه‌كی قدقدا مریشكێ دبه‌ت و دكه‌ته‌ د گوهێ هه‌ڤالێ خۆدا (كو كاهن و فالگرن یێن كو بانگه‌شه‌یا زانینا غه‌یبێ دكه‌ن)، ئه‌و ژی زێده‌تر ژ سه‌د دره‌وان تێكه‌لی وێ په‌یڤا ڕاست و دروست دكه‌ن)).

((ل سه‌ر قه‌بران نه‌ڕوینن و نڤێژان ل به‌رامبه‌ری وان نه‌كه‌ن)).

ده‌مێ نه‌خۆشییا مرنێ ل ده‌ڤ پێغه‌مبه‌ری (صه‌لات و سه‌لامێن خودێ ل سه‌ر بن) په‌یدا بووی، پارچه‌كا قوماشێ (خه‌میصه‌) دهاڤێته‌ سه‌ر ڕویێ خۆ، ڤێجا ده‌مێ پێ بێزار ببا و بێهن لێ ته‌نگ ببا ڕادكر و د وێ ڕه‌وشا دژواردا گۆت: «لَعْنَةُ اللَّهِ عَلَى اليَهُودِ وَالنَّصَارَى، اتَّخَذُوا قُبُورَ أَنْبِيَائِهِمْ مَسَاجِدَ»، ئانكو: ((نه‌فره‌تا خودێ ل جوهی و فه‌له‌یان (نه‌صارایان) بیت، ئه‌وان قه‌برێن پێغه‌مبه‌رێن خۆ كرنه‌ مزگه‌فت))، هشیاری ددا ژ وێ كریارا وان كری.

زه‌لامه‌ك هاته‌ ده‌ڤ پێغه‌مبه‌ری (صه‌لات و سه‌لامێن خودێ ل سه‌ر بن) و ده‌رباره‌ی كاره‌كی د گه‌ل ئاخڤت، پاشی گۆت: ئه‌وا خودێ بڤێت و ته‌ بڤێت. ئینا پێغه‌مبه‌ری (صه‌لات و سه‌لامێن خودێ ل سه‌ر بن) گۆت: ((ئه‌رێ ته‌ ئه‌ز كرمه‌ هه‌ڤئاست و شریك بۆ خودێ؟ بێژه‌: ئه‌وا خودێ ب تنێ بڤێت)).

ئه‌ز ل پشت پێغه‌مبه‌ری (صه‌لات و سه‌لامێن خودێ ل سه‌ر بن) ل سه‌ر گوهدرێژه‌كی یێ سویار بووم كو دگۆتنێ (عوفه‌یر)، ئینا گۆت: ((موعاز؛ ئه‌رێ تو دزانی مافێ خودێ ل سه‌ر عه‌بدان چییه و مافێ عه‌بدان ل سه‌ر خودێ چییه‌؟ من گۆت: خودێ و پێغه‌مبه‌رێ وی باشتر دزانن، ئینا پێغه‌مبه‌ری (صه‌لات و سه‌لامێن خودێ ل سه‌ر بن) گۆت: ((مافێ خودێ ل سه‌ر عه‌بدان ئه‌ڤه‌یه‌ ئه‌و عیباده‌تێ وی ب تنێ بكه‌ن و چ شریكان بۆ دروست نه‌كه‌ن، مافێ عه‌بدان ژی ل سه‌ر خودێ ئه‌ڤه‌یه‌ ئه‌و وی كه‌سی عه‌زاب نه‌ده‌ت یێ چ شریك بۆ وی دروست نه‌كربن))، من گۆت: ئه‌ی پێغه‌مبه‌رێ خودێ؛ ئه‌رێ ما ئه‌ز ڤێ مزگینییێ نه‌ده‌مه‌ خه‌لكی؟ گۆت: ((نه‌خێر مزگینییێ نه‌ده‌ وان، چونكی دێ خۆ هێلنه‌ ب هیڤییا وێ چه‌ندێڤه‌ و كار ناكه‌ن)).

((هه‌ر كه‌سێ بێژیت: ژ ئه‌لڵاهی پێڤه‌تر چ خودایێن ژ هه‌ژی په‌رستنێ نینن (لَا إِلَهَ إِلَّا اللهُ) و كوفرێ ب هه‌ر تشته‌كێ دی بكه‌ت كو ژ بلی خودێ عیباده‌ت بۆ بهێته‌ كرن؛ هنگی مالا وی و خوینا وی دێ حه‌رام بن، حساب و لێپرسینا وی ژی ل سه‌ر خودێیه‌)).

هاته‌ گۆتن: ئه‌ی پێغه‌مبه‌رێ خودێ؛ ل ڕۆژا قیامه‌تێ كیژ مرۆڤ ژ هه‌مییان پتر دێ ب شه‌فاعه‌تا ته‌ به‌خته‌وه‌ر بیت؟ گۆت: ((ئه‌بو هوره‌یره‌؛ من گومان دبر كو ژ ته‌ پێڤه‌تر كه‌سه‌ك پرسیارا ڤێ فه‌رمووده‌یێ ژ من ناكه‌ت، ئه‌ڤه‌ ژی ژ به‌ر وێ ڕژدییا ئه‌ز ل ده‌ڤ ته‌ دبینم ل سه‌ر ب ده‌ستڤه‌ئینانا فه‌رمووده‌یان، به‌خته‌وه‌رترین مرۆڤ ب شه‌فاعه‌تا من ل ڕۆژا قیامه‌تێ ئه‌وه‌ یێ ژ نیڤا دلێ خۆ گۆتی: ژ ئه‌لڵاهی پێڤه‌تر چ خودایێن ژ هه‌ژی په‌رستنێ نینن (لا إله إلا الله))).

عه‌لییێ كوڕێ ئه‌بو طالبی گۆته‌ من: ئه‌رێ ما ئه‌ز ته‌ فڕێنه‌كه‌م بۆ وی تشتێ پێغه‌مبه‌رێ خودێ (صه‌لات و سه‌لامێن خودێ ل سه‌ر بن) ئه‌ز بۆ فڕێكریم؟ ئه‌و تشت ئه‌ڤه‌یه‌ هه‌ر په‌یكه‌ره‌كێ تو ببینی؛ تو نه‌هێلی و خراب بكه‌ی و هه‌ر قه‌بره‌كێ بلندكری ژ ئه‌ردی؛ د گه‌ل ئه‌ردی ڕاست بكه‌ی.