Encyclopedia of Prophetic Hadiths

((هشیاربن (نێزیكه‌ ده‌مه‌ك دێ هێت) زه‌لامه‌ك یێ ل سه‌ر جهێ خۆ درێژ كرییه‌ و فه‌رمووده‌یه‌ك ژ فه‌رمووده‌یێن من دێ بۆ وی هێته‌ گۆتن، ئه‌و ژی دێ بێژیت: د ناڤبه‌را مه‌ و هه‌وه‌دا په‌ڕتووكا خودێیه‌، ڤێجا هه‌ر تشتێ مه‌ د وێدا دیت یێ حه‌لاله‌؛ ئه‌م ژی دێ ب حه‌لال دانین، و هه‌ر تشته‌كێ مه‌ د وێدا دیت یێ حه‌رامه‌؛ ئه‌م ژی دێ ب حه‌رام دانین، و ب ڕاستی هه‌ر تشته‌كێ پێغه‌مبه‌رێ خودێ (صه‌لات و سه‌لامێن خودێ ل سه‌ر بن) حه‌رام كربیت، وه‌كی وی تشتییه‌‌ یێ خودێ حه‌رام كربیت)).

((ل ڕۆژا قیامه‌تێ خودێ دێ زه‌لامه‌كی ژ ئوممه‌تا من ژ ناڤ هه‌می چێكرییان (ژ مرۆڤ و ئه‌جنه‌یان) جودا كه‌ت، پاشی دێ نۆت و نه‌ھ تۆمارێن وی (كو هه‌می د پڕن ژ گونه‌هان) ڕێزكه‌ت و ڤه‌كه‌ت، درێژييا هه‌ر تۆماره‌كێ ب ته‌مه‌ت دیتنا چاڤییه‌، پاشی خودێ دێ بێژیته‌ وی: ئه‌رێ تو تشته‌ك ژ ڤانه‌ ڕه‌د دكه‌ی؟ ئه‌رێ ئه‌و مه‌لائیكه‌تێن من یێن كریارێن ته‌ تۆمار دكرن و دنڤیسین چ زۆڕداری ل ته‌ كرییه‌؟ ئه‌و ژی دێ بێژیت: نه‌خێر خودایێ من، خودێ دێ بێژیتێ: ئه‌رێ ته‌ چ هێجه‌ت (و عوزر) بۆ وی تشتێ ته‌ كری هه‌نه‌؟ دێ بێژیت: نه‌خێر خودایێ من، خودێ دێ بێژیت: به‌لێ، ته‌ خێره‌ك یا ل ده‌ڤ مه‌ هه‌ی، ب ڕاستی ئه‌ڤرۆكه‌ چ زۆڕداری ل ته‌ ناهێته‌ كرن، پاشی دێ كارته‌ك هێته‌ ده‌رئێخستن و یا تێدا نڤیسییه‌: ئه‌ز شاهده‌ییێ دده‌م كو ژ ئه‌لڵاهی پێڤه‌تر چ خودایێن ژ هه‌ژی په‌رستنێ نینن و ئه‌ز شاهده‌ییێ دده‌م كو موحه‌ممه‌د عه‌بدێ خودێ و پێغه‌مبه‌رێ وییه‌ (أَشْهَدُ أَنْ لَا إِلَهَ إِلَّا اللهُ وَأَشْهَدُ أَنَّ مُحَمَّدًا عَبْدُهُ وَرَسُولُهُ)، پاشی خودێ دێ بێژیت: ته‌ڕازییا خۆ بینه‌، ئه‌و ژی دێ بێژیت: خودایێ من؛ ما ئه‌ڤ كارته‌ دێ چ كه‌ت ل به‌رامبه‌ری ڤان هه‌می تۆماران؟ خودێ دێ بێژیت: زۆڕداری ل ته‌ ناهێته‌ كرن، گۆت: ڤێجا دێ تۆمار هه‌می د ڕه‌خه‌كێ ته‌ڕازییێدا هێنه‌ دانان و ئه‌و كارت ژی دێ د ڕه‌خه‌كێ دی یێ ته‌ڕازییێدا هێته‌ دانان، پاشی تۆمار دێ سڤك بن و كارت دێ گران بیت و ژووردا چیت، چ تشت د گه‌ل ناڤێ خودێ گران نابیت)).

ده‌مێ ئایه‌تا: {ثُمَّ لَتُسْأَلُنَّ يَوْمَئِذٍ عَنِ النَّعِيمِ} هاتییه‌ خوارێ، زۆبه‌یری گۆت: ئه‌ی پێغه‌مبه‌رێ خودێ؛ ئه‌رێ دێ ل سه‌ر كیژ خۆشی و نیعمه‌تان پرسیار ژ مه‌ هێته‌ كرن، ئه‌رێ ئه‌و ب تنێ هه‌ردوو ڕه‌شاتینه‌ (قه‌سپ و ئاڤ)؟ گۆت: ((ئه‌و (پرسیاركرن) دێ هه‌ر هێت)).

پێغه‌مبه‌ری (صه‌لات و سه‌لامێن خودێ ل سه‌ر بن) به‌حسێ تشته‌كی كر، پاشی گۆت: ((ئه‌ڤه‌ دێ هنگی بیت ده‌مێ زانین دچیت و نامینیت))، من گۆت: ئه‌ی پێغه‌مبه‌رێ خودێ؛ چاوا دێ زانین چیت و نامینیت، د ده‌مه‌كیدا ئه‌م یێ قورئانێ دخوینین و یێ نیشا زارۆكێن خۆ دده‌ین، زارۆكێن مه‌ ژی دێ نیشا زارۆكێن خۆ ده‌ن هه‌تا ڕۆژا قیامه‌تێ (ڤێجا چاوا زانین دێ چیت و نامینیت)؟ گۆت: ((دایكا ته‌ ب ته‌ ببێژیت زیاد، من تو ب شاره‌زاترین زه‌لامێ مه‌دینێ ددیتی، ئه‌رێ ما ئه‌ڤه‌ جوهی و فه‌له‌ نینن، ئه‌و ژی یێ ته‌وڕات و ئنجیلێ دخوینن، به‌لێ كار ب تشته‌كێ د واندا هه‌ی ناكه‌ن؟!)).