Li pa fè pati de kominote nou an, nenpòt moun ki chèche siy nan zwazo (sipèstisyon) oswa ki fè sa pou lòt moun, nenpòt moun ki pratike divinasyon oswa ki fè sa pou lòt moun, oubyen nenpòt moun ki pratike maji oswa ki mande pou yo fè maji pou li.

Pwofèt la (ke lapè ak benediksyon Allah sou li) te avèti nenpòt moun pami kominote li a ki fè kèk aksyon, avèk pawòl li kote li te di: "li pa fè pati nou (li pa swiv chemen nou an nèt)", epi pami yo genyen: Premye a: "Moun ki pratike sipèstisyon oswa yo pratikel pou li". Orijin pratik sa a se te lage zwazo lè yap kòmanse yon travay, tankou yon vwayaj, yon biznis, oswa lòt bagay. Si zwazo a vole sou bò dwat, moun nan pran sa kòm yon bon siy (optimis) epi li kontinye sal vle fè a. Si zwazo a vole sou bò gòch, li pran sa kòm yon move siy (pesimis) epi li sispann pwojèl la. Li pa pèmèt pouw fè sa pou tèt ou, ni pouw mande yon lòt moun fè li pou ou. Epi, sa enkli tout fòm pesimis pou nenpòt bagay, kit se yon bagay ou tande oswaw wè, kit se zwazo, bèt, moun ki gen enfimite, chif, jou, oswa nenpòt lòt bagay. Epi dezyèm nan: «Moun ki aji kòm divinò oswa yo fè sa pou li», kidonk moun ki pretann li konnen sa ki kache (lavni) lè li sèvi ak zetwal yo ak lòt bagay ankò, oswa li ale jwenn moun ki pretann li konnen sa ki kache tankou yon divinò ak tout moun ki sanble ak yo, epi li kwè li nan sa lap di sou pretansyon li fè kòmkwa li konnen sa ki kache a; li demanti sa ki te desann sou Muhammad, ke lapè ak benediksyon Allah sou li. Twazyèmman: "Moun ki fè maji oswa ki mande pou yo fè maji pou li", se moun ki fè maji a ak pwòp tèt li, oswa ki chaje yon moun fè yon maji pou li; pou li ka fè yon moun byen oswa poul fèl mal, oswa li mare yon ne nan yon fil epi li fè maji sou li pandan lap resite fòmil ak priyè majik ki entèdi epi li soufle sou li.