Encyclopedia of Prophetic Hadiths

«wakat ning Wẽn d sẽn wa n naan arzãnã la Bugmã, A tʋmsa a Gibriila, tɩlgr be a yĩnga, arzãnẽ wã, n yeel-a : « ges-a la f ges bũmb ning Mam sẽn sεgl a pʋgẽ wã, n na n kõ nebã ». T’a Gibriil ges-a n lebg wa yeele : m wẽen ne Fo zɩslemã, ned ka be, n na n wʋm yãwã kibare, rẽndame t’a kẽ-a. Tɩ Wẽnd sagl tɩ b gũbg arzãnã ne yεl nins yõor sẽn kisã. La A yeel-a « ges-a la bũmb ning Mam sẽn sεgl tɩ be a pʋgẽ wã, n na n kõ nebã» . T’a lebg n tɩ ges-a, n mik tɩ b gilg-a lame ne yεl nins yõor sẽn kisi. T’a Gibriil yeele: “ m wẽen ne Fo zɩslemã, m yεεsdame tɩ ned baa a yembr kõn n kẽ-a ye” T’a yeele: kẽng n tɩ ges Bugmã la f ges bũmb ning Mam sẽn sεgl a pʋgẽ, n na n bĩng a nebã. T’a tʋg n ges-a, n mik tɩ Bugmã zombda taaba, t’a lebg n wa n yeel Wẽnde: “ m wẽen ne Fo zɩslemã ned baa a yembr kõn n kẽ yãwã ye”. Tɩ Wẽnd sagl tɩ b gilg Bugmã ne yõor yamleoog teedo, tɩ Wẽnd yeel-a: “lebg n tɩ ges-a”. T’a Gibriil tʋg n ges-a, n mik t’a yaa sẽn gũbg ne yõyã yamleoodo, t’a lebg n wa yeele: “ m wẽen ne Fo zɩslemã, ad mam yεεsdame tɩ ned baa a yembr ka na n põse, n ka kẽ Bugmã ye».

«Ned ning sẽn wa n pãrg keelem n bas lɩslaama, Wẽnd pãrgda keelem n bas-a, sẽn yi dũni yikr raar keelemã, la ned ning sẽn wa n yols yell kãenkãe soab zugu, Wẽnd yolsd a zugu dũni la laahre. La ned ning sẽn wa n luda lɩslaam bãngo, Wẽnd maand-a la sʋtr dũni wã yikr raare. La Wẽnd yɩta sõngda ne A yamba tɩ yambã sã n be a ma-bi-taag sõngr poorẽ, la ned ning sẽn tuka sor n baood bãngr a pʋgẽ, Wẽnd yolsda sor ne-a n tʋg arzãna. La neb ka yɩ sẽn na tigme Roog sẽn yaa Wẽnd rotã pʋga, n karem Wẽnd gafã, la b pẽesd-a bãmb ne taab sʋka, rẽndame tɩ yĩn-yõgneg sig b zugu tɩ yolsgã bui-ba, tɩ malεgsã gilg-ba, tɩ Wẽnd tẽeg b yelle zama ning sẽn be A nengẽ wã pʋgẽ, la ned ning tʋʋmd sẽn wa n maag ne-a a buud ka na n taas-a ye».

«Ned sã n pʋʋs zama pʋgẽ, a yel-sõmdã yɩɩda ned sẽn na n pʋʋs a zakẽ, la a sẽn na n pʋʋs a raagẽ pisi la saare, la rẽnda yaa tɩ yãmb ned fãa sã n yõk koom, n maneg koomã yõgbo, rẽ poorẽ n yi n kẽng miisrẽ wã, tɩ bũmb ka kẽng ne-a rẽnda Pʋʋsgã, a ka rat bũmb sã n ka Pʋʋsgã, a ka zẽkd a na-tagdre rẽndame tɩ Wẽnd zẽk dargε ne-a, la A lub yel-beed ne a na-tagdrã zẽkre, halɩ t'a wa tʋg n ta miisrẽ wã. La a sã n kẽ miisrã pʋgẽ, a bee Pʋʋsg pʋgẽ bala, tɩ sã n mikame tɩ yaa Pʋʋsgã n gɩdg-a t'a be beenẽ. La malεgsã pʋʋsda ned fãa, sã n mikame t'a ket n bee ɑ Pʋʋsgã zĩigẽ, b yetame: m Soab a Wẽnde! Yols-a, m Soab a Wẽnde! Yaaf-a, m Soab a Wẽnde! Reeg a tuubgu. T'a sã n ka maan zũnuub tʋʋma a zĩigẽ wã, maa a koomã sã n ka kao».

«Sã n pa m sẽn da na n weoog muumin-rãmbã -maa: m poorẽ-rãmbã-, m rag n na sagl-b ne ra-wãbdga, Pʋʋsg wakat fãa».

«Ad Wẽnd zabda ra-taare, la muumim me zabda ra-taare, la Wẽnd ra-taarã zabre yaa muumim sẽn wat n maan Wẽnd sẽn gɩdgã».

Neb sẽn yi Nabiyaamã sahaabsẽ, -Wẽnd pʋʋsg la A tɩlgr be a yĩnga-, n sok Nabiyaamã : tõnd mi n tagsda d mensẽ wã, bũmb ning sẽn yaa bedre, tõnd ned baa a ye ka tõe n gom ne a noorẽ ye, tɩ Nabiyaamã yeele : « yãmb paama yel-kãngã y sũy wã ? » tɩ b yeele: « n-yee » la Nabiyaamã yeele : «ad yaa yẽ meng la sɩd-kũunã vẽenega».

«A sʋɩtãan loeta yãmb ned fãa kãarẽ, a sã n gõe, loees a tãabo, a yembr fãa wẽedɑ yʋn-wok fo zug, n yeele bɩ f gãande, la a sã n nek n tẽeg Wẽnd yʋʋrã, la loεεg a yembr sẽn lokde, la a sã n yõk koom la loεεg a yembr sẽn lokde, la a sã n pʋʋse, la loεεg a yembr sẽn lokde, t'a lebg yĩn-yẽesg soaba, t'a mengã tar laafɩ, lɑ sã n ka yɩ woto a nekda yibeoogo t'a mengã yaa gõo, n yaa kʋɩɩma».

«Ned ning sẽn loe Ramadaanã, ne liimaoongo (sɩd kũuni) la yel-sõmd tẽebo, b yaafd-a lame, a zunuubã sẽn reng taoorã».