Encyclopedia of Prophetic Hadiths

«Ra wẽen-y ne rʋbsã ye, la ra wẽen-y ne saam-rãmbã me ye».

Tõnd rag n bee Nabiyaamã nengẽ, (Wẽnd pʋʋsg la A tɩlgr be a yĩngɑ) t'a ges n tʋg kiuugã yʋngo -rat n yeel t'ɑ rasem piig la a naasã rɑɑre- n yeele: « Ad yãmb na n yãa y Soabã, wala yãmb sẽn ne kiu-kãngã wã, la yãmb ka maand sik a yãabã pʋgẽ, la yãmb sã n tʋlla t'a ra wa põsg yãmbã, bɩ y pʋʋs taoor tɩ tɩ wĩndgã na n ka puki la taoor t'a na n ka lʋɩ, bɩ y maane». Rẽ poorẽ t'a kareme: «{la f yɩlg f Soabã yʋʋrã ne pẽka, taoor tɩ wĩntoog na n pa puki, la taoor t'a na n pa lʋɩ ye}».

«Ka tar sẽn yaa sãnem bɩ wanzur soaba, sẽn ka kõta Zaka, rẽndame tɩ dũni yikr raarã b rɩkd-a lame n maan piisds sẽn yaa Bugum sɑ-tʋʋlse, tɩ b wɩng-a Gεhannem pʋgẽ wã, n rɩk-a n piis a lʋgã la a rĩirã la a poorã, a sẽn maag fãa la b sẽn lebsd-a, raarã woglem yaa yʋʋm tus-pis-nu. Halɩ tɩ b wa bʋ yembsã ne taab sʋka, t'a yã a sorã, maa tɩ yaa arzãnã maa Bugmã».

Tõnd ra zĩime, Wẽnd Tẽn-tʋʋm kɩrengã (Wẽnd pʋʋsg la A tɩlgr be a yĩnga) la a Abuu Bakr ne a ʿƲmar ra beebe n lagem neb saare, tɩ Wẽnd Tẽn-tʋʋmã (Wẽnd pʋʋsg la A tɩlgr be a yĩnga) yik n yi tõnd sʋka, n kaoos bilf n ka wa ye, tɩ tõnd yεεs tɩ b na n wa pas-a lame tɩ tõnd ka bãng ye, tɩ tõnd yiki, la maam la rẽenem ned sẽn bir n yiki, tɩ mam yi n baood Wẽnd Tẽn-tʋʋmã (Wẽnd pʋʋsg la A tɩlgr be a yĩnga) halɩ n tʋg n ta pʋʋg sẽn yaa Madiin rãmbã pʋʋgo, yaa Banii Nagεεr rãmba neda, tɩ mam gilg pʋʋgã, tɩ tõe tɩ m yã noor n tũ n kẽ, la m ka yã ye, la mam sẽn ne ko-sor sẽn tũud lalg (võore) n kẽed pʋʋg sʋka, n yit pulg sẽn be yɩngã n watẽ, tɩ mam põd n menga n kẽ, n kẽng Wẽnd Tẽn-tʋʋmã nengẽ (Wẽnd pʋʋsg la A tɩlgr be a yĩnga), t'a yeele: «Abaa hʋrayra» tɩ mam yeel: n-yee Wẽnd Tẽn-tʋʋmã, t'a yeele: «Yaa bõe n wa ne-fo?» Tɩ mam yeele: fo ra bee tõnd sʋka, n yiki la fo kaoosame, tɩ tõnd yεεs tɩ bũmb na n wa maan foom tɩ tõnd ka bãng ye, tɩ tõnd yεεge, la maam la rẽenem n yik n wa pʋʋgẽ wã n gilgdẽ, la mam põda wala waaga sẽn põt to-to wã n kẽ, la nebã bee mam poorẽ, tɩ Nabiyaamã (Wẽnd pʋʋsg la A tɩlgr be a yĩnga) yeele: «Abaa Hʋrayra» la a rɩk a neod a yiibã n kõ maam n yeele: «Kẽng ne mam neood a yiibã woto wã, tɩ fo sẽn sεg ned ning lal-kãngã poorẽ t'a maan kaset tɩ soab ka be tɩ sã n ka Wẽnde, n tar bãng-n-wãak ne a sũurã, bɩ f noog a sũur ne Arzãna». La rẽenem ned mam sẽn sεg yaa a ʿƲmar, t'a yeele: yaa bõe neood a yiib la woto Abaa Hʋrayra? Tɩ mam yeele: Bãmbã b yiibã, yaa Wẽnd Tẽn-tʋʋmã neoodã (Wẽnd pʋʋsg la A tɩlgr be a yĩnga), a tʋmsa maam ne neood a yiibã, tɩ m sẽn sεg ned ning t'a maan kaset tɩ soab ka be tɩ sã n ka Wẽnde, n tar bãng-n-wãak ne a sũurã, bɩ m noog a sũur ne Arzãna. T'a ʿƲmar rɩk a nugã n wẽ mam yãoogã, tɩ m tar n lʋɩ m sεεgã zugu, n yeele: lebge Abaa Hʋrayrat, tɩ mam lebg n kẽng Wẽnd Tẽn-tʋʋmã nengẽ (Wẽnd pʋʋsg la A tɩlgr be a yĩnga), n tʋg n kũmdẽ, t'a ʿƲmar pʋgl maam n wa, tɩ Wẽnd Tẽn-tʋʋmã (Wẽnd pʋʋsg la A tɩlgr be a yĩnga) yeele: «Yaa bõe n tar foom yaa Abaa Hʋrayra?» Tɩ mam yeele: m sεga a ʿƲmar n kõ-a kibar ne gomd ning fo sẽn tʋms maam ne wã, t'a wẽ mam yãoogã, tɩ mam lʋɩ m kɩgbã zugu, la a yeel maam tɩ m lebge, tɩ Wẽnd Tẽn-tʋʋmã yeele: (Wẽnd pʋʋsg la A tɩlgr be a yĩnga) «ʿƲmar yaa bõe n kɩt tɩ fo maam woto?» La a yeel yã, Wẽnd Tẽn-tʋʋma, mam saamb la m ma rɩkd n yaoome n põsg fo yõorã, foom n tʋms a Abuu Hʋrayrat ne neood a yiibã, t'a sẽn sεg ned ning t'a maan kaset tɩ soab ka be tɩ sã n ka Wẽnde, n tar bãng-n-wãak ne a sũurã, bɩ a noog a sũur ne Arzãna? T'a yeele: «N-yee» T'a ʿƲmar yeele: bɩ f ra maan woto ye, tɩ ad mam yεεsda nebã na teeg rẽ, bas-b tɩ b tʋme, tɩ Wẽnd Tẽn-tʋʋmã (Wẽnd pʋʋsg la A tɩlgr be a yĩnga) yeele: «Bɩ f bas-b tʋ b tʋme».

« Ad Wẽnd na n yiisa ned mam poorẽ rãmbẽ wã, bõn-naandsã taoore, yikrã raarã, n yεdg a tʋʋm sεb pis-wae la a wae, sebr fãa gilli, a yaa nif gesg tεkẽ, rẽ poorẽ tɩ Wẽnd yeel-a : fo kɩɩsda bũmb tʋʋm-kãensã pʋgẽ baa fʋɩ bɩɩ ? Rẽ yĩnga Ma malεgs nins sẽn yaa gũusdbã, n yaa gʋlsdbã b wẽga foom bɩɩ ? T’a yeele : « ayoo ! M Soaba Wẽnde » tɩ Wẽnd yeel-a : « rẽ yĩnga fo tara padang bɩɩ ? » T’a yeele : « ayoo ! M Soaba Wẽnde » Tɩ Wẽnd yeel-a « ad fo tara tʋʋm sõng Tõnd nengẽ, ad wẽgb ka be fo zug rũnda ye » tɩ b yiis seb bila tɩ gʋlsa a pʋgẽ, Ashadu Anlaa’ilaa illallah, wa ashadu anna Muhammadan abduhuu wa Rasuuluhuu (m maan kaset tɩ soab sẽn na n tũ n tɩlg ka be rẽnda Wẽnde, m leb n maana kaset t’a Mohammad yaa Wẽnd yamba n leb n yaa A Tẽn-tʋʋma) tɩ Wẽnd yeele : « wa ne fo tʋʋma » tɩ nedã yeele : « seb-kãngã na n maana bõe ne seb-kãensã fãa gilli ? » Tɩ Wẽnd yeel-a : « ad foom, b ka na n vẽg-f ye » [Nabiyaamã yeelame] tɩ b rɩk tʋʋm wẽnsã sebrã n ning kɩreng a yembre, la b rɩk sebrã n ning kɩreng a to wã, tɩ sebrã sẽn ningẽ wã zɩsge, tɩ sebã sẽege, rẽnd bũmb baa fʋɩ ka be sẽn na n zɩsg n naag Wẽnd yʋʋrã ye ».

«Ad neb n na n zĩndi, zamaan yaoolem mam poorẽ dãmbẽ wã, n yẽsd yãmb ne kibay nins yãmb sẽn ka wʋme, y yaab-rãmb ka wʋme, bɩ y gũus y mens ne-ba».

M yeelame: yaa Wẽnd Tẽn-tʋʋmã, wilgd maam gomde, lɩslaangã pʋga, m sẽn kõn n le sok-a ned baa a yembr sã n ka foom, t'a yeele: «yeele: m kõo sɩd ne Wẽnde, rẽ poorẽ, tẽeg tɩrga».

«Yãmb na n pʋga neb nins sẽn reng yãmb taoorã na-kẽndre, nug-yakemd la nug-yakemde, la kãntɩɩg la kãntɩɩga, hal tɩ b sã n wa kẽ wiuug bokẽ, yãmb na n pʋg-b lame», tɩ tõnd yeele: Wẽnd Tẽn-tʋʋma, yaa Yahuud-rãmbã la Nasaar-rãmbã bɩɩ? T'a yeele: «La na n yɩɩ ãnda?».