Encyclopedia of Prophetic Hadiths

پێغه‌مبه‌ر (صه‌لات و سه‌لامێن خودێ ل سه‌ر بن) د به‌ر دوو گۆڕاندا ده‌ربازبوو و گۆت: ((ئه‌و هه‌ردوو یێن دهێنه‌ سزادان و ئه‌و ل سه‌ر تشته‌كێ وه‌سا ناهێنه‌ سزادان كو ل ده‌ڤ هه‌وه‌ یێ مه‌زن بیت (به‌لێ ل ده‌ڤ خودێ یێ مه‌زنه‌)، یێ ئێكێ خۆ ژ میزێ نه‌دپاراست، یێ دی ژی ئاخڤتن ڤه‌دگوهاستن (فه‌سادی دكر))). پاشی چه‌قه‌كێ ته‌ڕ یێ دارخورمێ ئینا و كره‌ دوو كه‌ر و ل سه‌ر هه‌ر گۆڕه‌كی ئێك چكلاند. گۆتنێ: ئه‌ی پێغه‌مبه‌رێ خودێ، ته بۆچی‌ ئه‌ڤه‌ كر؟ گۆت: ((دا به‌لكی هندی هشك نه‌بووین سزای ل سه‌ر وان سڤك بكه‌ن)).

ده‌مێ پێغه‌مبه‌رێ خودێ (صه‌لات و سه‌لامێن خودێ ل سه‌ر بن) موعازێ كوڕێ جه‌به‌لی هنارتییه‌ یه‌مه‌نێ، گۆته‌ وی: ((بزانه‌ تو دێ چییه‌ د ناڤ هنده‌ك كه‌سێن خودانێن په‌ڕتووكێدا، ڤێجا ئه‌گه‌ر تو چوویه‌ د ناڤ واندا؛ ده‌ستپێكێ تو گازی وان بكه‌ ئه‌و شاهده‌ بده‌ن كو ژ ئه‌لڵاهی پێڤه‌تر چ خودایێن ژ هه‌ژی په‌رستنێ نینن و كو موحه‌ممه‌د پێغه‌مبه‌رێ خودێیه‌، ئه‌گه‌ر وان بۆ ڤێ چه‌ندێ گوهدارییا ته‌ كر، هنگی تو بێژه‌ وان كو خودێ د هه‌ر شه‌ڤه‌ك و ڕۆژه‌كێدا پێنج نڤێژ یێن ل سه‌ر وان فه‌ڕزكرین و ئه‌گه‌ر بۆ ڤێ چه‌ندێ گوهدارییا ته‌ كر، هنگی تو بێژه‌ وان كو خودێ صه‌ده‌قه‌یه‌ك (زه‌كات) یا ل سه‌ر وان فه‌ڕزكری، ژ زه‌نگینێن وان دهێته‌ وه‌رگرتن و ل سه‌ر هه‌ژارێن وان دهێته‌ دابه‌شكرن، ئه‌گه‌ر وان بۆ ڤێ چه‌ندێ گوهدارییا ته‌ كر، هنگی هشیاربه‌ نه‌چی مالێ وان یێ ژ هه‌مییان باشتر ژ وان وه‌ربگری و خۆ ژ دوعایێن مرۆڤێ سته‌ملێكری بپارێزه‌، چونكی ب ڕاستی چ په‌رده‌ و ناڤبڕ د ناڤبه‌را دوعایا وی و خودێدا نینن)).

پێغه‌مبه‌رێ خودێ (صه‌لات و سه‌لامێن خودێ ل سه‌ر بن) گۆته‌ ژنه‌كا ئه‌نصاری - ئبن عه‌بباسی ناڤێ وێ ئینا بوو، به‌لێ من یێ ژبیركری‌-: «چ تشت بوویه‌ ئه‌گه‌ر كو تو د گه‌ل مه‌ نه‌هێیه‌ حه‌جێ؟» وێ ژنێ گۆت: مه‌ ب تنێ دوو حێشترێن ئاڤكێشانێ هه‌بوون، بابێ زارۆكێ من (زه‌لامێ من) و كوڕێ من ل سه‌ر ئێكێ ژ وان چوونه‌ حه‌جێ، و ئێك ژی بۆ مه‌ هێلا دا ئاڤێ پێ بكێشین، (ئینا پێغه‌مبه‌ری) گۆت: «ئه‌گه‌ر ڕه‌مه‌زان هات؛ عومرێ بكه‌، چونكی عومره‌ك د ڕه‌مه‌زانێدا به‌رامبه‌ری حه‌جه‌كێیه‌».

((چ ڕۆژ نینن كریارێن باش تێدا خۆشتڤیتر بن ل ده‌ڤ خودێ ژ ڤان ڕۆژان))، ئانكو: ده‌هكێن حاجییان، گۆتن: ئه‌ی پێغه‌مبه‌رێ خودێ، خۆ جیهادا د ڕێكا خودێ ژیدا؟ گۆت: ((خۆ جیهادا د ڕێكا خودێ ژیدا، ب تنێ ئه‌و نه‌بیت زه‌لامه‌ك ب نه‌فسا خۆ و مالێ خۆ ده‌ركه‌ڤیت و خۆ تشته‌ك ژ وان نه‌زڤڕیته‌ڤه‌)).

((فه‌رمان ل من هاتییه‌ كرن كو سوجدێ ل سه‌ر حه‌فت هه‌ستییان ببه‌م: ل سه‌ر ئه‌نییێ -و ب ده‌ستێ خۆ ئاماژه‌ كره‌ دفنا خۆ-، هه‌ردوو ده‌ستان، هه‌ردوو چۆكان و سه‌رێ تبلێن پێیان و كو جلك و پرچا خۆ كۆم نه‌كه‌م)).

ژ پێغه‌مبه‌ری (صه‌لات و سه‌لامێن خودێ ل سه‌ر بن) د وێ چه‌ندێدا یا ژ خودایێ خۆ ڤه‌دگوهێزیت كو گۆتییه‌: گۆت: ((مسوگه‌ر خودێ خێر و گونه‌ھ نڤیسینە، پاشی ئه‌ڤ چه‌نده‌ ڕۆهنكر، ڤێجا هەر کەسێ دلێ خۆ ببه‌ته‌ خێر و باشییه‌كێ و وێ نه‌كه‌ت؛ خودێ دێ وێ ل ده‌ڤ خۆ بۆ وی ب خێره‌كا ته‌مام نڤیسیت، و ئه‌گه‌ر وی دلێ خۆ برێ و كر؛ خودێ دێ وێ ل ده‌ڤ خۆ ب ده‌ھ خێران نڤیسیت هه‌تا دچیته‌ حه‌فت سه‌دان و گه‌له‌ك پتر، و ئه‌گه‌ر وی دلێ خۆ بره‌ گونه‌ھ و خرابییه‌كێ و نه‌كر؛ خودێ دێ وێ ل ده‌ڤ خۆ بۆ وی ب خێره‌كا ته‌مام نڤیسیت، و ئه‌گه‌ر دلێ خۆ برێ و كر؛ دێ بۆ وی ب گونه‌هه‌كێ ب تنێ نڤیسیت))

((پشكێن میراتی یێن دیار و ئاشكه‌را بده‌نه‌ خودانێن وان، ئه‌وا دمینیت ژی بۆ نێزیكترین زه‌لامییه‌ ژ مرۆڤێن مری)).