Encyclopedia of Prophetic Hadiths

((ل ڕۆژا قیامه‌تێ خودێ دێ زه‌لامه‌كی ژ ئوممه‌تا من ژ ناڤ هه‌می چێكرییان (ژ مرۆڤ و ئه‌جنه‌یان) جودا كه‌ت، پاشی دێ نۆت و نه‌ھ تۆمارێن وی (كو هه‌می د پڕن ژ گونه‌هان) ڕێزكه‌ت و ڤه‌كه‌ت، درێژييا هه‌ر تۆماره‌كێ ب ته‌مه‌ت دیتنا چاڤییه‌، پاشی خودێ دێ بێژیته‌ وی: ئه‌رێ تو تشته‌ك ژ ڤانه‌ ڕه‌د دكه‌ی؟ ئه‌رێ ئه‌و مه‌لائیكه‌تێن من یێن كریارێن ته‌ تۆمار دكرن و دنڤیسین چ زۆڕداری ل ته‌ كرییه‌؟ ئه‌و ژی دێ بێژیت: نه‌خێر خودایێ من، خودێ دێ بێژیتێ: ئه‌رێ ته‌ چ هێجه‌ت (و عوزر) بۆ وی تشتێ ته‌ كری هه‌نه‌؟ دێ بێژیت: نه‌خێر خودایێ من، خودێ دێ بێژیت: به‌لێ، ته‌ خێره‌ك یا ل ده‌ڤ مه‌ هه‌ی، ب ڕاستی ئه‌ڤرۆكه‌ چ زۆڕداری ل ته‌ ناهێته‌ كرن، پاشی دێ كارته‌ك هێته‌ ده‌رئێخستن و یا تێدا نڤیسییه‌: ئه‌ز شاهده‌ییێ دده‌م كو ژ ئه‌لڵاهی پێڤه‌تر چ خودایێن ژ هه‌ژی په‌رستنێ نینن و ئه‌ز شاهده‌ییێ دده‌م كو موحه‌ممه‌د عه‌بدێ خودێ و پێغه‌مبه‌رێ وییه‌ (أَشْهَدُ أَنْ لَا إِلَهَ إِلَّا اللهُ وَأَشْهَدُ أَنَّ مُحَمَّدًا عَبْدُهُ وَرَسُولُهُ)، پاشی خودێ دێ بێژیت: ته‌ڕازییا خۆ بینه‌، ئه‌و ژی دێ بێژیت: خودایێ من؛ ما ئه‌ڤ كارته‌ دێ چ كه‌ت ل به‌رامبه‌ری ڤان هه‌می تۆماران؟ خودێ دێ بێژیت: زۆڕداری ل ته‌ ناهێته‌ كرن، گۆت: ڤێجا دێ تۆمار هه‌می د ڕه‌خه‌كێ ته‌ڕازییێدا هێنه‌ دانان و ئه‌و كارت ژی دێ د ڕه‌خه‌كێ دی یێ ته‌ڕازییێدا هێته‌ دانان، پاشی تۆمار دێ سڤك بن و كارت دێ گران بیت و ژووردا چیت، چ تشت د گه‌ل ناڤێ خودێ گران نابیت)).

((ل دویماهییا ئوممه‌تا من دێ هنده‌ك مرۆڤ په‌یدا بن كو دێ هنده‌ك ئاخڤتنێن وه‌سا بۆ هه‌وه‌ بێژن نه‌ هه‌وه‌ و نه‌ باب و باپیرێن هه‌وه‌ چ جاران گوهـ لێ نه‌بووینه‌، ڤێجا هشیاری وان بن و خۆ ژ وان بپارێزن و وان ژ خۆ دویر بكه‌ن)).

من گۆت: ئەی پێغەمبەرێ خودێ، ئاخڤتنه‌كێ د ئیسلامێدا بۆ من بێژە کو ژ بلی تە پرسیارێ ژ كه‌سه‌كێ دی نەکەم، گۆت: ((بێژە: من باوەری ب خودێ ئینا، پاشی ل سه‌ر ڤێ گۆتنێ به‌رده‌وامبه‌ و ڕاسته‌ڕێبه‌)).

«هوین دێ ل دویڤ ڕێکا ملله‌تێن به‌ری خۆ چن، بهۆست بهۆست و گه‌ز گه‌ز، هه‌تا ئه‌گه‌ر ئه‌و چووبنه‌ د ناڤ كۆنا بزنمشكی ژیڤه‌؛ هوین دێ هه‌ر ل دویڤ چن». مه‌ گۆت: ئه‌ی پێغه‌مبه‌رێ خودێ؛ مه‌ره‌ما ته‌ جوهی و فه‌له‌نه‌؟ گۆت: «پا كینه‌؟».

((سویند ب وی خودایێ نه‌فسا موحه‌ممه‌دی د ده‌ستیدا، هه‌ر كه‌سه‌كێ ڤێ ئوممه‌تێ (ڤێ جیهانێ) گوهـ ل من ببیت، چ جوهی بیت یان فه‌له‌، پاشی بمریت و باوه‌رییێ ب وێ په‌یامێ نه‌ئینیت یا ئه‌ز پێ هاتیمه‌ هنارتن؛ هنگی دێ ژ وان كه‌سان بیت یێن دچنه‌ جه‌هنه‌مێ)).

((نه‌ ژ مه‌یه‌ یێ باڵنده‌يه‌كى بفرينيت يان بۆ بێته‌ فراندن - ب مه‌به‌ستا ڕه‌شبينيێ يان گه‌شبينييێ - ، یان فالگریێ بکه‌ت یان بۆ بهێته‌ کرن، یان سحر و سێره‌به‌ندیێ بکه‌ت یان بۆ بهێته‌ کرن، هەر کەسێ گرێیەکێ گرێدەت و هه‌ر كه‌سێ بچیته‌ ده‌ڤ فالگره‌كی و باوه‌ریێ ب گۆتنێن وی بینیت، ئه‌ڤه‌ وی كوفری ب وێ كر یا بۆ موحه‌ممه‌دی (صه‌لات و سه‌لامێن خودێ ل سه‌ر بن) هاتییه‌ خوارێ)).

«ئه‌رێ ئه‌ز تشته‌كی ده‌رباره‌ی ده‌ججالی بۆ هه‌وه‌ نه‌بێژم كو چ پێغه‌مبه‌ران به‌ری من بۆ ملله‌تێ خۆ به‌حس نه‌كربیت؟ ئه‌و یێ كوره‌یه ب چاڤه‌كی‌ و ئه‌و دێ هێت و دێ تشته‌كێ وه‌كی به‌حه‌شت و جه‌هنه‌مێ د گه‌لدا بیت، ڤێجا ئه‌وا ئه‌و دبێژیتێ به‌حه‌شته؛‌ ئه‌و ب ڕاستی جه‌هنه‌مه‌، و ئه‌ز هه‌وه‌ ژێ هشیار دكه‌م وهه‌وه‌ ژێ دترسینم هه‌روه‌كی چاوا نووحی ملله‌تێ خۆ ژێ ترساندی».

((ئيسلام ل سه‌ر پێنج ستوینان هاتییه‌ ئاڤاكرن: شاهده‌دان كو ژ ئه‌لڵاهی پێڤه‌تر چ خودایێن ژ هه‌ژی په‌رستنێ نینن و موحه‌ممه‌د پێغه‌مبه‌رێ خودێیه‌، كرنا نڤێژێ، دانا زه‌كاتێ، چوونا حه‌جێ و گرتنا ڕۆژییێن هه‌یڤا ڕه‌مه‌زانێ)).