Encyclopedia of Prophetic Hadiths

Mwen te di: "O Mesaje Allah ,ki sa ki veso basen dlo a (Al-Hawd)?" Li te reponn: "Mwen fè sèman sou Sila a ki kenbe nanm Muhammad nan men li a, veso li yo anpil pase kantite zetwal ak planèt ki nan syèl la, menm jan ak yon nwit ki nwa epi ki klè (kote tout zetwal yo parèt). Yo se veso ki soti nan Paradi a; nenpòt moun ki bwè ladan li pap janm swaf ankò aprèsa. Gen 2 kanal ki soti nan Paradi a kap vide dlo ladan li; moun ki bwè ladan li pap janm swaf. Lajè basen an egal ak longèl, distans ki ant Amman ak Ayla. Dlo a pi blan pase lèt, epi li pi dous pase siwo myèl."

Pwofèt la (lapè ak benediksyon Allah sou li) rapòte pawòl Allah a ki di: "O sèvitèm yo! Mwen entèdi enjistis pou tèt mwen, epi mwen fèl tounen yon bagay ki entèdi ant nou menm tou. Donk, pa fè enjistis youn ak lòt. O sèvitèm yo! Nou tout pèdi, eksepte moun mwen gide a; donk, mandem gidans, map gide nou. O sèvitè m yo! Nou tout grangou, eksepte moun mwen bay manje a; donk, mandem manje, map nouri nou. O sèvitèm yo! Nou tout toutouni, eksepte moun mwen abiye a; donk, mandem rad, map abiye nou. O sèvitèm yo! Nou fè erè lajounen kou lannwit, e mwen menm mwen padone tout peche; donk, mandem padon, map padone nou. O sèvitèm yo! Nou pap janm rive fèm mal pou nou ta blesem, e nou pap janm rive fèm byen pou nou ta potem benefis. O sèvitèm yo! Si premye ak dènye pami nou, moun ak djinn, ta gen kè moun ki pi sen an pami nou, sa pa tap ajoute anyen nan wayòm mwen an. O sèvitèm yo! Si premye ak dènye pami nou, moun ak djinn, ta gen kè moun ki pi mechan an pami nou, sa pa tap retire anyen nan wayòm mwen an. O sèvitèm yo! Si premye ak dènye pami nou, moun ak djinn, te kanpe nan yon menm kote epi yo te mandem, epi mwen te bay chak moun sal mande a, sa pa tap diminye anyen nan sam posede, sof jan yon zegwi diminye lanmè a lè ou plonjel ladan li. O sèvitèm yo! Se sèlman aksyon nou yo map anrejistre pou nou, epi map peye nou konplè pou yo. Donk, nenpòt moun ki jwenn byen, se poul fè lwanj pou Allah ; epi nenpòt moun ki jwenn lòt bagay (sa ki mal), se pou li pa blame pèsonn sof tèt li."