Encyclopedia of Prophetic Hadiths

Mam rag n zĩi Nabiyaamã nengẽ (Wẽnd pʋʋsg la A tɩlgr be a yĩngɑ) tɩ raop a yiib tʋʋd taaba, tɩ b yiibã yembr nengã mooge, t'a koko gĩinã yiki, tɩ Nabiyaamã (Wẽnd pʋʋsg la A tɩlgr be a yĩngɑ) yeele: «Mam mii gomde, t'a sã n yεεl-a, Wẽnd na n sεεsa sẽn be ne-a wã, a sã n yeele: m kot gũudum ne Wẽnde, n yi a sʋɩɩtãana, Wẽnd loogda ne bũmb ninga sẽn be ne-a wã» Tɩ b yeel raoã tɩ Nabiyaamã (Wẽnd pʋʋsg la A tɩlgr be a yĩngɑ) yeelame: «kos gũudum ne Wẽnde n yi a sʋɩɩtãana», la a yeel yã: rẽ yĩnga gẽemd n tar maam laa?

«Yãmb ned fãa sã n na n rɩ, bɩ a rɩ ne a rɩtgo, a sã n na n yũ, bɩ a yũ ne a rɩtgo, bɑlɑ a sʋɩtãan rɩta ne a gobre, la a yũud ne a gobre».

«Ned ning fãa sẽn yeel a ma-biig a to: kɩfrã, ad b yiibã yembr n sɩd tall gomdã, sã n mikame tɩ nedã yaa wala a sẽn yeelã, sã n ka woto, a na n lebg n waa yẽ zugu».

«Yãmb yembr fãa ka kõt sɩda (ne Wẽnde) hal t'a wa tʋg n nong ne a ma-biiga bũmb ning a sẽn nong ne a mengã».

Tɩ neb sẽn yi Nabiyaamã Ṣahaabsẽ wã (Wẽnd pʋʋsg la A tɩlgr be a yĩnga), yeela Nabiyaamã (Wẽnd pʋʋsg la A tɩlgr be a yĩnga): Wẽnd Tẽn-tʋʋmã: ad arzεgsã rãmb looga ne keoorã zãnga, b pʋʋsda wala tõnd sẽn pʋʋsdã la b loe noor wala tõnd sẽn loetã, la b leb n maand sara ne b arzεgsã sẽn kellã, t'a yeele:«La Wẽnd ka kõ yãmb bũmb ning y sẽn tõe n maan sara ne laa? Ad sʋbhaanallaah fãa yaa sara, la Allaahʋ akbarʋ fãa yaa sara, la Alhamdʋ lillaah yaa sara, la laa'ɩlaaha ɭllallaah yaa sara, sagl ne manegr yaa sara, gɩdg ned n yi yel-kiti yaa sara, yãmb yembr fãa kẽed-n-taar ne a paga yaa sara». La b yeel yã Wẽnd Tẽn-tʋʋmã, rẽ yĩnga tõnd yembr fãa na n wa n bao a yõor yamleoog ne a paga la a leb n tall keoore? T'a yeele: «Yãmb ka ne t'a sã n rag ning-a haraamã pʋgẽ, a na n talla zũnuub laa? Yaa woto bala, a sã n rɩk-a n ning halaalẽ wã me a tara keoore».

«Sõor waoog zug sẽn bɩr n puki, b sẽn tusd a soab n yit ragnoyẽ, a sã n wẽen tɩ Wẽnd yell zugu, A sɩd manegd-a lame».

Wẽnd Tẽn-tʋʋmã (Wẽnd pʋʋsg la A tɩlgr be a yĩnga) sagla tõnd ne yεl a yopoe, la a gɩdg tõnd tɩ d bas yεl a yopoe: a sagla tõnd tɩ d kaag bãadã, la d tũ kũ-rãmba, la d loek tĩsda, la d maneg wẽenego, maa sẽn na n wẽen ne bũmb ningã, la d sõng b sẽn wẽg a soaba, la d sak boaanda, la d sẽeg sallem pʋʋsgo, la a gɩdg tõnd tɩ d ra wa ning sãnem nug-biis ye, la d ra yũ wanzur ko-tεεg pʋgẽ ye, la d ra zomb harɩɩr gãdg zug ye, la harɩɩr fu-gẽtse, la ɭstabraƙ (harɩɩr fu-tagdo), la dɩɩbaag (harɩɩr fu-neeba).

Wẽnd Tẽn-tʋʋmã (Wẽnd pʋʋsg lɑ A tɩlgr be ɑ yĩngɑ) rag n yɩɩme t'a sã n kẽng bãad nengẽ, a kotame n kõ-a n yeele:« Azhib al-ba'sa, rabbi an-naasi, wa ašfɩ, anta aš-šaafɩɩ, laa šɩfaa'a illaa šɩfaa'aka, šɩifaa'an laa yʋgaadirʋ saƙaman= Loog ne bãagã, Fo sẽn yaa nebã Soabã, la F sigsi, tɩ ad Foom la Tɩpda, tɩpg ka be rẽnda fo tɩpgã, bɩ F tɩp-a tɩpg sẽn ka loogd n bas bãaga».