Encyclopedia of Prophetic Hadiths

«wakat ning Wẽn d sẽn wa n naan arzãnã la Bugmã, A tʋmsa a Gibriila, tɩlgr be a yĩnga, arzãnẽ wã, n yeel-a : « ges-a la f ges bũmb ning Mam sẽn sεgl a pʋgẽ wã, n na n kõ nebã ». T’a Gibriil ges-a n lebg wa yeele : m wẽen ne Fo zɩslemã, ned ka be, n na n wʋm yãwã kibare, rẽndame t’a kẽ-a. Tɩ Wẽnd sagl tɩ b gũbg arzãnã ne yεl nins yõor sẽn kisã. La A yeel-a « ges-a la bũmb ning Mam sẽn sεgl tɩ be a pʋgẽ wã, n na n kõ nebã» . T’a lebg n tɩ ges-a, n mik tɩ b gilg-a lame ne yεl nins yõor sẽn kisi. T’a Gibriil yeele: “ m wẽen ne Fo zɩslemã, m yεεsdame tɩ ned baa a yembr kõn n kẽ-a ye” T’a yeele: kẽng n tɩ ges Bugmã la f ges bũmb ning Mam sẽn sεgl a pʋgẽ, n na n bĩng a nebã. T’a tʋg n ges-a, n mik tɩ Bugmã zombda taaba, t’a lebg n wa n yeel Wẽnde: “ m wẽen ne Fo zɩslemã ned baa a yembr kõn n kẽ yãwã ye”. Tɩ Wẽnd sagl tɩ b gilg Bugmã ne yõor yamleoog teedo, tɩ Wẽnd yeel-a: “lebg n tɩ ges-a”. T’a Gibriil tʋg n ges-a, n mik t’a yaa sẽn gũbg ne yõyã yamleoodo, t’a lebg n wa yeele: “ m wẽen ne Fo zɩslemã, ad mam yεεsdame tɩ ned baa a yembr ka na n põse, n ka kẽ Bugmã ye».

«Yãmb dũni bugmã yaa Gεhannam Bugmã sẽn pʋɩ zĩis pîs-yopoe bεk a yembre », la b yeel yã: yaa Wẽnd Tẽn-tʋʋma, ad yẽ meng sekame, la a yeel yã : «ad laahr Bugmã b yɩɩs-a-la dũni bugmã noor pis-yoob la a wae, a yembr fãa yaa wala dũni bugmã tʋʋlem».

«Ad rẽenem zãma sẽn kẽed arzãnã, b yalε wã yaa wala kiuug rasem piig la a naase, rẽ poorẽ neb nins sẽn pʋgd bãmbã b peelemã yɩɩda ãd-pɩndga saasẽ wã, b ka rʋʋte, b ka maan wa-kεεnga, b ka tʋbsde, b ka fẽesd b yõy ye, b zutã sãasdsã yaa sãnem, yũ-nood b sẽn fuusd yaa misk, b wisd laasã yaa wisd noodo, b pagb yaa Huuru ʿAyn, b bee rao a yembr tãa naaneg zugu, b saamb a Aadam yalε wã, yaa kãntɩɩs pis-yoob saasẽ wã».

«B gũbgɑ Bugmã ne yõor yɑmleedo, lɑ b gũbg arzãnã ne yõor sẽn kisã».

«Ad yãmb yembr fãa zĩig arzãnã sẽn tʋg n yaa kɩdg n yɩɩda, yaa b sẽn na n yεεl-a: T'a tags yẽ sẽn rat bũmb ningã, tɩ b yεεl-a, fo saaga fo sẽn ratã fãa? T'a yeele: n-yee, T'a yεεl-a:Ad fo sẽn saag bũmb ningã fãa f paamame, la a bilg-n-taare n paase».

B soka Wẽnd Tẽn-tʋʋm, (Wẽnd pʋʋsg la A tɩlgr be a yĩnga) bũmb ning sẽn waoog n kẽesd nebã arzãn n yɩɩda, t'a yeele: "Yaa Wẽnd zoεεga la zʋg sõngo" la b leb n sok-a yεl nins sẽn yaa wʋsg n kẽesd nebã Bugmẽ wã, t'a yeele: " yaa noorã la taoorã".

«Kõbg a yiib sẽn yi Bugum koambẽ wã, mam ka yã b buud lae, yaa nebã b tara sãbse, tɩ yaa wala yʋgmã zʋya tɩ b pãbd nebã ne-ba, la pagba sẽn yeelge n yaool n yaa bεεla, n toeemd rao yam, n kẽnd n kɩlledẽ, b zutã yaa wala yʋgma zẽg sẽn kɩlle, b ka na n kẽ arzãnã, b ka na n wʋm a yũugã, la arzãn yũuga bee fo sẽn na n kẽn woto la woto zĩigẽ».

«Wẽnd yeelame (A Naam zẽk yã) Mam seglame M yemb-sõmsã yĩnga, nifr sẽn na n ka yã, tɩ tʋbr ka wʋme la ka lʋɩ ninsaal tagsg pʋgẽ». A Abuu Hʋrayrat yeelame: karem-y tɩ yãmb sã n tʋlla: {Rẽnd yõor kɑ mi b sẽn solg n bĩng bãmbã sẽn yɑɑ sũ-noog lɑ nif mɑɑgr tεkẽ, tɩ yɑɑ b sẽn dɑ yɩ n tʋmdẽ wã rolbo} [As-sagda: 17].