Пайгамбар хадистеринин энциклопедиясы

"Чынында, Аллах кызганат. Чынында ыймандуу пенде да кызганат. Аллахтын кызгануусу ыймандуу пенде Анын тыюу салган ишине барганда болот".

«Шайтан силердин бириңерге келип: «Баланчаны ким жаратты? Муну ким жаратты?» - деген ойлорду салат. Акырында: «Раббиңди ким жаратты?» - деген азгырык суроо салат. Эгерде кимдир бирөөгө мындай азгырык ойлор келсе, анда ал Аллахтан коргоо сурасын жана андай ойлонуусун токтосун».

«Тууралыкка жакындагыла жана ортолукту кармагыла, жана билгиле, силерден эч ким өз амалы менен кутула албайт». Алар: «Оо, Аллахтын Элчиси! Сиз дагыбы?» – дешти. Ал айтты: «Мен дагы. Аллах мени Өзүнүн ырайымы жана пазилетине бөлөсө гана (кутуламын)».

«Чындыгында, Аллах силердин келбетиңерге жана байлыгыңарга карабайт, бирок жүрөгүңөргө жана иш-аракетиңерге карайт».

"Биз Аллахтын элчисинин (ага Аллахтын тынчтыгы жана мактоосу болсун) тегерегинде олтурган элек. Жаныбызда Абу Бакр, Умар жана бир топ адамдар бар эле. Бир маалда Аллахтын элчиси (ага Аллахтын тынчтыгы жана мактоосу болсун) ордунан туруп кетип, ошол бойдон көпкө кечикти. Көпкө келбеген соң, биз ага кимдир бирөө тарабынан кол салуу болдубу деп чочулап ордубуздан туруп издей баштадык. Биринчилерден болуп чочулаган мен болдум. Аллахтын элчисин (ага Аллахтын тынчтыгы жана мактоосу болсун) издеп, бани Нажжар уруусундагы бир ансардын багына келдим. Эшигин таппай анын дубалын айланып чыктым, акыры дубал түбүнөн сырттан суу агып кирчү оюгун таап, ошол жерден кысылып кирдим. Кирсем, Аллахтын элчиси (ага Аллахтын тынчтыгы жана мактоосу болсун): «Абу Хурайрасыңбы?» - деди. Мен: Ооба, оо, Аллахтын элчиси, - дедим. «Бул жакка эмнеге келдиң?» - деди. Сиз биз менен олтуруп, анан туруп кеттиңиз, ошол бойдон көпкө кечиктиңиз. Көпкө келбеген соң, биз сизге кимдир бирөө тарабынан кол салуу болдубу деп чочулап ордубуздан туруп издей баштадык. Биринчилерден болуп чочулаган мен болдум. Анан бул дубалга келип, ичине түлкү сойлогондой сойлоп кирдим, тигилер болсо менин артымда, - дедим. Ошондо ал: «Оо, Абу Хурайра» - деп, мага эки кепичин берди да, анан: «Менин бул эки кепичимди ал да, бул дубалдын артында сага жолуккан кимиси: "Аллахтан башка сыйынууга татыктуу кудай жок" - деп, чын жүрөгүнөн күбөлүк берсе, аны бейиш менен сүйүнчүлө» - деди. Мен эң биринчи эле Умарды жолуктурганымда, ал: Бул эки көлөч эмне, оо, Абу Хурайра? - деп сурады. Бул Аллахтын элчисинин (ага Аллахтын тынчтыгы жана мактоосу болсун) эки кепичи, мага жолуккан кимиси: "Аллахтан башка сыйынууга татыктуу кудай жок" - деп чын жүрөгүнөн күбөлүк берсе, аны бейиш менен сүйүнчүлөө үчүн ал мени булар менен жөнөттү, - дедим. Ошондо Умар менин көкүрөгүмө колу менен катуу уруп жибергенде чалкаман кулап түштүм. Ал мага: Артка кайт, оо, Абу Хурайра, - деди. Мен Аллахтын элчисине (ага Аллахтын тынчтыгы жана мактоосу болсун) кайтып келип, өксүп ыйлап жибердим. Умар да артымдан жете келди, көрсө ал мени ээрчип келген экен. Аллахтын элчиси (ага Аллахтын тынчтыгы жана мактоосу болсун): «Сага эмне болду, оо, Абу Хурайра?" - деди. Мен Умарга жолукканымда, мени эмне менен жөнөткөн болсоңуз, ошону ага айттым, ошондо ал көкүрөгүмө катуу уруп жиберди эле, чалкаман кулап түштүм. Анан ал мага: Артка кайт, - деди, - деп айттым. Аллахтын элчиси (ага Аллахтын тынчтыгы жана мактоосу болсун): «Оо, Умар, мындай кылууңа эмне түрткү болду?» - деди. Ал: Оо, Аллахтын элчиси, атам менен энем сизге курман болсун! Абу Хурайрага эки кепичиңизди берип, ал кимиси Аллахтан башка сыйынууга татыктуу кудай жок - деп чын жүрөгүнөн күбөлүк берсе, анын бейишке кирерин сүйүнчүлөө үчүн жөнөттүңүз беле? - деди. Ал: «Ооба», - деди. Ал: Андай кылбаңыз, адамдар буга гана таянып калышат деп корком. Аларды тек коюңуз, амал кылышсын, - деди. Аллахтын элчиси (ага Аллахтын тынчтыгы жана мактоосу болсун): «Анда аларды тек койгула» - деди."

"Аллах Аруу-Таза, таза нерселерди гана кабыл кылат. Аллах Таала ыймандууларды пайгамбарларды буйруган нерсеге буйруган. Ал минтип айткан: "Оо, элчилер! Таза, адал нерседен жегиле! Жакшы иш-амалдарды кылгыла! Чынында, эмне кылганыңарды Мен билүүчүмүн". (Муминун, 51-аят). Ошондой эле: "Оо, ыйман келтиргендер! Биз силерге берген ырыскылардын таза-адалынан жегиле...!" деген. Андан кийин пайгамбарыбыз (ага Аллахтын тынчтыгы жана мактоосу болсун) алыс сапарга чыгып, чачы саксайып жүдөгөн, үстү-башын чаң баскан адам колун өйдө көтөрүп: “Оо, Раббим! Оо, Раббим!” - деп дуба кылганын эскерип, анан мындай деди: “Анын жегени арам, ичкени арам, кийгени арам, арамдан азыктанат. Анан анын дубасы кантип кабыл болсун?!”

"Аллах жерди кармап, асмандарды түрүп, оң колуна алып, анан: "Мен - Падышамын, жердин падышалары кайда?!" - дейт.

"Оо, адамдар! Аллах Аруу-Таза, таза нерселерди гана кабыл кылат. Аллах Таала ыймандууларга пайгамбарларга буйруган нерсени буйруган. Ал минтип айткан: "Оо, пайгамбарлар! Таза, адал нерседен жегиле! Ийги иш-амалдарды кылгыла! Чынында, эмне кылганыңарды Мен билүүчүмүн" (Муминун, 51-аят). Ошондой эле: "Оо, ыйман келтиргендер! Биз силерге берген ырыскылардын таза-адалынан жегиле...”!" деген (Бакара, 172-аят). Андан кийин пайгамбарыбыз (ага Аллахтын тынчтыгы жана мактоосу болсун) алыс сапарга чыгып, чачы саксайып жүдөгөн, үстү-башын чаң баскан адам колун өйдө көтөрүп: “ “Оо, Раббим, оо, Раббим” деп дуба кылганын эскерип, анан мындай деди: “Анын жегени арам, ичкени арам, кийгени арам, арамдан азыктанат. Анан анын дубасы кантип кабыл болсун?!”