Encyclopedia of Prophetic Hadiths

ئه‌ز زارۆكه‌ك بووم د كوشا پێغه‌مبه‌ریدا (صه‌لات و سه‌لامێن خودێ ل سه‌ر بن)، و ده‌ستێ من د ناڤ ئامانێ خوارنێدا دهات و دچوو، ڤێجا پێغه‌مبه‌ری (صه‌لات و سه‌لامێن خودێ ل سه‌ر بن) گۆته‌ من: «كوركۆ، ناڤێ خودێ بینه‌ (بێژه‌ بسم الله)، و ب ده‌ستێ ڕاستێ بخۆ، و ژ به‌را خۆ بخۆ»، ڤێجا پشتی هنگی ئه‌و بوو شێوازێ خوارنا من.

((مسوگه‌ر خودێ چاكی ل سه‌ر هه‌می تشتان نڤیسییه‌، ڤێجا ئه‌گه‌ر هه‌وه‌ كوشتن كر؛ هوین ب جوانی بكه‌ن، و ئه‌گه‌ر هه‌وه‌ ڤه‌كوشتن كر؛ هوین جوان ڤه‌كوژن، و بلا ئێك ژ هه‌وه‌ كێركا خۆ خۆش بكه‌ت و بلا قوربانی و ڤه‌كوشتییێ خۆ ژی ڕحه‌ت بكه‌ت)).

«ئه‌رێ ئه‌ز به‌رێ هه‌وه‌ نه‌ده‌مه‌ هنده‌ك كاران كو خودێ گونه‌هان پێ ژێدبه‌ت و پله‌یان پێ بلند دكه‌ت؟» گۆتن: به‌لێ ئه‌ی پێغه‌مبه‌رێ خودێ، گۆت: «ته‌مامكرنا ده‌ستنڤێژێ د سه‌ر نه‌خۆشییاندا و گه‌له‌ك پێنگاڤ هاڤێتن و چوونا به‌ره‌ڤ مزگه‌فتان و چاڤه‌ڕێكرنا نڤێژێ پشتی نڤێژێ، ب ڕاستی ئه‌ڤه‌یه‌ زێره‌ڤانیكرن و چوونا د سه‌نگه‌ریدا بۆ خودێ».

((مسوگه‌ر ئێك ژ نیشانێن قیامه‌تێ ئه‌ڤه‌یه‌ زانین نه‌مینیت و نه‌زانین زێده‌ بیت، زینا زێده‌ بیت، ڤه‌خوارنا عه‌ره‌قێ زێده‌ بیت، زه‌لام كێم بن و ئافره‌ت ببنه‌ گه‌له‌ك، هه‌تا وی ڕاده‌ی هه‌ر پێنجی ئافره‌ت دێ زه‌لامەك ب كارێن وان ڕابیت و سه‌رپه‌رشتییا كارێن وان كه‌ت)).

پێغه‌مبه‌رێ خودێ (صه‌لات و سه‌لامێن خودێ ل سه‌ر بن) پاشڤه‌برن ژ قه‌زه‌عێ كر (قه‌زه‌ع ژی ئه‌ڤه‌یه‌ مرۆڤ هنده‌ك ژ پرچا خۆ بتڕاشیت و هنده‌كێ بهێلیت).

((حه‌سویدییێ ب ئێكودوو نه‌به‌ن، ئێكودوو نه‌خاپینن، كه‌ربێ ژ ئێك و دوو ‌ڕانه‌كه‌ن، پشتا خۆ نه‌ده‌نه‌ ئێكودوو، هنده‌ك ژ هه‌وه‌ فرۆتنێ ل سه‌ر فرۆتنا هنده‌كێن دیڕا نه‌كه‌ن، ببنه‌ عه‌بدێن خودێ و برایێن ئێك، موسلمان برایێ موسلمانییه‌، نه‌ زۆڕدارییێ لێ دكه‌ت، نه‌ پشتا وی به‌ردده‌ت و وی شه‌رمزار دكه‌ت، و نه‌ وی كێم دكه‌ت، ته‌قوا یا د ڤێرێدا)) سێ جاران ئاماژه‌ كره‌ سینگێ خۆ ((ئه‌و خرابی ب تنێ تێرا مرۆڤی هه‌یه‌ كو مرۆڤ برایێ خۆ یێ موسلمان كێم بكه‌ت، موسلمان هه‌می ل موسلمانی یێ حه‌رامه‌، خوینا وی و مالێ وی و نامویسا وی)).

پێغه‌مبه‌ر (صه‌لات و سه‌لامێن خودێ ل سه‌ر بن) ل سه‌ر ده‌واری بوو و موعاز ل پشت وی یێ سویار بوو، ئینا گۆت: ((ئه‌ی موعازێ كوڕێ جه‌به‌لی))، گۆت: ئه‌ز یێ ل بن فه‌رمانا ته‌ ئه‌ی پێغه‌مبه‌رێ خودێ و به‌رده‌وام دێ د به‌رسڤا ته‌دا هێم و من داخوازا به‌خته‌وه‌رییێ یا كری ب به‌رسڤدانا ته‌، گۆت: ((ئه‌ی موعاز))، گۆت: ئه‌ز یێ ل بن فه‌رمانا ته‌ ئه‌ی پێغه‌مبه‌رێ خودێ و به‌رده‌وام دێ د به‌رسڤا ته‌دا هێم و من داخوازا به‌خته‌وه‌رییێ یا كری ب به‌رسڤدانا ته‌، سێ جاران ئه‌ڤه‌ گۆت، پاشی پێغه‌مبه‌ری (صه‌لات و سه‌لامێن خودێ ل سه‌ر بن) گۆت: ((هه‌ر كه‌سێ ب دروستی و ژ دل شاهده‌ بده‌ت كو ژ ئه‌لڵاهی پێڤه‌تر چ خودایێن ژ هه‌ژی په‌رستنێ نینن و كو موحه‌ممه‌د پێغه‌مبه‌رێ خودێیه‌؛ خودێ دێ وی ل سه‌ر ئاگری حه‌رام كه‌ت))، گۆت: ئه‌ی پێغه‌مبه‌رێ خودێ؛ ئه‌رێ ما ئه‌ز ڤی ده‌نگوباسی نه‌گه‌هینمه‌ خه‌لكی و دا پێ كه‌یفخۆش بن و ببیته‌ مزگینییه‌ك بۆ وان؟ گۆت: ((ئه‌گه‌ر ته‌ گۆتێ؛ دێ خۆ هێلنه‌ ب هیڤییا هندێڤه‌)). ده‌مێ مرنا موعازی نێزیك بووی؛ ئه‌ڤ تشته‌ گۆت، بۆ هندێ دا گونه‌هكار نه‌بیت.

((بۆ چ موسلمانان یا حه‌لال نینه‌ ئه‌و ژ سێ شه‌ڤان زێده‌تر ژ برایێ خۆ سل ببيت و پشتا خۆ بده‌تێ و د گه‌ل نه‌ئاخڤیت، دێ گه‌هنه‌ ئێك و ئه‌ڤه‌ دێ پشتا خۆ ده‌ته‌ ڤی و یێ دی دێ پشتا خۆ ده‌ته‌ وی، باشترینێ وان ژی ئه‌وه‌ یێ ده‌ستپێكێ سلاڤ دكه‌ت)).