Encyclopedia of Prophetic Hadiths

((ئێك ژ هه‌وه‌ باوه‌رییێ نائینیت (باوه‌رییا وی یا ته‌مام و بنه‌جھ نینه‌)؛ هه‌تا حه‌ز و دلچوونێن وی ل دویڤ وێ بن یا ئه‌ز پێ هاتیم)).

((مسوگه‌ر هه‌می کار ب ئنیه‌تێنه‌ و مسوگه‌ر بۆ هەر کەسەکی ئەو دێ هه‌بیت یا وی ئنیەت بۆ ئینای، ڤێجا هه‌ر كه‌سێ مشه‌ختبوونا وی بۆ خودێ و پێغەمبەرێ وی بیت؛ ئه‌ڤه‌ مشه‌ختبوونا وی بۆ خودێ و پێغەمبەرێ وییە و هه‌ر كه‌سێ مشه‌ختبوونا وی بۆ په‌ڕتاله‌كێ دونیایێ بیت دا ب دەست خۆڤە بینیت یان بۆ ژنەکێ بیت دا بۆ خۆ بینیت؛ هنگی مشه‌ختبوونا وی بۆ وی تشتییه‌ یێ ئه‌و ژ به‌ر مشه‌ختبووی)). د ڤه‌گوهاستنا بۆخاریدا هاتییه‌: ((مسوگه‌ر هه‌می کار ب ئنیەتانە و مسوگه‌ر بۆ هەر کەسەکی ئەو دێ هه‌بیت یا وی ئنیەت بۆ ئینای)).

((خودێ نموونه‌ بۆ مه‌ ب ڕێكه‌كا ڕاست‌ ئینایه‌، دوو دیوار یێن ل هه‌ردوو لایێن ڕێكێ، هنده‌ك ده‌رگه‌هێن ڤه‌كری یێن تێدا و په‌رده‌ یێن ب سه‌ر وان ده‌رگه‌هاندا هاتینه‌ دان، ژ لایێ ده‌رگه‌هێ ڕێكێ گازیكه‌ره‌ك یێ هه‌ی گازی دكه‌ت و دبێژیت: گه‌لی خه‌لكی؛ هوین هه‌می وه‌رنه‌ سه‌ر ڤێ ڕێكا ڕاست و خۆ ژ ڕێكا ڕاست لانه‌ده‌ن، گازیكه‌ره‌كێ دی ژی یێ ل سه‌ر ڕێكا ڕاست هه‌ی، ئه‌گه‌ر ئێكى ڤیا ده‌رگه‌هه‌كی ژ ڤانه‌ ڤه‌كه‌ت؛ دێ بێژیت: تێچوون بۆ ته‌ بیت، ده‌رگه‌هی ڤه‌نه‌كه‌، چونكی ئه‌گه‌ر ته‌ ده‌رگه‌ھ ڤه‌كر دێ چییه‌ ژوور. ڤێجا ڕێكا ڕاست ئیسلامه‌ و هه‌ردوو دیوار ژی: سنوورێن خودێنه‌ و ده‌رگه‌هێن ڤه‌كری ژی: ئه‌و تشتن یێن خودێ حه‌رام كرین، ئه‌ڤ گازیكه‌رێ ل سه‌رێ ڕێكێ دكه‌ته‌ گازی ژی: په‌ڕتووكا خودێیه‌، ئه‌و گازیكه‌رێ ل سه‌ر ڕێكێ ڕاوه‌ستیای ژی: شیره‌تكارێ خودێیه‌ د دلێ هه‌ر موسلمانه‌كیدا)).

((ئوممه‌تا من هه‌می دێ لێ هێته‌ بوورین، ژ بلی ئه‌وێن ب ئاشكه‌رایی گونه‌هان دكه‌ن، ئێك ژ جۆرێن ئاشكه‌راكرنێ ئه‌ڤه‌یه‌‌: مرۆڤ ب شه‌ڤ كاره‌كی بكه‌ت و لێ ببیته‌ سپێده‌ و خودێ عه‌یب و كێماسییا وی ڤه‌شێریت، پاشی ئه‌و ب خۆ بێژیت: ئه‌ی فلان كه‌س؛ دوهی ب شه‌ڤ من ئه‌ڤ كاره‌‌ و ئه‌ڤ كاره‌ كر، د ده‌مه‌كیدا خودایێ وی عه‌یب و كێماسییا وی ڤه‌شارت بوو، به‌لێ ئه‌و ڕادبیت په‌رده‌یێ خودێ ل سه‌ر خۆ ڕادكه‌ت)).

«ب ڕاستی خودایێ مه‌زن ب شه‌ڤێ ده‌ستێ خۆ درێژ دكه‌ت دا ئه‌وێ ب ڕۆژێ گونه‌هـ كری ته‌وبه‌ بكه‌ت و ب ڕۆژێ ده‌ستێ خۆ درێژ دكه‌ت دا ئه‌وێ ب شه‌ڤێ گونه‌هـ كری ته‌وبه‌ بكه‌ت، هه‌تا كو ڕۆژ ژ ڕۆژئاڤایێ ده‌ردكه‌ڤیت و دهه‌لێت».

ده‌مێ ئایه‌تا: {ثُمَّ لَتُسْأَلُنَّ يَوْمَئِذٍ عَنِ النَّعِيمِ} هاتییه‌ خوارێ، زۆبه‌یری گۆت: ئه‌ی پێغه‌مبه‌رێ خودێ؛ ئه‌رێ دێ ل سه‌ر كیژ خۆشی و نیعمه‌تان پرسیار ژ مه‌ هێته‌ كرن، ئه‌رێ ئه‌و ب تنێ هه‌ردوو ڕه‌شاتینه‌ (قه‌سپ و ئاڤ)؟ گۆت: ((ئه‌و (پرسیاركرن) دێ هه‌ر هێت)).

((دلێ خۆ نه‌به‌ دونیایێ؛ خودێ دێ حه‌ز ژ ته‌ كه‌ت، دلێ خۆ نه‌به‌ وی تشتێ ل ده‌ڤ خه‌لكی هه‌ی؛ خه‌لك ژی دێ حه‌ز ژ ته‌ كه‌ن)).

((ئه‌رێ ما ئه‌ز بۆ هه‌وه‌ نه‌بێژم كا مه‌زنترین گونه‌ھ كیژكن؟)) سێ جاران ئه‌ڤه‌ گۆت، وان گۆت: به‌لێ ئه‌ی پێغه‌مبه‌رێ خودێ، گۆت: ((دروستكرنا شركێ بۆ خودێ، خرابییا د گه‌ل دایك و بابان)) و ڕوینشت و به‌ری هنگی یێ پالڤه‌دایی بوو و گۆت: ((هشیاری گۆتن (و شاهده‌دانا) ژ دره‌و بن))، گۆت: ڤێجا ئه‌ڤ گۆتنه‌ هه‌ر دووباره‌ دكر، هه‌تا مه‌ گۆت: خۆزی بێده‌نگ ببا.