Encyclopedia of Prophetic Hadiths

«M na n bee bãkẽ wã, n get ned ning sẽn na n wa yũ yãmb pʋgẽ, la b na n gɩdga neb tɩ b ra ta maam ye, tɩ mam yeele : « m Soab a Wẽnde, ad bãmbã yaa mam nebã, b yaa mam poorẽ rãmbã». Tɩ b yeel maam: «rẽ yĩnga fo bãnga bũmb ninga bãmbã sẽn tʋme fo loogr poorẽ» ? M wẽen ne Wẽnde, ad b ka bak n tard n lebd poorẽ ye».

«Ned ning sẽn loe Ramadaanã, ne liimaoongo (sɩd kũuni) la yel-sõmd tẽebo, b yaafd-a lame, a zunuubã sẽn reng taoorã».

Wẽnd Tẽn-tʋʋma (Wẽnd pʋʋsg la A tɩlgr be a yĩnga) ra yɩɩme t'a sã n yeel Allaahʋ akbarʋ Pʋʋsgẽ, a sĩndida bilfu, taoor t'a na n ka sɩng karengã ye, tɩ mam yeele: Wẽnd Tẽn-tʋʋmã, m na rɩk m ba wã la m ma wã n yao n fãag fo yõorã, kõ maam kibare; fo sĩndgã Allaahʋ Akbarʋ wã la f karengã sʋka, yaa bõe la f yeta? T'a yeele: "Mam yetame: «M Soab a Wẽnde, zãag maam ne tʋʋm-tuudsã sʋka, wa F sẽn zãag yaangã ne wĩnto-lʋɩɩngẽ wã sʋka, m Soab a Wẽnde, yɩlg-ma n yi m tʋʋm-tuutɩ wã, wala b sẽn yɩlgd fu-pεεlga n yi rẽgdã, m Soab a Wẽnde pεk-ma n yi m tʋʋm-tuutɩ wã ne koom la sa-pɩlma la maasga= Allahuma baa'ʿɩd baynɩɩ wa bayna ẖataayaaya kamaa baa'ʿadta bayna l-mašrɩƙɩ wal-maġrɩb; Allahumma naƙɩnɩɩ min ẖataayaaya kamaa yʋnaƙƙaɑ Aṯ -ṯawbʋ al-abyaḍu min ad-danas; Allahumma ġsɩlnɩɩ min ẖataayaaya bil maa'ɩ wa ṯ-ṯalǧɩ wal-barad».

«Sʋɩɩtãanã wata yãmb yembr fãa nengẽ, n yεεl-a « ãnda n naan wãnde ? Ãnda n naan wãnde ? » Halɩ n wa yeele: « la ãnd n naan fo Soaba ? » Rẽnd a sã n wa ta woto, bɩ a kos gũudum n yi a sʋɩɩtãana la a base ».

Tɩ yẽ ma wã, sẽn yaa a Rawaaha bi-pugla, a kosa yẽ baabã wã, t'a yãk a ligdã n kõ yẽ biigã, t'a ba wã wa togl yʋʋmde, rẽ poorẽ t'a ges t'a na n sɩd kɩsame, t'a ma wã yeele: mam ka yarde, tɩ f kõ mam biigã halɩ tɩ f wa kɩt tɩ Wẽnd Tẽn-tʋʋmã (Wẽnd pʋʋsg lɑ A tɩlgr be ɑ yĩngɑ) maan kaseto. Tɩ mam baabã wã gãd mam nugã, la mikame tɩ wakat-kãngã m da yaa bi-bilfu, t'a wa Wẽnd Tẽn-tʋʋmã nengẽ n yeele (Wẽnd pʋʋsg lɑ A tɩlgr be ɑ yĩngɑ), Wẽnd Tẽn-tʋʋmã: ad yãwã ma wã, sẽn yaa Rawaah bi-puglã, a nongame n rat tɩ m maan foom kaset bũmb ning mam sẽn kõ a biiga, tɩ Wẽnd Tẽn-tʋʋmã (Wẽnd pʋʋsg lɑ A tɩlgr be ɑ yĩngɑ) yeele: «Bɑšɩɩru fo tara biig a to sẽn ka yãwã bɩɩ?». La a yeel tɩ: N-yee, t'a yeele: «Fo kõo b fãa gill wala fo sẽn kõ yãwã wã bɩɩ?» T'a yeel tɩ: Ayoo. T'a yeele: «Bɩ f ra maan maam kaset tɩ mam ka maan kaset ne wẽgd ye». La a Muslim gafã pʋgẽ, a yeelame: «bao nin-zẽng sẽn ka maam t'a maan kaseto».

«Koom soob arzũn raarã yaa tɩlae ne baalik fãa, la a wãb sɩgdre la a ning yũ-noogo t'a sã n paame».

«Tabl-y sɩda, tɩ ad sɩd peegdame n tʋgd manegre, la manegr peegdame n tʋgd arzãna, la ned ka bakd n togsd sɩda la a gũusd sɩd togsgo, halɩ tɩ b wa tʋg n gʋls-a Wẽnd nengẽ t'a yaa sɩd soaba. La y gũus ne zĩri-beedo, tɩ ad zĩri-beed peegdame n tʋgd wẽngẽ, wẽng me peegdame n tʋgd Bugmẽ, la ned ka bakd n yagda la a tũusd yagbo, hal tɩ b wa tʋg n gʋls-a Wẽnd nengẽ t'a yaa pʋ-yagda».

«Yãmb yembr fãa ka yεεsd t'a sã n reng limaamã n roog a zugã, tɩ Wẽnd nɑ n maan a zugã tɩ lebg bõang zugu, maa A maan a yĩngã tɩ lebg bõang yĩnga».