Encyclopedia of Prophetic Hadiths

«Yaa sɩda, ad sã n wa beẽ, neb n na n zĩndi tɩ mam hadiis (gomd) wa tʋg n ta a nengẽ, t’a yaa sẽn kɩll a zaoog zugu, n yetẽ : « ad tõnd ne yãmb sʋka yaa Wẽnd Gafã bal n be d sʋka, bũmb ning tõnd sẽn mik Wẽnd Gafã pʋgẽ tɩ yaa halaalã, d na n maaname tɩ yaa halaale, la d sẽn mik a pʋgẽ tɩ yaa haraam d na n maaname tɩ yẽ yaa haraam, la hadiis ka pak tõnd ye, la b bãng tɩ bũmb ning Wẽnd Tẽn-tʋʋmã (Wẽnd pʋʋsg la A tɩlg be a yĩnga) sẽn harm-a, a yaa wala Wẽnd sẽn haram bala».

« Ad Wẽnd na n yiisa ned mam poorẽ rãmbẽ wã, bõn-naandsã taoore, yikrã raarã, n yεdg a tʋʋm sεb pis-wae la a wae, sebr fãa gilli, a yaa nif gesg tεkẽ, rẽ poorẽ tɩ Wẽnd yeel-a : fo kɩɩsda bũmb tʋʋm-kãensã pʋgẽ baa fʋɩ bɩɩ ? Rẽ yĩnga Ma malεgs nins sẽn yaa gũusdbã, n yaa gʋlsdbã b wẽga foom bɩɩ ? T’a yeele : « ayoo ! M Soaba Wẽnde » tɩ Wẽnd yeel-a : « rẽ yĩnga fo tara padang bɩɩ ? » T’a yeele : « ayoo ! M Soaba Wẽnde » Tɩ Wẽnd yeel-a « ad fo tara tʋʋm sõng Tõnd nengẽ, ad wẽgb ka be fo zug rũnda ye » tɩ b yiis seb bila tɩ gʋlsa a pʋgẽ, Ashadu Anlaa’ilaa illallah, wa ashadu anna Muhammadan abduhuu wa Rasuuluhuu (m maan kaset tɩ soab sẽn na n tũ n tɩlg ka be rẽnda Wẽnde, m leb n maana kaset t’a Mohammad yaa Wẽnd yamba n leb n yaa A Tẽn-tʋʋma) tɩ Wẽnd yeele : « wa ne fo tʋʋma » tɩ nedã yeele : « seb-kãngã na n maana bõe ne seb-kãensã fãa gilli ? » Tɩ Wẽnd yeel-a : « ad foom, b ka na n vẽg-f ye » [Nabiyaamã yeelame] tɩ b rɩk tʋʋm wẽnsã sebrã n ning kɩreng a yembre, la b rɩk sebrã n ning kɩreng a to wã, tɩ sebrã sẽn ningẽ wã zɩsge, tɩ sebã sẽege, rẽnd bũmb baa fʋɩ ka be sẽn na n zɩsg n naag Wẽnd yʋʋrã ye ».

Wakat ning Wẽnd koεεgã sẽn wa n sigi: {Rẽ poorẽ b na sok yãmba, raaren-kãngã, neema wã yelle.} [Attakaasirʋ: 8] a Az-zubayr yeelame: yaa Wẽnd Tẽn-tʋʋma, yaa neema bʋd la b sẽn na n sok tõndã, yaa bõn-sabl a yiibã bala, tamarʋ wã la koomã? Tɩ Nabiyaamã yeele: « La ad sokrã na n yɩɩme».

Nabiyaamã, (Wẽnd pʋʋsg la A tɩlgr be a yĩnga), tẽega bũmb yell n yeele: “ ad rẽnda yaa bãngr loogr sasa la a yɩta” tɩ mam yeele, yaa Wẽnd Tẽn-tʋʋma, bãngr loogda wãnã, tɩ tõnd karemd Alkʋrãanã la d wilgd-a d koamba, tɩ tõnd koambã me karemd-a n na n wilg b koamba, n tʋg tãag dũni yikr raare? La Nabiyaamã yeele: “fo ma wã sã n rag n ka rog foom, rẽ n são yaa Ziyaade, m da neeme tɩ Madiin pʋgẽ, ned sẽn yɩɩd ne bãngr yaa foom, rẽ yĩnga fo ka ne tɩ Yahuud-rãmbã la Nasaar-rãmbã karemda Tawraat la Lingiil laa? La b ka tʋm ne baa fʋɩ sẽn wa b yiibã pʋgẽ ye?!”.